رواية هديه من مجهول الفصل الثالث عشر 13 - بقلم محمد السبكي

أومال كنت هعمل إيه يعني؟ مفيش حد بيجيله فجأة عرض سفر بالمواصفات دي. أنا مش أحمد زويل. ضحك وقالي: إنتِ بالنسبة لي أحسن من أحمد زويل ومجدي يعقوب ونجيب محفوظ كمان. ضحكت وسكتت خالص. كمل كلامه وقال: خلاص ماتشيليش هم. أنا هقابله وأظبطها معاه. وخلال يومين كان عندنا هو وأهله. أهله أصلاً فاكرين إن خالد عنده شركة صغيرة. وإن الدنيا بدأت تتحسن معاه وهيطور شغله برا مصر. وده فعلاً الكلام اللي اتقال لبابا.

بابا رحب بخالد جداً وكان فرحان بيه أوي لدرجة إننا قرينا الفاتحة في نفس القعدة. وبعدها بأسبوع بابا عمل العملية. وشوية بشوية بدأ يتحسن ويقف على حيله. أنا وخالد قربنا من بعض جداً. حبيت الحياة عشان هو فيها. كل حاجة بقا ليها طعم جديد ومختلف. وف يوم خالد قالي: خلاص هانت يا شهد. أوراقنا قربت تخلص وبعدها هنبدّل الحاجة وناخدها ونسافر. قلت له بخوف: طب هنسفرها إزاي يا خالد؟ قالي: متقلقيش يا حبيبتي أنا ليّ طرقي.

طيب. في حاجة كمان عايز آخد رأيك فيها. قلت له بحب: خير يا حبيبي. قالي وهو مبتسم: ماما يا ستي مصممة تطلع عمرة قبل ما نسافر. إيه رأيك عمو وطنط يطلعوا معاها بالمرة. قلت له: بس إحنا مش معانا فلوس للعمرة. قالي بحزن: هو أنا كلمتك في فلوس؟ أنا معايا يا ستي متقلقيش. قلت له بحزن: هنطلعهم عمرة بفلوس حرام. اتعصب وقالي: هما مالهم بالموضوع؟ هما مش عارفين حاجة. و100 مرة قلت لك دي مش فلوس حرام. ده حقنا.

سكتت خالص واقتنعت بكلامه. دي مش فلوس حرام ده حقنا. وبالفعل ماما وبابا طلعوا العمرة مع والدة خالد. وأنا وخالد كنا بنجهز باقي الأمور عشان السفر. ظبطنا كل حاجة وبدلنا قطعة الآثار. واتفقنا إني قبل السفر بيوم هرجع الجهاز للدكتور وأقوله إني مسافرة لأهلي في الصعيد.