رواية حكاية قمر الفصل التاسع 9 - بقلم ياسمين علي

قمر واقفة مستغربة. اسر: عاملة إيه؟ قمر: أنا كويسة.. لو جاي لتونة، فتونة مش موجودة. اسر فهم قصدها: لا، أنا مش جاي لحد غيرك. قمر باستغراب: عاوزني أنا! خيراً؟ اسر: خير، متقلقيش.. بس تعالي معايا. قمر: أجي معاك فين؟ اسر: تعالي، هنركب العربية وهنمشي بعيد عن الفيلا. قمر: بعيد عن الفيلا ليه.. هو في إيه يا أستاذ اسر؟ ماتنطق. اسر: يا ستي قولتلك متقلقيش.. كل الحكاية مش عاوز ليل تشوفنا مع بعض. قمر بتبص حواليها: ليل.. هي فين ليل؟

اسر: متقلقيش، أنا اطمنت عليها إنها ركبت وزمانها ع وصول.. فـ ياريت تيجي معايا قبل ما توصل وتشوفنا. قمر: طيب، اتفضل وأنا جاية وراك. اسر: ماشي، متتأخرش. *** أحمد: مساء الخير يا عايدة. عايدة: مساء النور يا بيه.. تأمرني بحاجة؟ أحمد: هما الولاد هنا؟ عايدة: كريم بس اللي في أوضته يا بيه. أحمد: ونور فين؟ عايدة: خرجت من حوالي ساعة كدا وزين بيه خرج وراها.. وأسر من الصبح مجاش.. أظاهر كدا في الكلية. أحمد: طيب، روحي شوفي شغلك.

عايدة: تحب أحضرلك العشا؟ أحمد: لا، لما يجوا. عايدة: تحت أمرك يا بيه، عن إذنك. *** قمر ركبت العربية مع اسر. قمر: خير يا أستاذ اسر؟ اسر: مبدئياً، إحنا نشيل كلمة "أستاذ" دي.. مالهاش لازمة. قمر: يا أخويا، ودا وقته؟ ماتنطق. اسر: إيه التحول دا؟ قمر: ماهو انت مجرجني كدا وأنا مش فاهمة حاجة.. وأيشي موضوع مهم، وأيشي مش عاوز ليل تشوفنا.. هو في إيه؟ اسر: إيشي!! طيب، أنا هدخل في الموضوع على طول. قمر: ها.. اخلص.

اسر: بصي يا ستي، أنا خدت بالي من نظراتك ليا ولـ ليل.. وحاسس بخوفك عليها. قمر: طب الحمد لله إنك طلعت عندك دم وبتحس كدا. اسر: احم احم.. ممكن أكمل؟ قمر: اتفضل.. كمل. اسر: أنا جيت علشان أقولك إنك تطمنيني.. أنا مش عاوز آذيها. قمر: أومال عاوز إيه؟ اسر: بصراحة، أنا أول لما شوفتها أعجبت بيها.. وبعدها فيه موقف حصل بينا كدا خلاني مبقاش طايقها. قمر: معلش، بس أنا مش فاهمة حاجة.. ممكن تحكي من الأول؟ اسر: هحكيلك.. ***

نور سلمت على سائر ببرود وقعدت. سائر: تحبي تشربي إيه؟ نور: شكراً، مش عاوزة. سائر للجرسون: طيب، اتفضل أنت دلوقتي. نور: ممكن أعرف إيه الكلام اللي عاوز تقوله؟ سائر مسك إيدها: عاوز أقولك إنك وحشتيني يا نور. نور شدت إيدها: لو سمحت يا سائر.. اللي بتعمله دا مالهوش لازمة. سائر: أنا مش بعمل حاجة.. انتي وحشتيني بجد. نور: وأنا قولت مالهوش لازمة!! سائر: حرام عليكي يا نور.. أنا راجع مخصوص علشانك أنتِ. نور: حرام عليا أنا!!

وراجع علشاني؟ ولما أنت راجع علشاني مشيت وسبتني ليه من الأول؟ سائر: أنا مسبتكيش.. انتي عارفة أنا مشيت ليه. نور: لا، سبتني يا سائر. سائر: مسبتكيش.. بس مكنتش هقدر أعيش هنا وأبقى مرتاح.. وانتي عارفة ليه كويس أوي. نور: عارفة ليه.. بس أنا كان ذنبي إيه في كل دا؟ أنت مفكرتش فيا.. أنت فكرت في نفسك وفي راحتك.. سألت نفسك هل أنا هكون مرتاحة ولا لأ.. طبعاً لأ، المهم راحتك.

سائر: صدقيني، مكنش عندي حل تاني.. أنا فقدت أمي.. وفجأة لقيت بابا جايبلي واحدة تانية وبيفرضها عليا.. وعاوزها تاخد مكان أمي.. مكنش قدامي حل غير إني أبعد عنه. نور: كان ممكن تواجه كل دا بس أنت معملتش كدا.. أنت بتهرب من غلطك.. واخد باباك وجوزاه شماعة تعلق غلطك عليه.. وأنا مكنش ليا ذنب وخلتني مذنبة زيهم.. فاكر آخر مقابلة بينا لما اعترضت على سفرك علشان مش عاوزك تبعد عني.. قولتلي إيه؟ سائر سكت.

نور: قولتلي انت أناني.. مش بتفكري غير في نفسك.. عاوزة راحتك وسعادتك على حسابي.. مشيت وسبتني من غير ما تسمعني ٨ سنين معرفتش عنك حاجة فيهم.. قررت تبعد عن الكل.. حتى أنا.. جاي دلوقتي تقول راجع علشاني؟ بعد إيه؟

سائر: انتي عندك حق في كل كلمة.. أنا خدتك بذنبهم.. أنا كنت كاره حياتي.. حاولت أبعد.. قولت أنسى الكل.. مكنتش عاوز حاجة تفكرني بمصر.. وحاولت أنساكي.. بس معرفتش أنساكي.. كنت هكمل دراستي وأرجع أتجوزك ونسافر.. بس مقدرتش استحمل لحد ما أخلص دراستي.. نزلت مخصوص قبل عيد ميلادك علشان أكون معاكي.. اديني فرصة تانية يا نور.. وأوعدك مش هزعلك تاني. نور: وأنا مش موافقة. سائر: ليه مش موافقة يا نور.. أنا متأكد إنك بتحبيني.

نور: آه، لسه بحبك.. ومحدش دخل حياتي بعدك ولا كان حد هيدخل.. بس أنا معنديش استعداد لصدمات تانية.. خلي شوية الحب اللي فاضلين لك في قلبي ومتضيعهمش. سائر: صدقيني، مش هضيعهم.. والله أنا مش عاوز غيرك.. اديني فرصة تانية. نور: أنا لازم أمشي. سائر: بس انتي مردتيش عليا. نور: بعدين يا سائر.. بعدين.. عن إذنك. *** قمر باستغراب: ليل كذبت عليك؟ طب ليه؟

اسر: أنا مش عارف.. وهي مردتش تقول السبب.. بس دا مش موضوعي.. هو حاجة وعدت وأنا نسيتها و.. قمر سرحت: معقولة ياليل مش عاجبك حياتنا.. انتي تكدبي؟ مش مصدقة.. طب ليه كدا؟ آه.. صح.. إحنا فقراء.. بس مكنتش بحرمك من حاجة.. اللي معايا كله كان ليكي.. ليه كدا يا ليل؟ اسر: قمر.. قمر.. انتي سمعاني؟ قمر: ها؟ اسر: سرحتي في إيه؟ قمر: ولا حاجة.. كمل.

اسر: بصي بقا.. نهاية الموضوع واللي أنا عاوزه وجايبك هنا علشانه.. أنا عاوز آخد الإذن منك إني أتقرب من ليل. قمر: وبعد ما تتقرب من ليل؟ اسر: هتجوزها إن شاء الله. قمر: طب لما أنت عاوز تتقرب لها.. ماتتقدم لها على طول.. إيه لازمة المشي البطال من الأول؟ اسر: مشي بطال إيه بس يا قمر.. افهمي.. مش هينفع أتقدم دلوقتي. قمر: ليه بقا إن شاء الله؟ ما معكش تمن الشبكة؟ بسيطة.. أسلفك.. مش لازم نوسعها أوي.. هو دبلتين حلوين.

اسر: لا.. ويت كدا.. شبكة إيه اللي ممعيش حقها.. أنا بتكلم على نقطة تانية. قمر: نقطة إيه بقا؟ اسر: أنا علشان أتقدم.. لازم أنجح السنة دي على الأقل علشان بابا يوافق.. وكمان ليل لو أتقدمت دلوقتي مش هتوافق أصلاً.. دي مش طايقاني. قمر: ولما هي مش طايقاك.. حاطتها في دماغك ليه؟ اسر: مش طايقاني دا موضوع طويل.. بس أنا متأكد إنها هي كمان معجبة بيا.. بس بتكابر. قمر: عندك حق والله.. دي عنيدة ورأسها جزمة زيي.

اسر: شوفتي بقا.. علشان كدا محتاج وقت علشان نتقرب من بعض.. يكون المشاكل اللي حوالينا هدت.. وأنا بستأذنك في الوقت ده.. واعتبريني إني كدا بتقدملها يا ستي.. بس المهم هي متعرفش بالحوار اللي دار بينا ده خالص. قمر: طب افرض هي أساساً مش عاوزاك. اسر: لا.. متقلقيش.. هي هتموت عليا. قمر: لا ياشيخ.. تامر حسني.. بسلامتك. اسر: لا.. اسر الألفي.. ما فيش بنت مش بتحبني أصلاً. قمر: ونبي تتوكس.. وترجعني الفيلا.. قبل ما البت تيجي.

اسر بيضحك: حاضر. قمر: قال ما فيش بنت محبتنيش قال.. مانا جنبك بقالي ساعة أهو.. مش نازل من زور.. سوق سوق. *** سامح: عملتي إيه مع البت يا نجلاء؟ نجلاء: قالتلي هفكر. سامح: يعني ميالة للموضوع؟ نجلاء: وماتميلش ليه يا سامح.. الواد كويس ومحترم. سامح: طيب.. على البركة.. نادي عليها يلا تأكل معانا. نجلاء: ماشي.. هجهز الأكل وأدخلها. *** ليل: تونة.. اصحى. تونة: عاوزة إيه؟ سبيني.. أنا عاوزة أنام شوية. ليل: فين قمر طيب؟

تونة قامت نطت تجري دخلت المطبخ وطلعت: مش جوة. راحت الحمام: مش في الحمام كمان.. أوعي كدا رجلك يا ليل.. مش تحت السرير كمان.. أومال راحت فين؟ ليل: انتي بتعملي إيه ياهبلة؟ تونة: بدور عليها. ليل: وهي إيه يدخلها تحت السرير؟ تونة: أنا أشرفني.. يمكن عاوزة تفجعني. ليل: الحركات المتخلفة دي.. انتي اللي تعمليها. تونة: يابنتي لمي لسانك. ليل: بنتك إيه يامفعوصة؟ دانا لو اتجوزت هجيب قدك. تونة: تتجوزي إيه يابايرة؟ هو انتي حد معبرك؟

ليل: لسانك ده هقطعهولك في مرة. تونة: وريني كدا علشان أخزقلك عينك دي. قمر: فيييه إيه؟ صوتكم عالي ليه؟ تونة: تعالي شوفي اختك.. الحق عليا إني دفعت عنها ومسبتهمش يقطعوها. قمر: بس ياتونة.. عيب كدا.. محدش يقدر يعمل لأختك حاجة. ليل: انتي كنتي فين يا قمر؟ قمر: كنت بشتري حاجة. ليل: هي فين الحاجة دي؟ قمر بتوتر: مانا ملقتهاش بقالها.. ليل: غريبة.. يعني طلعتي وسبتي تونة لوحدها؟ قمر: عادي.. وهي أول مرة. ليل: جايز.

قمر: أنا هدخل أسخنلكم الأكل. *** حازم قاعد سرحان وبيفكر في كنزي.. وافتكر إن رقمها معاه من وقت ما كانت في القسم.. وقرر يكلمها. كنزي: رديت؟ حازم: الو.. مين معايا؟ كنزي: انتي مش مسجلة الرقم ولا إيه؟ حازم: لا والله.. انت مين؟ كنزي: أنا حازم. حازم: انتي تعرفي كذا حازم غيري ولا إيه؟ كنزي: لا والله.. أنا معرفش حد أصلاً.. بس أصل ماما.. حازم: مالها ماما؟ كنزي: أنا لازم أقفل.. يا حازم. حازم: استني بس.. متقفليش.

كنزي: يا حازم.. والله مش هينفع. نجلاء دخلت فجأة: هو إيه اللي مش هينفع يا بت؟ كنزي حدفت الموبايل واتنطرت: ماما.. استني.. هفهم. نجلاء: تفهميني إيه.. دانتي خلاص مبقاش حد قادر عليكي.. أنا هناديلك أبوكِ. كنزي مسكتها: استني يا ماما.. ونبي والله.. انتي فاهمة غلط. نجلاء: ولا كلمة زيادة.. والعريس هتوافقي عليه يا كنزي غصب عنك.. وما فيش قعاد ليكي هنا.. هتتجوزي وترجعي المنصورة. كنزي: بس أنا مبحبهوش يا ماما.. حرام عليكي.

نجلاء: حرمت عليكي عيشتك يابت.. أومال بتحبي مين يابت؟ بتحبي حازم؟ كنزي: أيوه يا ماما.. بحب حازم. نجلاء: اخرسي.. كمان اتجرأتي تقوليها في وشي من غير كسوف كدا.. كان عندها حق عايدة. كنزي: وست عايدة قالت إيه؟ نجلاء: مالكيش دعوة قالت إيه.. كلامي هو اللي هيمشي عليكي.. أنا عملالك قيمة وأقول البت كبرت وعقلت.. وانتي اتهبلتي أكتر.. بتحبي اللي آخره يكلمك من ورانا بس.. وسايبة اللي شاريكي ومتقدملك.. هو الزمن جرى في إيه بس.

كنزي: وأنا بقا هتحكم في قلبي أقول له يحب مين وميحبش مين؟ نجلاء: أيوه يا عين أمك.. من هنا ورايح هتتحكمي فيه.. وحسك عينك تقولي لأ على خالد.. انتي فاهمة؟ كنزي بزعل: فاهمة. نجلاء: يلا قدامي علشان تأكلي. كنزي: مش عاوزة أكل. نجلاء: أحسن بردك. كنزي قعدت تعيط وتفكر في كلام مامتها.. وحازم كل ده لسه مقفلش وسمع كل الكلام والعريس اللي اتقدم لها.. واتضايق.. يا ترى هيعمل إيه؟ *** أحمد: نور.. كنتي فين يا حبيبتي؟

نور: كنت.. كنت مع سائر. أحمد: مش موضوع سائر ده اتقفل من زمان. نور: .... أحمد: مالك يا نور؟ نور عيطت جامد: أنا لسه بحبه يا بابي ومش عارفة أعمل إيه. أحمد حضنها: طيب.. اهدي يا حبيبتي.. اهدي.. واللي انتي عاوزاه.. أنا هوافق عليه. *** سامح: أومال فين البت يا نجلاء؟ نجلاء: قالتلي عاوزة تنام.. مش عاوزة تأكل. سامح: وانتي سبتيها تنام من غير أكل يا نجلاء؟ حرام عليكي. نجلاء: انت رايح فين طيب؟ مش هتأكل؟

سامح: رايح أجيبها تأكل معانا.. مش هسيبها تنام كدا. نجلاء: براحتك.. أكل أنا. *** زين: صباح الخير. الكل: صباح النور. زين: اسر.. تعالي عايزك. اسر: خير يا زين؟ زين: أنا طلبت معايه النهاردة ننزل حمام السباحة.. تيجي؟ اسر: ماشي.. معاك.. بس انت مش عندك شغل؟ زين: لا.. هفكس للشغل النهاردة.. العوم وحشني أوي. اسر: ماشي.. أنا جاهز. زين: اشطا.. هكلم حازم يجي. *** قمر: أيوة يا عربي.. ازيك يا ولا.. والحارة أخبارها إيه؟

عربي: الحارة وحشة من غيرك يا ست قمر والله.. انتي هترجعي امتى؟ قمر: والله يا عربي ما عارفة.. إذا كنت هرجع ولا لأ. عربي: معناه إيه الكلام ده يا ست قمر؟ قمر: يعني اللي ربنا عاوزه هيكون يا عربي.. المهم اسمعني في اللي هقوله كويس.. ومش عاوزة حد يعرف حاجة.. انت فاهم؟ عربي: خير يا ست قمر.. محتاجة فلوس؟ قمر: لا يا ولا.. فلوس إيه.. انت حيلتك حاجة؟ أنا عاوزة خدمة منك.. هتعرف تعملها ولا أشوف غيرك؟ عربي: هعرف طبعاً.. آمريني.

قمر: أنا عاوزاك ترقب لي حد.. وتنقل لي كل أخباره خطوة بخطوة من غير ما يحس. عربي: حد! حد مين ده؟ قمر: هقولك.. *** هدي: حبيبتي.. مش هتنزلي تفطري معانا؟ صافي: ماليش نفس يا ماما. هدي: ليه كدا؟ مين زعلك؟ صافي: اسر مش بيرد عليا بقاله يومين. هدي: أكيد عملتي حاجة.. قولي عملتي إيه. صافي: بصراحة.. عملت يا ماما.. في بنت بقالها فترة متقربة منه.. هدي: مانتي عارفة يا صافي إن اسر حواليه بنات كتير.

صافي: أيوة.. بس أنا مش مطمنة ل دي بالذات.. دي كمان سكنت معاه في الفيلا كمان. هدي: بجد.. طب انتي عملتي إيه علشان يزعل منك؟ صافي: اتفقت أنا وسهر على ليل دي.. وضربناها و.. هدي: استني يا صافي.. مين ليل دي؟ صافي: ماهي ليل دي البت اللي بتكلم عنها يا ماما. هدي: اسمها ليل؟ صافي: آه.. هو ف حاجة؟ هدي: لا.. لا.. ما فيش.. كملي. صافي: أكمل إيه؟ أنا خلصت.. خلاص.. مالك يا ماما؟ في حاجة؟

هدي: لا يا حبيبتي.. ما فيش.. أنا من رأيي تحاولي تاني مع اسر لحد ما يرد.. وتعتذري له. صافي: حاضرة. هدي بتوتر: أنا همشي بقا علشان أفطر بابا. صافي باستغراب: اتفضلي. *** قمر: كنزي.. اتفضلي يا حبيبتي. كنزي: هي ليل هنا؟ قمر: آه.. نايمة أهي.. ادخلي صحيها. كنزي: لا.. خلاص.. أجيلها وقت ما تصحى. قمر: لا والله أبداً.. ادخلي نصحيها.. ولو مصحتش.. أنا موجودة أهو.. اقعدي معايا. كنزي بابتسامة: متشكرة أوي.

قمر: العفو يا حبيبتي.. دانتي تنوري.. قمر: بتت ياليل.. فوقي.. انتي يابت. ليل: إيه الصوت ده ع الصبح.. في إيه يا قمر؟ قمر: اصحي.. كنزي عاوزاكي. ليل: صحيت خلاص أهو.. خير يا كنزي؟ كنزي عيطت: أنا مخنوقة أوي. قمر جريت حضنتها: إيه ده.. إيه ده؟ مالك؟ ليل: يعني انتي مصحياني علشان تنكدي عليا ع الصبح؟ قمر: بس ياباردة انتي.. مالك يا كنزي؟ مين مزعلك بس؟ كنزي: ماما. قمر: مالها يا حبيبتي؟

كنزي: مش حاسة بيا خالص.. وعاوزة تجوزني لواحد مبحبهوش.. وترجعني أعيش مع عمتي وأبعد عنهم.. اهئ اهئ.. أنا عاوزة أعيش هنا جنب بابا وماما. قمر: طيب ياحبيبتي.. فهمي نجلاء براحة.. وهي أكيد مش هترضى تزعلك. كنزي: لا يا قمر.. ماما خدت قرارها خلاص.. عاوزة تبعدني عنهم.. عارفة إحساس يعني إيه تعيشي بعيد عن أهلك مع إنهم عايشين؟ قمر: عارفة يا حبيبتي. كنزي: لا.. أكيد متعرفيش الإحساس ده.. ومحدش هيحس بيا.

قمر أتضايقت وسكتت.. وليل لاحظت وفهمت ليه اتضايقت. قمر: طيب ياحبيبتي.. اهدي ومتزعليش.. كل حاجة هتتحل إن شاء الله. كنزي: يارب. تونة: إيه ده؟ مين مات ع الصبح؟ قمر: موت إيه بس ياتونة.. بعد الشر. تونة: أومال قلبي نهنه مناحة ليه كدا؟ لا.. أنا مبحبش النكد.. أنا بحب الفرفشة. ليل: ااايوة الفرفشة.. فرفشووني.. يلا نشغل أغاني.. لا لا.. قمر تغني الأغنية اللي بتغنيها لنا ديما. تونة: أيوه.. أيوه.. يلا تافتي في تا تا تا.

كنزي: انتي بتغني ياقمر؟ قمر: يعني شوية دندنة كدا. ليل: دندنة إيه دي؟ صوتها جميل أوي.. اسمعي بس واحكمي. قمر: طب استنوا نفطر. الكل: لا.. دلوقتي. قمر: البنات البنات.. الطف الكائنات غنوا يا تلميذات الكل بيسقف وبيلفوا حوالين بعض: تافاتيفى تاتاتا قمر: قولوا يابختنا الكل: يابختنا يابختنا قمر: قد إيه كلنا الكل: كلنا كلنا قمر: فرحانين إننا اتولدنا بنااااات البنات حنينين .. كلهن طيبين همهم خدمة بلدهم .. زيهم زي البنين

البنت زي الولد .. ماهيش كمالة عدد في الاحتمال والجلد .. مذكورة في المعجزات البنات ناصحين تمام .. يسألوا الحاجة بكام ينفعوا وزراء مالية .. واقتصاد ما فيش كلام البنت عين أمها .. وأبوها يحبها والكل معجب بها .. في الحي والبلكون تي اسلام على البنات .. الأروبة المدهشات تذاكر فوتوغرافية .. كمبيوتر معلومات يا بنت يا مؤدبة .. يا حلوة يا مرتبة وبحتة الموهبة .. كم فينا من مبدعات البنات البنات الطف الكائنات .. غنوا يا تلميذات

الكل: تافتيفي تاتاتا .. تافتيفي تاتاتا ... هييييه *** اسر: هما بيعملوا إيه؟ جوازين بتريقة: فاتحين حضانة جوا. اسر: بقولك إيه؟ أنا شايف إننا نروح النادي أو أي مكان تاني بدل ما نبقى في وشهم كدا.. وممكن يتكسفوا يطلعوا. حازم: أنا بقول كدا بردك.. علشان منقيدش حركاتهم. زين: لا طبعاً.. لا نادي ولا زفت.. أنا مش هتحرك من هنا. اسر: طب خلينا في البسين التاني بعيد عن هنا. زين: لا.. هو ده الأكبر علشان نعرف نتحرك براحتنا.

حازم: هو عند وخلاص يا زين. زين: آه.. هو كدا.. قال تتكسف قال.. دي وش كسوف دي. حازم: على فكرة.. هو قال "يتكسفوا" مش "تتكسف" يا زين. زين: عاوز إيه يعني؟ حازم ضحك: ولا حاجة يا حبيبي.. طلعها من دماغك بس. زين: اطلع مين؟ حازم ضحك ومشي بعيد. زين: خد هنا.. بس.. انت تقصد مين؟ استنى. *** كنزي: لا.. حقيقي صوتك حلو.. وبجد فرفشتوني وأنا كنت مخنوقة. ليل: خدمة.. انتي بس متعيطيش.. علشان ربنا يكرم. تونة: إيه دا؟ هاه؟

بصوا.. بصوا.. دول بيعملوا إيه دول؟ ليل وكنزي راحوا يبصوا: هما هينزلوا البسين ولا إيه؟ تونة: يا خرااابي ع الحلاوة.. دول طلعوا مزز أكتر من ما كان. ليل حطت إيدها على عين تونة: بس يا تونة.. عيب كدا.. ماتبصيش. تونة زقت إيدها: يا سلام ياختي.. عيب ليا وحلال ليكي.. أوعي كدا.. نشوف عضلات الظابط. كنزي: ماتتلمي يا تونة بقا.. في إيه.. ماتبصيش عليه.

تونة: مبصش عليهم ولا ع الظابط.. يابتاعة الظابط انتي.. ونعمة لروح أقول لأمك نوجة اللي معرفتش تربيكِ. كنزي: استني بس.. أنا ناقصة.. خلاص.. بصي براحتك. قمر: انتوا بتعملوا إيه عندكم؟ كلهم اتنطروا: مممم.. مبنعملش حاجة يا قمر. قمر: وسعوا انتي وهي كدا.. ينيلك.. انتي وهي بتتفرجوا عليهم.. ادخلي ياختي انتي وهي.. بطلوا قلة أدب. تونة: قولت لهم كدا.. مسمعوش الكلام والله يا قمر.

ليل: يابت ياكدابة انتي.. والله يا قمر.. هي اللي كانت بتبص. قمر: بس انتي وهي.. ادخلوا جوا يلا. زين: أهي اللي بتقول هتتكسف.. أهي واقفة وبتتفرج. قمر شدت الستارة. حازم: شوفت.. ظلمتها إزاي. اسر: أكيد اتضايقت.. ما بلاش هنا يا زين. زين: تولع.. أعمل لها إيه يعني.. مش عاجبها.. تمشي هي.. مش إحنا. *** تونة طلعت تتسحب وهما بيأكلوا.. وفتحت الباب وطلعت بسرعة. زين: دي جاية تهبب إيه دي كمان؟ تونة: أسلموعليكو.

زين: عاوزة إيه يابت انتي؟ تونة: طب رد السلام.. طب دا السلام لله. زين: عاوزة إيه.. اخلصي. تونة: انت مالك يا جدع انت.. أنا جيت جنبك.. دانت حشري بصحيح. اسر: براحة يا زين.. عاوزة إيه يا تونة؟ تونة: عاوزة سلامتك يا حلو يا مسمسم.. يابو عيون حلوة. اسر بيضحك: إن شاء الله.. يخليكي ياشيخة. زين: عجبتك حلو ومسمسم. اسر: آه.. أوووي بصراحة. زين: طب خلصي وانزلي وسيبك منه. تونة: اللهم طولك يا روح.

اسر: معلش.. امسحيها فيا أنا.. ها.. عاوزة إيه؟ تونة: عاوزة أنزل بلبسين. زين: بلبسين يعني إيه؟ بلبسين. تونة: مش هرد عليك.. ها بقا. اسر: أيوة.. جدعة.. خليكي معايا أنا. تونة: هتنزلني بلبسين وتعلمني العوم. اسر: عيوني ليكي.. بس مش دلوقتي.. علشان إحنا عاملين مسابقة مع بعض.. لما نخلص هبقى أخليكي تنزلي براحتك. تونة: بيجاااااد. اسر: أيوه.. بيجاااااد. ليل: تونة.. انتي يابت.. إيه موقفك هنا؟

تونة بتغيظ ليل: أصل اسر قالي هيعلمني العوم.. واتحايل عليا.. وأنا وافقت. اسر: أنا. تونة: آه.. انت. ليل: لا ياشيخة.. طب يلا ع جوه بقا.. بدل ماناديلك قمر تجيلك بالشبشب. تونة: لا.. مش هدخل.. أنا عاوزة أتفرج. زين: تتفرجي ع إيه ياباردة.. يابجحة انتي.. ادخلي.. محدش هنا عاوزك. ليل: أنا هدخل أجبهالك.. ماشي؟ تونة: انت شكلك مش هتتلم في ليلتك دي. زين: لا.. مش هتلم.. وريني هتعملي إيه.. *بيضحك بتريقة* صرصار بيهددني.

تونة: طااااايببب.. جريت خدت هدومه وحدفتها في البسين. زين: يابت المجنونةة.. استني. تونة خدت البورنص وطلعت تجري بيه.. وزين وراها.. وعمالين يلفوا حوالين حمام السباحة.. وحازم واسر ميتين ضحك. زين: والله ماهسيبك ياعفريتة انتي.. راح وقع.. اتزحلق ع ضهره. تونة: هاهاهاها.. مش عيب ع طولك ده.. اءاءاء.. مش هتعرف تمسكني.. وطلعت تجري ع البيت.. وقفلت الباب وراها. زين قام وطلع يجري.. وعمال يخبط جامد ع الباب.

قمر فتحت بصدمة: انت إزاي تخبط علينا وانت بالمنظر ده؟ زين: لا.. وانت وش كسوف.. أوووي.. انتي وأخواتك.. وبالذات الجزمة الصغيرة.. مانتي واقفة قدامي أهو بكل برود. قمر اتعصبت ورزعت الباب في وشه. زين خبط تاني جامد: افتحي بدل ما أكسره على دماغكم. قمر فتحت.. حدفت البورنص بتاعه في وشها.. ورزعت الباب تاني.. ووقفت ورا الباب وهي متعصبة من كلامه. تونة طالعة من ورا الكنبة: ها.. مشي؟ قمر

قلعت الشبشب وحدفته عليها: انتي اللي جايبالي الكلام يامفعوصةة. *** عدى اليوم على أبطالنا.. ونبدأ يوم جديد. كنزي: ليل.. استني يا ليل.. أنا جاية معاكي الكلية. ليل: انتي ف هندسة؟ كنزي: لا.. ف تجارة.. بس قولت أمشي على سكتك. ليل: ماشي.. يلا. اسر: لو رايحين الكلية.. تعالوا أوصلكم. ليل لسه هتمانع.. كنزي قطعتها. كنزي: آه.. آه.. ياريت يا اسر. اسر: يلا اركبوا. *** قمر: صباح الخير. عايدة: ست قمر.. صباح النور.

نجلاء: صباح النور يا حبيبتي. قمر: مالك يا عايدة بتبصيلي كدا ليه؟ عايدة: لا.. مقصدش.. بس أصل مستغربة وجودك معانا في المطبخ. قمر: لا.. متستغربيش.. أنا وحشني الطبخ.. قولت أجي أساعدكم. عايدة: يا سلام.. تنوري وتشيلى عني شوية. نجلاء: لا طبعاً يا عايدة.. ميصحش كدا. قمر: ليه بس يانوجة؟ أنا قاعدة زهقانة.. قولت أجي أساعدكم وندردش مع بعض شوية. نجلاء: دردشي.. آه.. إنما تساعدينا.. لا.. دا شغلنا إحنا. قمر: لا.. الاتنين يانوجة.

نجلاء: اللي يريحك يا حبيبتي. قمر: مالك يا نوجة؟ حساكي زعلانة. نجلاء: والله يا قمر.. قلبي واكلني ع البت.. النهاردة نزلت الكلية.. والكلية جديدة عليها.. خايفة حد يضحك عليها.. وأنا بنتي هبلة. قمر: لا يا نجلاء.. مالكيش حق.. كنزي عاقلة والله.. بس انتي متشديش عليها.. وهي مش هتعمل حاجة من وراكي. نجلاء: مبشدش عليها والله. قمر: عليا بردك يانوجة. نجلاء: هي اشتكت لك مني؟ قمر: لا.. مشتكتش.. بس بيبان عليها الزعل.

نجلاء: طب.. ونبي قوليلي.. دي زعلانة ليه دي؟ قمر: زعلانة ليه؟ نجلاء: جيلها عريس زي الورد.. أدب إيه وأخلاق إيه.. ومش غريب يعني.. معرفة.. مش موافقة عليه. قمر: ماهو من حقها تقبل أو ترفض.. هو الجواز مش غصب يعني. عايدة: ومن امتى البنات كان ليها رأي يعني.. دانا عرفت إني هتجوز قبل فرحي بيوم واحد بس.. وعرفوني بس علشان استحما.. غير كدا مكنوش هيقولولي.

قمر: إحنا نسيبنا من العلاقة القذرة دي يا عايدة.. وخلينا في دلوقتي.. البنات مبقتش زي زمان.. دلوقتي كل واحدة من حقها تحب وتتحب وتختار.. مش يتفرض عليها أي حد. عايدة: حب إيه بس اللي بتتكلمي عليه يا ست قمر.. مفيش الكلام ده.. لما تتجوز.. تبقا تحبه. نجلاء: أيوه.. عايدة عندها حق يا قمر.. الحب ييجي بعد الجواز. قمر: طب.. نسأل السؤال المهم.. انتي يا عايدة مثلاً.. جوزك حبك بعد الجواز؟ عايدة: ولا بيطيق يبص في خلقتي حتي.

قمر: طب.. وانتي يا نوجة.. بزمتك.. مكنتيش بتحبي عم سامح قبل الجواز؟ نجلاء: هاق. قمر: أيوه.. أيوه.. اعترفي. نجلاء: بصراحة.. آه.. بس إيش جاب سامح لشباب الأيام دي اللي بيتسلوا بالبنات.. دا عمك سامح أول لما شافني.. جه اتقدملي على طول.. ولا فكر يتصل بيا في نص الليل.. ولا الحاجات اللي مالهاش لازمة اللي بتحصل دلوقتي. قمر: الزمن غير الزمن يا نوجة.. بس لازم زي ما انتي اخترتي وحبيتي.. سيبي كنزي هي كمان تختار.

نجلاء: اختياراتها زي الزفت. قمر: يا ستي.. هي البنت لسه اختارت. نجلاء: اسكتي يا قمر.. انتي متعرفيش حاجة. *** ليل داخلة الكلية هي واسر.. صافي كانت واقفة بعيد هي وسارة.. شافتهم. صافي بعصبية: هو ده اللي بتقولي مبيتكلموش مع بعض؟ سارة: أنا معرفش. صافي: اسكتي انتي خالص. سارة: استني بس.. راحة فين؟ صافي: هعرفها مقامها.. أوعي.. سبيني. صافي داخلة على ليل علشان تتهجم عليها.. وخربشتها في رقبتها وإيدها.. اسر مسك صافي.

والناس اتلمت. اسر: انتي اتجننتي ولا إيه؟ إيه اللي بتعمليه ده؟ صافي: انت لسه شفت جنان؟ ياسر.. أنا هوريك إزاي تسبني علشان الجربوعة دي. ليل: انتي مريضة والله.. وآخرتك مستشفى المجانين. صافي: انتي تخرسي خالص. اسر: سارة.. خديها من وشي دلوقتي حالاً. صافي دمعت: بتبعد عني علشانها يا اسر؟ سارة شدت صافي: يلا.. امشي.. الناس بتتفرج. اسر: يلا يا سارة.. مشيها بسرعة.

صافي: ماشي يا اسر.. همشي.. بس مش ههنيكم ببعض.. لحظة واحدة.. وهتشوف. اسر: ليل.. انتي كويسة؟ ايدك بتنزل دم. ليل: أنا كويسة. اسر: أنا آسف والله.. أنا السبب في اللي بيحصلك ده. ليل: محصلش حاجة خلاص.. هي اللي مريضة.. أنا مش فاهمة كنت بتحبها إزاي. اسر: أنا مبحبهاش أصلاً.. ولا عمري حبيتها. ليل: اهدي طيب.. أومال بتعمل كده ليه.. وكأنكم متجوزين؟ اسر: هي كدا ومش هتتغير.. سيبك منها.. تعالي نروح نجيب علاج نوقف الدم.

ليل: دا حاجة بسيطة.. متقلقش. اسر: لا.. يلا بس اسمع الكلام. ليل: حاضر. "مشيت وهي مبسوطة إن اسر طلع مش بيحب صافي." *** سائر: نور.. أنا مش مصدق.. أخيراً اتصلتي. نور: عامل إيه يا سائر؟ سائر: أنا بقيت كويس أول لما سمعت صوتك.. نور: أنا بتصل بيك علشان أقولك إني فكرت في اللي اتكلمنا فيه آخر مرة. سائر: نور.. لو سمحتي.. متستعجليش.. وخذي وقتك.. ومتتسرعيش.. أنا والله بحبك وعاوزك.. ومش هبعد عنك تاني و..

نور فرحت من كلامه: أنا كنت عاوزة أقولك إني موافقة يا سائر. سائر بفرحة: بجد يا نور؟ نور: آه.. بجد.. بس عندي شرط. سائر: أنا هنفذ أي حاجة تطلبيها مني.. قولي. نور: أنا وانت هنعيش هنا.. ومش هنسافر. سائر: إيه!! ياترى سائر هيوافق على شرط نور ولا هيختار السفر تاني ويسيبها؟ هنعرف من الأجزاء الجاية.. تابعوا.. وأحب أعرف توقعاتكم يا حلوين.