رواية حياة العاصم الفصل الرابع 4 - بقلم سلوى عوض

نهال! نهال! يا نهال! يخرج عامر ونهلة على صوت ارتطام ليلاقوا نهال مغمي عليها. عامر: روحي يا نهلة ندهي حد من الخدم عشان ننقلها على جناحها. نهلة: أنا خايفة لا تكون شافتنا. عامر: مش وقته، روحي بس. نهلة: طيب. تروح نهلة وتجيب واحد من الخدم عشان ينقلوا نهال على جناحها، ويتصل عامر بالدكتور. الطبيب: للأسف جلطة رباعية، ولازم تتنقل المستشفى فوراً. عامر: اتصلوا بالإسعاف بسرعة.

تجي الإسعاف وتاخد نهال، وبعد ما وصلوا المستشفى وأجروا الفحوصات. الطبيب: للأسف يا عامر باشا، دي حالة جلطة رباعية. عامر: والحل؟ الطبيب: هنكتب على مجموعة حقن تعمل سيولة في الدم، بتتاخد تحت الجلد، ومعاها أدوية. عامر: ينفع ننقلها البيت؟ نهلة: آه ننقلها، وأنا هكون تحت رجلها. الطبيب: مفيش مشكلة بس أهم حاجة مواعيد الأدوية والحقن. نهلة: حضرتك اكتبلي المواعيد وأنا هنفذ تعليماتك.

الطبيب: تمام، وأهم حاجة العامل النفسي لأنه بيساعد في الشفا. عامر: تمام. ينقلوا نهال جناحها. حياة: مامي حبيبتي، مالها يا بابي؟ عامر: مامي تعبانة شوية. حياة: مامي حبيبتي يا مامي! نهلة: متخافيش يا قلبي، مامي هتخف وتبقى بخير، بس الدكتور قال أهم حاجة الراحة النفسية، وأنا هقعد معاها وأخد بالي منها. تعالي معايا نسيبها ترتاح. حياة: لا، أنا هقعد معاها. عامر: تعالي معايا يا نهلة. نهلة: حاضر.

يسيبوا حياة مع والدتها ويدخلوا المكتب. نهلة: أهي جاتلنا الفرصة يا عامر. عامر: انتي هتجيبي ابنك وتقعدي معانا على طول، وأنا هشغل جوزك في الحسابات. نهلة: أنا عايزة أخلص منه. عامر: هنخلص منه، بس اصبري. نهلة: بحبك انت. عامر: أوعي حياة تاخد بالها من أي حاجة بينا. نهلة: لا طبعاً، ده سر ما بينا. تعود نهال للحاضر. نهال: عمري ما كنت أتخيل إن أختي تعمل فيا كده، أنا خايفة قوي على حياة.

أما حياة فكانت قاعدة على السفرة مع أبوها وخالتها، ويدخل عليهم عز. عز: أخباركم إيه؟ نهلة: تمام إحنا تمام. عز: حياة بطلة العالم في التنس وأجمل بنوتة في الدنيا. حياة: ميرسي يا عز. عز: دي حقيقة. نهلة: اقعد اتغدى معانا. عز: بعد الغدا هاخد حياة ونروح الديسكو. حياة: أوكيه، بس هنروح بعربيتي. عز: موافق. عامر: بس متتأخروش. حياة: هنرجع قبل الفجر. نهلة: خليهم براحتهم يعيشوا سنهم. عامر: خلاص، بس على مهلك وإنتي سايقة. حياة: أوك.

أما في الصعيد، فكان سامر اشترى كل اللي محتاجه. سامر: الله عليك يا واد يا أبو سمرة، دي هتبقى جان الجامعة كلها. حبيبتي يا جدتي، أشتريلها الجاتوه وأروح. يبص على ساعته. سامر: إيه ده؟ الساعة بقت تسعة! الوقت عدى بسرعة أوي. سامر: آه وبالمرة أجيب حاجة حلوة للبت شوق المغرمة بيا. بت عبيطة أوي، فاكرة إني ممكن أبصلها! سامر عاصم يتجوز عيلة جاهلة كل اللي تعرفه في الدنيا باميه وملوخية، وأقصى طموحها إنها تعمل صنية كيكة!

بس ياله، أهي بتداري عليا، وكمان ساعات بتديني فلوس. في الساعة ١١ يوصل سامر البيت، يلاقي شوق مستنياه. شوق: حمد الله على السلامة. سامر: الله يسلمك، بس أنا ما كنتش مسافر. شوق: حضرتلك العشا، عاملين ويكا ولحم، وأنا حوشتلك مناب كبير. سامر: جدعة، خشي سخني. أمال فين جدتي؟ شوق: قاعدة في أوضتها كانت بتصلي. سامر: والبومة قمر شوج جمر؟ شوق: نامت من بدري. سامر: وسي عاصم فين؟ شوق: اتصل وقال هيبيت في الأرض.

سامر: طيب خدي، جيبتلك الحلويات دي مخصوص عشانك. شوق: يخليك ليا. سامر: حضّري العشا على ما أشوف جدتك. شوق: من عيني. سامر: الحلويات دي تاكليها لوحدك، متديش حد منها حاجة. شوق: حاضر، هدسها في أوضتي. سامر: شاطرة. يدخل سامر أوضة جدته. سامر: كركورة الأمورة، أبو سمرة وصل. كريمة: كده بردك يا واد عوجت جوي؟ سامر: مش، على ما اشتريت الحاجة، غمضي عيونك. كريمة: أديّني غمضت. سامر: خلاص، افتحي. كريمة: وبعدين معاك يا واد!

سامر: ده الجاتوه بتاعك، وكمان جزمة طبية عشان رجلك متوجعكيش، وجبتلك حاجة على جدي كده —تليفون باللمس عشان أنزلك عليه الواتس ونتكلم فيديو أنا وانتي يا نور عيوني. كريمة: يا حبيبي، بس ده غالي جوي. سامر: الدنيا كلها متغلاش عليكي. ياله نتعشى وبعدين أشرحلك كل حاجة في التليفون الجديد، وكمان عشان تكلمي حبيبتك حياة بنت عمي. كريمة: تعرف، مع إن قلبي غضبان على عامر، بس حياة بنته حاجة تانية، نفسي تيجي وأشوفها.

سامر: ما أنا هخليكي تشوفيها. كريمة: بجد؟ سامر: آه، هنتكلم معاها فيديو وتشوفيها براحتك. كريمة: يارب ما أتحرمش منك يا سامر يا ضي عيني. والله نفسي كمان أطمن على نهال أم حياة، مسكينة ليها سنين راقدة مبتتحركش. من لله عامر، ما هاينش عليه يسفرها بره تتعالج. وبجولك، صح يا سامر، عاوزاك تراضي خيك عاصم، بيحبك. سامر: يا سلام بيحبني! وكل شوية يعايرني "ضحيت عشانكم وعملت وسويت". كريمة: عشان خاطري يا سامر.

سامر: عشان خاطرك أموت نفسي. كريمة: بعد الشر عليك! أوعى تقول كده تاني، والله أحاربك. سامر: خلاص، مش هقول كده تاني. كريمة: جيبت الملابس اللي كنت عاوزها؟ سامر: ده أنا جيبت لبس كتير أوي، وجيبت كل اللي أنا عاوزه وزيادة كمان. كريمة: وبجولك صح صاحب المحل اللي اشتريت منه الملابس وأنا بجيس الطقم صورني وجالي إنك تنفع موديل للإعلانات وأنا هنزل صورتك بعد إذنك على التيك توك دعاية للمحل وانت كده هتتشهر وممكن كمان تمثل في السينما.

كريمة: إيه التيك توك ده اللي بنركبوه لما بنروحوا مشاوير؟ سامر: ليضحك سامر لا يا جلبي ده برنامج على النت وبيجيب فلوس كتيرة جوي. كريمة: يعني هتطلع في التلفزيون زي محمد رمضان؟ سامر: وهبقى أشهر منه كمان بس انتي ادعيلي ومتعرفيش حد بالموضوع ده. كريمة: له داري على شمعتك تجيد وأنا أخاف عليك من عيون الناس وانت أشقر وجميل كده. سامر: حبيبتي يا كركورة ياله بجا عشان نتعشى. كريمة: له كل انته أنا أكلت. سامر: خلاص ما أكلش.

كريمة: خلاص ها أكل معاك بس بعد كده تصالح عاصم. سامر: لما أرجع من الجامعة عشان هنتعشى ونكلمو حياة فيديو. كريمة: بفرحة كده يبقى تمام جوي. سامر: ليخرج سامر مع جدته أهي شوق حضرت الوكل ياله نتعشى بجا. شوق: بالهنا والشفا على قلوبكم أروح أعملكم الشاي. كريمة: وه ماشاء الله نايب سامر من اللحم كتير. شوق: أصل أنا لقيت نفسي شبعانة فخليتله نايب ياكله بالهنا. كريمة: لتضحك كريمة أحبه وأوكله وكلي. شوق: بكسوف أروح أعمل الشاي.

الراوي: لتدخل شوق المطبخ لتخرج طبق من الثلاجة لتأكل جبن وعيش. شوق: مادام سامر بياكل أنا بشبع أعالج على الشاي. الراوي: وبعد نصف ساعة تخرج عليهم شوق بالشاي. سامر: هناخده في الأوضة عند جدتي عشان عايزها في موضوع. الراوي: لاتفرح كريمة ويخيل لها أن سامر سيطلب يدها من جدتها. الراوي: ليدخل سامر مع جدته غرفتها. سامر: هاتي بقا تليفونك عشان أحطه في التليفون الجديد وأنزللك الواتس والفيس ونكلموا حياة. كريمة: وايه ده كمان؟

سامر: برنامج على التليفون يخليكي تكلمي الناس فيديو. كريمة: زي التيك توك كده؟ سامر: شاطرة. وبعد وقت قليل. سامر: أنا نزلتلك كل حاجة أهو وكده هنتصل على حياة. الراوي: ليتصل سامر على حياة ماسنجر. حياة: إيه إيميل باسم كريمة عاصم جدتي معقولة وفيديو كمان لتفتح. حياة: إيه ده تيته حبيبتي وحشتيني. كريمة: وانتي كمان يا جلب جدتك. حياة: بس إيه فيسبوك كريمة ده؟ كريمة: سامر واد عمك شاله يخليه عملهولي.

حياة: حلو أوي عشان نكلم بعض على طول بس أوعي الشباب يعاكسوكي. كريمة: لتضحك كريمة بس يا بت. كريمة: حياة مش ناوية ترضي عن بابا بقا؟ كريمة: لو جبتي السيرة دي مش هكلمك تاني إلا جوليلي أمك عاملة إيه. حياة: زي ما هي والله يا تيته ادعيلي. سامر: إيه ما فيش ازيك يا ابن عمي؟ حياة: سوري ما أخدتش باللي أخبارك إيه؟ سامر: الحمد لله والله وحشتينا. حياة: وانتو كمان. سامر: إيه أخبار التنس معاكي؟

حياة: بكرة عندي بطولة الساعة حداشر الصبح. سامر: خلاص هكلمك بكرة فيديو عشان أفتخر بيكي قدام أصحابي بس ابجي افتحي عليا. حياة: لو كسبت البطولة هرد عليك لو خسرت يبقى وشك وحش عليا ومتتصلش. سامر: له هتكسبي البطولة. حياة: طاب تصبحوا على خير عشان هصحى بكرة من بدري باي. سامر: باي يا بطلة. الراوي: ليغلق سامر مع حياة. سامر: كده انتي اتعلمتي هبعتلك طلب صداقة على الفيس عشان نكلمو بعض فيديو. كريمة: يا واد هتفسد أخلاقي.

سامر: عيشي حياتك يا كركر وياله بجا كلي الجاتوه تعالي أما أوكلك. كريمة: عارف يا سامر انت أغلى واحد في أحفادي كلهم، حنين كده وطالع جميل يا واد، ده كفاية غمازاتك ولا ضحكتك اللي بتخلي الدنيا تضحكلي. سامر: عارفة يا جدة، نفسي أتجوز واحدة زيك وتكون حنينة زيك، الصراحة أنا كان نفسي أجوزك شوج، بس الصراحة مش لايقة عليك، انت باشا ومتعلم ومتنور. كريمة: عارف أنا عاوزة أجوزك حياة، بنت متعلمة ومتنورة زيك.

سامر: وأنا كمان نفسي أتزوجها، بس عشان أرجع فلوسنا من أبوها. كريمة: له حياة ملهاش صالح بأبوها، حياة وأمها قلوبهم طيبة مش زي الجاحد عامر جلبي، وربي غضبانين عليه ليوم الدين، لا يكسب ولا يربح، بس كل ما بدعي عليه بيتجبر أكتر، ربنا ينتقم منه. سامر: له له بعد الشر، مهما كان بردك ولدي. كريمة: سيبك منه دلوقت، خلينا في حياة، مش عاوزة حد يعرف اللي قولناه دلوقت، خليه سر بينا. سامر: إيه؟ استني، تليفوني بيرن.

كريمة: رد، خير اللهم اجعله خير. سامر: آه، أهلاً بحضرتك. صاحب المحل: مبروك يا أستاذ سامر، الفيديو بتاعك على التيك توك جايب مشاهدات عالية أوي، وكمان في واحد صاحبي عنده مصنع ملابس طالبك عشان تعمله إعلان، وكمان عايز أحولك مبلغ، تليفونك ده عليه محفظة؟ سامر: آه عليه. الرجل: خلاص، حالاً هحولك أربعين ألف جنيه، وعاوزك بقا تيجي تعملي إعلانات تاني، والحاجة اللي هتستخدمها في الإعلان دي هدية مني. سامر: تمام، اتفقنا، عاوزني امتى؟

الرجل: من بكرة الصبح لو تحب. سامر: تمام، أنا عندي جامعة، والساعة تلاتة هكون عندك. الرجل: تمام كده. ليغلق سامر مع الرجل. سامر: يا بركة دعاكي يا كركر. كريمة: خير، فرحني. سامر: صاحب المحل اللي اشتريت منه الملابس هو اللي كان بيكلمني، فرحني وقاللي الإعلان بتاعي ضرب في العالي، وكمان هيبعتلي أربعين ألف على محفظة التليفون بتاعي، وكمان هعمل إعلانات لصاحب مصنع وهيديني كل الملابس هدية. ليُقبل

يدها: ربنا يخليكي ليا، وعشان كده هجيبلك هدية حلوة. كريمة: أنا عاوزة شرمة. ليضحك سامر: قصدِك شاورما، هجيبلك، وكمان هجيبلك عبايتين حلوين عشان بعد كده تحضري معايا التصوير. كريمة: صح، هتاخدني معاك؟ سامر: آه أمال إيه، ده انتي تميمة الحظ بتاعتي. كريمة: يعني إيه؟ سامر: يعني انتي حظي الحلو من الدنيا. كريمة: يعني مش هتصالح مع خيك؟

سامر: أخلص اللي ورايا وأصالحه، حاضر. بس أهم حاجة بكرة على الساعة اتنين تكوني جاهزة عشان أفوت عليكي نروح سوا، ومتعرفيش حد كأننا رايحين أي مشوار. كريمة: وبالمرة نجيبو حاجة لشوق بت عمتك. سامر: حاضر، بس كده من عيني. كريمة: طيب وجمر خيتك؟ سامر: هبقى أديها فلوس تجيب اللي هي عاوزاه، هطلع أنا عشان أنام، تصبحي على خير. كريمة: وانته من أهل الخير يا ضي عيني. *** عاصم: جالس على الأرض بجانب العم عوض.

عوض: مالك يا ولدي، سرحان في إيه؟ عاصم: في الدنيا، وفي سامر أخويا اللي ماسألش فيّا كأنه مصدق الساعة جربت عليه بعد نص الليل وهو متصلش يطمن عليا بالتليفون. عوض: خليها عليك، انته الكبير. عاصم: وهو الكبير ده مش من حقه يحس إن خواته خايفين عليه؟ ولا اتكتب عليا أتعب وأشقى، ولو اتكلمت أتعير بجهلي ويتقاللي محدش طلب منك حاجة؟ عوض: بجولك إيه بجا، أنا بطني اتنفخت من أكل الدُرّة وكمان انته سهرتني، أنا هنام.

عاصم: ناس ما انته خالي البال. عاصم: ومش عارف يعني، تعيش طول عمرك تدي ومش مستني مقابل غير إنك تشوف خواتك في أحسن حال، لكن تلاقي إن كل اللي عملته وجع على الأرض. عارف يا عم عوض، لو كان سامر أخويا اتصل واطمن عليّا كنت نسيت كل حاجة، لكن ده كان مصدّق. ياله، ربنا يهديه. لينظر عاصم إلى العم عوض ليجده قد راح في النوم. عاصم: بجا أنا بكلمك تروح مني في النوم؟ ليسمع صوت شخيره. عاصم: هو ده اللي كان ناقصني!

أنا عرفت دلوقتي ليه الخالة سكينة دايمًا بتتعارك معاك، يخرب بيتك ده انت مركب زمّارة في زورك!