رواية حور عيني الفصل الثالث عشر 13 - بقلم رغد عبد الله

مالك: .. والموضوع التاني .. ابتسمت: عرفت .. بت لهطة قشطا، اسمها كان .. آه، فيروز! القلم وقع من إيده وقال بصدمة: فيروز! مركبة صور لمرات..، متأكدة؟ _عيب يا بية..احنا عيال! مسك أعصابه.. وقال: طب أمشي انتي دلوقتي.. طلعت من سكات، بخوف من نظراته.. غمض عينه... وموعيش بنفسه إلا وهو موقع كل اللي على المكتب..، كان غضبان.. لأول مرة يبقى غضبان كدا.. لبس جاكيت بدلته وخرج من الشركة بسرعة.. _في البيت

_من غير ما يخبط فتح أوضة فيروز... وضربها بالألم.. فيروز بصتله بصدمة..، مالك بغضب: هي كانت عملتلك إيه؟ .. تركبي صور وتطعني شرفها! ? .. تهدمي علاقتنا! إنت بن آدمة حقيرة! فيروز بصراخ..: حقيرة عشان بحبك! ? .. للأسف أنا حبيتك يا مالك، وانت غبي موعتش بحبي.. وروحت اتجوزت واحدة من دماغك، لا هي قدنا ولا مننا! (بتقرب منه)

.. مالك أنا أستحقك أكتر منها..، أنا أعرف عنك كل حاجة بتحب إيه بتكره إيه، بعرف إزاي أبسطك.. بعرف أنك زعلان من غير ما تتكلم.. مالك أنا... بيبعدها مالك عنه... وبيزعق فيها: اخرسي.. بقيت بكره أسمع صوتك.. حور مالية عيني.. هي أحسن من مليون واحدة زيك.. ولو سمعتك بتجيبي سيرتها تاني، مش هيطلع عليكي صبح يا فيروز! فيروز ببكاء: بتحبها! مالك: ... ضحكت بهستيرية ممزوجة ببكاء: شوفت.. مالك بمقاطعة، قال لاستفزازها: بعشقها..

نزل لمستواها..: حجزتلك تذكرة على باريس هتطلع نص الليل... على ما تلمي حاجتك ومش عايز أشوف وشك تاني.. فيروز بزعيق: أنت عايزني أمشي؟! مالك: لا بطردك.. بس بطريقة ناس محترمة، متعرفيهاش.. وسابها ومشي... ، قعدت على الأرض تبكي.. وهي بتراقب طيفه بحسرة... كان ماشي بعصبية شديدة..، سامية باستغراب..: مالك يابني..؟ مردش عليها سابها ومشي.. دخلت عند فيروز.. لقتها بتعيط.. سامية: عرف؟ فيروز..

جريت عليها: انتي اللي قولتيلي أعمل كدا.. اتصرفي، أنا مش عايزة مالك يكرهني..! سامية: اتصرف أعمل إيه..؟ ما دامك نزلتي من نظره استحالة ترجعي تاني.. انسى يا فيروز.. فيروز بعصبية..: أنسي؟ .. انتي السبب..! لو محلتيش المشكلة دي، أنا هروح أقوله على كل حاجة.. سامية ببرود واستفزاز: أنا الظاهر إديتك أكبر من حجمك، لدرجة نسيتك إزاي تتكلمي.. مالك عمره ما حبك، ولا كان هيحبك.. إفهمي بقا!

فيروز بإنكار وبعياط: لا.. مالك كان بيحبني.. مالك كان ممكن يبقى ليا.. انتي كذابة.. انتي السبب! سامية: تصدقي متصدقيش دي مشكلتك..، لكن اسمعي.. لو مالك شم أن ليا يد في الموضوع ده.. أنا هقطع المساعدة اللي ببعتهالك كل سنة عشان تكملي دراستك في الجامعة..، ياريت تفكري كويس وتحافظي على اللي باقي من حياتك وكرامتك... ومشت سامية وسابتها... ، والدنيا كلها اسودت في وش فيروز..، متأكدة أنها هترجع شخص تاني غير اللي جات بيه هنا..

_في المساء _كان مالك قاعد سرحان.. وحور قاعدة قدام التسريحة، بتراقبه في المرايا.. حور.. بحزن: .. أنت زعلان عشان فيروز ماشية؟ ضحك مالك غصب عنه على كلامها.. هو محبش يقولها حاجة.. راح وقف وراها.. وباس راسها..: حد يزعل ومعاه القمر ده..؟ ابتسمت بخجل... : أنا عمر ما حد قالي أني حلوة..، انت أول حد يقولهالي.. مالك: بديهي..، محدش بيقول للسكر أنه سكر..، ولا للقمر أنه قمر.. لأنها حقايق مفيش نقاش فيها..

ضحكت على كلامه..: طب مانت قولتلي أهو.. ! مالك: عشان شايفك تايهة.. فلازم أرشد القمر يقف في مكانه... فاهماني..؟ نزل على الأرض قدامها..، وطلع من جيبه علبة صغيرة.. حور: إيه ده؟ فتحها، طلع خاتم رقيق جدا.. مسك إيدها الناعمة برقة.. ولبسها الخاتم.. وهو بيقول: دا أول هدية منى ليكي يا حور..، مبعرفش أنقي، بس قولت أجيب حاجة تشبهلك.. رقيقة.. ضحكت حور... ، وحضنته..: جميل.. هحافظ عليه طول عمري.. بس بشرط.. مالك: ؟؟

حور: متتكلمش مع حد بطريقتك اللي بتتكلم بيها معايا... كلامك بيوقع، أحسن من أجدع صياد..! ضحك مالك بشدة..: أوامر.. وقفت حور بنشاط.. وراحت الدولاب: قولي بقى، أنهي أحسن فستان أروح بيه الفرح بكرة؟ "في حياة الإنسان بييجي عليه أوقات بيبقى عايز يسمع أنه كويس، وإنه ذكي، وإنه جميل... بالرغم إنه عارف، لكن ده عشان بيبقى عطشان لكلمة لطيفة.. وحلوة" _مساء تاني يوم _مالك: لسه مخلصتيش؟ بتبص له حور من المرايا..، وبتحدق فيه من وسامته...

بيخطر في بالها أن البنات هيحاولوا يقربوا منه.. ودمها بيشيط.. حور: احمم.. بقولك إيه أنا غيرت رأيي بلاش نروح الفرح... مالك: ليه إن شاء الله... حور: ... كدا... مالك: استهدي بالله، دي صاحبتك عمرك، مينفعش متروحيش.. حور بزهق: طب اتفضل..، اربطلي شعري من ورا.. بيحاول يربطه، وبينجح بصعوبة..، بتمسك صباع الروج عشان تحط.. مالك خدها من إيدها: تؤ.. انتي كدا حلوة من غير حاجة.. حور: لكن...

مالك بحسم: .. ملكنش، اسمعي الكلام وإلا هعاقبك.. وعلى فكرة أنا عقابي وحش.. بيبصلها بطرف عينه بخبث... بتحمر خدود حور... : أنا قاعد مؤدب أهو.. وبسمع الكلام..، اسبقني انت وأنا هحصلك.. بيضحك، وهو بياخد مفاتيح العربية وبينزل تحت... بعد دقايق بتنزل حور..، قلب مالك بيدق جامد من جمالها.. بيقول بتوهان لما بتركب، وعطرها يملأ العربية: م.. مـ.. تيجي نكنسل الفرح ونطلع فوق و..

حور بتريقة: تؤ.. فرح صاحبتي عمرى، مينفعش مروحش.. يلا اتأخرنا.. بيجز على سنانه بغيظ: ماشي.. أنا هوريكي لما نرجع.. _في القاعة _بتروح حور تسلم على سلمى وتباركلها ومعاها مالك، يسلم على العريس.. سلمى بوشوشة: هو القمر ده يطلع جوزك؟ بتضربها حور بخفة على ضهرها: اتعدلي يا شيخة دا النهاردة دخلتك.. ! جه شخص ورا مالك..، ولما بص جنبه لقى حور بتضحك مع سلمى.. قال بدهشة: حور..!

بصت له حور بصدمة..، مد إيده عشان يسلم عليها وهو مبتسم وعيونه بتلمع.. مسك مالك إيده، وسلم عليه وهو بيضغط على إيده.. قال الشخص بضيق: وحضرتك تبقى مين؟! مالك بإبتسامة: ما تعرفينا يا حور... حور بصتلهم بتردد: .. مالك يبقى جوزي.. ويوسف زميلي دراستي و..