رواية حكاية قمر الفصل الثالث والعشرون 23 - بقلم هاجر محمود

نرجع لسيف. بعد ما فارس خرج من مكتب سيف، تليفون سيف رن برقم الحج سالم. فرد عليه وحكى الحج سالم عن الحفلة اللي حصلت عنده في البيت. فرد سيف: حلو. الحج سالم: وفارس عامل ايه؟ فرد سيف: كويس، بس لسه تايه شوية. الحج سالم: لسه معقلش؟ في حكاية قمر؟ اتنهد سيف وقال: المشكلة مبقتش في قمر بس. الحج سالم بقلق: عمل ايه تاني؟ سيف: هو حضرتك مقرأتش القانون الجديد؟ الحج سالم: قانون ايه؟ مش قصدك بتاع السحر والشعوذة؟

سيف: لا ده جديد، تبع الأحوال الشخصية باين. الحج سالم: بيقول ايه؟ سيف: أي بنت معاها حاجة تثبت بيها على ولد إنه وعدها بالجواز وهرب هتقدر تسجنه أو يدفع غرامة والغرامة مفتوحة، وفي حالات هيدفع ويتسجن. الحج سالم: وده طلع إمتى؟ سيف: من يومين، وتم تفعيله. الحج سالم: وفارس يعرف؟ سيف: أه بس أنا قولتله إنه اتفعل من النهاردة لما لقيته قلق. الحج سالم: ويقلق ليه؟ سيف: يمكن قمر تستخدمه ضده أو أي واحدة تانية هو كان يعرفها.

الحج سالم بقلق: تفتكر؟ سيف: مش بعيد، محدش عارف الأيام مخبية إيه؟ الحج سالم: عندك حق، المهم خلي بالك منه وطبعا زي العادة متقولش إني سألت عنه. سيف: حاضر. وقفل المكالمة ومسحها من التليفون وخرج من مكتبه يلف على عساكر الخدمة، وهو في الطريق عدا على مكتب فارس فلقاه بيزعق جامد فخبط على الباب ودخله…… ******************** نروح للحج سالم. كان في بيته قاعد في التراس بيفكر في كلام سيف والقانون الجديد وبعدين اتصل بالمحامي يسأله.

فرد عليه وقال: أيوه يا حج الكلام ده صح. الحج سالم: والقانون عالكل ولا ممكن استثناء، وأنت فاهم طبعا. المحامي: لا يا حج، عالكل على ابن الوزير واللي عندهم سلطة في أي حتة ودول غرامتهم أعلى وحبسهم أطول. الحج سالم: كمان يعني مقفلة؟؟ المحامي: أيوة، والطرق اللي من تحت لتحت اللي هتحصل من الطرفين، هيتم إضافة حكم عليهم. الحج سالم: يعني مفيش أي ثغرات فيه؟ المحامي: لا الحل هو إنه يحصل صلح مع المدعي. الحج سالم: تمام، شكرا.

وبعد ما قفل مع المحامي قعد يفكر ويقول: يا ترى إيه مصيرك يا فارس. وفجأة لقى فارس الصغير بيقعد جنبه وهو ماسك التليفون وقال: مساء الخير يا جدو. الحج سالم بابتسامة: مساء الخير، رجعت إمتى من المدرسة؟ فارس الصغير وهو مركز في اللعب عالتليفون: من شوية. الحج سالم بعتاب: طيب فين حضن جدو؟ ابتسم فارس الصغير وقام عشان يحضن جده، بس لقى صبا جريت ناحية سالم وحضنته وهي بتقول: أنا هحضنك الأول. فدبدب فارس في الأرض وقال: لا أنا الأول.

فضحك الحج سالم وحضنهم هما الاتنين بحنية وحط بوسة على جبهة كل واحد فيهم وفضل يسألهم عن أحوالهم وهما يجاوبوه وبعد شوية نادى الحج سالم: هاتوا الأكل هنا عشان الولاد. وبعد شوية جاء الأكل وبدأوا ياكلوا وفارس فتح تليفونه عشان يكمل لعب وصبا فتحت تليفونها عشان تتفرج عالتيك توك بس فجأة بدأت تتعصب فبصلها الحج سالم وسألها: بتعملي إيه؟ صبا: التيك توك مش راضي يفتح وكل شوية يظهرلي الرسالة دي. فأخد سالم التليفون منها وشاف الرسالة

وبعد ما شافها ابتسم وقال: كويس والله إنهم عملوا كده. فسألته صبا: هيفتح يا جدو؟ الحج سالم: لا يا حببتي. صبا بزعل: ليه؟ الحج سالم: حظروه في مصر. صبا: يعني إيه؟ الحج سالم: يعني مش هيفتح تاني، روحي نادي ماما عشان أقول لها. صبا: حاضر. وراحت تنادي أمها وبعد دقايق حضرت فريدة وقعدت جنبه وسألته: خير يا بابا؟ الحج سالم: حظروا التيك توك في مصر. فريدة بفرحة: بجد؟ الحج سالم: أه والله خدي تليفون أهو شوفي.

وفعلا شافت فريدة الرسالة اللي ظهرت لما حاولت تفتح التطبيق وقالت: الحمدلله….. ******************* نرجع لسيف وفارس. دخل سيف مكتب فارس لقاه رايح جاي بيتكلم في الفون وبيزعق فقعد سيف عالكرسي اللي قصاد مكتبه لحد ما فارس خلص مكالمة وفضل رايح جاي برضه فسأله سيف: في إيه يا فارس؟ فارس بعصبية: مي بتهددني إنها هتحبسني بالقانون الجديد. سيف: أنت وعدتها بالجواز؟ فارس: كان الكلام وقت ما كانت عملالي سحر وأنا مكنتش في وعيي.

سيف: طيب ماهي محلولة أهي؟ فارس بسرعة: إزاي؟ سيف: أنت تقدم فيها بلاغ بممارسة السحر والشعوذة… وسكت شوية بيفكر، فسأله فارس بقلق: في إيه؟ سيف: مفيش دليل ضدها، أنا وأبوك حرقنا اللي يثبت إنها راحت لدجال. قعد فارس قصاده بخيبة أمل وسأله: وإيه الحل؟ أنا تعبت من اللي بيحصلي ده كله. فكر سيف شوية وقال: أبوك قالها هما كلاب فلوس. فارس: ماشي بس متحبسش يوم واحد. سيف: يبقى لازم أقول لوالدك. فارس بلهفة: أنتوا بتتكلموا؟ هو عامل إيه؟

توه سيف في الكلام وقال: قوم نلف عالخدمة ونتغدا، ونكمل كلامنا. فارس: ماشي. ونزلوا لفوا عالخدمة وبعدها راحوا يتغدوا وهما في طريقهم اتصل سيف بجنى وبعد ما خلص مكالمة سأله فارس: مين دي اللي عندها ضغط نفسي؟ سيف: واحدة صاحبة مراتي. فارس: إيه السبب؟ سيف: نصيبها بقى حب واحد وسابها. فارس: أكيد في سبب. بدأ سيف يكلمه عن صاحبة مراته من غير ما يعرفه إنها قمر وبعد ما خلص رد فارس: بقى في حد يسيب واحدة زي دي؟

سيف: تفتكر ده يتقال عنه إيه؟ فارس: حمار طبعا. ضحك سيف فسأله فارس: بتضحك على إيه؟ سيف: بلاش أضحك ولا إيه؟ فارس: لا أضحك. سيف: طيب يلا عشان نتغدا….. ******************* نروح لقمر. كانت في بيت جنى بيتكلموا سوا وبيخططوا هيعملوا إيه في سفرية بكرة وبعد ما خلصوا قالت جنى: ما تقومي تعملي شاي بدل ما أنتي قاعدة كده؟ قمر بابتسامة: حاضر.

وراحت تعمل شاي أما جنى ففتحت تليفونها وفضلت تقلب فيه لحد ما ظهر قدامها خبر القانون الجديد وأول قضية اتعملت به فندهت على قمر بفرحة: قمررررررر!! تعالي بسرعة. اتفزعت قمر منها وراحت تجري ليها وسألتها بخوف: في إيه؟ جنى بفرحة: حقك رجع من فارس خلاص. قعدت قمر جنبها وسألتها باستغراب: إيه؟ إزاي؟ ناولتها جنى الفون وقالتها: بصي الخبر ده. قرأت قمر خبر القانون الجديد وسكتت، فسألتها جنى: هتعملي إيه؟ رجعت قمر تبص في الفون

تاني وقالت وهي بتضحك: بصي أول قضية معمولة به. قرأت جنى تفاصيل القضية وقالت وهي بتضحك: ١٥ واحدة يا بن المفتري. قمر: لا وفي نفس الوقت. جنى باستغراب: عملها إزاي ده؟ قمر: مش عارفة. جنى: تفتكري هيدفع ولا يتحبس؟ قمر بضحك: لا ده ياخد إعدام أوفر له. ضحكت جنى وقالت: على رايك. وقطع كلامهم مكالمة سيف فردت جنى وقمر رجعت المطبخ، وفي المكالمة سألها سيف بهزار: قوليلي كنتي هتعملي إيه لو خلعت؟ جنى بتحذير: كنت خدت فيك إعدام.

سيف: يا ساتر، ليه كده؟ جنى بغيرة: عشان مفيش واحدة تانية تاخدك. سيف: طيب كويس إني اتجوزتك. جنى: طبعا كويس. سيف: قمر عرفت؟ جنى: أيوه. سيف: وناوية على إيه؟ جنى: معرفش. حكالها سيف عن اللي حصل لفارس الفترة اللي فاتت وقال: ده غير اللي بنت خالته عملته فيه. جنى بفضول: عملت إيه؟ سيف: هترفع عليه قضية بالقانون الجديد. جنى: أحسن أحسن. سيف: وبعدين يا جنى مش وقت شماتة.

جنى باعتذار: غصب عني بس قمر صعبة عليا أوي من اللي عمله فيها، وأكيد ده ذنبها. سيف: هي عامله إيه؟ شرحتله جنى حالة قمر بما إنها دكتورة نفسية، فسألها سيف: تفتكري ممكن تعمل في نفسها حاجة من كتر الضغط النفسي ده؟ جنى: معتقدش، قمر أعقل من كده. سيف: أنا حاسس إنها هتعمل في نفسها حاجة. سيف: المهم خلي بالك من نفسك. جنى: حاضر. سيف: يلا سلام. جنى: سلام.

وقفلت معاه ونادت على قمر بس مردتش عليها فنادت تاني بس مردتش عليها برضه فقامت راحتلها وأول ما دخلت المطبخ لقت قمر واقفة بتعيط ومن غير كلام راحتلها جنى وطبطت عليها وأخدتها في حضنها، وعياطها بدأ يزيد لحد ما جسمها ساب فنادت جنى عليها لما حست بتقلها بس مردتش عليها، فنادت تاني بس مفيش رد فرفعت جنى راس قمر من حضنها لقيتها مغمى عليها، فأخدتها عالصالة بسرعة ونيمتها عالكنبة وقعدت جنبها تفوقها، وبعد

شوية فاقت قمر وسألتها: أنا فين؟ جنى: في بيتي. قامت قمر قعدت وسألتها: إيه اللي حصل؟ جنى: فضلتي تعيطي لحد ما أغمى عليكي، ليه كده؟ حطت قمر إيديها على وشها وعيطت وقالت: غصب عني مبقتش قادرة أسمع اسمه أو أي حاجة عنه غير لما أفتكر اللي عمله فيا. جنى: حقك عليا، مكنتش أعرف. مسحت قمر دموعها وقالت: ولا يهمك أنتي مكنتيش تعرفي. جنى: المهم قررتي هتعملي إيه؟ قمر: في إيه؟ جنى: هتاخدي حقك منه بالقانون الجديد؟

سكتت قمر شوية فعادت جنى السؤال تاني. بصتلها قمر وقالت:……….