رواية حكاية قمر الفصل الثلاثون 30 - بقلم وردة في البستان

فاروق: ممكن أدخل. صافي: اتفضل يا بابا. فاروق: بنتي حبيبتي، مبتنزلش تقعد معايا ليه؟ من ساعة ما جيت من السفر مشوفتكش. صافي: والله يا بابا مشغولة، أصل بقيت أروح الكلية. فاروق: ع كدا بتحضري المحاضرات؟ صافي: آه طبعًا مبفوتش محاضرة، أصل ناوية آخد السنادي جد، علشان ع الإجازة كدا أسر يجي يخطبني. فاروق: بجد؟ هو قالك كدا؟

صافي: لا هو مقالهاش بطريقة مباشرة، بس حسيت إنه عاوز ينجح السنادي أوي. إحساسي إن فيه خطوة هتحصل بينا بعد النجاح دا، ادعيلي يا بابا. فاروق: يارب يا بنتي، أنا مش عاوز حاجة غير أشوفك فرحانة. تعالي ف حضن بابا. سهر دخلت فجأة: صافي أنا كنت عاوزة... فاروق: انتي جيتي؟ عملتي اللي قولتلك عليه؟ سهر: هعمله. فاروق: يعني اقتنعتي دلوقتي بكلامي؟ سهر: مقتنعتش بحاجة، بس أهو أمر زي أي أمر كنت باخده منك. فاروق: جدعة وعارفة مصلحتك.

صافي: كنتي عايزة حاجة يا سهر؟ سهر: لا كنت هطمن عليكي، عن إذنكم. صافي: بابا انت ليه بتعاملها كدا؟ دي سهر طيبة أوي. فاروق: مالكيش دعوة انتي يا صافي بالشغل، إحنا إخوات وفاهمين بعض. صافي: ماشي، أنا هنام بقى، تصبح ع خير. فاروق: وأنتي من أهله يا حبيبتي. *** الكل قاعد ع السفرة، وزين قاعد مش طايق نفسه. أحمد: أنا جمعتكم كلكم علشان عاوز أوضحلكم حاجات، مش عاوز حد فيكم ينساها. نور: اتفضل يا بابي. أسر: خير يا بابا؟

أحمد موجه كلامه لزين: أولًا البيت دا بيتي، مش من حق أي حد غيري يقول مين يقعد ومين يمشي، أو أي حد يتدخل ف حاجة متخصهوش. زين: ولو الحاجة دي تخصه؟ أحمد: قولت متخصهوش يبقى متخصهوش. أسر: اهدوا يا جماعة، هو في إيه؟ أنا مش فاهم. زين: أقولك يا حبيبي في إيه؟ أبوك كتب شيك للست زفتة اللي أجبرنا ع وجودها معانا هنا بـ 10 مليون جنيه. أسر: إيه؟ أحمد بعصبية: أنا مكتبتش لحد حاجة، دي فلوسها.

زين: لا والله، واحدة كانت عايشة ف حارة، تمتلك المبلغ دا إزاي؟ أحمد: اللي بتتكلم عنها دي وتغلط فيها دي تبقى بنت صاحبي، والفلوس دي أبوها كان سايبها لها هي وأخواتها معايا، وكنت بدور عليها والصدفة خلتني أوصلها. فهمت بقى؟ زين: وأنا إيه اللي يخليني أصدق؟ أحمد: الشيك اللي انت مسكته كان بتاريخ قديم، لو كنت ركزت كنت عرفت قبل ما تحكم ع البنت وتظن فيها وتتهمها بالباطل. أسر بفرحة: يعني ليل تبقى بنت صاحبك؟ الكل بص له.

أسر: أقصد ليل وقمر وكلهم يعني. نور: بابي هو دا عبد الحميد صاحبك اللي كنت حكيتلي عنه زمان؟ أحمد: آه يا نور هو. شوفتي الصدف؟ تبقى عايشة معايا ومعرفهاش. نور: الحمد لله، كدا بقوا من أهلنا. أحمد: آه يا نور، واستحالة أرجعهم الحارة دي تاني. وانت ساكت ليه دلوقتي؟ زين: معنديش حاجة أقولها. أحمد: بس أنا عندي، انت لازم تروح تعتذر لها ع اللي قولته الصبح. زين: مش هعتذر لحد أنا، عاوزني أشوفها نازلة بشيك من مكتبك وأسكت؟

أحمد: آه تسكت، طالما مش فاهم يبقى تسكت، مش تجرح ف الناس وخلاص. ويكون ف علمك من هنا ورايح تعاملهم باحترام. زين: مش هتعامل معاهم أصلًا، عن إذنكم. أحمد: يكون أحسن بردك. نور: بابي متنساش إن عيد ميلادي كمان يومين، يعني مش عاوزة شغل اليوم دا، ماشي؟ أحمد: ودي حاجة تتنسي بردك يا حبيبتي، متقلقيش مش هنزل شغل اليوم دا، علشان خاطر عيونك.

نور حضنت أحمد: ربنا يخليك ليا يا أحلى بابي ف الدنيا. أنا هطلع بقى علشان أكلم صحابي، وانت يا أسر اعزم وليد وصافي وسارة. أسر: حاضر هعزمهم، وأنتي ابقي اعزمي قمر وليل وتونة. نور: دول مش محتاجين عزومة أصلًا. رجعت تاني خطوتين، غريبة يعني انت مهتم أوي بيهم كدا مع إنك متعاملتش معاهم؟ أسر بتوتر: عادي، مش ضيوف عندنا، لازم نهتم بيهم ولا إيه يا بابا؟ أحمد بمكر: أكيد طبعًا. وبص لنور وضحك.

أسر: ممم، طب أنا أطلع أنام أحسن، تصبحوا ع خير. *** ليل: قمر، قمر اصحي. قمر بنوم: هي الساعة بقت كام؟ ليل: الساعة 12. قمر: أنا نمت كل دا إزاي؟ وانتي مصحتنيش؟ ليل: كان شكلك تعبان قولت أسيبك نايمة. المهم دلوقتي أنا عاوزة المصروف علشان راحة الكلية. قمر: البوك عندك، خدي اللي عاوزة. هي فين البت تونة؟ ليل: قاعدة برا تقريبًا. قمر: أما أقوم أشوفها، أحسن دي متقعدش ف حتة غير وتجيبلي مصيبة فيها. ليل: طيب أنا راحة الكلية، سلام.

قمر: خلي بالك من نفسك. ليل: حاضر. *** نور: عم خليل، عم خليل، تعالي ساعدني. خليل: تحت أمرك يا ست نور. نور: خد الحاجات دي طلعها أوضتي. خليل: حاضر يا ست نور. تونة جاية تجري ع نور: الله، إيه كل الحاجات دي يا نور؟ انتي هتعملي فرح ولا إيه؟ نور: لا مش فرح، دا عيد ميلادي بكرة. تونة نطت وسقفت: هييييه! أخيرًا الفرحة هتدخل بيتكم الكئيب دا. نور بتضحك: طيب يا تونة، مش هتساعديني بقى؟ دانا عملالك مفاجأة حلوة أوي. تونة: مفاجأة إيه؟

مفاجأة إيه؟ نور: تعالي ورايا وهقولك. تونة: ف ديلك أهو. قمر: بت يا تونة، راحة فين؟ نور: هتيجي معايا. تونة: هطلع أشوف المفاجأة. قمر: مفاجأة إيه؟ نور: هتعرفي لما تنزلي. قمر: مابلاش تدخلي الفيلا علشان محدش يضايق. نور: متقلقيش، زين مش جوا. مافيش ف الفيلا غير كريم، وأهو قاعد بيرسم هناك أهو، وأسر نايم، يعني مش هتحصل مشكلة. تونة: ونبي يا قمر سبيني أشوف المفاجأة، ونبيييي، ونبيييي! قمر: خلاص يا تونة بطلي زن، روحي.

تونة: هيييييييه! وطلعت تجري ع فوق. قمر: شوفي البت صدقت. نور: متقلقيش عليها يا قمر، تونة غلاوتها من غلاوة كريم، وأنا كان نفسي من زمان ف أخت صغيرة، بس محصلش نصيب. قمر: إن شاء الله يا حبيبتي نفرح بيكي، وتجبلنا انتي البنت. نور: إن شاء الله. صح، بكرة عيد ميلادي، طبعًا هتكوني موجودة. قمر: اعذريني يا نور، أنا مش هينفع أحضر. انتي شوفتي اللي حصل امبارح، وأنا بصراحة مش طايقة أبص ف خلقة أخوكي.

نور: والله بابي دافع عنك وجبلك حقك وطلب منه يعتذرلك، بس طبعًا زين دماغه ناشفة ومبيعتذرش. قمر: أنا لا عاوزة منه اعتذار ولا أي كلام بيني وبينه أصلًا. نور: طيب والعيد ميلاد؟ قمر: ليل وتونة هيحضروا بس، ونبي يا أختي اعذريني أنا، ومتزعليش مني. نور: ماشي يا قمر، هسيبك ع راحتك. تونة طلعت من بلكونة أوضة نور: ماتخلصونا بقى ف الليلة دي، عاوزة أشوف المفاجأة. نور بتضحك: طالعة أهو، متزعليش نفسك.

تونة: روحي يا قمر الله يسهلك وسبيها تطلع. قمر: ماشي يا أم لسان طويل. نور: أنا هطلع بقى قبل ما تنزل تضربنا، عاوزة حاجة؟ قمر: لا يا حبيبتي سلامتك. *** ليل خلصت محاضرات وبتدور ع حد تديهالها. لمحت صافي قاعدة. ليل: ييييه، هو مافيش غير البومة دي؟ هروح لها وأمري لله. ليل: إزيك يا صافي. صافي بعدم اهتمام: أهلاً. ليل: دي المحاضرات بتاعت النهاردة، علشان امبارح... صافي قطعت كلامها: مالهاش لازوم خلاص، مش محتاجينها. ليل: مش فاهمة؟

صافي: إيه الصعب ف اللي قولته؟ بقول مش محتاجين منك محاضرات، سهلة أهي. ليل: دا من إمتى؟ ومين قال كدا أصلًا؟ صافي: من إمتى؟ من يومين. مين قال كدا بقى؟ ف هو أسر. بصراحة كدا قال إنه مش حبك ومش عاوز واحدة غريبة تدخل الشلة، وكلام كتير قاله عنك، مش عاوزة أقوله علشان متضايقيش. ف وفري ع نفسك المحاضرات دي، مش محتاجينها. ليل اتغاظت من كلامها وحبت تحرق دمها هي كمان. ليل بابتسامة: أسر هو قال كدا؟ بصراحة مش مصدقة كلامك.

صافي: ومتصدقيش ليه إن شاء الله؟ ليل: لا ولا حاجة. ع العموم أنا لما أشوفه النهاردة هبقى أسأله. سلام يا حبيبتي. صافي: استني عندك، تشوفي فين؟ انتو هتخرجوا مع بعض؟ ليل: مين جاب سيرة الخروج دلوقتي. صافي: أومال إيه لما تشوفي دا؟ ليل: أشوفه ف الفيلا، هيكون فين يعني؟ إيه دا؟ هو أسر مقال لكش إننا عايشين مع بعض ف نفس الفيلا؟ إزاي ينسى يقولك؟ صافي بعصبية: فيلا إيه؟ انتي عايشة مع أسر؟ انتي واحدة كدابة! ليل: تؤ تؤ، وهكدب ليه بس؟

أونكل أحمد يعرفنا وجبنا نعيش عنده ف الفيلا. انتي اتضايقتي ولا إيه؟ لو عاوزةني أكلم أونكل أحمد تيجي تعيشي معانا، أنا موافقة. بس هدي أعصابك. صافي بعصبية: غورررري من وشي. ليل بابتسامة: أنا كدا كدا كنت ماشية، انتي اللي وقفتيني. يلا بااااي. صافي بعصبية قلبت الطربيزة ومشيت والناس واقفة تتفرج. *** نور: أنا جيت أهو يا تونة. تونة: أخيرًا، ها فين المفاجأة بقى؟ ها؟ نور بتدور ف الكياس: استني. تونة: ها. نور: أهم.

(فساتين أشكالها مختلفة وشيك أوي لـ تونة) . بصي إيه رأيك ف دول؟ تونة برقت عينها: الللله، كل دوول علشاني؟ دول حلوينن أووووي أووي. هاتي ألبسهم. نور: استني بس، مش المفروض تاخدي شاور حلو كدا ونظبط شعرنا الجميل دا وبعدين نلبس الفساتين دي؟ تونة: يعني عاوزاني علشان ألبس الفستان، أستحمى وأسرح الاتنين؟ نور: آه الاتنين. تونة: لا ياستي يفتح الله، مش عاوزة. نور: استني بس يا تونة. مش أنا اتفقت معاكي.

تونة: أنا ما بتفقش على الحاجات اللي تفرهد دي. كنزي: إيه يا نور، في حاجة؟ نور: دادة نجلاء فين؟ كنزي: خرجت تشتري حاجات. لو محتاجة حاجة أعملها أنا. نور: عاوزاكي تساعدي تونة وهي بتاخد شاور.