رواية حمقاء في المخابرات الفصل الرابع 4 - بقلم ايزيس

سيف فاتح قميصه وعرقان من كتر الضرب في عمار الجاسوس ومتعصب جدا وعروقه كلها بارزة. وفجأة يدخل حازم ومعاه شاب فرفور جداااا. سيف: (بينهج) مين دا؟ الشاب: (بمياعة شوية) هاي، أنا ميزو، مدرب الأيتيكيت للكابتن ملك. هي فين؟ سيف: (بغضب) نعممممم؟ ومسك ميزو من تي شيرته وشده ناحيته. سيف: انت ايه يا روح أمك؟ ميزو: (بنفس المياعة) أوه ماي جاد! انت مجنون؟ سيف لسة هيمسك ف رقبة ميزو بس حازم بسرعة فك ايدين سيف بالعافية من تي شيرت ميزو.

حازم: سيف، اهدي شوية. أنا اللي طلبت معتز عشان يدرب ملك عشان يبقي فيها حتة أنوثة شوية عشان المهمة الجديدة. سيف: (بصدمة) مهمة إيه؟ ملك هتشتغل إيه بالظبط؟ وليه يجي الشئ دا يدربها؟ حازم: سيف، أكيد هتعرف كل حاجة في الوقت المناسب. وبعدين قال لميزو: وانت يا معتز، معلش دلوقتي روح عشان ملك تعبانة وماجاتش انهاردة، بس من بكرة تقدر تبدأ شغلك معاها. سيف: (بعصبية) يبدأ إيه يا باشا؟

أنا لازم أفهم المهمة من بدايتها. ملك مراتي ولازم أعرف هتشتغل فين. حازم: (بعصبية أكبر) سيف، أنا مقدر أن ملك مراتك، غير كده انت عارف اني ما بحبش حد يتعصب عليا. بكرة إن شاء الله لما تيجي ملك هتعرف انت وهي المهمة كلها. وسابه مع ميزو وخرج. سيف بص لميزو وعمل الحركة دي. ميزو وهو بيجري قال: يا مامي، إيه الوحش دا؟ هو هيتحول لزومبي ولا إيه؟ نور وصلت البيت وهي ف عالم تاني وحاضنة الورد وبتبسم غصب عنها. ملك بصتلها باستغراب.

ملك: نور، نور يابت ردي عليا. نور: (بنفس الابتسامة) بتقولي حاجة يا لوكا يا قمر؟ ملك: قمررر؟ إيه اللي جرالك يابت يا نور؟ نور: (همست) هقولك وماتقوليش لأبيه سيف. ملك: (همست) قوللي. نور: في بير. نور: (بصوت واطي وفرحة) عدنان جالي الجامعة و... وفجأة يدخل سيف. سيف: (بص لقاهم بيهمسوا لبعض) هو فيه إيه؟ بتتوشوشوا ف إيه؟ ملك: (باندفاع) والله ماليا ذنب، هو اللي راح وو... نور كتمت بوق ملك بايدها. سيف قرب علي ملك بشك. سيف: هو مين؟

ااه قصدك ع الواد المايع ميزو؟ وبعدين كلمها بتهديد: عارفة يا ملك لو لقيتك بتهزري معاه أو بتضحكيله هقتلك يا ملك. ملك: (مبرقة ومش فاهمة ولا كلمة، وساكتة) نور: ااه، ميزو، ميزو يا ملك. ملك بصت لسيف ولنور وسابتهم ودخلت الأوضة. نور: (بصت بتوتر لسيف اللي شكله متعصب وجريت ع المطبخ) أنا هساعد ماما في العشا. سيف: هو البيت دا كله فيه حاجة غريبة ليه انهاردة؟ تاني يوم في المخابرات. وصل سيف وملك وكل واحد راح ع مكان شغله.

دخلت ملك لقيت ميزو ف مكتبها. ملك: (بدهشة) صباح الخير. هو انتي بنت قاصة شعرها؟ ولا شاب متحول؟ ولا هويتك إيه بالظبط؟ ميزو: هاي، أنا ميزو، مدرب الأيتيكيت ليكي يا كابتن ملك. ملك: (ضحكت عشان فهمت) يا صلاااة العيد! مدرب إيه؟ (ايتيكيت) ومين قالك اني مش بفهم في الأيتيكيت؟ داحنا اللي اخترعنا الأيتيكيت يا سوسو. ميزو: (بعصبية بس كيوتا) اسمي ميزو على فكرة. ملك: أنا شيفاك سوسو. يالا واظبط نفسك بدال ما أظبطك. ميزو: (بصوت ناعم)

أوه ماي جاد، انتي ازاي كده؟ لازم تكوني كيوت وهادية ف كلامك وتتكلمي بالراحة جدا. أول سؤال، لو عايزة خدمة من أي شاب وانتي ماتعرفهوش هتقوليله إيه؟ ملك: ودي عايزة اتيكيت؟ دي هاقوله: والنبي يا خويا شالله تنستر، عايزة منك خدمة. ساهلة أهي. ميزو: (بصدمة) انتي بتقولي إيه؟ نو واي! تقولي كده طبعًا. قول لي: إكس كيوز مي أو باغدون، وبعدين تقولي الخدمة. ملك: نعم؟ باغدوو؟ أنا كابتن ملك أقول باغدون؟ انت أهبل يااااض؟

ميزو: اووووف. طب لو عايزة تشكريه ع الخدمة هتقولي؟ ملك: (ضحكت فهمتك أنا يا سوسو) هاقوله: مرسيي. إيه رأيك؟ ميزو: اسمها مغسيي على فكرة. ملك: انت الدغ يااض؟ إيه اللي باغدون مغسيي؟ والله أهبل بجد. ف مكتب سيف. قاعد عمال يغلي ومضايق عشان عارف أن ملك مع ميزو. خلاص مش قادر يستنا قرر أنه يروح هناك ويقعد معاهم. لسة هيخرج لقي عدنان جي عنده. عدنان: (بابتسامة) صباح الفل يا وحش المخابرات. سيف: (بضيق) صباح الخير. مالك أنت كمان؟

أكيد ف حاجة ورا الاحترام دا. عدنان: احم، حاجة إيه يا معلم؟ هو ما ينفعش الواحد يصبح ع صاحبه إلا وفيه مصلحة ولا إيه؟ سيف: ارغي يا حسام عشان أنا فيا اللي مكفيني. مش هتبقا أنت وميزو عليا. عدنان: (بدهشة) ميزو مين؟ سيف: دا حوار كده هابقي أقولك عليه، بس انت عايز إيه؟ عدنان: تعالي نقعد. قعد. عدنان: سيف، أنا كنت... يعني كنت جي أتقدم لنور أختك. سيف: نور؟ بس نور مش بتفكر في الارتباط دلوقتي يا حسام. أنا آسف.

عدنان: مين قالك انها مش بتفكر؟ وبعدين احنا مش هنتجوز إلا بعد ما تخلص دراستها. يبقي ليه الاعتراض؟ سيف: هي مش هتوافق. أنا عارف. عدنان: (اتعصب واتجنن) لا، هي موافقة. سيف: وعرفت منين؟ انت كلمتها؟ عدنان: رحتلها الجامعة وسألتها ووافقت. سيف فقد كل ذرة سيطرة على أعصابه. وقام ضرب عدنان بالبوكس تلات مرات وهو بيقول: بتخون صاحبك يا حسام؟ بتكلم اختي من ورايا؟

وعدنان كمان بدأ يبادله الضرب. ودا العادي بتاعهم لما يتخانقوا بيفضلوا يضربوا ف بعض لغاية ما يتعبوا هما الاتنين. (ظباط مخابرات وعضلات بقا🤣) عند ملك وميزو. ملك: انت مجنون؟ عايزني آكل الرز بالشوكة؟ انت مش طبيعي على فكرة. مافيش حد يقدر ياكل الرز بالشوكة ياااض. ميزو: ملك، لازم تكوني متفاهمة معايا أكتر من كده يا بيبي. ملك: بيبي مين ياااض؟

وفجأة سمعوا ضرب جامد وصوت عالي. خرجوا يجروا هما الاتنين. وصلوا مكتب سيف ولقوا سيف وعدنان طحنوا بعض. ملك: (بخوف) الحقهم يا ميزو، هيموتوا بعض. ميزو: (ببرود) نو واي إني أتدخل وأبوظ برستيجي. مش انتي كابتن؟ الحقي... عدنان وهو بيضرب ف سيف وبينهج: مين دي؟ سيف: (بسخرية وهو بينهج برضو) دي ميزو. ولسة بيضربوا ف بعض قامت ملك داخلة بينهم وصرخت: باااااس كفاية. سيف زقها من غير ما يقصد وقامت واقعة ع الأرض. وهما لسة بيضربوا ف بعض.

ملك: (صرخت) اااااه... البيبي! سيف وعدنان سمعوا الكلمة دي وجريوا عليها هما الاتنين. سيف: (بقلق) انتي كويسة؟ وبيبي إيه اللي بتقولي عليه؟ انتي حامل؟ ملك: هعهعهعهع... قدرت أضحك عليكو وأخليكوا تسيبوا بعض. ميزو: (بنفس مياعته اللي اتعودنا عليها) ملك، نو واي تدحكي كده. دي ضحكة بلدي أوي. عدنان وسيف بصوا لبعض وطلعوا يجروا وراه. وميزو يجري: يا ماااامي! يا مستر حازم! شيل عني الوحوش دول. حازم دخل بهيبته

المعتادة وجموده وقال: ملك وسيف وحسام، تعالوا ورايا على أوضة الاجتماعات. في أوضة الاجتماعات. حازم: طبعًا كلكم بتسألوا عن المهمة الجديدة. حازم شغل الداتا شو وبدأ يعرض صور. حازم: طبعًا أكيد كلكوا عارفين مين دا. ملك: (باندفاع) الله! دا إياد الشوال! أنا بعشقه. سيف: (بغضب) نعم يا روح أمك؟ بت... إيه؟ ملك: (بخوف) بعشق تمثيله و... وأفلامه والله. عدنان: اششش... ماله دا يا فندم؟

حازم: إياد الشوال بدأ حياته زي أي ممثل عادي من أسرة فقيرة. خطواته في عالم الفن كانت تدريجية، يعني اتشهر واحدة واحدة. بس فجأة يبقي معاه مليارات وطيارة خاصة وحياة مرفهة جدا. بدأنا نشك في مصدر ثروته. يا تري مخدرات ولا آثار وتجارة أعضاء؟ وأثناء بحثنا اكتشفنا أنه ليه علاقات ومعارف كتير في إسرائيل وبيسافر بصفة مستمرة برا البلد. فاحنا دلوقتي عايزين نمسك أي دليل يثبت أنه جاسوس أو خاين. سيف: وإيه علاقة ملك بالموضوع دا؟

حازم: إياد متجوز ومراته ماتت من حوالي سنة في ظروف غامضة. سافروا رحلة بطيارته الخاصة ولما رجع نزل نعي في الجرايد والمجلات أنها ماتت. وعنده ابن منها عمره أربع سنين اسمه بدر. وبدر دا هو أغلي حاجة ف حياة إياد. بياخده معاه مواقع التصوير وبيسافر معاه كل مكان. الأسبوع اللي فات إياد نزل إعلان أنه عايز مربية متفرغة عشان تعيش معاه هو وابنه وبشرط ما تكونش أجنبية. وهنا بقا لعبتنا هتبدأ. سيف: (بعصبية) يعني إيه؟

ملك تعيش معاه ف بيت واحد؟ وبعدين دا ممثل سمعته في الأرض وكله بيتكلم عنه أنه بتاع ستات. حازم: سيف، أهدي. أديك قلت بتاع ستات. يعني الستات اللي حواليه كفاية أوي يخلّوه ما يفكرش ف ملك. وبعدين اللي يعرف ملك مش هيعتبرها ست يعني. ملك: نعم يادلعادي؟ مش ست إزاي؟ وبعدين بصت لسيف وهي عاملة كده. ملك: سيفو، أنا مش ست. سيف: (قرب منها وهمس ف ودنها) أجمَد ست وربنا. بس ماحدش يعرف كده غيري. ملك: حبيبي يا سيفو. حازم: بتقولها إيه؟ ملك:

(بتكح) كمل يا للي مش شايفني ست. دانا ست الستات. حازم: انتي اتسرعتي في الحكم. أنا كنت هاقول انه اللي يعرف ويشوف طيبتك وبرأتك هيفكر فيكي على أنك طفلة بريئة مش أكتر يا ست ملك. أنا مش عارف سيف شايفك إزاي، بس أنا شايفك كده. المهم دورك أنك تبقي مربية بدر وتعلقيه بيكي على قد ما تقدري. ومن الناحية التانية تراقب كل تصرفات إياد. وليكي كاريزما وحضور يخلي أي حد يحبك. ها، فهمتي؟ ملك: فهمت طبعًا.

سيف كان مضايق جدا من المهمة دي بس ما باليد حيلة. أخد ملك وراحوا ع البيت وهو مضايق من كل حاجة. عدنان وميزو وملك وحازم. وكمان نور اللي عرف أنها بتحب صاحبه. في الشقة وصل سيف وملك. كانت أمينة ونور بيشاهدوا التي ڤي. سيف: (بص لنور بغضب) نور، عدنان اتقدملك. نور بصت وابتسمت. ودا خلى سيف يضايق أكتر. سيف: وأنا رفضته. نور: ...