رواية حكاية قمر الفصل السابع 7 - بقلم ياسمين علي

سهر راحت ع أوضتها وهي بتفتكر اللي حصلها من سنين. *** فاروق: اظن اللي كنتي موجودة علشانه راح خلاص.. يعني وجودك مالهوش لازمة دلوقتي. نورة: اطلعي فوق ياسهر. سهر طلعت وقفت ع السلم واستخبت. نورة: انت عاوز ايه يا فاروق. فاروق: عاوزك تغوري من حياتي.. اللي كنتي بتتحمي فيه راح. نورة: انت عاوز تطردني من بيتي؟ فاروق يضحك بتريقة: بيتك؟

بيت إيه.. انتي نسيتي انتي كنتي إيه.. لولا أبويا أقول إيه بقا الله يرحمه هو اللي خلاكي من ممرضة لصاحبة بيت.. بعد ما ضحكتي عليه. نورة: أنا مضحكتش ع حد.. أبوك كان بيحبني. فاروق: آخررسي.. أبويا محبش غير أمي وبس.. انتي واحدة رخيصة استغليتي مرضها ورقدتها ف السرير.. استغليتي هو شخصيا.. وأمي ماتت بحسرتها بسببك. نورة: نصيبها كدا. فاروق: صح عندك حق نصيبها.. وانتي كمان هتاخدي نصيبك. نورة: تقصد إيه؟

فاروق نادي ع الأمن بتوع الفيلا. نورة: انت هتعمل إيه؟ فاروق: خدوهَا برا ومتدخلش الفيلا دي تاني. نورة: انت اتجننت.. انت مالكش حق.. أنا ليا ف البيت دا أنا وبنتي. فاروق: حقك؟ صح أنا نسيت أقولك.. مش أنا خليت أبويا يكتب كل حاجة باسمي قبل ما يموت. نورة: انت كددااب.. استحالة يعمل كدا. فاروق مبتسم: لا عمل.. كتب كل حاجة مقابل إن أربي بنته المدللة.. يعني باعك.. زي ماباع أمي زمان. نورة بصدمة: انت بتقول إيه استحالة!!!

فاروق بعصبية: خدوهَا ع برا.. وزي ما قولت مش عاوز أشوف وشها هنا تاني.. واحمدي ربنا إنك طالعة من هنا عايشة. نورة: أنا مش هسيب بنتي.. أنا عاوزها. فاروق: آخررسي.. واخرجي برا. سهر نازلة تجري: ماما.. ماما انتي راحة فين. فاروق مسك إيدها: اطلعي ع فوق. سهر: أنا عاوزة أروح مع ماما.. اوعا إيدي أنا مش بحبك انت وحش. نورة: ارجوك متحرمنيش منها يا فاروق. فاروق: انتي فاكرة إني قبلت أربيها حب فيها؟

أنا وافقت بس عشان تتحرمي منها زي ما حرمتيني من أمي. نورة بعياط: ارجوك سهر مالهاش ذنب ف حاجة.. ارجوك سبني حتى أسلم عليها. فاروق ساب سهر طلعت تجري حضنت نورة. سهر: ماما انتي راحة فين.. أنا عاوزة أجي معاكي متسبنيش. نورة بتعيط: غصب عني ياحبيبتي.. خلي بالك من نفسك ياسهر.. اسمعي كلام أخوكي. سهر: لا ياماما دا وحش أنا مش عاوزة أعيش معاه خديني معاكي.. بابا سابني وانتي هتسبيني.. خديني معاكي. نورة

حضنتها جامد وهي بتعيط: غصب عني ياسهر. فاروق شد سهر من حضن نورة: كفاية كدا.. يلا خدوهَا ع برا. سهر: اوعا سبني.. ماااما.. متسبنيش. نورة: خلي بالك من نفسك ياسهر.. هتوحشينيي ياحبيبتي. سهر بعياط وبتشد نفسها من فاروق: لااا متسبنيش ياماما... ماااامااااا. *** سهر بتعيط: هتدوق اللي دوقته يا فاروق.. هتدوقه. *** نعمة: سائر وصل يابيه. صافي بفرحة: سائر رجع.. أنا مش مصدقة.. يلا يابابا ننزله بسرعة يلاه.

هدي بفرحة: حمدالله ع سلامتك ياحبيبي.. أخيرا افتكرتنا. سائر: الله يسلمك. صافي نازلة تجري حضنته: وحشتني اوووي.. كل دي غيبة ياسائر. سائر: وحشتيني يامجنونة انتي.. عاملة إيه. صافي: بقيت كويسة لما شوفتك. فاروق: حمدالله ع السلامة.. أخيرا افتكرت إن ليك أهل. سائر: انت عارف إني مكنتش راجع. فاروق: وايه رجعك؟ هدي: إيه اللي بتقولوه دا يا فاروق.. سائر ينور ف أي وقت.. دا بيته. سائر: عارف إن دا بيتي والله من غير ما تقولي.

فاروق: يظهر إن السفر والغربة منستكش. سائر: ولا عمري هنسا.. عن إذنكم أنا راجع تعبان. صافي: رايح فين كدا.. انت فاكرني هسيبك.. فين الهدايا بتاعتي. سائر: طب سبيني أرتاح الأول. صافي: ابدا رجلي ع رجلك.. يلا بينا ع فوق نفتح الشنط. طلعوا. هدي واقفة مضايقة وفاروق راحلها: متضايقيش نفسك من كلامه.. هو يومين ويرجع مكان ما جه.

هدي: ومين قالك إني هبقا مبسوطة لما يمشي.. أنا عاوزة يفضل عايش معانا دايما.. بس مش عارفة أعمل إيه عشان أرضيه. فاروق: متتعبيش نفسك معاه.. دا دماغه ناشفة.. المهم انتي متزعليش. هدي: ماشي يا فاروق. *** تونة قاعدة حاطة رجل ع رجل وبتتفرج ع التلفزيون وماسكة طبق لب بتقزقز وترمي ف الأرض وليلى واقفة تلم ومتغاظة منها. تونة: نضفي بضمير.. في قشرة هناك أهي. ليل: فين دي؟ تونة حدفت قشرة: أهي.

ليل بعصبية: لا بقا كفاية كدا كتير.. أنا أروح أقول لقمر بنفسي بقا أكرملي. تونة: يلا ياحبيبتي انتي تقولي اللي حصل وأنا أحط بهاراتي. ليل: ااه منك ياسوسة انتي. تونة: والله لما تيجي قمر هقولها ع عملتك السودة. ليل: طب ابقي افتحي بقك عشان أكسر دماغك دي. تونة: طب وريني كدا عشان أطلع عينك ف إيدك. قمر دخلت: في إيه الصوت دا.. بتزعقوا ليه.. انتو مبتعرفوش تقعدوا كويسين مع بعض.. إيه حصل؟ تونة: أنا أقولك إيه اللي حصل. ليل طلعت

تجري حطت إيدها ع بق تونة: محصلش حاجة يا قمر.. عادي احنا توم وجيري كدا دايما نتخانق.. انتي عارفنا. قمر رفعت حاجبها: شيلي إيدك من ع بقها ياليل. ليل: مابلاش. قمر: شيلي يابت. ليل شالت إيدها وهي خايفة. تونة: أصل ليل مش عاوزني أقولك إني شوفتها وهي.... ليل قفلت عينها وبتدعي ف سرها. قمر: انطقي مالها. تونة: شوفتها وهي كانت طالعة تتسحب برا. ليل بصوت واطي: يلاهوي هتقول. قمر: ها وبعدين.

تونة: روحت اتسحبت وراها وقبضتها وهي راحة تنط بالبسين. ليل فتحت عينها واتنهدت: الحمدالله. قمر: بسين إيه.. انتي اتهبلتي ياليل. تونة: ما أنا قولتلها كدا ياقمر والله.. وزعقتلها.. أقولها عيب ميصحش كدا ياليل.. مستنية قمر تمشي وتلعبي بديلك من وراها.. تقولي ابدااا حرانة وعاوزة أنزل. ليل: يابنت التونة: بتقولي حاجة ياحبيبتشي.. مش سامعة.. مش دا اللي حصل ولا بكدب. ليل: انتي تكدبي يا خبر.. دا العالم كله يكذب إلا انتي يا طاهرة.

قمر: وانتي اتجنيتي.. عاوزة تنزلي فين. ليل: دانا كنت بهزر مع تونة.. انتي عارفة أنا مبعرفش أعوم. قمر: اه بحسب. ليل: مقولتلناش بقا جبتي هدية إيه لنور. قمر: تعالوا.. تعالوا أفرجكم. *** كنزي: صباح الخير ياماما. نجلاء: صباح النور ياحبيبتي.. إيه مصحيكي بدري كدا. كنزي: قلقت قولت أصحا أساعدكم. عايدة: اه دا انهاردة هيبقا يوم صعب أوي أوي. نجلاء: كله يهون عشان عيون نور. كنزي: ماما أنا كنت عاوزة أشتري فستان.

عايدة: انتي عاوزة تساعدينا ولا تشتري فستان. كنزي بغيظ: الله بقا وانتي مالك. نجلاء: بنت عيب كدا.. تعالي معايا برا. كنزي: ياماما بقا سيبي إيدي.. في إيه أنا مقولتش حاجة غلط. نجلاء: عيب تكلميها كدا أكبر منك. كنزي: ماهي كل حاجة تتدخل فيها ليه.. دي غلبت البقدونس. نجلاء: خلاص اسكتي.. خدي الفلوس أهي.. روحي هاتي الفستان.. وهاتي هدية لنور.. هاتي حاجة حلوة كدا ع ذوقك. كنزي: من عنيا يانوجة.. حاجة تانية.

نجلاء: اه.. خدي حد معاكي.. متروحيش لوحدك لتتوهي. كنزي: هو فين بابا يوصلني. نجلاء: أبوكي مش هنا. كنزي: ليه.. راح فين دا.. عمو أحمد مرحش الشغل. نجلاء: أبوكي راح يطمن ع عمتك.. ما هو مش عشان انتي جيتي هنا هينسى أخته. كنزي: طيب أنا دلوقتي أروح مع مين. نجلاء: مش عارفة يابت ياكنزي.. أقولك متاخدي ليل معاكي. كنزي: اه صح.. أخده ليل معايا.. يلا أنا هروح ألبس بقا. نجلاء: ماشي وخلي موبايلك مفتوح.. متقلقنيش عليكي. كنزي: حااضر. ***

في أوضة نور نايمة.. وزين وكريم وأسر داخلين بهدوء ورا بعض ومعاهم بلالين كتير وتورتة فيها شمع عليه رقم 25. أسر ولع النور.. ونور فتحت عينها. أسر وزين: هابي بيرث داي تو يوو.. هابي بيرث داي تو يو.. هابي بيرث داي تو نور.. هابي بيرث داي تو يو. نور قامت

وقفت ع السرير وهي مبسوطة: سنة حلوة يا جميل.. سنة حلوة يا نور.. سنة حلوة يا يا جميلي.. لا حالا بالا بالا.. حيو ابو الفصاد.. هيكون عيد ميلاد الليلة أسعد الأعياد.. حيو ابو الفصاد. نور جاية تنفخ ف الشمع. أسر: استتني اتمني أمنية الأول. نور: تفتكر هتتحقق؟ زين: ان شاءالله ياحبيبتي تتحقق. نور ابتسمت وغمضت عينها واتمنت أمنية وطفيت الشمع. أسر: ها اتمنيتي إيه بقا. زين: مالكش دعوة يارخم.. سبها..

حضن نور: كل سنة وانتي طيبة ياحبيبتي.. عقبال سنين كتير أوي وانتي منورة حياتنا. أسر: كل سنة وانتي طيبة يانوني. نور: ربنا يخليكوا ليا.. ومتحرمش منكم أبدا. كريم حضن نور وطلع علبة فيها سلسلة رقيقة جدا عطاها ل نور. نور: الله جميلة أوي يا كريم.. أنا هلبسها انهاردة ياحبيبي. زين: والله عيب علينا.. الصغير يجيب هدية واحنا لا. أسر: اتكلم عن نفسك ياحبيبي.. أنا هديتي موجودة وهي عارفة.

نور ابتسمت: فستان عيد ميلادي.. كل سنة لازم يكون ع ذوقك انت.. ربنا ما يحرمني منك أبدا. زين: أنا شكلي بقا وحش أوي. أسر: اوي اوي بصراحة. نور: هو بابا لسه نايم.. ولا يكون راح الشغل. زين: لا بابا قاعد تحت مستنينا ع الفطار. نور: طيب يلا ننزل. أسر: يلا. *** كنزي: أنا تعبت من كتر اللف.. ومافيش حاجة عجبتني. ليل: ومين سمعك.. بصراحة انتي مش بيعجبك حاجة خالص. كنزي: بزمتك في حاجة حلوة أصل. ليل: بزمتي فيه كتير حلوين.

كنزي: فين دول. ليل: اهو بصي.. طب الفستان دا حلو إزاي. كنزي: لا مش عاجبني دا. ليل: ياستي ادخلي شوفي عليكي بس. كنزي: ماشي هشوفوا بس لو معجبنيش هتلفي معايا. ليل: امري لله.. هعمل إيه.. يلا الله يهديكي ادخلي. كنزي: حاضر. *** قمر: بت ياتونة.. خدي أقولك. تونة: يانعم. قمر: انتي مخبية عليا إيه. تونة: تعرفي عن تونة إنها بتخبي حاجة. قمر: لا طبعًا عمرك.. علطول فاضحة الناس. تونة: اومال بتسألي ليه. قمر: عشان مش مرتحالك انتي وأختك.

تونة: وأنا مالي أنا عملت إيه.. مترتحلهاش هي بس. قمر: مرتحلهاش ليه بقا.. قوليلي عملت إيه. تونة: عملها أسود ومنيل.. دي طلعت ماية من تحت تبن. قمر: في إيه ياتونة قلقتيني. تونة: ناوليني واحدة بيبسي من التلاجة. قمر: يوة ماتحكي الأول.. دا وقته. تونة: خلاص أنا هروح أجيبها لنفسي وشوفي مين يحكيلك بقا. قمر: خلاص خلاص هجبلك. تونة: هاتيها ساقعة أوي أوي. قمر: خدي ياختي.. قولي بقا. تونة: مجبتيش فستق ليه. قمر: وبعدين بقا معاكي.

تونة: خلاص تعالي هحكيلك. قمر: ها قولي. *** كنزي خرجت. ليل: طب والله حلو دا.. متفصل عليكي. كنزي: بجد.. يعني حلو عليا. ليل: اوي اوي. كنزي: أنا كمان عجبني اووي. ليل: لولولولوولي.. أخيرا. كنزي ضحكت: للدرجادي زهقتي مني. ليل: أنا.. ابد.. محصلش.. مين قال كدا بس. كنزي: لا واضح واضح.. تعالي نحاسب. *** قمر: يعني انتي متأكدة ياتونة. تونة: اه.. وغلاوتك شوفتهم بعيني دول. قمر: ما يمكن يكونوا أصحاب ف الكلية.

تونة: لا ياقمر مش أصحاب بس.. دا قالها بحبك. قمر: بتتكلمي جد يابت.. اوعا يكون بهاراتك دي. تونة: ابدا.. تعرفي عني كدا. قمر: أعرف عنك أبو كدب. تونة: خلاص مش مصدقاني براحتك. قمر: طيب متقوليلهاش إنك عرفتيني حاجة. تونة بصوت واطي: كويس بردك عشان استغلها. قمر: بتقولي حاجة. تونة: بقولك أنا هقوم أجهز نفسي للعيد ميلاد.. عاوزة حاجة مني. قمر: لا روحي. *** نجلاء: كل دا ياكنزي.. مش قولتلك متتأخريش.

كنزي: معلش ياماما.. الدنيا زحمة أوي.. احنا رايحين نركب اهو.. متقلقيش. نجلاء: ماشي.. لما تجيلي. كنزي: ماشي ياماما سلام. ليل: الدنيا زحمة ولا انتي اللي مش عاجبك حاجة. كنزي: انتي عاوزني أقولها كدا عشان تهزقني أكتر.. يرضيكي. ليل: لا ياختي ميرضنيش. كنزي: احنا هنركب منين. ليل: من قدام اهو.. الموقف قرب. كنزي: الحمدالله.. أحسن تعبت من المشي. موتوسيكل معدي من جنبها.. شد الشنطة والكيسة اللي ف إيد كنزي.

كنزي وليل صوتوا وطلعوا يجروا ورا الموتوسيكل. كنزي: الفستاااان. ليل: استني استني... أنا صورت الأرقام. كنزي بعياط: خد الفستااان والشنطة.. ماما هتزعقلي. ليل: اهدي.. هو أنا ماشية مع عيلة صغيرة. كنزي: هنعمل إيه دلوقتي. ليل: هنروح القسم نعمل محضر. كنزي: بس كدا هنتأخر. ليل: لا إن شاء الله منتأخرش.. يلا. *** تونة لبست وطالعة كالعادة طايرة بالفستان وبتلف بيه.. لمحت كريم. طلعت تجري عليه.

تونة بتلف قدام كريم: بص يا كريم.. إيه رأيك ف الفستان بتاعي.. حلو صح. كريم بصلها ودير وشه. تونة: هو انت علطول ساكت.. إيه دا.. انت بتعمل إيه. كريم: ..... تونة: دا اسمه رسم صح.. طيب ماترسمني. كريم: ..... تونة: اوف بقا.. ماترد عليا.. طيب رد عليا ومش هقول لحد إنك اتكلمت.. أوعدك. كريم: .... تونة: يووة بقا.. أنا همشي أحسن. كريم مسك إيدها وقعدها. تونة: هترسمني.. هييييه. كريم شاورلها تثبت. تونة: حاضر مش هتحرك.. يلا يلا. ***

في القسم. كنزي بتعيط: زمان ماما قلقانة عليا... أعمل إيه يا رب.. ياريتني مانزلت. ليل: لا اله إلا الله.. اهدي ياكنزي.. أبوس إيدك.. أنا مش ناقصة توتر. كنزي بتعيط أكتر: أنا عاوزة الفستاااان ياليل. ليل: أنا مش عارفة حاجة هنا.. أول مرة أدخل قسم. كنزي: كمان هنتوه ف القسم.. يلاهووي. ليل: اسكتتيي... هنسأل مش هنتوه. ليل: لو سمحت.. أنا كنت عاوزة أعمل محضر. حازم خارج من مكتبه.. كنزي بترفع عينها شافته.. طلعت تجري عليه وهي بتعيط.

حازم اتخض: يلااهوي.. إيه جابها دي. كنزي بعياط: حازم الحقني.. أنا اتسرقت... انت فاكرني أنا اللي قلبت عليك العصير. حازم: ولو مش فاكرك بالعياط دا.. لازم أفتكرك.. ادخلي. حازم: قوليلي اتسرقتي إزاي. كنزي بتعيط: كنت راحة أجيب فستان أنا وليل.. وفضلنا نلف نلف نلف عشان يعجبني حاجة.. ولما... حازم: انتي هتحكي قصة حياتك.. انجزي.. عاوز أمشيك. كنزي عيطت: انت بتزعقلي ليه.. انت قولت أحكي اللي حصل وأنا بسمع الكلام.

حازم: ياستي أبوس إيدك ماتعيطي.. أنا عاوز أعرف بس اتسرقتي إزاي. كنزي: واحد راكب موتوسيكل شد مني الشنطة و خد الفستان كمان. حازم: ماخدتوش أرقام الموتوسيكل طيب. ليل: أنا خدتها أهو.. اتفضل. حازم: تمام كدا.. دقيقة وراجعلكم. حازم: اهدي خلاص.. الحرامي وحاجاتك هيجوا دلوقتي. كنزي: متشكرة أوي. حازم: دا واجبي.. متقلقيش انتي بس. كنزي: حاضر. *** نجلاء: يلااااهوي.. البت لسه مجتش لحد دلوقتي.. ما كانت قايلالي راحة تركب.

عايدة: طب كلميها. نجلاء: بكلمها موبايلها مقفول.. أنا قلقانة أوي. عايدة: مانتي غلطانة.. بتنزليها لوحدها ليه. نجلاء: مش لوحدها.. معاه ليل. عايدة: ماهي بنت هي كمان ياختي.. لازم كان يبقا معاهم راجل ولا حد كبير. نجلاء: انتي هتقلقيني أكتر ليه ياعايدة. عايدة: أنا بفهمك بس.. أصل الخطف دلوقتي بقا ف كل حتة. نجلاء: بدل ما تهديني بتولعيني أكتر.. أنا طالعة أستناه برا بدل ما أجلط وأنا واقفة. عايدة: يوة.. هو أنا قولت حاجة. ***

حازم: شنطتك وحاجاتك أهي.. شوفي لو حاجة ناقصة. كنزي بفرحة خدتهم: لالا.. مافيش حاجة ناقصة.. أنا متشكرة أوي أوي. حازم: العفو ياستي.. تعالوا هوصلكم ع سكتي. ليل: دا يبقا كتر خيرك والله. كنزي: لا مش هينفع عشان ماما متزعقليش.. لما تشوفني راكبة مع واحد غريب. ليل: أمك هتزعقلك لو اتأخرنا أكتر من كدا. كنزي: اه صح.. خلاص هنركب معاه.. بس لو ماما اتكلمت. ليل: أنا هفهمها ياستي.. يلا. كنزي: ماشي. ***

تونة: اوف بقا.. أنا زهقت.. العيد ميلاد هيبدأ ويخلص وانت لسه مخلصتش. كريم: ..... تونة: طب وريني وصلت لفين.. انت مخبي الورق ليه.. هو احنا ف امتحان. كريم خلص رسم و لف الورقة. تونة بفرحة: الله دي حلوة أوي.. شبهي بالظبط.. زي عيني وزي مناخيري وزي شعري.. كلي كلي بالظبط.. متشكرة أوي يا كريم.. أنا هروح أوريهالهم. جت تمشي رجعت خطوتين باسته من خده وطلعت تجري بالرسمة. وكريم واقف فرحان لفرحتها. ***

نجلاء بعصبية: كل دا تأخير.. عجبك القلق اللي أنا فيه.. والزفت اللي ف إيدك دا بيعمل إيه.. وهو مقفول.. أنا غلطانة إني نزلتك. كنزي: استني ياماما هفهمك. نجلاء: قدامي ع جوا.. مسمعش صوتك. ليل: يادادة نجلاء.. أنا وكنزي طلع علينا حرامي.. ولولا الظابط اللي كنزي تعرفه دا مكناش رجعنا الحاجة. نجلاء ضربت بايدها ع صدرها: يلاااهوي.. ظابط مين يابت اللي تعرفيه.. دانتي مبقالكيش أسبوع هناا.. لحقتي تتعرفي ع حد.

كنزي: والله ما أعرف حد ياماما.. استني هفهمك بس. ليل: أنا خربت الدنيا ولا إيه. نجلاء: تفهميني إيه.. انطق. كنزي: دا الظابط صاحب زين اللي اسمو حازم.. ياماما.. روحنا نعمل محضر لقيته.. وهو ساعدني. نجلاء: مانتي ماشية زي الهبلة.. لازم تتسرقي. ليل: يعني الناس اللي بتتسرق كلهم هبل. نجلاء: لا بنتي لوحدها اللي هبلة. كنزي: بصي بتقول عليا إيه.. بصي. ليل: خلاص قلبك أبيض.. روحي اللبسي يلا.. وأنا هروح ألبس.. احنا متأخرين أوي.

كنزي: زعلانة مني ياماما. نجلاء: روحي اللبسي يلا.. قبل الناس ما تيجي. كنزي: يعني مش زعلانة منين. نجلاء: لا.. بس تاني مرة متتأخريش. كنزي باستها من خدها: من عنيا يانوجة قلبي.. أسيبك أنا بقا وأروح ألبس. *** ليل: مساء الخير... وحشتكم صح. قمر: اتأخرتي أوي كدا ليه. ليل: ماهو لو تعرفي الي حصلنا.. مش هتقولي كدا. قمر: إيه حصل؟ ليل: مش طلع علينا حرامية ورحنا القسم.. بصي.. أنا هدخل آخد دش وألبس كدا وأطلع أحكيلك.

قمر: ماشي ياليل.. بقولك.. مافيش حاجة عاوزة تقوليلي عليها. ليل بتوتر: ها.. حاجة زي إيه. قمر: أي حاجة عاوزة تقوليلي عليها.. أنا هسمعك. ليل: لما يبقا في حاجة هقولك أكيد. قمر: ماشي ياليل. *** أحمد: ممكن أدخل. نور: اتفضل طبعًا. أحمد: الجميل خلص ولا لسه. نور: خلاص فاضلي الفستان. أحمد: كل سنة وانتي طيبة ياحبيبتي. نور: وانت طيب يابابي.. ودايما معانا.. وميحرمنيش منك أبدا.

أحمد: يارب ياحبيبتي.. أنا أسيبك تلبسي بقا عشان متتأخريش. نور: ماشي. *** صافي: إيه دا ياماما.. انتي لسه ملبستيش. هدي: لا ياحبيبتي.. روحوا انتو وانبسطوا.. أنا هخليني هنا. صافي: ليه كدا بس يا دودو.. تعالي غيري جو.. انتي مبتخرجيش خالص. هدي: المرة الجاية هاجي معاكم إن شاء الله. صافي: ماشي ع راحتك.. يلا ياسهر عشان منتاخرش. سهر: أنا خلصت اهو.. مستعجلة ع إيه.

صافي: أسر وحشني أوي.. عاوزة أشوفوا.. ومتشوقة أوي للحفلة اللي اتفقنا عليها. هدي: حفلة إيه. سهر: حفلة العيد ميلاد طبعًا.. يلا ياصافي ياحبيبتي قبل ما تودينا ف داهية. صافي: يلاسائر نازل ببدلة شيك جدا: استنوا أنا جاي معاكم. الكل بصله باستغراب. سائر: بتبصوا كدا ليه.. بلاش أجيب. سهر: لا طبعًا ياحبيبي تعال. سائر: ماشي يلا بينا. صافي: يلا. *** وليد: أيوة يا ست سارة.. كل دا بتلبسي. سارة: لا أنا اهو داخلة ع العربية والله.

وليد: فين دا. سارة ركبت: اهو جيت. وليد: ساعة ملطوع لحضرتك.. ماكنتي طلبتي أوبر ولا أي حاجة. سارة: كنت عاوزة أروح معاك يا وليد.. مش عاوزة أمشي لوحدي. وليد: ماشي ياستي. سارة: مقولتليش.. إيه رأيك ف الفستان. وليد مبصلهاش: اه حلو.. ممكن نطلع بقا. سارة اتضايقت: ماشي يلا. *** "الناس جت والأغاني شغالة وكل حاجة جاهزة" ليل واقفة هي وتونة.. أسر راحلهم. تونة: احم احما. أسر: عاملة إيه ياتونة.. وحشتيني والله.

تونة: وانت كمان موحشتنيش. أسر: الله يكرم أصلك.. بقولك إيه.. انتي بتحبي غزل البنات. تونة: أيوة طبعًا. أسر: بصي الراجل دا بيعملوا حلو أوي.. روحي خدي منه. تونة بترفع حاجبها: ما تقول إنك عاوز تكلم ليل علطول.. بتلف وتدور ليها. أسر: الله ينور عليكي نبييه. تونة: مش ماشية. أسر: براحتك.. أنا قولت أقولك قبل ما غزل البنات يخلص. تونة بصيت ع بتاع غزل البنات.. ضعفت: طيب أنا هروح أجيب بسرعة وأجي.. عيني عليكما. أسر: مستنيكي ياغالية.

ليل جاية تمشي. أسر: استني.. هو أنا بوزعها عشان سيادتك تمشي. ليل: عاوز إيه مني. أسر: عاوز أتفق معاكي اتفاق. ليل: اتفاق إيه. أسر: نفتح صفحة جديدة وننسا اللي فات. ليل: انت مجنون صح.. يعني إمبارح تغلط فيا.. وأنهاردة تقولي صفحة جديدة. أسر: اه.. اعتبريني مجنون.. قولتي إيه. ليل: قولت بص وراك كدا. أسر بيبص لقي صافي بصاله. ليل: روح شوفها قبل ما تولع فيك.. ومشيت وسابته. صافي: الزفتة دي واقفة معاك بتعمل إيه.

أسر: وانتي مالك.. أنا مش قولت لما تعقلي تكلميني. صافي: أنا عاقلة.. بس أعمل إيه بغير عليك. أسر: متتغيريش عليا ياستي. وليد: بتزعقوا ليه كدا. أسر: الحمدالله إنك جيت.. تعالي عاوزك.. خد وليد ومشوا. صافي بعصبية: بصي بيهرب مني إزاي. سارة: انتو متخانقين ولا إيه. صافي: تعالي معايا. سارة: ع فين. صافي: تعالي بس. *** نور بتسلم ع الناس. سائر: كل سنة وانتي طيبة يانور. نور لفت اتصدمت وعينها لمعت وساكتة. زين شافها راحلها بسرعة.

زين: اهلا وسهلا يااسائر.. ازيك.. انت رجعت امتى. سائر: لسه راجع امبارح.. انت عامل إيه يازين. زين: أنا كويس ياحبيبي.. اتفضل.. اتفضل. سائر: دي حاجة بسيطة ليكي يانور.. يارب تعجبك. نور سرحانة. زين: نور خدي الهدية من سائر. نور: متشكرة ياسائر.. عن إذنكم. -زين: حازم.. إيه يابني كل دا تأخير. حازم: معلش والله السكة زحمة. سهر: ازيك ياحازم.. اخبار شغلك إيه. حازم: كويس الحمدالله. *شاف كنزي واقفة لوحدها*

طب اسيبكم أنا بقا وأنطلق شوية. سهر: اتفضل. *** حازم: ياتري خلصتي عياط ولا لسه. كنزي اتخضت: حازم. حازم: إيه اتفجعتي. كنزي: لا عادي. حازم: واقفة لوحدك ليه. كنزي: بدور ع ليل.. مش عارفة فينها. حازم: طيب تعالي ندور عليها سوا. كنزي بكسوف: ماشي. حازم سكت دقيقة. حازم: مقولتليش بقا.. هو دا الفستان اللي الحرامي سرقه. كنزي: اه هو. حازم: مالهوش حق ياخده بصراحة. كنزي: ليه.. وحش. حازم: لا طبعًا.. جميل أوي.. ولايق عليكي كمان.

كنزي وشها احمر: شكرا. نجلاء: ازيك ياحازم ياحبيبي.. عن إذنك هاخد كنزي وشدتها جامد من إيدها.. قداميي ياختي. كنزي: براحة ياماما.. إيدين. نجلاء: تعالي هنا.. إيه موقفك مع واحد غريب. كنزي: والله ياماما.. هو اللي جه وقف معايا. نجلاء: وانتي ياختي متعرفيش تمشي لما يقف معاكي. كنزي: الله ياماما.. دا لسه مساعدني.. أمشي وأسيبه عيب. نجلاء: العيب وقفتك معاه لوحدكم.. عاوزة الناس تشوفك تقول معرفتش أربي بنتيك. كنزي: ياماما والله ابدا.

نجلاء: تاني مرة متتكررش.. فاهمة. كنزي: حاضر ياماما. *** ليل واقفة وصافي وسارة جايين عليها. سارة: عاملة إيه ياليل. ليل: الحمدالله ياسارة كويسة. صافي: يارب دايما ياحبيبتي. ليل: يارب.. عن إذنكم. صافي: راحة فين.. دا احنا جايين نقف معاكي.. تسيبنا وتمشي. ليل: معلش.. أصل راحة أشوف أختي فين. صافي: تصدقي ياسارة.. أنا نفسي آكل كبدة.. متعرفيش ياليل حد بيبع كبدة حلوليل حسيت إن في تلقيح ف كلامها: المطاعم كتير هتلاقي فيها.

سارة: أكيد.. دا مش وقته كبدة يعني.. ع فكرة ياليل فستانك حلو أوي.. ممكن تعرفيني جايبة منين. ليل لسه هتتكلم.. صافي قطعتها: من الوكالة طبعًا.. مش كدا ياليل. سارة: في إيه ياصافي! ليل بتحاول تتمالك أعصابها: أنا هحترم المكان اللي أنا فيه ومش هرد عليكي. صافي: ليكي حق تحترمي المكان دا وتقدسي كمان.. انتي كنتي تحلمي تعيشي هنا. ليل بعصبية: آخررسيي.

صافي بعصبية: مش هسكت.. لازم أعرفك حجمك كويس أوي.. عشان متفكريش بعد كدا تبصي لحاجة مش بتاعتك. ليل دمعت: ومين قالك إني عاوزة الحاجة دي.. اشبعي بيها. *كريم واقف بعيد وشايفهم وتونة جت تقف جنبه* سهر: في إيه يابنات.. صوتكم عالي ليه.. وبصيت لليل من فوق لتحت.. ومين دي. صافي: متشغليش بالك ياسهر.. أنا كنت بعلم واحدة الأدب بس. ليل: والله ماحد عاوز يتعلم الأدب غيرك. رفعت إيدها عشان تضربها بالقلم.

سهر مسكت إيدها: انتي اتجرأتي تمدي إيدك ع بنت الكيلاني. سارة: سهر أهدي وسيبي ليل. سهر: استني انتي.. لازم تعرف مين بنت الكيلاني قبل ما تفكر ترفع صوباعها ف وشها.. بس مش إيده. ليل: ابعدي إيدك عني. تونة لسه هتروح.. كريم مسكه. تونة: أوعى.. سيبني أقطعهم بسنانك. كريم شدها وراحوا عشان ينادي ع حد. سهر: انتي بقا البنت الجربوعة اللي ساكنة ف حارة.. وجاية لجأ هنا انتي وأخواتك.. بتطاولي ع أسيادك.

ليل: والله ماحد جربوع غيرك انتي وعيلتك اللي فرحانة بيها دي. سهر بعصبية: أنا هوريكي إزاي تغلطي. زقتها ف البسين. ليل وقعت ومش عارفة تعوم. سارة جاية تنزل تلحقها.. صافي مسكتها. سارة: انتي مجنونة.. البنت بتغرق.. أوعي كدا. سارة نزلت تلحقها.. كان كريم وأسر ونور وزين ووليد وتونة. أسر: إيه اللي بيحصل هنا. سهر: ليل ياحبيبتي رجلها فلتت بالغلط.. وقعت وشكلها مبتعرفش تعوم.. وسارة نزلت تلحقها. زين: طيب امسكوها بسرعة.

أسر راح يمسك ليل من سارة.. ليل طلعت زقته بعيد عنها وطلعت تجري وهي بتعيط.. وتونة وراها. أسر استغرب وشك إن في حاجة. وليد: هي مالها.. ووقعت إزاي. صافي: ماقولنا غصب عنها الله. سارة بصيتلها بقرف. نور: تعالي ياسارة معايا.. غيري هدومك. زين: طيب يلا ياجماعة نرجع للحفلة بدل وقفتنا هنا. سهر راحت مسكت إيده: خدني معاك يازين. *** ليل داخلة منهارة وهدومها كلها ماية. قمر بخضة: إيه اللي حصل.. في إيه.

ليل داخلة الحمام ومنهارة من العياط. قمر: افتحي ياليل.. فهميني بس حصلك إيه ياحبيبتي.. ردي علي. تونة داخلة تجري: هي فيين. قمر: حصل إيه ياتونة.. قوليلي. تونة: الولية الحرباية اللي برا ضربتها وزقتها ف البسين ياقمر.. واتلموا عليها. قمر بعصبية: مين دي.. انطق. تونة: معرفهاش.. تعالي معايا أوريهالك. *** نور ماشية. سائر مسك إيدها: نور. نور: خير ياسائر. سائر: كنت عاوز أطمن عليكي.. انتي بتتهربي مني ليه.

نور: أنا مش بتهرب.. مش عادتي إني أهرب. سائر: طيب مش حابة وجودي. نور: لا طبعًا.. تنور ف أي وقت.. بس مكنتش متوقعة إنك ترجع تاني. سائر: أنا كنت عاوز أتكلم معاكي يا نور. نور: بعدين ياسائر.. مش وقته. سائر: أنا ماشي.. بس زي ما قولتلك.. لازم نتكلم.. عن إذنك. *** تونة: اهي الولية اللي واقفة مع زين دي. قمر شافتها واقفة مع زين اتعصبت أكتر وراحت ليها.. بتخبط ع كتفها. سهر لفت: افندم.. انتي مين.

قمر: عملك الأسود ياحبيبتي.. ضربتها بالقلم وجبتها من شعرها.. وقعدتها عليها. سهر: ابعدي عني يامجنونة انتييي.. عاوزة مني إيه. زين بيشد قمر: انتي اتجننتي ياقمررر.. إيه اللي بتعمليه ده. قمر زقته جامد: ابعد عن وشاااي. سهر: اه اه.. سبيني بقا يامجنونة.. أنا عملتلك إيه. قمر: ورحمة ستي مانا سيباكي..

صافي جاية تجري تلحقها.. تونة مسكتها عضتها من رجلها ومش عاوزة تسيبها.. وصافي بتصرخ لحد ما وقعت ف الأرض.. وتونة مسكتها من شعرها هي كمان.. وصافي بتحاول تبعدها مش عارفة. والكل جه يجري يحوش.. مش عارفين ينقذوا حد فيهم. كنزي ونور مسكوا ف قمر بالعافية. أسر ووليد مسكوا تونة. زين مسك سهر وهي حضناه وبتتصنع العياط: مين الجربوعة دي يازين.. إزاي تسبها تعمل فيا كدا.

قمر: مين دي اللي جربوعة.. يابت.. دانتي الستة منك ببلاش ف سوق الستات يازبالة.. أنا هعرفك مقامك. سهر: زين انت ساكت ليه.. اطردها حالا. قمر بعصبية: دانة مش همشي من هنا غير وأنا مقطعاكي بسناني.. يارخيصة يامعفنة. زين: كففااية اللي عملتيه.. لسه ليكي عين تتكلمي. قمر بعصبية: دانة مش هتكلم وبس.. دانا هعمل كمان.. وراحة تتهجم ع سهر تاني. سهر استخبت ورا زين..

وزين وقف قصاد قمر: انتي اتعديتي حدودك بما فيه الكفاية.. وكويس أوي إني مطردتكيش لغاية دلوقتي. أحمد: تطرد مين يازين. الكل بص لها. أحمد: اظاهر إنك نسيت كلامي. سهر: اونكل أحمد.. الحقني.. المجنونة دي بص عملت فيا إيه. أحمد: أولًا دي مسمهاش مجنونة.. ثانيًا قوليلي انتي عملتي إيه يوصلها تعمل فيكي كدا. سهر بتتصنع العياط: أنا معملتش حاجة.. قولو يازين. زين: سهر كانت واقفة معايا.. والأستاذة قمر جت مدت إيدها عليها.

أحمد: دا اللي انت شوفتو.. إنما اللي حصل غير كدا.. قولي يا قمر.. عملتي كدا ليه. قمر: اللي تتجرأ تمد إيدها ع أختي.. مش أعمل فيها كدا وبس.. دانا أخنقها بايدي دول لو فكرت تلمس شعرة من أختي تاني. زين: هو حد جه جنب اختك انتي هتتبلي عليه. تونة بعصبية: لا ياحبيبي مش بنتبلي ع حد.. الحربايتين دول مدوا إيدهم ع ليل.. زقوها ف البسين. زين: هنصدق واحدة كدابة زيك. تونة: سبني يااسر.. أنا هوريلوا مين الكدابة.. ابو طويلة دا.

أحمد: أنا مصدقهم.. إيه اللي هيخلي قمر تعمل كدا من غير سبب. سهر: يعني حضرتك مكذبني ومصدقها هيا. أحمد: قمر مبتكدبش. سهر: يبقا أنا اللي بكدب.. يلا بينا يا صافي.. عن إذنكم. زين بص لابوه وقمر بغضب وراح ورا سهر. وقمر خدت تونة وراحت لليل.. والكل طلع والناس مشيت. *** قمر: ليل ياحبيبتي.. حقك رجع. تونة بتضحك: داحنا أديناهم حتة علقة. كنزي: أنا مش عارفة إيه حصل.. بس متزعليش نفسك. *ليل عيطت أكتر*

قمر حضنتها: ياحبييتي.. ونبي متعملي ف نفسك كدا.. والله أروح أضربهم تاني. تونة: خلاص بقا يابت.. طب أروح أفقعلك عينها.. بس أفقعلك أنهو منهم دي بأربعة وأربعين. ليل ضحكت والكل ضحك. قمر: أيوة كدا.. لا عاش ولا كان اللي يزعلك وأنا موجودة.. يلا قومي اغسلي وشك. ليل حضنت تونة وقمر: ربنا يخليكم ليا. قمر: يارب ياحبيبتي.. تعالي ياكنزي انتي كمان. كنزي طلعت تجري حضنتهم. ***

أسر: يعني إيه سارة مقالتلكش حاجة.. أنا عاوز أفهم إيه اللي حصل. وليد: معرفش يااسر.. متكلمتش وأنا مردتش أضغط عليها عشان كان شكلها مضايق.. نبقا نعرف بعدين.. روح نام انت بقا.. تصبح ع خير. أسر: وانت من أهله.. سلام. *** تونة: بصي ياقمر.. حلوة الرسمة دي. قمر: اه جميلة أوي.. دا كريم اللي رسمه. تونة: اه هو.. اتحايل عليا عشان يرسم. قمر: يابت. تونة: مش مصدقاني ولا إيه. قمر: لا طبعًا.. أنا هروح أعمل حاجة نأكله.

تونة: يااريت.. أنا جعانة. قمر: من عنيا ياحبيبتي. تونة: ليل.. بت ياليل. ليل: عاوزة إيه ياتونة.. أنا مش فايقة لك. تونة: لا فوقيلي ياختي.. بصي كريم رسم دي ليا وفرحت بيها.. وأنا مش عارفة أفرحه إزاي.. فكري معايا. ليل: وأنا هعرف منين. تونة: مانتي مقطعة السمكة وديلها.. مش عاوزة أفضحك.. خليني ساكتة. ليل: اه.. وانتي يابت بتسكتي فعلاً ومفضحتنيش. تونة: أنا وغلاوتك ماحصل.. يلا ساعديني بقا. ليل: قومي هاتي شنطتي. تونة: خدي أهي.

ليل طلعت شوكولاتة: دي كنت جايباها لك.. بس هي من نصيبوا. تونة: أنا مش عاوزة أفرحه أوي يعني.. هاتيها لي. ليل: هتطمعي فيها ولا إيه.. سبيها لكريم وهجبلك واحدة تانية. تونة: ماشي.. انتي بتكتبي إيه. ليل: بشكره.. كأنه انتي اللي كاتبه يعني.. قال يعني بتعرفي تكتبي. تونة: خلصي بقا. ليل: استني ألفهالك أحسن الورقة تطير.. بس كدا.. خدي أدهاله. تونة: دلوقتي. ليل: اه بسرعة قبل ما قمر ترجع. تونة: ماشي.. هروح بسرعة وأجي. ***

زين واقف بالعربية قدام الفيلا ومحتار.. مش عارف ليه أبوه بيعمل كدا مع قمر.. وليه هو بيكرهه قمر. نور ف أوضتها بتعيط.. وبتفتكر اللي كان بينها وبين سائر.. ومش مصدقة إن أمنيتها اللي اتمنت الصبح اتحققت. أسر ف أوضته بيحاول ينام مش عارف ومضايق عشان اللي حصل مع ليل.. وحاسس إنه السبب.. ونفسه ينزل يسألها ويعرف منها إيه اللي حصل. تونة دخلت أوضة كريم. تونة: كريم.. كريم انت هنا.. شكله مش موجود.. أنا أحط الشيكولاتة وأمشي.

حطيت الشيكولاتة.. شافت رسمة بتمسكها. تونة: الله.. مين الست الحلوة دي.. بصت حواليها.. مالكيش دعوة ياتونة.. اخرجي قبل ما حد يشوفك. بتحط الرسمة.. إيدها خبطت ف كوباية الماية.. وقعتها ع الرسمة.. باظت. تونة اتخضت: إيه اللي عملتوا دا.. أعمل إيه دلوقتي.. بتمسك الصورة تمسحها.. اتقطعت ف إيدها. كريم دخل شاف رسمة أمه ف إيدها مقطوعة.. ياتري قمر هتعمل إيه ف المصيبة الجديدة اللي تونة جبتهالها؟ ... هنعرف ف الأجزاء الجاية.. تابعوا.