رواية هو مين ده الفصل الخامس 5 - بقلم اسماء الطبلاوي

ام فاروق اول ما حست بالجو حر عند نسمة نزلت على طول تحت ودخلت وقفلت بابها بس كانت قلقانة عليها. ام فاروق: البنت دي فيها حاجة غريبة اليومين دول مش عارفة مالها لازم ابقى جنبها طول الوقت على الأقل عشان خاطر أمها الله يرحمها. فاروق خرج في الوقت ده لقى أمه بتكلم نفسها وقف جنبها وهو بيقول. فاروق: مالك يا أمه في إيه بتكلمي نفسك ليه هي زعقتلك ولا حاجة لما طلعتلها.

ام فاروق: ولا زعقت ولا حاجة يا ابني بس البت غريبة ومش عارفة فيها إيه ربنا يروق بالها وبالك. في الوقت ده كانت نجات وسنية ورباب قاعدين مع بعض في بيت نجات لما اتكلمت سنية وقالت. سنية: هااا قوليلي بقى كنت عاوزانا في إيه قلتيلي هاتي رباب وتعالي واديني جبت رباب وجيت خير في حاجة ولا إيه. رباب: ومن امتى يعني واحدة فينا بيجي من وراها الخير للتانية خشي في الموضوع على طول يا نجات وقولي عاوزة إيه.

نجات: اصبري انتي وهي وأنا هتكلم وهقولكم اللي انتوا عاوزين تعرفوه اشربوا الأول العصير. رباب بشك: لا معلش مفيش واحدة فينا اتعودت تشرب بق ميه في بيت واحدة تانية مننا عشان كده خشي في الموضوع على طول وبلاش لف ودوران. نجات: طيب اشرب أنا. مسكت نجات كوباية من كوبايات العصير وشربت منها قدامهم عشان تثبتلهم إن مفيش فيها حاجة وبعدين اتكلمت.

نجات: بصي بقى انتي وهي المعلم شعبان اليومين دول حاطط عينه على البنت نسمة وعايز يتجوزها وطبعاً إحنا مش هنسيب الكلام ده يحصل وأظن كفاية عليه تلت نسوان وأكتر من كده يبقى حرام. سنية: قصدك إيه المفروض نعمل إيه يعني عشان نخليه ما يحبهاش ولا يتجوزها. رباب: استني يا سنية ما يتهيأليش إن نجات مش عايزاه يتجوزها وبس نجات مش عايزاه يبص لواحدة تانية أصلاً.

نجات: عندك حق أنا مش عايزاه يبص لواحدة تانية أصلاً وعموماً موضوع المخزن اللي اتحرق ده هيشغله شوية بس إحنا عاوزين نعلمه الأدب كل واحدة فينا عاملة لنفسها قرش للزمن صح ولا لا. رباب: اه حصل أكيد يعني كل واحدة فينا عاملة ليها قرش على جنب ما فيش حد ضامن الموت من الحياة يختي... المهم يعني انتي بتلفي وتدوري حوالين إيه.

نجات: المخزن بتاع شعبان ولع المرة دي من غير ما حد يعرف هو ولع إزاي ولحد دلوقتي مش عارفين نوصل لأي حاجة تثبت مين اللي ولعه عشان كده إحنا هنستغل الموضوع ده لحسابنا إحنا عن نفسنا مستورين بس هو لما يخسر اللي قدامه واللي وراه هيحتاجنا وساعتها مش هيبص لقدام ولا ورا ولا لواحدة تانية غيرنا معايا ولا إيه. رباب: يا نهارك أسود ومنيل انتي عايزانا نولعله في محلاته كلها بس ده يبقى خراب بيوت مستعجل.

نجات: افهمي الأول قبل ما تتكلمي إحنا يا أختي مش هنخرب بيوت بالعكس هنعمر بيتنا خصوصاً إن نسمة مش عايزاه يعني إحنا هنجيب رجالة تحرق محلاته والمخازن بتاعته من غير ما يبان لهم أثر بس قبل ما يتحرقوا البضاعة اللي فيهم هتبقى خرجت وراحت لمكان تاني تبعنا تتباع وفلوسها تتقسم علينا إحنا التلاتة بالشكل ده هيفضل المعلم شعبان محتاجنا معايا ولا مش معايا. وقتها سنية ونجات ورباب بصوا لبعض وكأنهم بيفكروا في الموضوع لحد ما اتكلمت سنية.

سنية: أنا عن نفسي معاكي و بتهيألي رباب كمان هتبقى معاكي. رباب: أنا معنديش مانع طالما مش هيبص بره ولا هيجيب لنا ضرة جديدة. نجات: يبقى اتفقنا نقرا الفاتحة على الكلام ده.

هناك عند نسمة كانت واقفة في وسط النار وهي عمالة تصرخ ومرعوبة ندهت ندهة واحدة باسم راكان لأنها حست في الوقت ده بالذات إنه أمانها اللي ناقصها فجأة راكان ظهر والنار هديت والشقة سليمة كأن مفيش حاجة حصلت فيها ونسمة لسه موطية على الأرض ومرعوبة حضنها راكان وهو بيطمنها. راكان: نسمة يا حبيبتي افتحي عينيكي ما تخافيش ما فيش حاجة. فضلت نسمة تترعش شوية مكانها وبعدين أول ما سمعت صوته رفعت وشها وبصيت ليه وخدته هي في حضنها المرة دي.

نسمة: أنا مش عارفة إيه اللي حصل النار ولعت ومسكت في المكان كله فجأة... ما تسيبنيش تاني خليك جنبي عشان خاطري. راكان: أنا جنبك على طول يا حبيبتي ما تخافيش وصدقيني اللي عمل كده هيتحاسب أنا آسف أوي يا نسمة عشان شفتي حاجة زي دي وأوعدك إنها مش هتتكرر تاني سامحيني عشان خاطري ما تزعليش مني. نسمة: أنا مش زعلانة منك بالعكس أنا مبسوطة إن انت موجود في حياتي خليك على طول قريب مني.

وقف راكان وشال نسمة ودخلها جوه على السرير وقعد جنبها وحط إيده على وشها. راكان: نسمة يا حبيبتي أنا لازم أحاسب اللي عمل كده صدقيني مش هتأخر عليكي بس عشان خاطري خلي بالك من نفسك لحد ما أجي وصدقيني أنا طول الوقت حواليكي. نسمة بخوف: لا ما تسيبنيش أنا مش عايزة اللي عمل كده يتحاسب المهم إنه ما يحصلش تاني عشان خاطري خليك معايا.

راكان: صدقيني مش هتأخر عليكي بس لو أنا ما حاسبتش اللي عمل كده هيعمل كده تاني وتالت وأنا الأمير راكان ما ينفعش حد يعمل معايا كده وما أحاسبوش انتي أغلى حاجة عندي وما ينفعش استهتر بحياتك. نسمة: طيب أنا هسيبك تمشي بس أوعدني ما تتأخرش عليا. راكان: أوعدك على قد ما أقدر مش هتأخر عليكي.

اختفى راكان من جنب نسمة وفضلت هي قاعدة زعلانة إنه مشي وحست إنها دخلت في حاجة هي مش قدها بس في مكان تاني كان حارث واقف تاني مع اتباعه وهو غضبان. حارث: انتوا إزاي تخلوا الأمير راكان يعرف باللي إحنا كنا هنعمله دلوقتي هيتعمل ليا محاكمة لأن أنا الوحيد اللي هيشك فيه أنا الوحيد اللي عارف بعلاقته بالـ إنسية دي انتوا لازم تخلصوا منها بأي شكل مش لازم يرجع يلاقيها لو أنا اختفيت اعرفوا إني بتحاكم...

وتنفذوا اللي قلتلكم عليه وتيجوا تخلصوني فوراً بحكم العهد اللي ما بينا. هز الاتنين راسهم موافقة على الكلام اللي هو قاله واختفوا من قدامه بس راكان كان تحت الأرض واقف قدام والده وهو غضبان وبيقول له. راكان: أنا خدت موافقتك على علاقتي بالـ إنسية وخرجت من العشيرة وما عملتش أي مشاكل واتنازلت عن كل حاجة واخترتها هي في مقابل كل ده لكن إن حد يأذيها ده اللي مش هسمح بيه.

شهبير: أنا مش فاهم إيه اللي بتقوله مين اللي اتجرأ وأذى الـ إنسية اللي تخصك وإزاي تتهمني بحاجة زي دي. راكان: أنا مش بتهمك يا عظمتك أنا ببلغك إن في حد اتخطى أوامرك وما عملش حساب لقراراتك وحاول يأذيها وأنا مش هسكت. شهبير: أنا كمان مش هسكت انت شاكك في حد. راكان: أكيد شاكك في حد هو حارث مفيش غيره محدش ليه مصلحة غيره. شهبير: لو حارث اللي عمل كده أنا مش هرحمه وهنفيه في السجن ومش هيخرج منه باقي عمره.

راكان: أنا ما يهمنيش عظمتك هتعمل فيه إيه أنا اللي يهمني إني آخد منك دلوقتي عهد إن مفيش حد هيتعرض لنسمة تاني لأنه لو حصل المرة الجاية مش هعمل حساب لأي مخلوق لا فوق الأرض ولا تحتها. شهبير: من غير تهديد يا أمير فهمت خلاص اللي انت عاوز تقوله وهتصرف. راكان: لا أنا مش هستناك تتصرف وأنا فوق أنا عايزك تخلص الموضوع ده قدامي حالا قبل ما أمشي.

أمر الملك شهبير بإحضار حارث لمحاكمته وفوراً كان أعوان الملك شهبير مسكوا حارث وجابوه قدام الملك. شهبير: أنا هسألك سؤال واحد وترد لأنك لو كذبت أنا هحرقك ده أقل حاجة ممكن أعملها لأنك كسرت العهد اللي ما بيني وما بين الأمير راكان. حارث: أنا تحت أمرك يا مولاي وانت عارف. راكان: المهم تجاوب بصراحة لأنك عارف إني هعرف انت بتقول الحقيقة ولا بتكذب.

شهبير: استنى انت يا راكان قولي يا حارث مين اللي حاول يأذي الـ إنسية اللي تخص الأمير راكان انت مش عارف المعاهدة اللي ما بيني وما بينه في الموضوع ده. حارث: أنا صحيح كنت فوق الأرض يا مولاي لكن مليش أي علاقة بالموضوع ده وما أعرفش حاجة عنه. راكان: وأنا واثق إنك ما تعرفش حاجة عنه ولا كنت في المكان هناك لكن اللي راحوا وحرقوا المكان وحاولوا يأذوا الـ إنسية كانوا من اتباعك.

حارث: إزاي تقدر تثبت إنهم كانوا من اتباعي أنا طول عمري مخلص للملك شهبير ولجلالتك من بعده وما حصلش إني أخطأت ولا عملت حاجة أتحاسب عليها ليه بتقول إن أنا السبب عندك دليل على كلامك تقدمه. شهبير: راكان قدر إنه يمسك أعوانك اللي اتسببوا في أذية الـ إنسية وقالوا إنهم عملوا كده بأمر منك.

اتصدم حارث وقتها وما كانش عارف يصدق ولا لا بس كان شاكك إنها لعبة من راكان لأنه ملك الألاعيب وبيقدر يدخل ذهن اللي قدامه ويعمله حالة من الارتباك حاول يرد بثبات. حارث: أنا ما حصلش مني حاجة زي دي هاتوا الأعوان دول قدامي يقولوا إن أنا اللي بعتهم. راكان: أنا لازم أمشي عظمتك عشان مغلطش غلطة أتحاسب عليها خلص الموضوع بطريقتك المهم إن ما حدش يتعرض للـ إنسية دي تاني لأن المرة الجاية مش هستنى يتعمل محاكمة وهتصرف بطريقتي.

انصرف وقتها راكان وساب المحكمة مقامة وراح يفرغ غضبه في مكان بعيد. في الوقت ده في شارع ضلمة كانت واقفة واحدة ست مع خمس رجالة وكان الحوار كالتالي.

نجات: دلوقتي فهمتوا هتعملوا إيه أنا عايزة المحلات بتاعته والمخازن تبقى كوم تراب مش عايزة يبقى حيلته حاجة يتسند عليها المهم قبل كل ده ما يحصل وقبل ما تولعوا النار فيهم كل البضاعة اللي عنده في أي محل من المحلات تتحول على المكان اللي أنا قلتلكم عليه وحلاوتكم محفوظة وكل اللي هتطلبوه هتلاقوه. راجل: إحنا تحت أمرك طالما هتدفعي بس انتي كنتي بتقولي محلين تلاتة الوقتي هيبقوا 6 محلات يعني العمولة هتزيد شوية.

نجات: وأنا هديك اللي هتقول عليه من غير ما أتكلم معاك المهم كل الكلام ده يتم قبل ما النهار يطلع مفهوم. الراجل: مفهوم قبل ما نهار بكرة يطلع هيكون كل شيء خلصان. نجات: ويبقى يوريني بقى هيروح يتجوز تاني إزاي رجالة عينها فارغة بصحيح. مشت نجات وروحت وحكت لسنية ورباب على اللي هي عملته وهناك في نفس الوقت كانت نسمة قاعدة قدام الدكان بتاعها وقاعد شفشق على كرسي قدامه.

نسمة: والله يا واد يا شفشق أنا اليومين دول بيحصل معايا حاجات تخلي الواحد يتجنن ومش عارفة ألاقيها منين ولا منين. شفشق: طب ما تحكيلي يا ست الناس إيه اللي بيحصل معاكي أنا برده بير أسرارك وانتي كنتي بتحكيلي على كل حاجة مش عارف إيه اللي حصل وخلاكي تبطلي تتكلمي معايا. نسمة: ما حصلش بس زي ما تقول كده بدأت أكتم في نفسي وما أتكلمش مع حد أصل أنا لو حكيتلك هتقول عليا مجنونة.

شفشق: طب جربي كده ولا هقول عليكي مجنونة ولا حاجة ما تبصيش لسني الصغير أنا ياما شفت في حياتي. نسمة: طيب يا أخويا اتنيل على عينك وروح هات لنا غدا يلا عشان ناكل سوا. شفشق: هتعزميني على إيه المرة دي. نسمة: هعزمك على كباب وكفتة يا منيل مش خسارة فيك انت الوحيد اللي بتتكلم معايا يلا قوم خد الفلوس أهي واجري بسرعة هات لنا كيلو كباب وكيلو كفتة وتعالى جري. أنا هموت من الجوع.

شفشق خد الفلوس وقام راح وهو مبسوط فجأة نسمة وهي قاعدة لقت المعلم شعبان داخل عليها وغضبان أوي وبيزعق. شعبان: مش عشان سكتلك مرة يبقى كل مرة تسلم الجرة انتي حرقتي المخزن الأولاني وأنا ما اتكلمتش تقومي تكملي على بقية المخازن والمحلات روحي منك لله. نسمة: انت اتجننت يا راجل انت إيه اللي انت بتقوله ده مخازن إيه ومحلات إيه أنا مش فاهمة حاجة.

شعبان: لا انتي فاهمة كويس أنا أنا بتكلم على إيه خربتي بيتي الله يخرب بيتك أنا لا عايز اتجوزك ولا عايز أشوف وشك بس أنا مش هسيب حقي. نسمة: انت باين عليك اتجننت أنا هولع في محلاتك ليه ولا انت فاكر إن أنا ممكن أعمل زيك. شعبان: تعملي زيي في إيه هو أنا جيت جنبك. نسمة: هو انت فاكرني مش عارفة اللي انت كنت بتحاول تعمله والناس اللي انت بعتهم عشان يولعوا في دكانة أبويا بس شوف ربنا أهي جات فيك انت.

شعبان: أنا ما عملتش حاجة بس خليكي فاكرة يا نسمة إنها كده ما خلصتش. خلص شعبان كلامه ومشى غضبان ونسمة قعدت تفكر مين اللي ممكن يكون عمل كده خدت بعضها وطلعت الشقة وقعدت لوحدها وندهت عليه. نسمة: راكان انت فين أنا عاوزة أكلمك. ما استنتش كتير قبل ما يظهر راكان بس كان باين عليه غضبان مش زي كل مرة وقالها. راكان: نعم في حاجة ولا إيه. استغربت نسمة من كلامه وإنه المرة دي ما بيقولش كلام حلو زي كل مرة.

نسمة: في إيه مالك بتتكلم كده ليه مش عوايدك يعني. راكان: هو المفروض أكلمك إزاي يعني. نسمة: زي ما بتكلمني على طول هو أنا زعلتك في حاجة. راكان: مش لازم طول الوقت أبقى بكلمك بطريقة تعجبك ساعات ببقى غضبان ومتعصب. زعلت نسمة من كلامه لكن وقفت قدامه وحاولت تبان هادية. نسمة: طيب أنا عايزة أسألك على حاجة المحلات والمخازن بتوع شعبان جنزيرة انت اللي حرقتهم. اتعصب جدا راكان وقتها ومسكها من ذراعها بقوة.

راكان: انتي اتجننتي ولا إيه هو أنا هسيب كل اللي ورايا وأركز مع شعبان وغيره انتي فاكراني إيه بالظبط. اتوجعت نسمة جدا من مسكة إيديه وصرخت. نسمة: اااه سيب إيدي وجعتني.