رواية حكاية قمر الفصل الثامن 8 - بقلم ياسمين علي

تونة بخضة: إيه اللي عملتوه دا؟ أعمل إيه دلوقتي؟ بتمسك الصورة، تمسحها، اتقطعت في إيدها. كريم دخل شاف رسمة أمه في إيدها مقطوعة. كريم بعصبية خد منها الرسمة وزقها جامد. وقعت على الأرض، ومسك الرسمة يبصلها ويعيط. (كان رسمها وحطيتها جنبه عشان يحس إنها لسه موجودة.) افتكر الحادثة وكأن مامته راحت منه تاني. تونة بخوف: أنا مكنش... كريم صرخ جامد وكسر في الحاجة. زين جاي يدخل أوضته سمع صوت كريم، طلع يجري.

زين مسك كريم: اهدى يا كريم، اهدى. مالك يا حبيبي؟ حصل إيه؟ كريم مازال يصرخ ويعيط. زين لقي تونة قاعدة في الأرض خايفة. ساب كريم وراح على تونة والشر طالع من عينه. زين مسك تونة جامد: انتي السبب! عملتي له إيه؟ تونة: والله مكنش قصدي، والله. زين بعصبية: اخرررسي! تعالي معايا. وشدها من إيدها جامد ونزل بيها. *** قمر طالعة من المطبخ وجايبة الأكل. قمر: يلا يا ليل، تعالي كلي. أومال فين البت تونة؟ ليل ماسكة الموبايل ومش مركزة.

قمر: انتي يابنتي سيبي اللي في إيدك وردي عليا، فين أختك؟ ليل: إيه يا قمر؟ بتقولي حاجة؟ قمر: يالهوي عليا! بقولك فين تونة؟ ليل بتوتر: اا... مش عارفة، ممكن تكون دخلت الحمام ولا حاجة. قمر: حمام إيه؟ الحمام فاضي. الباب بيخبط جامد. ليل: مين هيخبط كدا؟ قمر: مش عارفة، استنى نشوف. استر يا رب. فتحت الباب. زين حدف تونة على الأرض جامد، وليل طلعت تجري حضنتها، وقمر واقفة مش مستوعبة اللي بيعمله.

زين: أنا صبرت عليكم بما فيها الكفاية، إنما تتعدوا حدودكم دا اللي مش هسمح بيه أبدًا. انتو فاهمين؟ قمر بعصبية: انت إزاي تمد إيدك على أختي بالشكل دا؟ زين: لما أختك تكون مش متربية يبقا واجبي أربيها. قمر: انت إنسان مريض، وأنا أختي متربية غصب عنك وعن أي حد. زين: اتكلمي عدل أحسن لك. قمر: عايزني أشوفك عامل كدا في أختي وأسكت؟ أنا كل دا بس محترمة صاحب البيت اللي قاعدة فيه.

زين: وأنا كل دا سايبكم عشان صاحب البيت، مستحمل قرافكم وراميتكم عندنا بس عشان صاحب البيت، بس توصل إنكم تأذوا حد من إخواتي دا ساعتها مش هعمل حساب لأي حد. قمر: محدش جه جنبك انت ولا إخواتك، انت اللي بتتلكك. أه محروق أوي من اللي عملتوه في حبيبت القلب وانت واقف تتفرج. زين: حسابك معايا في دا بعدين، لما أطمن على أخويا الأول. قمر: مش هتقدر تعملي أي حاجة، والبيت اللي بتهددنا بيه دا أنا مش عاوزاه.

زين: ياه، دا أحسن خبر سمعته من يوم ما دخلتوا. ليل بعصبية: انت فاكر نفسك إيه؟ إزاي تعاملها بالأسلوب دا؟ انت معملتش حساب إن دي طفلة حتى؟ عملت إيه لكل دا؟ زين بعصبية: اسأليها عملت إيه في كريم. لو حصله حاجة مش هرحمكم انتو فاهمين؟ ومش... قمر: كريم!! طلعت تجري على تونة: انتي عملتي إيه في كريم ياتونة، ردي. تونة بتعيط: أنا.. أنا معملتش.. مكنش قصدي والله ياقمر، صدقيني مش بكذب.

قمر حضنتها: اهدى طيب يا حبيبتي، محدش هيقدر يعملك حاجة، أنا جنبك. اهدى. أنا عاوزة أعرف بس إيه وداكي لكريم. ليل: أنا هقولك يا قمر. قمر: انتي عارفة؟ قولي ساكتة ليه؟ *** كريم في الأوضة بيعيط وبيصص على الرسمة ومتعصب أوي من تونة، فاكر إنها قصدها تضايقه وتبوظ له الرسمة. لحد ما شاف الشيكولاتة واقعة في الأرض وعليها ورقة مكتوب فيها (شكراً على رسمتك ليا يا كريم)

كريم بدأ يفهم إن تونة مجتش مخصوص عشان تضايقه، وإنها جت عشان تديله شيكولاتة. وزعله منها قل. زين دخل حضنه: خلاص يا حبيبي، كل حاجة وحشة هتنتهي. هيرجعوا مكان ما جم ومش هسمح بوجودهم هنا تاني أبدًا. كل حاجة هترجع زي ما كانت وأحسن لما يمشوا. كريم أتضايق من كلامه وزقه ونزل يجري. زين: كريم.. كريم. *** تونة: والله دا اللي حصل ياقمر. ليل: وهي هتبوظ رسمة مامته ليه يعني؟ أنا بنفسي عطيها الشيكولاتة.

قمر: خلاص خلاص، مصدقاكم. قوموا يلا حضروا حاجتكم عشان هنمشي من هنا. ليل: هنروح فين؟ إحنا مالناش مكان غير دا. قمر: اسمعي الكلام ياليل، أنا مش هقدر استحمل أشوف البني آدم دا تاني. قومي لمي حاجاتك. ليل: طب استني الصبح، لما عمو أحمد يقوم نقول. قمر: لا مش هستنى عشان مش هيخليني أمشي. وأنا مبقتش قادرة استحمل. قومي بقا. ليل: حاضر ياقمر.

قمر قامت تحضر الحاجة وبدأت تعيط على اللي بيحصل معاها هي وأخواتها ومش عارفة تعمل حاجة. الباب خبط، راحت تفتح وبتمسح دموعها. كريم دخل وزين واقف بعيد. تونة جت تجري وبتعيط: والله يا كريم مكنش قصدي، أنا كنت عاوزة أديك الشيكولاتة، راحت الماية وقعت غصب عني والله والله. متزعلش مني. كريم مسح دموعها وابتسم لها. تونة بفرحة: يعني انت مش زعلان مني؟ بصي ياقمر، هو مش زعلان مني خلاص.

قمر فرحت وحضنت كريم: أنا آسفة يا حبيبي لو كان وجودنا اتسببلك في زعل، بس والله هي مكنش قصدها. أنا محبش أشوفك زعلان أبدًا. انت عارف غلاوتك عندي يا كريم. وزين واقف بيتفرج ومستغرب من طريقتها مع كريم وطريقته هو كمان معاها، باين إن هو بيحبها. ليل: أنا حضرت حاجتي يا قمر. قمر: ماشي يا ليل. كريم يا حبيبي خليك قاعد مع تونة، لحد ما أحضر حاجتي أنا كمان. كريم مسك إيدها قبل ما تمشي وبصلها بزعل.

قمر: أنا همشي بس هاجي أطمن عليك. مش هسيبك. كريم هز رأسه بالرفض وفضل ماسك إيد قمر. ليل: دا عاوز إيه دا؟ أنا مش فاهمة. قمر: مش عاوزنا نمشي. ليل: بجد؟ طب أهو بقا حد طايقنا وعاوزنا نقعد. خلينا. قمر: وبنسبة لطائر البطريق اللي بيتلكك لنا دا هستحمله إزاي؟ زين سمعها وهو واقف بعيد ورفع حاجبه، وكريم شافه وكتم الضحك. ليل: ياستي كبري دماغك منه. عمو أحمد عاوزنا نبقا نقعد. وبعدين إحنا هنمشي في الوقت دا إزاي لوحدنا.

تونة: أنا عاوزة أفضل هنا يا قمر، ومش هعمل حاجة تانية خالص. قمر: أمري لله، هقعد عشان خاطر كريم. ليل: بصي يا تونة، هتقعدي مش عشاننا إحنا. قمر: بس عندي شرط قدامكم كلكم أهو. قريب هنمشي من هنا. ليل: يوووه، هنرجع الحارة تاني؟ قمر: لا مش هنرجع الحارة. أنا هدور على بيت تاني. ليل بفرحة: بجد ياقمر؟ طب هتجيبي فلوسه منين؟ قمر: ربنا يحلها. متشغليش بالك. يلا يا كريم روح على أوضتك عشان تنام يا حبيبي. كريم خرج.

قمر: وانتي وهي يلا انتوا كمان على النوم. مش عندك كلية بكرة؟ ليل: لا أنا مش هروح بعد اللي حصل فيا دا. قمر: نعم ياختي؟ دانتي تروحي وتحطي صوبعك في عينها كمان. دا هي اللي المفروض تتكسف مش انتي. ليل: ماشي ياقمر. تصبحي على خير. قمر: يلا، وانتي من أهله. *** كريم ماشي جنب زين. زين: مبسوط دلوقتي؟ يعني أنا أعمل كل دا عشانك. وفي الآخر انت تصالحهم وأطلع أنا غلطان؟ كريم: ...

زين: وبتزقني كمان عشانها. خلاص حبك ليا قل بعد ما ست هانم دي جت وبقيت تحبها هي أكتر؟ كريم: ... زين: أنا مش فاهم هي عملالكم إيه عشان الكل يحبها كدا؟ مش عارف العيب فيا ولا فيها بصراحة. كريم: ..... زين: عمومًا، أنا مش زعلان منك. انت طلعت أجدع مني. أنا اتغبيت وكنت همشيهم في الوقت دا لوحدهم. بس لما شوفتك بالشكل دا مقدرتش استحمل. وبصراحة مصدقت انفجر فيها. يلا اطلع نام انت بقا قبل ما يصحوا. كريم ابتسم ومشي.

وزين فضل قاعد منمش. *** سامح: نجلاء، اصحي يانجلاء. نجلاء: مين؟ سامح؟ انت جيت امتى؟ سامح: لسه واصل أهو. نجلاء: طب يا حبيبي تعالي ناملك شوية قبل ما أستاذ أحمد يصحى. سامح: لا مش عاوز. اصحي بس انتي. عاوز أتكلم معاكي. نجلاء: خير يا سامح، قول. سامح: بنتك جالها عريس. نجلاء بفرحة: بجد؟ دا يبقا مين بقا؟ سامح: ابن صفاء. نجلاء: صفاء؟ صفاء مين؟ سامح: لا ركزي معايا شوية. صفاء أخت جوز روحية أختي. فاكرها ولا؟

نجلاء: ااه صفاء. بس أسمع إن ابنها في الجيش. سامح: ماهو هيخلص جيشه خلاص. نجلاء: طب وانت رأيك إيه؟ سامح: هو أنا اللي هتجوز ولا البت؟ نجلاء: لا أقصد يعني انت شايف إيه؟ سامح: أنا عن نفسي شايف إنهم ناس محترمة ومناسبة، وروحية كمان بتقول الواد محترم. نجلاء: وكمان كنزي هتتخرج السنة دي، يعني مافيش حاجة نرفض عشانها. يبقا تتصل بأختك دلوقتي تقولها موافقين. سامح: إيه اللي بتقوليه دا يا نجلاء؟ مش لما ناخد رأي البت الأول؟

نجلاء: وإيه اللي هيخلي البت ترفض؟ سامح: نسألها بردك واللي تقوله هيمشي. هو أنا مهصدق يعني. كنزي ألف واحد يتمناها. نجلاء: ماشي يا خويا، بس أنا عاوزة أفرح ببنتي. سامح: هنفرح لما ربنا يأذن. المهم دلوقتي لما تصحى خديها واحدة واحدة كدا وقوليلها وشوفي رأيها إيه. نجلاء: وأنا هستنى لما تصحى. دلوقتي نصحيها. سامح: لالا، سبيها نايمة. لما تصحى براحتها قوليلها. قومي حضريلي لقمة أكلها، على بال ما أستاذ أحمد يصحى. نجلاء: من عنيا.

سامح: تسلميلي. *** صافي: انتي منمتيش؟ سهر: ومين يجيله نوم بعد اللي حصل امبارح؟ صافي: ياما نفسي أمسكهم كلهم أولع فيهم. وبالذات البت الصغيرة دي. آآآه منها، أنا راسي هتنفجر من امبارح. ورجلي علمت من عضتها. سهر: عيلة صغيرة تعمل فيكي كدا؟ صافي: دي عيلة دي! لا وكله كوم، وأنكل أحمد كوم. انتي شوفتي نصرهم علينا إزاي؟ دا شوية وكان هيطردنا. سهر: ماهو أنا مشيت قبل ما شكلنا يبقا وحش أكتر من كدا. صافي: وهنعمل إيه؟

أنا لازم آخد حقي. أنا هعرف بابا وهو يتصرف مع الأشكال دي. سهر: حيلك حيلك. تعرفي مين؟ انتي هبلة. انتي عارفة فاروق لو عرف إن حصلك حاجة هيتجن. وهيروح يتخانق مع أحمد، واللي شوفتيه من أحمد واضح إن البت دي مكانتها كبيرة عنده، يعني ممكن يخسروا بعض عادي جدًا عشانها. وساعتها بقا يا حلوة تنسي أستاذ أسر بتاعك دا خالص. صافي: لا طبعًا مش هنسى أسر، مقدرش. سهر: يبقا تسكتي خالص ومتبينييش حاجة. لحد ما أشوف أنا هعمل إيه، مفهوم؟

صافي: حاضر. بس أنا راسي وجعاني أوي. سهر فتحت الدرج وطلعت علبة برشام: خدي دا مسكن حلو كنت باخده. هيريحك. صافي: متشكرة أوي يا سهورة يا حبيبتي. أنا مش عارفة ليه كل العمة ميبقوش حلوين زيك كدا. سهر: حبيبتي، ربنا يخليكي ليا. صافي: أنا هاخد المسكن دا وهروح أنام. سهر بابتسامة: بالشفاء يا حبيبتي. بالشفاء. *** فريال: زومي، اصحي يا حبيبي. الضهر هيأذن. حازم بيتمطع: صباح الخير يا ماما.

فريال: صباح النور يا حبيبي. يلا أصحى الفطار جاهز. افطر معايا قبل ما تروح شغلك. حازم: لا شغل إيه؟ أنا واخد إجازة النهارده. هروح أشوف زين. فريال: ماله زين؟ مش كنت معاه امبارح في عيد الميلاد؟ حازم: اسكتي يا ماما ع اللي حصل امبارح. عيد الميلاد اتحول لمعركة. فريال: يا ساتر يا رب، معركة إيه؟ حازم: أنا هدخل آخد شاور بسرعة، ولما أخلص أحكيلك. فريال: طب استنى بس عاوزك. حازم: إيه يا ماما؟ خير؟ محتاجة حاجة؟

فريال: آه، هي حاجة واحدة محتاجاها. حازم: إيه؟ فريال: نفسي أشوف عيالك قبل ما أموت. حازم: بعد الشر عنك يا فوفا. فريال: لا مش شر، الموت علينا حق. وأنا عاوزة أفرح بيك. عجبك قعدتك دي؟ اللي قدك متجوزين ومخلفين وعيالهم في المدارس كمان. حازم: فين دا؟ ما زين أهو. فريال: ماليش دعوة بزين، أنا ليا بيك. عاوزة أفرح بيك. حازم: يا حبيبتي إن شاء الله نفرح كلنا، بس هي تيجي. فريال: وهي اللي بتيجي ولا إحنا اللي بنروح لها؟

لو هتستنى يبقا مش هتتجوز. سيبني أنا أشوفلك واحدة. البنات كتير قرايبنا وجيرانا. سيبني أنقيلك. حازم: لا يا ماما ونبي سيبيني أنا أختار بنفسي. فريال: سيبتك كتير أوي. حازم: حبة كمان عشان... فريال: ماشي يا حازم. بس يكون في علمك لو مشوفتش انت واحدة بسرعة، هترجع تلقيني عازمة الناس وجايبة المأذون والعروسة وهحطك تحت الأمر الواقع. أه، أنا جبت أخري منك. حازم بيضحك: قادرة وتعمليها. فريال: مبهزرش يا حازم. اديني نبهتك، وانت حر بقا.

حازم باسها: ونبي قمر وانتي متعصبة كدا. حاضر يا ستي هفرحك بيا إن شاء الله. فريال بفرحة: بجد ياحازم؟ طب امتى؟ امتى؟ قولي وفرحني. حازم: مش عارف امتى، بس هيحصل إن شاء الله. تسمحيلي أدخل الحمام بقا؟ فريال: ادخل يا حبيبي. فريال بتكلم نفسها: طالما قال كدا يبقا أكيد فيه حد في دماغه. أكيد. يارب يسعدك يا ابني. *** ليل: قمر، أنا راحة الكلية. قمر: خلي بالك من نفسك يا حبيبتي. ليل: حاضر. يلا سلام. ليل ماشية، عربية أسر وقفت قصادها.

ليل من غير ما تبص له: أفندم؟ أسر: اركبي. ليل: لا. أسر نزل من العربية: عاوز أتكلم معاكي. ممكن؟ ليل: مش عاوزة أتأخر ع الكلية. أسر: مش هأخرك. اركبي يلا. ليل ركبت العربية ومشوا. وقمر متابعاها من بعيد. تونة: بتعملي إيه؟ قمر: يا ختااي! بتطلعي منين؟ انتي مش كنتي نايمة؟ تونة: حاجة كدا قالتلي اصحي يابت ياتونة، عشان تشوفي الكارثة دي. قمر: هو فيه كارثة غيرك هنا؟ تونة: بقا كدا ياقمر؟ بقا أنا أقولك، عشان تمسكيها تديها قلمين؟

وانتي واقفة تتفرجي عليها وهي بتركب مع الواد المز دا العربية وتجيب لنا العار؟ قمر: عار إيه يا أم لسانين انتي؟ وبعدين دي ركبت العربية معاه، مش طلعت أوضته وحطيتله شيكولاتة؟ تونة: ها؟ قمر: أيوة. اعملي نفسك من بنها بقا. تونة: مين أنا؟ قمر: لا أنا. حسابك معايا بعدين. يلا عشان تفطري قدامي. تونة: حاضر. *** ليل: نعم، عاوز إيه؟ أسر: عاوز أفهم إيه حصل امبارح. ليل: لا والله متعرفش حصل إيه؟ أسر: لو أعرف هسألك ليه؟

ليل: صح، مالكش تسألني. روح اسأل الحلوة بتاعتك. عن إذنك. أسر مسك إيدها قبل ما تنزل: استني. أنا لسه مخلصتش كلامي. أنا مش هكلمها ولا هسألها. أنا عاوز أعرف منك انتي. صافي هي اللي زقتك امبارح في البسين ولا لأ؟ ليل: مش صافي الزفتة اللي كانت معاها بامر منها طبعًا. أسر: وهما يعملوا معاكي كدا ليه؟ ليل: بسببك. أسر: بسببي؟ ليه؟ أنا مقولتش لحد يزقك.

ليل: مقولتش لحد يزقني، أه. بس روحت عرفت الحلوة بتاعتك إني كدبت عليك وإني من حارة. أسر: أنا... والله ما حصل. محدش عرف الموضوع دا غير وليد، ودا لأنه صاحبي. ووليد استحالة يقولها. ليل: أه فعلًا استحالة يقولها. وهي عرفت من الهوا؟ عمومًا ميهمنيش تعرف منك ولا من غيرك. انت نفسك متهمنيش، لا انت ولا هي. وافهمها إنها تبعد عني أحسن لها. سلام. أسر: ليل.. ياليل.. أوووف. طلع موبايله واتصل بوليد. أسر: أيوة.. انت فين؟ في البيت؟

تمام، أنا جيلك. سلام. *** كنزي: صباح الخير. نجلاء وعايدة: صباح النور. كنزي مسكت خيارية تأكلها: أنا جعانة أوي. حطيلي أكل. نجلاء: عنيا يا حبيبة قلبي. أحطلك إيه؟ كنزي باستغراب: حبيبة قلبك؟ نجلاء: ونور عيني كمان. كنزي: حيث كدا بقا، انتي تعمليلي بيض بالعجوة من إيدك الحلوة دي. نجلاء: بس كدا، انتي تأمري. كنزي: آمر! هو فيه حاجة يا ماما؟ نجلاء: حاجة؟ حاجة إيه؟ هو أنا عشان هعملك الحاجة اللي تحبيها هيكون فيه حاجة؟

كنزي: مش مرتاحة. عايدة: بصراحة كدا يابت يا كنزي، انتي جالك عريس. كنزي: نعم؟ نجلاء: بس يللي تتشكي ف لسانك، انتي اسكتي. تعالي يا كوكي معايا نتكلم. كنزي: عريس إيه يا ماما اللي عايدة بتقول عليه؟ نجلاء حضنتها: كبرتي يا كنزي، وأخيرًا هفرح بيكي. هتوحشيني والله. كنزي: في إيه يا ماما؟ متفهمينيني. نجلاء: عمتك فتحت أبوكي ف موضوع خطوبتك ع ابن صفاء. الموضوع واقف ع موافقتك يا جميل. كنزي: ابن صفاء مين؟ خالد؟

نجلاء بفرحة: أيوة خالد. طلبك بالاسم باينه بيحبك. كنزي: بس أنا مبحبهوش. نجلاء: مع الوقت ياحبيبتي هتحبيه. كنزي: لا يا ماما، لا. أنا أصلًا مش عاوزة أتجوز. نجلاء: ليه يعني؟ هتخليكي جنبي؟ كنزي: أه بالظبط كدا. عاوزة أفضل جنبك. هو أنا لحقت أشبع منكم عشان ترجعوني؟ نجلاء: لا يا حبيبتي وانتي عشان تفضلي جنبي متتجوزيش. لا، أنا عاوزة أطمن عليكي. أنا ليا غيرك. كنزي: وانتي هتطمني عليا لما أكون أنا في حتة وانتو في حتة؟

نجلاء: هتكوني مع جوزك. وعمتك هناك. كنزي: أنا لا عاوزة دا ولا دا. أنا عاوزاكم انتو تكونوا جنبي. ومش هتجوز وأرجع وأسيبكم. عاوزين تفرحوا بيا؟ افرحوا بيا هنـا. نجلاء: طيب أقولك. أنا ممكن أكلم سامح أخليه يكلمهم ويقنعهم تسكنوا هنا وتبقي جنبنا. كنزي: ها؟ لا مانا مش عاوزة خالد أصلًا. نجلاء: اومال عاوزة مين ياعين أمك؟ كنزي: مش عاوزة حد يا ماما.

نجلاء: لا أنا مبقتش فهماكي. عملتي حجة المسافة ومش عاوزة تبعدي عننا، بس الموضوع مش كدا. الحكاية فيها آن. كنزي: مافيش حاجة يا ماما. بس أنا مش عاوزة دلوقتي. نجلاء: لا، لما ييجي أبوكي بقا. هو يكلمك عشان أنا كدا هتشلك. كنزي: طب اعمليلي البيض بالعجوة طاه. نجلاء: مفيش بيض بعجوة. هو بيض سادة. إن كان عجبك. كنزي: يوة يوة. رجعتي ف كلامك ف ثانية. مش كنتي حبيبتي؟ نجلاء: حبك برص. اسكتي انتي قهراني. كنزي: أنا عملت حاجة يا ماما؟

نجلاء: عايدة اعمليلها بيض. كنزي: كمان هتخليها هي تعمل؟ نجلاء: مش عجبك تعالي انتي اعملي. كنزي: أهئ أهئ. كل دا عشان سي زفت خالد. مش عاوزة أكل خالص. هاع. عايدة: هي قالتلك إيه؟ نجلاء: مش موافقة. وشكلها هتتعبني معاها وأنا مش ناقصة مناهدة. عايدة: وقالتلك مش موافقة ليه؟ نجلاء: شوية عشان المسافات، وشوية مش عاوزة دلوقتي. مش فاهملها حاجة. عايدة: أيوة أيوة. تلقي فيه حد بالها ياختي. إزاي مش فاهمة؟

نجلاء: لا طبعًا. إحنا معندناش الكلام دا وهي عارفة. عايدة: والله أنا قولت أفهمك بس. شوفي انتي بقا. نجلاء بدأت تفكر في كلام عايدة. نجلاء: وسعي كدا. عايدة: انتي هتعملي إيه؟ نجلاء: هعملها البيض بالعجوة. اومال هسيبها من غير ما تأكل يعني. *** أسر: اصحى يلا. انت ليك نفس تنام؟ وليد: في إيه يا أسر؟ مالك؟ أسر: انت اللي روحت قولت لصافي ع إن ليل كدبت عليا. وليد: يوووه يا أسر، قولتلك قبل كدا. أنا مبقولش حاجة عنك لصافي، افهم.

أسر: اومال مين؟ وليد: أنا أش عرفني؟ هو مافيش غيري يعرف يعني؟ أسر: أنا محكتش لغيرك أصلًا. وليد: وأنا مقولتش لحد حاجة. مش مصدقني، متبقاش تحكيلي حاجة طالما بتشك فيا. أسر: مش بشك فيك، بس مش عارف بجد ومخنوق. طب قولي عرفت منين؟ فكر معايا إزاي صافي تعرف إن ليل من حارة ومش قريبتنا زي ما فهمتها؟ وليد: مانت يا فالح لو بتفكر هتفهم إن عرفت من سهر. أسر: سهر؟ وهي تعرف منين؟ سهر هي كمان؟ وليد: شكلك شيلت زين من حساباتك خالص.

أسر: يعني زين حكى لسهر؟ وليد: وسهر حكت لصافي واتفقوا ع ليل، والباقي انت عارفه. أسر: يعني أنا اللي شربت الليلة. وليد: ليلة إيه؟ مش فاهما. أسر: يعني ليل مقتنعة إن أنا اللي عرفت صافي. ومش مصدقاني. وليد: وفيها إيه؟ انت مش قولت هتكبر دماغك منها؟ أسر: أه هكبر دماغي منها طبعًا. بس بردك مبحبش أتفهم غلط. وليد: ماتجيلي دوغري يا أسر. مش مرتاح لحوار أتفهم غلط دا. أسر: مافيش حاجة. لو فيه هقولك. وليد: وأنا هستنى أسمعك.

أسر: قولي انت عملت إيه مع سارة. وليد: هعمل إيه يعني؟ أسر بيتخن صوته بترق: هعمل إيه يعني؟ إيه؟ يلا التناحة دي. وليد: في إيه؟ مالها سارة؟ وصلتها امبارح وخلصنا. أسر: مش تطمن عليها يا بني تعرف كويسة النهاردة ولا لأ؟ وليد: وأطمن ليه؟ أنا مالي. وهي عملت إيه عشان تبقى مش كويسة أصلًا؟ فكك فكك. عاوزين نسهر بليل، جهز نفسك بقالنا كتير مسهرناش.

أسر: لا بقولك إيه، خليها يوم تاني. البيت متلبش لوحده أصلًا. مش ناقصة خناقات تاني مع أبويا. وليد: ماشي، ظبط أمورك وقولي. أسر: ماشي. أنا هخلع أروح أشوف الكلية عاملة إيه. وليد: ابقا سلملي ع الكلية. *** كنزي ماشية متضايقة في الجنينة وحازم جاي عليها. حازم: كنزي، عاملة إيه؟ كنزي: كويسة. حازم: هو انتي بتعيطي؟ يا وشك مقلوب. كنزي: أه، عن إذنك بقا عشان ماما قالتلي عيب أقف معاك. حازم باستغراب: ماما؟ وعيب؟ انتي كام سنة يا كنزي؟

كنزي: عندي 22 سنة. حازم: اومال طريقتك طريقة واحدة عندها 6 سنين ليه؟ كنزي: يا سلام؟ هو عشان بسمع كلام ماما أبقى صغيرة؟ حازم: لا مقصدش، بس أصل... ولا أقولك. مع لينا. انتي مالك بقا متضايقة ليه؟ كنزي: ماما مردتش تعملي بيض بالعجوة. حازم: وانتي مبتعرفيش تعملي لوحدك يا صغنن؟ كنزي: مش بيطلع حلو زي ما هي بتعمله. أنا بحبه من إيدها. حازم: طيب كلي أي حاجة، يمكن تعبانة؟ مش هتقدر تعمل؟

كنزي: لا مش تعبانة. كانت هتعملي، بس كله من الزفت اللي اسمه خالد، هو اللي خلاها متعمليش. حازم: مين خالد دا؟ أخوكي؟ كنزي: لا دا العريس. نجلاء طالعة بالأكل شافتهم واقفين، اتضايقت وراحت عليهم. حازم: عريس إيه؟ كنزي: العريس ال... نجلاء قطعت كلامها: البيض بالعجوة أهو. كنزي حضنتها: متشكرة أوي يا ماما. أنا عارفة إني مش هيهون عليكي أبدًا. لسه هتأكل. نجلاء: انتي هتاكلي هنا ولا إيه؟ ادخلي جوا يلا. كنزي: حاضر يا ماما.

نجلاء: منور ياحازم. حازم: بنورك يا دادة. هو زين صاحي؟ نجلاء: أه صاحي. اتفضل. حازم: خليكي، أنا هدخل. متتعبيش نفسك. نجلاء: زي ما تحب. عن إذنك. حازم حس إنها اتضايقت من وقفته مع كنزي. *** نور: عايدة، ونبي اعمليلي قهوة. عايدة: حاضر يا نور يا هانم. نور: صباح الخير يا كيمو. انت بترسم صورة مامي تاني؟ لـ موبايلها رن. نور: الو؟ مين معايا؟ أسر: عاملة إيه يا نور؟ نور اتوترت وقامت من مكانها، بعدت عن كريم، وهو لاحظ. نور: عاوز إيه؟

أسر: قولتلك إني عاوز أتكلم معاكي. نور: كلامنا خلص من زمان. أسر: مخلصش يانور، لو سمحتي وافقي. نور: ماشي، بس هي ساعة واحدة بس وهمشي. أسر بفرحة: موافق. أنا هلبس وأجي آخدك. نور: لا.. أنا هاجي بنفسي. أسر: زي ما تحبي. المهم نتكلم. نور: ماشي يا أسر. باي. أسر: باي. *** نجلاء: أنا قولتلك إيه؟ انتي مب تسمعيش الكلام ليه؟ كنزي: والله يا ماما أنا كنت همشي مش هقف معاه، بس هو كان بيتكلم.

نجلاء: تسيبيه وتمشي بردك. يتكلم مع نفسه مالكيش دعوة. والا قسما عظما اشتكي لأبوكي وهو يتصرف بقا عشان أنا تعبت. كنزي: والله يا ماما معملت حاجة. وحاضر مش هقف معاه تاني خالص. نجلاء: لما أشوف. *** حازم: معقولة يازين؟ كنت عاوز تمشيهم من البيت في وقت زي دا؟ زين: اللي حصل بقا. كنت خايف ع أخويا. انت عارف يا حازم، مصدقنا بقا أحسن من الأول. حازم: بردك يازين، دول بنات. إزاي كنت هتعمل كدا؟ افرض حد طلع عليهم ولا حصلهم حاجة؟

زين: مش عاملة فيها بميت راجل. تورينا هتعمل إيه بقا. حازم: أنا مش فاهم انت حطيتها في دماغك ليه. وبتتلكك. الموضوع مش موضوع أخوك. انت كل حاجة تحصل مابتصدق تمسك فيها عشان يمشوا. ماتسيبهم قاعدين ف حالهم هنا. زين: مش حاطتها في دماغي. بس انت عارف أنا مبحبش حد قد أهلي ومش هسمح لحد يأذيهم. وطبيعي مكنتش مرتاحلهم. حط نفسك مكاني، ترضى ناس غريبة يعيشوا في بيتك؟

حازم: والله لو يوافقوا أخدهم يعيشوا معانا حتى، أبقى مطمن ع أمي ومتبقاش لوحدها. زين: انت بتتكلم جد؟ حازم: أه بتكلم جد. فيها إيه يعني؟ مش أحسن ما يترموا في الشارع؟ وبعدين هما في أزمة، المفروض تقف جنبهم. زين: وأنا مالي؟ أقف جنبهم ليه من باقي أهلي؟ حازم: مش أبوك قال إنهم بنات صاحبه؟ زين: وأنا مش مقتنع. أنا عديت الموضوع وخلاص. حازم: بلاش دي. مش اللي انت مش طايقها دي أنقذت أختك؟ زين: ما يمكن تكون هي أصلًا اللي عاملة كل دا.

حازم: انت مصمم تكرهها وخلاص. متنساش إن أنا ظابط وليا نظرة في الناس. والبنت دي شكلها محترم وجدعة وبتحب أخواتها بجد. مش شايف عملت إيه امبارح عشان أختها؟ زين: شوف، انت بتفكرني بإفعالها إزاي. عجبك اللي عملتوه في سهر؟ حازم: أه عاجبني. بنت جدعة خدت حق أختها. زين: حقها من إيه؟ محدش جه جنبها. حازم: ماهي مش مجنونة يازين. ولا البت الصغيرة بتكدب. ولا كلام سهر دخل دماغي أصلًا. إيه هيودي ليل للبسين أصلًا غير لو حد زقها؟

وايه كان مواقفها معاهم وهي متعرفهمش؟ فكر شوية. هما اتفقوا ع ليل، وأهي قمر خدت لها حقها. زين: أنا زهقت. كل لما أكلم حد يدافع عنها. مش فاهم عملالكم إيه بجد. دا حتى كريم، راح لها امبارح ومخلاهاش تمشي. حازم: كل دا ميأكدلكش إنها إنسانة كويسة؟ وإنك ظالمها؟ زين: كويسة ولا مش كويسة لنفسها. أنا هبعد عنها وخلاص. حازم: خير ما عملت والله. ريحت. زين: انت فاضلك دقيقة وتعملها تمثال هنا. حازم بضحك: لا مش للدرجة دي.

زين: يا عم اسكت. راحة فين يانور؟ نور: خارجة مشوار كدا ومش هتأخر. متقلقش. زين: طيب خلي بالك من نفسك. نور: حاضر. زين: ومتبقيش تروحي أماكن شعبية لتجيلنا بإيدك فيها 3 كمان. حازم: مافيش فايدة فيكي. نور: ماشي يا زين. باي. زين: باي يا حبيبتي. *** ليل: انت تاني؟ أسر: أه تاني وتالت ورابع. ليل: عاوز إيه؟ أسر: عاوز أفهمك إني مش أنا اللي قولت لصافي. ليل: يبقا وليد يعني؟ انت السبب بردك. أسر: ولا وليد. صافي عرفت من حد تالت.

ليل: أه مانت قايل لكل الناس. أسر بعصبية: يوووه بقا! افهمي أنا مش السبب. ليل: متتعصبش عليا. أسر: تمام، مش هتعصب. أنا اهو هادي خالص. ممكن تسمعيني بقا. ليل: اتفضل. أسر: بصي ياستي، صافي عرفت من عمتها سهر. ليل: الحرباية اللي زقتني؟ أسر: بالظبط. ليل: وهي دي هتعرف منين؟ أسر: من زين أخويا. عشان هما شبه بيحبوا بعض. فممكن يكون حكالها ع وجودكم. وهي حكت لصافي. يعني مش مني. ليل: وأنا إيه يثبتلي الكلام دا؟

أسر: أجيبلك إمضة صافي ع الكلام دا ولا أعمل إيه يعني؟ ليل: متعملش حاجة. قولتلك ولا انت ولا هي تهموني. أسر بعصبية: ولا انتي تهميني. أنا بس مش عاوز أتفهم غلط. ليل: افهم صح ولا غلط مش أنا مهمكش خلاص. ابعد عن طريقي بقا عشان عاوزة أمشي. أسر: اركبي أنا هوصلك. ليل: لا لا لا مش هركب. أسر: أحسن بردك، يكش تتخطف. أنا غلطان. ليل زقته ع العربية: طب عديني بقا أروح أتخطف. *** هدي: سائر، انت خارج حبيبي؟ سائر: أيوة. فيه حاجة؟

هدي: رايح فين؟ سائر: انتي هتحققي معايا ولا هتحسبيني ع خروجاتي؟ هدي: أنا مقصدش بس... سائر: اسمعي بقا. مش معني إني غيبت سنين أبقى نسيت. أنا منستش ومش هنسا. ولا هبقى زي صافي تأقلمت مع الحكاية عشان كانت عيلة. أنا مجبور بس مش أكتر. ف ياريت ياررريت خليكي ف حالك وابعدي عني. وكفاية إنك كنتي سبب في حاجات كتير وحشة ليا. عن إذنك. هدي عيطت من كلامه وطلعت ع أوضتها. *** الباب بيخبط. قمر بتغسل المواعين: بت ياتونة افتحي. انتي يابت.

طلعت تشوفها فين. قمر: ملاك نايمة؟ ملاك يا أخواتي. الباب خبط تاني. قمر: أيوة استنى جاية. فتحت. قمر واقفة مستغربة. أسر: عاملة إيه؟ قمر: أنا كويسة. لو جاي لتونة، ف تونة مش موجودة. أسر فهم قصدها: لا، أنا مش جاي لحد غيرك. قمر باستغراب: عاوزني أنا! خيير؟