رواية حمقاء في الموساد الفصل الثالث 3 - بقلم إيزيس

ملك .... اهدي يا وحش وفهمني بالراحة مش أهم حاجة الطلقة ما تصيبش الراجل التمثال دا. سيف .... صبرني يارب... دا هو دا ديفيد اللي الطلقة لازم تيجي فيه. أنا هاروح أظبطه أكتر من كده عشان تعرفي تركزي. ولسة سيف هيتحرك وملك كل تفكيرها أنه التمثال لديفيد، وقامت ضربة طلقة. جات في سيف. ملك صرخت.... سيييييييف.... يالهووويييي! الواد هيفرهد! يخرب بيت السلاح... وجريت عليه. سيف بألم .... هتعملي فيا ايه تاني؟ الله يخرب بيتك!

اااه دراعي.. كنت عارف إنك هتتعبيني بس مش من أول يوم كده. ملك مسكت دراعه لقت خدش بسيط وانصدمت بس اطمنت وقالت: ملك .... إيه دا؟ أومال طول بعرض ووقعت من طلقة في دراعك؟ وكمان الرصاص مش حقيقي! سيف بصلها بغل .... المرة الجاية هابقى أحطلك رصاص حقيقي وابقى صوبي المسدس ناحية قلبي.. ابعدييييي عني. ملك .... بتكشيرة أطفال... كنت بحاول أساعدك تقوم، وكمان هخيطلك الجرح أصلي أنا نيرس. سيف . بعصبية ...

ما تقربيليش.. هاقوم لوحدي.. انتي ما تجيش جمبي خالص.. وأنا مش مجنون عشان أخليكي تعالجيني. ملك . بتكشيرة .... براحتك قوم لوحدك.. مانت وحش وجامد بقا. قالتها بتريقة. وقام سيف ودخل الفيلا ونادى على الدكتور عمرو اللي بيشتغل مع حازم وقاعد معاهم في البيت السري لزوم الحوادث. ملك .... يا وااااد يا جامد! مأمن نفسك من كله انت، وجايب دكتور كمان! سيف .... قلب المؤمن دليله.. واتهدي واقعدي خمس دقايق من غير لوك لوك.

الدكتور خيط الجرح لسيف تلات غرز. وبعدها قام سيف وقال.... يلا يابت على برا.. هنكمل تدريب. ملك بصدمة.... انت تعبان يا كابتن.. لازم ترتاح أسبوع على الأقل. سيف.... وحياة امي... ملك .... بحزن ممكن ما تجيبش سيرة أمي. سيف.... أنا أسف.. بس أنا مش هينفع أرتاح. لازم خلال شهر بالكتير تكوني جاهزة للسفر. ملك..... حاضر.. أمرك. يلا بينا. وخرجوا تاني للتدريب. وفضل سيف يدربها لحد ما الضهر أذن. ملك بتعب ....

كابتن سيف.. انت خاطفني هنا ولا بتعذبني؟ سيف... ليه بتقولي كده؟ ملك ... مش ملاحظ إني ما أفطرتش؟ ويمكن يغمى عليا من الجوع دلوقتي. سيف افتكر إنها فعلاً ما فطرتش .... وايه الأدب اللي نزل عليكي فجأة دا؟ ما قولتيش ليه من بدري إنك جعانة؟ تحبي تاكلي إيه بقا؟ ملك.... بيتزا... سيف... نعم بيتزا؟ ودي أجيبها منين دلوقتي؟ ملك... أطلب دليفيري. سيف...

حضرتك ناسية إنه المكان دا سري وما ينفعش حد يعرفه. ادخلي جوه وأنا هاخرج نص ساعة وراجع تاني. دخلت ملك، اتوضت، وصلت الضهر. بعد نص ساعة وصل سيف ومعاه بيتزا. جريت ملك زي الأطفال واخدتها وفضلت تاكل بسرعة كأنه حد هيجي ياخدها منها. وسيف بياكل بكل هدوء وبيراقبها وبيبتسم. بعد شوية. ملك.... هيييييييح الحمد لله شبعت. سيف.... لسة فاضل العلبة.. كوليها.. طعمها حلو. ملك.... نينينينيني.. خليهالك كلها انت. سيف ... تشربي قهوة؟ ملك....

امممم. سيف... طب قومي اعمليلنا.. أنا إيدي متصابة. ملك ... استغلالي جدااااا. شربوا قهوة وخرجوا تاني للتدريب. فضلوا لحد المغرب. بس سيف لمح بصيص أمل إن ملك تتحسن لأنها أدت بشكل كويس نسبياً المرة دي. سيف..... كفاية كده.. شطورة أوي. ملك ... بفرحة بجد عجبتك يا كابتن؟ سيف ... امممم. وعشان كده هفرجك على فيلم. ملك.... هنروح سينما؟ وحياة عيالك. سيف...

لا سينما إيه.. انتي فهمتي غلط.. أنا واخد بنت أختي أفسحها. في أوضة في البيت دا خاصة بعرض الأفلام.. تعالي معايا. ملك بفرحة .... يلا نجري. وجريوا على جوه. في أوضة السينما. بعد مرور وقت. ملك منهارة في دموعها وسيف بيبصلها بصمت وملامحه جامدة جداً. وفجأة وقف وفصل العرض وقال: سيف... كفاية لغاية النهارده.. أنا أسف بس دا واقع. ملك ... بدموع وشهقات ... الحقيقة دايما بتوجع يا باشا.. بس انت ليه فرجتني على الحاجات دي؟ سيف....

المناظر دي يا ملك واقع بيعيشوا إخواتنا الفلسطينين كل يوم.. وبيتعرضلها أطفال عندهم يادوبك سنة وإنتين وتلاتة. أما أنا فرجتك ليه عليهم عشان انتي هتسافري وتواجهي الحقيقة دي بنفسك.. ولازم ما تنهاريش لما تشوفيها.. عشان كده هفرجك كل يوم على فيلم وثائقي فيه عذاب ألوان لناس مالهاش أي ذنب غير إنهم اتولدوا لقوا بلدهم في قبضة عدو مابيعرفش يعني إيه إنسانية ولا يعرف ربنا. قامت ملك ولسة بتعيط .... أنا هاروح أنام. سيف....

تمام.. بس كان فيه درس عبري لازم تاخديه.. وأنا هلغيه عشان حالتك دي.. وبكرة إن شاء الله نكمل.. تصبحي على خير. ملك ماردتش ومشيت وكأن جرح الماضي انفتح تاني. طلعت ملك أوضتها.. وصلت العشا وعيطت كتير ودعت لعائلتها بالرحمة ودعت ربنا إنه يقويها وينصرها في انتقامها. مددت ملك على السرير وافتكرت يوم موت أهلها. فلاش باك. باكملك راجعة من الشيفت الليلي بتاعها. نزلت من التوك توك وفجأة لقت نار شديدة جداً خارجة من شبابيك شقتهم.

ملك ..... فضلت تدور في الناس المتلمومة عشان تلاقي حد من أهلها. ملك بصدمة من غير بكاء .... خالتي سعاد.. فين ماما وبابا؟ سعاد .. ربنا يتولاهم يا بنتي برحمته. ملك.... بصراخ .... لااااااااااا.. ماتقوليش كده.. هما هيخرجوا.. مش هيجرالهم حاجة. ولسة هتجري على فوق لكن حد شدها من إيدها. ملك .... سيبني.. سيبني.. أنا رايحة لماما وبابا وأخواتي.. أخواتي فوق.. سيبني.. وصرخت بحرقة ..... يا ماااااااااماااااا.

وبعدين فقدت الوعي ووقعت بين إيدين شريف. باكملك انهارت أكتر في البكا وفضلت تعيط لحد ما نامت. وصحيت الفجر.. اتوضت وصلت ونزلت حضرت فطار. وبعدين سيف صحي صلي الفجر على الساعة خمسة وقرأ قرآن لحد الساعة ستة وراح يصحي ملك بس مالقهاش. نزل زي المجنون بس لقاها على السفرة محضرة الفطار ومش بتاكل. سيف اتنهد بارتياح..... قلقتيني عليكي.. انت قلت البت خافت وهربت. ملك ... بابتسامة.... أهرب ليه؟ برنس.. دانا قدرك. سيف ضحك....

هو انتي ملك فعلاً ولا أنا بحلم؟ أول مرة تصحي بدري كده.. خير. ملك ... لا يا كابتن.. أنا طبيعة شغلي كده أصلاً.. مرة أخلص الفجر وأروح.. ودا الشفت الليلي.. ومرة أصحى الفجر وأروح الشغل.. بنتعب أوي يا أبو صلاح. سيف.... ربنا يعينك.. أنا بجد جعاااان جداً. وبدأ يفطر. وبعد ما خلصوا فطار وشالوا الأكل. ملك..... يلا على التدريب.. أنا متحمسة جدااا. سيف.... ملك ممكن سؤال؟ بصتله ملك .... اتفضل.

سيف .. باحراج. طبيعة علاقتك بديفيد كانت عاملة إزاي؟ ملك بابتسامة.... مش فاهمة. سيف..... بنفس الاحراج.... يعني.. ديفيد قربلك أو اتخطى حدوده معاكي.. حصلت بينكم حاجة يعني؟ ملك كانت مصدومة ومن غير ما تحس قربت على سيف وضربته بـ قلم.