رواية حكاية قمر الفصل العاشر 10 - بقلم وردة في البستان

قمر: عيب يا تونة، وبعدين أنا مش زعلانة منها هي بس.. أنا زعلانة منك انتي كمان بتاخدي منه حاجة ليه. تونة: شهقت: أنا آخد منه حاجة؟ محصلش، دا هو اللي اتحايل عليا وأنا أقول له لأ، راح حطهالي في الكيسة وأنا مش واخدة بالي. قمر: كنتي خدتيها ورمتيها في وشه.. ولا كنتي خزقتي له عينه.. أشمعنى دا مبتفتحليهوش دماغه. تونة: شاورت على عيونها: من عيوني، وجت تمشي. قمر: مسكتها: راحة فين؟ تونة: راحة أخزق له عينه زي ما قلتي.

قمر ضحكت وحضنت تونة، وتونة حضنتها. ليل: قمر أنا آسفة.. والله مكنش قصدي كدا. تونة: لا، خاصم، خاصم يا كتكوت، مش هنكلمك إحنا الاتنين. قمر: هنصالحها المرة دي بس. تونة: لااا. ليل: علشان خاطري يا تونة. تونة: علشان خاطرك لأ لأ، مش لواحدة. قمر: طب علشان خاطري أنا. تونة: علشان خاطرك بس.. غير كدا كنت هقصلها شعرها وهي نايمة. ليل جريت حضنتهم، وقمر في النص، حضنهم ومبسوطة: يا رب يخليكم ليا وميحرمني منكم أبداً.

ليل: يا رب.. أنا أروح الكلية بقى. قمر: خلي بالك من نفسك يا حبيبتي. ليل: حاضر.. يلا باي. *** سارة: إيه دا، بصي دا آسر جاي. صافي بفرحة جريت حضنت آسر: مش معقول.. أنا كنت فاكرة مش هتيجي. آسر: إيه اللي بتعملي دا؟ انتي مش واخدة بالك إننا في كلية ولا إيه؟ صافي: في إيه يا حبيبي.. عادي يعني. آسر: لأ مش عادي، ومتتكررش. سارة: مالك يا آسر؟ انت زعلان من حاجة؟ آسر: مفيش.. هو وليد لسه مجاش؟ سارة: مظنش إن هو يجي، هو كان سهران معاك.

آسر: أنا كلمته في السكة وقالي جاي. صافي: أهو جاي. آسر بيبص شاف ليل، وهي شافته ودورت وشها. وليد: مالك يا عم؟ قلقتني.. حصل إيه؟ صافي بقلق: في حاجة يا آسر؟ آسر: آه.. اتخانقت مع أبويا وهاجي أقعد عندك يومين. وليد: تنورني يا صاحبي. صافي: اتخانقت مع أونكل ليه؟ آسر: علشان مهمل في دراستي. سارة: طيب ماهو عنده حق. وليد وصافي بصوا لها. سارة: متبصوليش.. أنا بقول الصراحة، آسر لازم يركز السنة دي.

وليد: لأ، وإنتي يا بت بتطلعي الأولى كل سنة.. ما كلنا بنسقط. سارة: ما أنا هركز أنا كمان وعندي الحل. الكل: إيه؟ سارة: شايفين البنت اللي هناك دي؟ الكل بص، وليل شافتهم وهما بيبصلها واستغربت، وبصت في الكتاب تاني. آسر: مالها؟ سارة: البت دي شوفتها في كذا محاضرة مبتعملش حاجة غير إنها بتكتب كلام الدكاترة ومركزة جداً وشكلها دحيحة وهتنفعنا... وليد: هتذاكر لنا يعني؟ سارة: ليه لأ، أو تدينا اللي بتكتبه.

صافي بتريقة: هنجيب عيلة تذاكر لنا بقى. سارة: إنتي خسرانة إيه؟ مش عاوزة تنجحي؟ صافي: آه جداً، بابا مواعدني يسفرني لو نجحت. سارة: يبقى تسمعوا الكلام. صافي: هتعملي إيه؟ سارة: هجيبها تقعد معانا ونتصاحب. صافي: لأ طبعاً، متبقاش صاحبتنا. وليد بتريقة: علشان متبقاش فيه واحدة أحلى منها في الشلة. صافي: دي أحلى مني أنا.. سارة: خلاص، طالما واثقة في نفسك، هجيبها. صافي بغيظ: ماشي. سارة: ممكن أتكلم معاكي؟ ليل: اتفضلي.

سارة: أنا اسمي سارة، وإنتي؟ ليل: وأنا ليل. سارة: بصي ياستي، دول صحابي، وكلنا بقالنا سنتين بنعيد سنة أولى.. محتاجين مساعدتك. ليل: وأنا هعمل لكم إيه يعني؟ سارة: إنتي بتكتبي ورا الدكاترة كل حاجة صح؟ ليل: آه. سارة: دا اللي إحنا عاوزينه، اللي بتكتبيه بس.. ليل بصت لآسر: موافقة، بس عندي شرط. سارة: شرط إيه؟ ليل قامت: نتعرف عليهم بعدين أقول شرطي. سارة باستغراب: ماشي، تعالي. سارة: ليل يا جماعة وافقت. صافي: اسمها ليل؟

ليل: آه، عندك اعتراض على الاسم؟ وليد: لأ، اتفضلي.. أنا وليد، ودا آسر، ودي صافي. سارة: ها، قولي بقى شرطك. الكل: شرط إيه؟ صافي: هي كمان هتتشرط من أولها. ليل: إيه مش عاجبك؟ صافي بغيظ: لأ مش عاجبني. ليل: شايفة الحيطة اللي هناك دي.. عارفة هتعملي إيه صح؟ صافي: شايفة مجايبك يا ست سارة. وليد: استهدوا بالله يا جماعة.. آسر: إيه هو شرطك؟ ليل: تعتذرلي على اللي عملتوه امبارح.

صافي: لأ، دا إنتي اتجننتي رسمي بقى.. مين إنتي علشان آسر يعتذر لك أصلاً؟ آسر بص لليل: أنا آسف، حاجة تاني؟ ليل اتصدمت، مكنتش متوقعة السرعة دي: لأ، خلاص كدا.. كل يوم حد يجي ياخد مني المحاضرات يصورها.. عن إذنكم. صافي واقفة مصدومة: إنت إزاي تعتذر لها بسهولة كدا؟ آسر: علشان مصلحتنا.. وأنا غلطت وبعتذر. صافي: من امتى آسر الألفي بيعتذر لحد؟ دا إنت عمرك ما اعتذرت لي. آسر: علشان أنا مغلطتش قبل كدا علشان أعتذر لك.

صافي: وإنت عملت لها إيه بقى إن شاء الله؟ آسر: بقولك إيه؟ أنا مش عاوز صداع.. أنا قايم. وليد: أنا جاي معاك. صافي واقفة متغاظة: بصي بيمشي ويسيبني إزاي. سارة: يابنتي اهدي، بيقولك متخانق وسايب البيت، تنكدي عليه أكتر. صافي: صح، عندك حق.. أنا نسيت.. بسبب الزفتة دي عصبتني.. هكلمه أصالحه.