رواية حنين الليل الفصل الخامس والأربعون 45 - بقلم أميرة رمضان

ايان افتكر اللي امه عملته فيه. غمض عينه وبدء يضغط علي اسنانه جامد. ماريا فهمت هو بيفكر في اي: ايان كارما مش هتعمل فيه زي ما طنط جاسمن عملت فيكم. متقلقش هي ايوا مجنونه شويه لكن متقدرش تستغني عن ابنها. ايااااااااااان في اي؟ حنين طلعت وشافت ايان الحالة بدأت تظهر عليه. حضنته جامد بدون مقدمات. وبعد شويه ايان بدأ يهدي. ماريا: ايان انا عملت كده عشان مش عايزاهم يبعدوا عن بعض بالاخص عشان ابنهم اللي لسه مشافش دنيا.

حنين بصدمة: انتي قولتي له على كارما؟ *** وجدان: الو. مليكه: اي ي جلبي اتسحرتي ولا لسه؟ وجدان: لسه بقولك. مليكه: اي؟ وجدان: هو حيدر جه؟ مليكه: لاء لسه ده نزل من بدري ولسه مجاش. شكلو هيصلي الفجر وياجي. وجدان: طب بالله عليكي لما ياجي في أي وقت خليه يرن عليا. مليكه بقلق: في حاجة ولا اي؟ وجدان: لاء مفيش بس هو زعلان مني شويه. مليكه: اه قولتي لي. طب كويس انك قولتي عشان اخد حذري وابعد عنه. هههههههه. وجدان: متنسيش بقا ماشي.

مليكه: ماشي وانتي خلي في بالك انه بيحبك وهيسامحك بس انتي صالحيه حلو. وجدان بضحك: هبين له حتة من الكتف. مليكه: استغفر الله. احنا في أيام صيام. اللهم اني صايمة. وجدان قفلت مع مليكه واتنهدت وقالت: شوفتي لسه مجاش. مامتها: أحسن خليكي قاعدة محتارة كده عشان بعد كده تبقي تعرفي بتقولي اي. وجدان: أنا مش عارفة هو رفض ليه وزعل أوي كده ليه. ماهو عادي يعني إني أسافر. هو أنا هعمل حاجة غلط؟

مامتها: اه ده غلط إنك تخرجي لوحدك. أنا لما وافقت انتي قولتي هيخرج معاكي وده جوزك كاتب عليكي. ف عادي يعني تخرجوا وترجعوا في نفس اليوم. لكن ده طلع بتقوليله يومين وأصحاب أصحابك هيجوا وحاجة آخر مسخرة. وجدان: بقولك ااااي أنا مش ناقصة. (سابتها ودخلت اوضتها) *** عند مليكه الباب خبط. مليكه: جاااااااايه ااااااااي. ندي: رايحة فين ي زفتة. استني أنا اللي هفتح. (فتحت الباب)

سليم: انتو هتتعازموا مين اللي يفتح. خدوا السحور اهو ومحدش يرن عليا تاني. مليكه: جبت فول. سليم: مش عارف بتتسحري ازاي بالفول. مليكه: ملكش دعوة يلا خد الباب في إيدك. سليم: مش هتقولولي اقعد اتسحر معانا؟ مليكه: إحنا هنتسحر بفول. (وقالت بسخرية) وحضرتك بتاكل باتيه. سليم: ماهو في جبنة وحاجات حلوة. أي سبيني. ندي: اقعد ي قلب عمتك كل. مليكه: استغفر الله العظيم. يعني جايبلنا السحور وعينه فيه. ***

عمر رجع الشقة ومعاه أكل. لسه داخل وتلفونه رن. _الو أيوا ي أمي. أمال: اتاخرت كده ليه. انت هتصوم بكرا؟ عمر: أيوا إن شاء الله. أمال: طب تعالا كل لقمة. عمر: لاء أنا هاكل أنا وكارما. أمال بسخرية: كارما وهي جات ست كارما. عمر: أيوا جبتها من شوية. أمال: انت اللي رحت جبتها. دي كنت تسيبها تاجي زي ا... عمر بمقاطعة: اااامي أنا ومراتي دلوقتي في الشقة فوق. عايزة حاجة؟ أمال بضيق: هعوز أي يعني. سلام. (وقفلت)

ميس: أو عي تقولي رجع كارما. أمال: أيوه جاب الزفتة تاني هنا. وبينها عايزة تخليه يعزل. ميس: اوووووف. دانا قولت خلصت منها. أمال: متقلقيش. وحياتك عندي لنمشيها من هنا من غير رجعة تاني. عند عمر دخل الأوضة. كارما: أنا مش قولت سيبني لوحدي. عمر: طب تعالي كلي الأول عشان الفجر قرب يأذن. كارما وهي حاسة إنها هتتقيأ: أي اللي انت جايبه ده. ابعدوا عني. عمر: أي ده. جبنة قريش من اللي بتحبيها. كارما بأرف: ابعدها. مش طايقة ريحتهاااااا.

عمر باستغراب: مالك فيكي اي؟ كارما جرت بسرعة على الحمام وبدأت تتقيأ. عمر دخل ورها. كارما بتعب: اطلع برا. عمر: مش هطلع. (وسندها وغسلها وشها وطلعها) كارما بتعب أكتر: أنا بردانه بردانه اوووي. عمر: طب ثواني. (جاب لها بطانية وغطاها وقعد جنبها حضنها اوووي عشان تدفي) عمر: تعالي أوديكي لدكتور. كارما: لاء. عمر: انتي باين عليكي تعبانة. بطلي عناد ويلا. كارما: أنا قولتك ابعد الجبنة عني وأنت مسمعتش الكلام. عاجبك كده؟

عمر: بس إزاي مش طايقة ريحتها. وأنتي بتحبيها أووي. كارما بانفعال ومن غير ما تاخد بالها قالت: كنت بحبها الأول قبل الحمل. لكن دلوووووقتي مش بطيقهااا... (لحظة استوعبت اللي قالته) عمر بزهول وفرحة: انتي حامل. كارما: اوعي من جنبي. لاء مش حامل. أنا بقول أي كلام. عمر: كاااااارما. انتي حامل. كارما بعناد: لاء. عمر: هو أنا مش هعرف يعني. (ومسك إيدها) تعالي معايا. كارما بانفعال: هتروديني فييييين؟ عمر: هشوف حامل ولا لاء.

كارما: منا قولتك لااااااااء. عمر: اسمعها من الدكتور. كارما بغضب وصوت عالي: خلاااااااص. حامل. أيوا حاااامل. ارتحت. عمر وقف لحظة وبعدين حضنها اووووي ولف بيها: أنا مش مصدق نفسي. اخيرااا هبقا أب لعيالك. كارما كانت فرحانة من جواها على ردت فعل عمر. بس كشرت وقالت: هتبقا أب على الورق بس. لآني هطلق وهاخدو.

عمر بغضب: بقولك ااااي. كلمة طلاق دي تنسيها أصلا ومسمعهاش منك تاني. ومحدش هيربي ولادنا غيرنا أنا وإنتي. واعقلي كده وفكك من الهبل ده. كارما: مش هعيش معاك غصب عني. عمر: أنا عمال أحايل فيكي وأقول هتعقل. لكن موضوع الطلاق ده لو اتفتح تاني متلوميش إلا نفسكككككك. كارما بخوف: طب خلاص. هنام لوحدي في الأوضة. عمر: لاء هتنامي معايا. كارما: لاء بقاااا أنا تعبانة وعايزة أرتاح. وأنت بتخنقني مش بعرف آخد راحتي.

عمر اتنهد وقال: ماشي. انهارده بس. أما نشوف آخرتها. *** تاني يوم. ماريا: يلا بسرعة. حنين: طب ثواني. رعد: رايحين فين على الصبح كده. حنين بتوتر: ر ر رايحين. رعد: في اي. انتي هتغني. ماريا: رايحين نزور وحدة صحبتي. رعد: مين. ماريا: ياعم هو انت هتحقق. رايحة أزور ريما في المستشفى. رعد: في المستشفى ليه. ماريا: اووووف. التحقيق اللي مش هيخلص. هي بتشتغل ممرضة في المستشفى عندك. اسأله تاني ولا نمشي. رعد: طب تعالوا أوصلكم.

حنين: لاء. إحنا هنروح بعربية ماريا. رعد بحده: أنا قولت هوصلكم. ماريا: وصل ي أخويا. يلا قدامنا. *** في المستشفى. هدي: بس أيان ده إيه يابنتي ملاك. مسبناش لحظة واقف معانا. زهره: يامي. الدنيا فيها ناس حلوة مش كلها يعني الوحشين اللي في حياتنا. هدي: اه ده مهتم بيكي أوي. هو مش حكاية إنك دفعتي له فلوس العلاج. الموضوع أكبر من كده. زهره: انتي عملتي له موضوع كمان. هدي: تعرفي أنا بدعي ربنا يكون من نصيبك.

زهره: اهو دي الحاجة الوحيدة اللي بتمني متحصلش. هدي: ليه كده بس ي بنتي. زهره: ماماااا. انتي مش شايفة هو مين وابن مين. ناس ليها قيمة في المجتمع. وأنا بنت خمارجي. هدي: عيب عليكي ي بت. متقوليش على أبوكي كده. زهره: هي دي الحقيقة يامي. مش هننكرها. وبعدين أنا راقدة بقالي فترة هنا. وهو مجاش حتى يشوفني عايشة ولا لاء. هدي بتحاول تلطف الجو: ماهو بيسألني عليكي كتير في التلفون. ولما بروح أجيب حاجة.

زهره: ماما متبرريش. أنا عارفاه. هو يعني أنا هتوه عنه. ده تلاقيه زعلان عشان مش هقدر أشتغل الفترة دي وأجبله فلوس. هدي بحزن: سامحيني ي بنتي. زهره: يامي مش كل ماكلمك في الموضوع ده تعيطي وتشيلي نفسك الذنب. ده نصيب وأنا راضية. متزعليش انتي بقا. الباب خبط. الممرضة دخلت ومعاها بنتين. هدي: أهلا وسهلا. = لو سمحتي حضرتك زهره اللي جايه في حادثة عربية. زهره باستغراب: اه أنا. انتو مين.