رواية حنين الفصل الرابع عشر 14 - بقلم هايدي احمد

طب يا ستي أنا محضر لك سفرية لمدة أسبوع في أكتر مكان كنتي عايزة تروحيه. اعتبريه شهر عسل تاني بس صغنن. هنروح الغردقة. حنين شهقت من المفاجأة: انت بتتكلم جد؟ صح صح. أحمد بضحك: امال بهزر يعني؟ أكيد بتكلم جد. حنين وهي بتحضنه: ربنا يخليك ليا يا حبيبي وميحرمنيش منك. أحمد: أنا عندي كام حنين يعني؟ بس ده بمقابل. بعدت عنه بضيق وهي بتبصله بعيون القطط: استغلالي. أحمد بصدمة: أنا.. مش كنت حبيبك من شوية؟ حنين: أيوه كنت مش شوية.

أحمد بمكر: لا يا قلبي، هنا تاخد وأخذها في قبلة شغوفة. وابتعد عنها بعد لحظات: ها فهمتي؟ حنين بإضطراب: فهمت إيه؟ أحمد: مش مهم، هبقى أفهمك بعدين. يلا جهزي حاجتك على ما أعمل كام مكالمة كده. حنين: حاضر. وجريت على الأوضة وهي بتضحك. أحمد بصوت عالي: براحة طيب. *** مالك يا هنا مروحتيش الكلية ليه؟ هنا بتوتر: ها.. أصل مفيش حاجة مهمة النهاردة. هي دوب محاضرة واحدة. سلمى تبقى تجبهالي. الأم بإستغراب: من امتى ده؟

ده انتي لو ندوه ملهاش لازمة بتروحي. إيه اللي حصل؟ هنا بحزن: يا ماما هتعب نفسي على إيه؟ محدش يستاهل. الأم: الله ده كلام جديد ده. هنا: لا جديد ولا حاجة. وبعدين إيه؟ زهقتي مني من يوم ده؟ بدل ما تقولي أخيراً هفطر معاكي وأقضي يوم من أوله. الأم: آه صحيح. وتعملي الغدا وتروقي البيت يا سلام. هنا بصدمة: لا متفقناش على كده! الأم: يلا يا بت قومي بلاش كسل عشان نفطر مع بعض. *** الله يسهله يا عم. إيه التغيير المفاجئ ده؟

تتحسد يا راجل. أحمد: يلا اتعديت منك. حسن: مني أنا؟ طب ياريت عندي عدوى بالشكل ده هفرح. الها: متنقش فيها بس خليها تكمل الله يخليك. المهم زي ما قولتلك بالظبط تعمله وتاخد بالك كويس من كل حاجة. هو أسبوع واحد بس مش هتأخر عشان نكمل المشروع. حسن: تمام. وصل و.. اختك ومامتك لو احتاجوا حاجة أنا موجود. يا ريت تقول لهم. أحمد: لا متتعبش نفسك يا حبيبي، محمد موجود. كتر خيرك كفاية الشغل عليك. حسن: يا عم متقولش كده. لا تعب ولا حاجة.

أحمد: متحرمش منك يا حبيبي. يلا أسيبك أنا عشان أجهز نفسي. سلام. حسن: سلام. *** أمم وهاخد دي كمان يمكن أحتاجها و.. أحمد بصدمة: إيه ده كله؟ كانت حنين واقفة وحواليها حاجات كتير وشنط. حنين بإستغراب: إيه؟ أحمد بضحك: احنا رايحين أسبوع مش سنة. ما تجيبي البيت معانا بالمرة. حنين بتذمر: الله الحق عليا عشان لو احتجنا حاجة. أحمد: مش تخافي لو احتجنا حاجة هننزل نشتري. حنين: طب ماما وهنا مش هيجوا معانا؟

أحمد: قولت لهم قالوا لا. هيسيبوها لإجازة الصيف نبقى نطلع كلنا. وبعدين عشان يسيبونا على راحتنا. حنين: بس أنا عايزاهم معانا. أحمد: في إيه؟ انتي خايفة مني ولا إيه؟ حنين: لا مش كده. أحمد بإستفهام: امال؟ حنين: مش عايزة أسيبهم هنا. أحمد: حنين يا حبيبتي، احنا مسافرين أسبوع مش مهاجرين. مالك؟ أنا مش مكفيكي يعني؟ حنين: لا مقولتش كده يا حبيبي. أحمد: مهو مش باين غير كده. يلا كملي بقيت الحاجة والبسي. حنين: طيب ماشي.

وطبع على جبينها قبلة وذهب. *** إيه ده بجد؟ عايزة أروح معاهم. الأم: اتلمي يا بت. أنا قولت له لا. هنا بتذمر: ليييه؟ كنتي سيبيني أروح معاهم. الأم: خلي في شوية دم. تعرفي.. أنا ما صدقت يرجعوا زي الأول. عايزة تروحي معاهم؟ هنا: الله أنا هعمل إيه يعني؟ ده أنا هقعد ومش هعمل صوت. الأم: انتي برضه. أصل أنا مش عارفاكي. هنا: يوووه يا ماما دي الغردقة. الأم: وإيه يعني؟

إجازة الصيف قربت أهي. ابقي اعملي اللي انتي عايزاه. إنما دلوقتي شوفي وراكي إيه وشوفي امتحاناتك. سمعاني؟ هنا قامت بتذمر: يووه حد يرفض عرض زي ده بس. الأم: بتبرطمي بتقولي إيه؟ هنا: مبقولش. الله. *** نزل أحمد وحنين بعد ما جهزوا حاجتهم عشان يسلموا على العيلة. الأم: مع السلامة يا حبايبي. خدوا بالكم من نفسكم. أحمد: حاضر. المهم انتوا تاخدوا بالكم من نفسكم كويس. وأي حاجة تحتاجوها محمد وحسن موجودين.

الأم: يا حبيبي ده أسبوع متقلقش. ليه ده كله؟ أحمد: برضه يا ماما زيادة أمان عشان أطمن. الأم: ربنا ينورلك طريقك يا ابني. راحت الأم حضنت حنين: مع السلامة يا حبيبتي. ابقي طمنيني عليكم. وهمست في ودنها: واسمعيني الأخبار الحلوة ها. حنين رجعت ورا بخجل: حاضر يا ماما. وراحت تسلم على هنا: هتوحشيني. هنا: وانتي كمان هتوحشيني أوي. حنين: أنا كنت عايزكم تيجوا معايا والله.

الأم: الأيام جاية كتير يا حبيبتي. نبقى نروح سوى. يلا عشان متتأخروش. أحمد: قولي لها محسساني إني هاكلها. هنا: حنين بصي متسببيش حتة في الغردقة إلا لما تصوريها. ماشي؟ حنين بضحك: حاضر عنيا. أحمد سلم على أخوه وبعدين هنا: خدي بالك من نفسك كويس. وانزلي الكلية. ولو حد اتعرضلك قولي لي. متخافيش من حد. هنا: حاضر. أحمد: يلا سلام. ركبوا ومشوا تحت نظرات فرح لهم وأخرى حقد عليهم. ***

وصلوا الفندق اللي أحمد حجزه ونزلوا يستلموا الأوضة ويشوفوها. حنين بإنبهار: الله! المنظر من هنا حلو أوي. أحمد: مبسوطة؟ حنين وهي بتحضنه: أوي أوي. أحمد أخدها في حضنه وهم بيبصوا على شكل البحر وجماله ومستمتعين بيه. باسلها على جبينها: ربنا يقدرني وأبسطك كده على طول. يلا غيري هدومك ونرتاح شوية وبعدين ننزل نتعشى. حنين: تمام. هظبط الحاجة الأول. *** انتي فين يا موكوسة؟ أهم مشيوا يا أختي. خليكي قاعدة مش عارفة تعملي حاجة.

=....... ريهام وهي على التليفون مع فاطمة: قولتلك يا عبيطة وإنتي اللي مبتسمعيش الكلام. أهم رايحين شهر عسل تاني. =....... ريهام: لا على مين؟ هطلعه على عينها لما ترجع بإذن الله. بقى حماتي تقول لمحمد خلي مراتك تنزل تساعدني هي تروح شهر عسل وأنا أقعد هنا خدامة. =........

ريهام: استني عليا لما يرجعوا. أنا هعرف أتصرف معاها. بس إنتي إيدك معايا. وبعدين في فرصة إن أحمد مش عايز خلفة دلوقتي وده في صالحنا والله أعلم. يمكن هي اللي مبتخلفش ومخبية علينا. : هي مين دي اللي مبتخلفش؟ ... يتبع