رواية حكاية مروى الفصل الثاني 2 - بقلم ابراهيم الخليل

بصيتله شوية ببرود وبعدين قولتله: أه أبويا برضو حاول يقنعني إن ولاد أخوه زي إخواتي، بس لحد دلوقتي بلبس الطرحة قدامهم. فأنا آسفة مش هعرف أشيلها دلوقتي قدام رجالة مش من محارمي، حتى لو بصولي على إني أختهم. وأنا يشهد الله إني بعتبرهم إخواتي، بس برضه همشي ورا اللي الشرع قاله.

حماتي هزت رأسها ومشيت. وياسين غسل وشه ولبس ونزلنا. قابلت حمايا في الصالون سلمت عليه ودخلت المطبخ أساعد سلفتي. وبعد شوية حطينا الفطار على السفرة. حماتي قعدت هي وحمايا وياسين. وسلفي كان لسه صاحي من النوم وجاي من شقته اللي فوق. دخل وأنا بحط الأطباق: السلام عليكم ورحمة الله وبركاته. ردينا كلنا السلام. وحتى سلفي التاني اللي خرج من أوضته لسه. (سلفي ده يبقى أصغر حد في خواته، هو 25 مش صغير أوي يعني، بس لسه متجوزش)

قعدنا وفطرنا. وجوزي راح شغله. وبعده بساعتين سلايفي الاتنين كمان راحوا شغلهم. وحماتي قسمت شغل البيت الكبير عليا أنا وسلفتي. فهمتني إن الكناين هنا يطلعوا لبيوتهم عشان النوم بس، يعني الفطار والغدا والعشا وحتى التنضيف بيبقى تحت. يادوب ألحق أنضف بعد ما بصحى من النوم قبل معاد الفطار.

المهم أنا اتعودت على الروتين ده. حتى أيام العزومات اللي كانت بتعملها حماتي مرة كل أسبوع كان بيسبقها ترويق شامل للبيت مع إنه نضيف. بس سلفتي قالتلي إن ده العادي عندهم، وإن الأيام اللي خلتها ترتاح فيهم كانت شهور حملها الأولى. بصتلي وهي بتضحك: شهلي إنتي بقى شوية عشان حماتي تخفف عننا العزومات شوية.

ابتسمت ومردتش. ومرو ست شهور وحماتي بدأت تزن على موضوع الخلفة. رغم إننا روحنا لدكاترة وأكدوا لنا إن مفيش مانع لا عندي ولا عند ياسين، بس هي مسألة وقت يعني ربنا لسه مكتبش. حماتي مكانتش مقتنعة بالكلام ده وفضلت تجبلي أعشاب من عند العطار. وشوية وجابتلي شيخ يرقينا. وبرضو مكانش فيه حمل.

وبعد ست شهور تانيين حماتي خطبت لسلفي التاني وكتبوا كتابهم وعملوا الفرح خلال تلات شهور. وبقى عندي سلفة تانية. مش عارفة ليه مكنتش بستلطفها من الأول، بس حاولت إني أبقى أنا وهي صحاب زي سلفتي الكبيرة. بعد أيام شغل البيت بقى متقسم على تلاتة. وبقى عندي شوية وقت آخد نفسي فيهم، أهتم بنفسي شوية، أعمل ماسك لوشي أو حتى أعملي كوباية نسكافيه أشربها وأنا بقرا رواية مفضلة ليا.

لحد ما في يوم قمت الصبح سمعت صوت زغاريت تحت. نزلت أشوف فيه إيه، لقيت حماتي مبسوطة وبتحضن في ريما (سلفتي الصغيرة) ألف مبروك يا حبيبتي. بصيت لسلفتي الكبيرة شاورتلها بمعنى فيه إيه. لمياء: ريما طلعت حامل. تعالي باركيلها يا مروى. فرحتلها من قلبي وروحت أباركلها وحضنتها: مبارك عليكي يا ريما ربنا يفرحك بيه ويكون ذرية صالحة ليكم. حماتي جت بعدتني عنها وزقت إيدي بطريقة وحشة: عقبالك يا حبيبتي أما نفرح بيكي. ابتسمت بإحراج

وأنا بحاول أمسك دموعي: إن شاء الله يا ماما. بعد الخبر ده حماتي ادت لريما إجازة من شغل البيت عشان ما تتعبش نفسها. ورجع الشغل عليا أنا ولمياء. اللي بعد خبر حمل ريما قالتلي إنها بطلت تاخد مانع الحمل. إيه اللي إنتي بتقوليه ده يا لمياء؟ إنتي شايفة إن ده سبب يخليكي تخلفي تاني؟ طب وسامي ده لسه صغير مكملش سنتين. هتلحقي تربيهم مع بعض؟ لمياء بغيض:

والنبي إنتي طيبة ومش فاهمة حاجة. دنا لو ربنا كتب وحملت حماتي هترحميني شوية. وأديكي شايفة الدلع اللي ريما فيه. وبالنسبة لسامي هيبقى عندي وقت أعلمه يخش الحمام ويبطل الحفاضات قبل ما أجيب التاني. وقربت مني وهي بتهمس كأنها بتقول سر خطير: وبعدين كلام في سرك بفكر أجيبله أخين تلاتة على بعض. وأخلي جوزي يقنع والدته يا تخليني أهتم ببيتي وولادي بس، يا يشوفلي شقة بره. لأني مش هبقى حمل تربية ولاده وكمان أهتم ببيتين طالعة نازلة.

كملت مواعين وأنا مستغربة طريقة تفكيرها. وفعلا بعد أقل من شهر لمياء حملت. وحماتي بدأت تهتم بيها هي وريما. لو اتوحموا على أي أكلة بعملهالهم وهي تطلعلهم. وشغل البيت من طبيخ وتنضيف ومواعين وغسيل حتى هدوم سلايفي وكوي وترويق فوق وتحت لحد ما حيلي اتهد. وبقيت ماشية بمرهم لوجع الضهر كل ليلة. ياسين وهو بيحط المرهم بين كتافي: معلش يا حبيبتي ربنا يكتبلك أجر على تعبك اللي تعبتيه مع ماما. رديت بتعب:

أنا عارفة بس أنا مبقاش فيا حيل. طب سبني أروح أبات يوم حتى عند أهلي أريح فيه وبعدين أرجع. لفيتله عشان أشوف رد فعله. بعد ما لقيته سكت، لقيته بيبص بتوتر ومش عارف يقول إيه. إيه في إيه يا ياسين؟ إنت مش وعدتني تخليني أروح أريحلي يومين في بيت أهلي؟ ايوه أصل أصل أظن مش هينفع تروحي اليومين دول. سلايفك الاتنين تعبانين من الحمل. وطبعًا أمي مش هتقدر تهتم بيهم وشغل البيت وحدها وهي كبيرة كده. بصيت بعدم استيعاب. وبعدين وقفت بغضب:

بس ينفع مروى الخدامة اللي إنت اشتريتها تخدم عليهم ليل نهار من غير بريك؟ حتى ده حتى الخدمات ليهم يوم في الأسبوع إجازة.