رواية حظ الملايح الفصل السادس والعشرون 26 - بقلم حنين ابراهيم

سمر بتوعد: إنت كده قفلت ملفك يا أيمن. بعد أن عاد مهاب بوقت قصير. سمر بدلع: هوبا حبيبي، ممكن أطلب منك طلب؟ مهاب: يا عيون هوبا، إنتي تأمري. سمر: ممكن نروح بكرة لنهاد، أصلها وحشتني. مهاب بتفكير: أجلي كمان أسبوع، تكون نسرين رجعت من جامعتها، وبالمرة نشوف اتفاقك مع دار النشر. سمر بتردد: مهو... مهاب: مهو إيه؟ هو في مشكلة جديدة ولا إيه؟ سمر: تقريبا كده أيمن هبب حاجة، وإحنا لازم نلحق الوضع. مهاب: هبب إيه؟

سمر: عاكس وحدة شغالة عنده في المطعم، وهي اتصلت بيا وقالتلي إنها هتشكيه لأخوها، فيا نلحقه يا ما نلحقوش. بعد نصف ساعة، كان يقود وهو يسألها عن التفاصيل.

سمر: من فترة أشواق كلمتني إن عندها زميلة محتاجة شغل، لأن أبوها متوفي وأخوها يدوب بيصرف فلوسه على علاج والدته وشغله باليومية، يعني النهاردة شغال، بكرة يا عالم. عرضت على أيمن يخليها تشتغل عنده دوام جزئي على حسب محاضراتها، وهو وافق. أخوها في الأول كان رافض، بس هي أقنعته إن ده الحل الوحيد عشان تكمل جامعتها وتحقق حلم أبوها بإنها تبقى دكتورة.

والنهاردة لقيتها بتكلمني وبتحكيلي إن جوز أختي عاكسها، ولما صدته قالها إنه مستعد يريحها من قرف الشغل ويصرف عليها لغاية ما تكمل جامعتها ويأجرلها شقة تفتح فيها عيادتها لو وافقت أنه يكتب عليها. أنا طلبت منها تستناني ونحل الموضوع، بس هي بلغت أخوها، وزمانه رايحله من محافظته اللي هي أبعد مننا. بعد بعض الوقت، وصلت سمر لبيت عمها لتدخل مثل العاصفة. سمر: إيه اللي إنت هببته مع بنت الناس ده؟ بقى هي دي الأمانة اللي أمناك عليها؟

أيمن ببرود: أنا معملتش حاجة غلط، أنا طلبت الجواز. كانت نهاد تنزل من السلالم ببطء بسبب حملها، عندما سمعت جملته. نهاد: مين ده اللي هيتجوز؟ جيهان بتشفي: جوزك يا حبيبتي، وهيجيبها دكتورة بدل ما إنتي كل شوية "آه رجلي" و"آه ضهري" ودوني دكتور، أدينا هنجيبهالك تقعدلك 24 ساعة. سمر بسخرية: تعرفي يا مرات عمي، أنا بموت في ثقتك بنفسك دي، دي ولا كأنها وافقت خلاص.

جيهان بثقة: هتوافق يا عيوني، عشان الفلوس بتعمل كل حاجة، وإنتي أدرى بظروفها. لما نكلم أخوها ونعرض عليه إنه يجوزهاله ويكتب الشقة باسمها، هيوافق. نهاد بصدمة أكبر: شقة إيه اللي يكتبها باسمها؟ ثانية وحدة، قصدك الشقة اللي هو واخد كل فلوسي أول بأول على حس أنه يجهزها في أسرع وقت وأسكن فيها؟ سمر بصدمة: نعم يا روح أمك؟

أيمن حاطط رجل على رجل: الملاليم اللي كنتي بتديهاني دي من حقي، لأني سمحتلك تشتغلي برة بيتك وضحيت بأكتر من 8 ساعات في اليوم، مطالب البيت كانت أولى بيهم، وفوق كل ده بترجعي تنامي، ولو طلبت حقي الشرعي بتتحججي بالحمل والشغل. مهاب: ما إنت لو كنت راجل كنت خليتها تقعد في البيت وترتاح، بس لا، إزاي تضيع عليك السبوبة اللي هتيجي من وراها.

جيهان: احترم نفسك وإنت بتتكلم مع ابني، هو كل اللي عمله إنه احترم رغبتها في الشغل، وفي المقابل هي قصرت في واجباتها اتجاهه ونسيت إن ليه متطلبات وحقوق، ومن حقه يجيب وحدة تشوف متطلباته. سمر وهي بتردح: ويشغلها تحت إيده عشان يلهف كل اللي هيجي من وراها، يا عالم جعانة. هو فين عمي من كل ده، ولا هو موافق؟ جيهان بسخرية: عمك هيقول إيه؟ أيمن راجل ومن حقه ياخد قراراته. سمر عروقها برزت وكانت هتهجم عليهم، لكن مهاب مسكها.

مهاب: يلا يا سمر، إحنا مش جايين نتخانق. نظر لنهاد: يلا يا نهاد، لمي هدومك ويلا بينا. نهاد: وأنا مش هسيب بيتي وأمشي. نظر لها الجميع بصدمة. أيمن بسخرية: عين العقل يا حبيبتي. سمر بصدمة: إنتي بتقولي إيه؟

نهاد حاولت التماسك أمامهم: زي ما سمعتي، محدش ليه دعوة باللي بيحصل بيني وبين جوزي، زي ما أنا متدخلتش في علاقتك بجوزك ولا قولتلك إنتي ليه فضلت تملي دماغي إن بيت العيلة مش كويس وإنتي عايشة فيه عادي، ودلوقتي عايزيني أغضب وأنا على وش ولادة وأتمرمط بابني؟ ساعتها مين هينفعني؟ بابا وماما هيفضلوا لحد إمتى شايلين همي، في المقابل إنتي هتسبيني وترجعي تعيشي مع جوزك وتنبطوا بحياتكم. سمر بدموع: يعني تدخلي؟

هو اللي هيخرب حياتك وإنه يتجوز عليكي عادي تمام؟ ماشي. التفتت لهم: مبروك يا ابن عمي، متنساش تعزمنا على الفرح. نظرت لأختها بغضب وكانت ستغادر، لكن نهاد أمسكت يدها وعانقتها.