رواية هو مين ده الفصل الثالث 3 - بقلم اسماء الطبلاوي

على السرير في أوضة نسمة كانت ممده ونايمة وهو قاعد جمبها وبيحسس على شعرها وهي نايمة. راكان: كان نفسي أفضل جنبك أطول وقت ممكن بس أنا لازم أمشي حالا، بس هجيلك يا روحي. هخلص الاجتماع ده وهرجعلك. ارتاحي انتي لحد ما أرجع. خلص راكان كلامه واتبخر من جمب نسمة فجأة وفضلت لوحدها في الأوضة. طلعت أم فاروق تاني ومدت إيدها من الشراعة بتاعت الباب وفتحت ودخلت معاها الأكل. أم فاروق: نسمة انتي فين يا ضنايا؟

بقالك أربع ساعات نايمة، كفاية كده عشان تعرفي تنامي بليل. انتي يا بت اصحي يلا. أم فاروق ملقتش رد من نسمة، دخلت تبص عليها في الأوضة لقتها نايمة على السرير ووشها أصفر. راحت قعدت جمبها. أم فاروق: بت يا نسمة اصحي بقى بقينا المغرب. قومي كلي يلا واللقمة سخنة. مردتش نسمة عليها بردوا. قلقت أم فاروق عليها وبدأت تهز فيها. أم فاروق: نسمة. فوقي يا بنتي. مالك يا بت. يا لهوي البت مبتصحاش.

قامت أم فاروق جابت كوباية مايه ورجعت غرقت وش نسمة بيها. فاقت نسمة وهي مفزوعة. نسمة: عاااااااا الحقوني عفريت. عفريت من السجل المدني. الحقوني. أم فاروق: الله يخربيتك فزعتيني. الاهي تتسرعي يا بعيدة. إيه يا بنتي في إيه. عفريت إيه ده اللي انتي ماسكة في سيرته وهبلتيني بيه. حرام عليكي خلتيني قطعت الخلف. نسمة: وهو انتي يختي لسه فيكي حيل لخلفة؟ ما كفاية نصيبة واحدة خلفتيها هيبقوا اتنين.

أم فاروق: هو انتي كان مغمي عليكي وقايمة تقلي أدبك عليا وأنا اللي جايبالك محشي وملوخية وفراخ وشوربة كمان. نسمة: جبتي لمون مع الشوربة؟ أم فاروق: آه جبت يا ضنايا. يووووه انتي في إيه ولا في إيه. قولولي كان مالك وإيه اللي دهولك كده. حصل إيه لما أنا نزلت. افتكرت نسمة اللي حصل على طول وقامت قعدت مخضوضة. نسمة: هو فين. مشي ولا لسه هنا؟ طمنيني والنبي مشي ولا لسه قاعد بره.

أم فاروق: هو مين ده. مفيش حد هنا غيري أنا وانتي وبس. وأما طلعت لقيتك عالسرير كده ومغمي عليكي. نسمة: سرير إيه. إحنا كنا بنتكلم بره في الصالة واغمي عليا في الصالة. إيه اللي جابني هنا. عشان تصدقيني إن في عفريت. أم فاروق: كنتي بتتكلمي مع مين في الصالة يختي.

نسمة: مع العفريت يا ولية. ده عفريت من السجل المدني. عارف كل حاجة عني وفضل يقولي بتحبي كذا وبتكرهي كذا وأمك كانت بتقولك كذا. ده عارف حاجات أنا مش عارفاها عني. أنا مرعوبة يا أم فاروق لا يرجع تاني. أم فاروق: يا عيني يا بنتي دنتي باين عليكي اتجننتي يا نسمة. يا خسارتك يا زينة بنات الحارة. خدي يختي كلي يمكن دي تخاريف جوع. حطت أم فاروق الصنية على رجلين نسمة.

نسمة: هاتي يا أم فاروق أما آكل يختي أحسن ما آكلك انتي. أنا ما اتجننتش والله أنا كنت شيفاه زي ما أنا شيفاكي كده. فجأة ظهر راكان تاني قدام الدولاب. راحت نسمة مفزوعة ومطيرة صنية الأكل. ولصدمة أم فاروق الصنية موقعتش على الأرض ولقيتها طايرة في الهوا ورجعت تاني على رجلين نسمة. وقفت أم فاروق تصرخ وهي بتجري. أم فاروق: لا إله إلا الله. يا لهوووووي آمنت بالله عفريت. عفريت يا ناس. اشتاتا اشتوت اللهم احفظنا.

نسمة: استني يا أم فاروق. آه يا جبانة متسبنيش لوحدي. خرجت أم فاروق تجري وقفتلت باب الشقة وراها. وقعد راكان جمب نسمة عالسرير وبدأ ياخد من الأكل ويأكلها وهي متجمدة مكانها. راكان بحب: هتاكلي أول وتشبعي وبعدين هقولك كل حاجة عاوزة تعرفيها من غير خوف ولا صريخ وصويت. مش انتي عاوزة تعرفي أنا مين. نسمة: آه. راكان: وعاوزة تعرفي أنا بعمل إيه هنا. نسمة: آه. راكان: وعاوزة تعرفي أنا عرفت كل حاجة عنك إزاي. نسمة: آه وكمان.

راكان قاطعها: وعاوزة تعرفي كنت بعمل إيه في البراد صح. نسمة: آه. كان راكان بيقول كل ده وهو بيأكلها لحد ما خلصت الأكل كله وشال الصنية بإيده بعيد وقرب منها وباس راسها وقال. راكان: أنا هعرفك كل حاجة يا قلبي. بس مش عاوزك تخافي ولا تتفزعي مني تاني أبداً مفهوم. نسمة: مفهوم. فجأة اختفى راكان من جمب نسمة وظهر على كرسي تاني بعيد في الأوضة. راكان: شوفتي أنا عملت إيه. ده ما يخليكيش تعرفي أنا أبقى إيه.

نسمة بهبل: بتتحرك بسرعة صح. زي الراجل اللي بيجي في أفلام الأجانب. اختفى راكان تاني وظهر قدامها بالظبط وبصلها. راكان: بصي يا نسمة هقولك الكلام كله مرة واحدة وحاولي تستوعبيه. وأنا معاكي لو في أي حاجة مفهمتيهاش قوليلي تمام. نسمة: تمام قول وأنا هحاول أفهم.

راكان: أنا الأمير راكان ابن الملك شهبير ملك من ملوك الجان السفلي والوريث للحكم بعد والدي. من يوم ما انتي اتولدتي وأنا عشقتك يا نسمة وعشت معاكي حياتك كلها خطوة بخطوة. حاجات كتير أوي أنا أعرفها عنك انتي نفسك نستيها. أنا بحبك من أول يوم ليكي على الأرض. أنا جيتلك عشان شفت الناس عينها عليكي طول الوقت وأنا بكره إن حد يبصلك وبغضب من نظراتهم. فقررت إني أعرفك بوجودي وأحميكي زي ما كنت بحميكي طول عمرك. بس أبقى جنبك ونتجوز. أنا كنت في البراد لأني كنت حابب أفاجأك بس واضح إنها كانت مفاجأة مش حلوة. وعاوزك تعرفي حاجة مهمة. أياً كان قرارك بالرفض ليا أو القبول أنا كده ولا كده موجود ومش هسيبك وأمشي. عرفتي بقى أنا أبقى مين.

نسمة بغباء: لا. انت مين. اتعصب راكان جدا وحاول يخفي غضبه عنها. راكان: أنا جن يا نسمة. أنا أمير من أمراء الجن. فهمتي ولا لسه. بصتله نسمة وهي مش مستوعبة حاجة وضحكت فجأة بهستريا. نسمة: ههههههههه انت إيه يا أخويا هههههه انت جن ودي حساسية ولا إيه هههههههه. هو انت عاوزني أصدق اللي انت بتقوله ده بجد. يا نهار أسود هموت من الضحك هههههه. فجأة زعق راكان بصوت عالي جدا هز البيت من قوته.

راكان: نسسسمه. أنا مش بهزر. أنا بتكلم بجد وعاوز قرارك دلوقتي. هتيجي معايا تحت ولا نعيش أنا وانتي فوق الأرض. حست نسمة إن الموضوع بجد ووقتها خافت وقعدت تعيط. نسمة: يا لهووووى 😭😭 يعني انت عفريت بجد. راكان: طيب انتي بتعيطي ليه دلوقتي فهميني. نسمة: عشان انت طلعت عفريت وانت مزز كده وحلو وقمر. وكمان بتزعقلي وبشخط فيا وأنا غلبانة. وعاوز تنزلني عند العفاريت أصحابك تحت.

راكان: أنا مش عفريت أنا جن. فيه فرق كبير. وبعدين يا قلبي أنا مش قصدي أزعقلك. أنا بس كنت بفهمك وكمان لو انتي مش عاوزة تنزلي تحت مفيش مشكلة. نعيش سوا هنا وأنا هضحي بكل حاجة عشانك. المهم أبقى جنبك وبس. بصتله نسمة برقة وهي مش مصدقة إن ده عفريت وبيحبها بوسامته دي. رفعت إيدها وقربتها من وشه وبصتله. نسمة: هو أنا لو لمستك هتحول عفريته ولا هتحرق. ضحك راكان بقوة وهو بيمسك إيدها يحطها على وشه.

راكان: هههههه هو أنا عندي عدوة يعني إيه هتتحولي. انتي تلمسيني في أي وقت. انتي عشقي وهتبقي مراتي يا نسمة. اتخضت نسمة من كلمة مراتي وقامت وقفت وهو قام وراها. نسمة: مراتك يعني مراتك بجد. راكان: امال بهزار. أكيد مراتي بجد. أنا بحبك يا نسمة وعاوز أكمل عمري معاكي. حست نسمة بوشها بيسخن وضحكت بفرحة بشكل تلقائي. أول مرة حد يقولها كلام حلو كده ويوم ما تسمعه يبقى من جن. نسمة: هو أنا لو رفضت هتقتلني.

راكان: إيه اللي بتقوليه ده. انتي لو رفضتي دلوقتي هفضل جنبك لحد ما تحبيني وهتحبيني يعني أكيد مش هسيبك بس بردوا مش هاذيكي يا قلبي. نسمة: طيب أنا موافقة على وجودك جنبي بس مش عاوزة أشوف أي حاجة من الحاجات المرعبة اللي بنسمع عنها دي وكمان متخوفنيش واظهرلي بشكلك ده على طول. ومتجبرنيش على حاجة لحد ما أقرر هنتجوز وهحبك ولا لأ.

راكان: وأنا موافق. بس لو شفتك بتهزري مع راجل ولا راجل بيهزر معاكي هفرمه وهعاقبك. أنا بغير وبقدرش أتحمل حد يقرب منك انتي فاهمة. نسمة: فاهمة. امشي بقى دلوقتي عشان أنزل شغلي. راكان: أنا مبمشيش وأسيبك. وساعة ما تحتاجيني هتلاقيني. وبالمناسبة أنا اسمي راكان احفظيه. نسمة: راكان. حلو حفظته. راكان: يلا البسي وغطي شعرك كويس عشان ما أغضبش وأنا غضبي وحش.

انصرف راكان. ونسمة بعد ما كانت بتتظاهر بالقوة قعدت عالسرير وهي مرعوبة وبتترعش. نسمة: يا لهووووى جن وبيحبني وعاوز يتجوزني. أعمل إيه في المصيبة دي بس يا رب. وتحت في محل شعبان جنزيرة كان قاعد وبيشرب سيجارة ومعاه واحد صاحبه اسمه رجب. شعبان: أهي البت دي مجننانى. وبنام وأصحى أحلم بيها. بس مش عاوزة تيجي سكة ومش طيقاني. وأنا عارف إن إيدها طويلة ولسانها أطول ولو قربتلها هتجرسني في الحارة.

رجب: طيب إيه رأيك لما تكسر مناخيرها عشان تشوف إن ملهاش غير المعلم شعبان وتجيلك جرى وتقولك الحقني يا معلم. شعبان بلهفة: إزاي يا رجب قول لي أعمل إيه وأنا أعمله. دبرني يا صاحبي. رجب: دي سيبها عليا أنا. الفجر والناس كلها نايمة. هاخد معايا جوز رجالة وجركن بنزين ونولعلها في دكانها. وهي لما تلاقي إن المكان اللي كان بيصرف عليها ومعيشها برنسيسة راح هتجري عليك وتقولك في عرضك يا معلم.

شعبان: يخربيت دماغك ياض يا رجب. تفكير أبلس بصحيح. خلاص أنا موافق. هتنفذ إمتى المطلوب. رجب: الليلة وحياتك يا معلم. وكل اللي تأمر بيه هيتنفذ. بس إيدك على فلوس الرجالة اللي هتنفذ. شعبان: دنتى عيل جشع. مفيش حاجة تعملها كده بالحب. رجب: حب إيه اللي انت جاي تقوله يا معلم. هات يلا قبضني عشان أتوكل أنا. مد شعبان إيده في جيبه وخرج مبلغ كبير وأداه لرجب.

شعبان: اتفضل على الله يشبعوك. بس بقولك إيه. أنا عاوز الدكان ده كوم تراب. مش عاوزها حتى يبقى عندها فرصة تصلح. انت فاهم. رجب: هخليه تلم باقي الدكان من على الأرض بالمأشة يا معلم. هههههههه. مشى رجب وساب شعبان بعد ما اتفقوا هيعملوا إيه. بس تحت عند الملك شهبير كان الوضع متوتر وراكان واقف قدام والده وهو غضبان.

راكان: عظمتك أنا عمري ما كسرتلك أمر ولا خالفت كلامك. بس أنا بحبها وانت عارف. وكفاية إني معملتش أي رد فعل لما خلتوها فقدت وعيها واحنا بنتكلم المرة اللي فاتت عشان الاجتماع. شهبير بغضب: انت كمان كنت عاوز تبدي أي رد فعل عشان نبهتك لميعاد الاجتماع. راكان: مش قصدي عليك عظمتك لإنك منفذتش ده بنفسك. وعارف إن حد تاني نفذ. بس أنا مش هسمح بده يحصل مرة تانية. شهبير: انت بتملي عليا أوامر يا راكان.

راكان: العفو جلالتك. بس أنا مش عاوزك تثق أوي في حارث. هو مش بيحبك زي ما هو مبين. خد حذرك منه. شهبير: يعني مصمم على علاقتك بالآنسية دي. راكان: ومعنديش كلام تاني أقوله يا عظمتك. وأتمنى متقفش ضدي. لإن مش هقف غير معاها. شهبير: بالشكل ده هتطرد من العشيرة. ومش هتكون مؤهل إنك تمسك الحكم بعدي. راكان: مش عاوز حكم وموافق أتطرد. أنا لما اخترتها كنت عارف إن كل ده هيحصل ومفرقش معايا. أنا بس عاوز تمنياتك بالتوفيق ليا.

شهبير: انت كده بتخليني عاجز يا راكان. لإن مش قادر أكسر قلبك وفي نفس الوقت عارف إنك هتبقى منبوذ من بني جنسك هنا. راكان: مش مهم. وعاوزك تعرف إني حتى لو اتطردت من العشيرة واتنبذت إني هفضل موجود في أي وقت تحتاجني فيه وعمري ما هتخلي عنك. شهبير: وأنا هاخد بنصيحتك وهاخد حذري من حارث. لإن قوتك تخليك تعرف اللي حواليك أكتر مني. أتمنالك التوفيق يا ابني. راكان: وأنا أتمنالك امتداد العمر يا عظمتك.

انتهى الكلام بين راكان وأبوه. وفي شقة من شقق شعبان جنزيرة عند واحدة من زوجاته كانت قاعدة بتتكلم مع أمها في التليفون. سنية: مش مبطل لف يا أمه ورا البت نسمة وهيموت ويتجوزها. راجل ناقص وعينه فارغة. أمها: ما تمليها انتي يختي. ما انتي لو مالية عينه من الأول مكنش اتجوز عليكي اتنين يا خايبة. سنية: هو أنا يا أمه كل ما أكلمك تسمي بدني بالكلام كده. مفيش مرة تجبري بخاطري.

أمها: ما هو من خوفي عليكي يا روح أمك. بس هقولك إيه. ما هو راجل طفس. سنية: أما انتي عارفة إنه راجل طفس بتبهدليني ليه. ده بدل ما تقوليلي أعمل إيه معاه. أمها: أنا هقولك تعملي إيه بس تنفذيه بالحرف الواحد مفهوم. وفي وقت الفجر قدام دكان نسمة كان واقف رجب ومعاه رجاله ومعاهم جركن البنزين ومختلفين على الفلوس. سعد: انت هتاكل حقنا يا معلم رجب. ما تطلع كمان 200 ج. هو اللي إحنا بنعمله ده سهل. دي جناية.

رجب: وبتعملها ليه يا حنين لما هي جناية؟ هو إنتوا جايين هنا وتتخانقوا على الفلوس. ذكي: ما انت اللي بخيل وإيدك ناشفة علينا يا رجب. فكها شوية والكل يتراضى وبلاش تاكل لوحدك. رجب: وطّي صوتك انت وهو خلينا نخلص وبعدين نتفاهم بكره على القهوة. قفل رجب الكلام معاهم ومسك جركن البنزين وفضاه كله على محل نسمة ورجع لورا شوية وولع عود كبريت ورميه. بس مفيش نار. رجب: إيه ده. النار مولعتش ليه. ذكي: يمكن الكبريت مبلول.

رجب: مبلول إزاي ما هو ولع قدامك أهو. مسك عود تاني وتالت ورابع ويولع ويرمي. ومفيش فايدة. لحد ما رجب لقى إيد بتضربه على قفاه راح مصرخ. رجب: عاااااااا إيه ده. أعوذ بالله من الشيطان الرجيم.