رواية حين تقع في الحب الجزء الثالث الفصل الخامس والعشرون 25 - بقلم ندى علي

غسان بغضب: نور مين اللي لعب في اللاب دا؟ نور اتعدلت بالألم: مش عارفة، بس محدش جه جنبه خالص. غسان بغضب: إزاي؟ الملف اللي عليه ممسوح، في حد لعب فيه. نور بتعب: غسان أنا اللي فيا مكفيني والله، بطني وضهري مش حاسة بيهم. هتسيبني أنام شوية ولا هتعمل إيه؟ غسان بحزم: اتخمدي يا نور، اتخمدي. نور اتعدلت على السرير تاني: يلا مش عايزة حاجة. غسان بص ليها بغيظ: نامي من غير دوشة بقى علشان أعرف أتنيل أرجع الملف تاني.

ولسه هيشتغل حبيبة عيطت. غسان بص للسقف: حرام اللي بيجرى لي دا، أقسم بالله أنا أقدم استقالتي وأجي أربي العيال بأمهم أحسن من كدا. وقام أخد حبيبة. غسان باسها وحضنها: روح بابا اللي ريحتها شبه الفل دي. وبيبوس فيها: نور عيوني اللي جعانة دي وبتاكل في صُباعها. غسان: كان على عيني والله يا بنتي إني أرضعك. ودخل المطبخ تحت ضحكات نور وعمل الرضعة ليها وقعد وفضل يشربها، وبعد ما خلصت قعدت على رجله.

غسان: أيوا يعني إيه مش نايمة تاني يعني؟ حبيبة بصت ليه وضحكت. غسان قعدها على رجله وحط اللاب على رجلها وفضل يحاول يرجع الملف تاني، بس اللي شغله أكتر إن إزاي اتسحب، ورغم إنه مش عارف فيه إيه بس ما دام اتسحب يبقى فيه حاجة مهمة جدًا. ************* نفين صحيت صلت الصبح ونورهان خبطت عليها. نورهان: صباح الخير يا طنط. نفين: صباح النور يا بنتي. نورهان: عندك بيض؟

عايزة أأكِّل فرحة ومفيش عندي والسوبر ماركت قافل علشان النهاردة الجمعة. نفين: ادخلي يا حبيبتي التلاجة قدامك، اللي انتي عايزاه خديه ومن غير استئذان. دخلت نورهان أخدت اللي يكفيها وطلعت. نفين: بس اسلقي البيض يا نورهان، ما تقليش علشان فرحة لسه الزيوت غلط عليها. نورهان: ما هو أنا كنت هاسلقه أصلًا. نفين: أيوا واسلقيها نص سوى كدا علشان تكون طرية عليها. نورهان: حاضر يا طنط. يلا هاروح أنا. ومشيت ونفين قفلت الباب.

نفين: طب أنا هاقعد أعمل إيه لوحدي؟ لما أدخل أنام أنا كمان. ودخلت على أوضتها ونامت. ************** ساعة صلاة الجمعة. غسان لبس العباية البيضا وسرّح شعره ورش برفانه وراح عند نور اللي حبيبة نايمة في حضنها. غسان بهمس: نور، نور. نور بنوم: نعم يا غسان. غسان: أنا نازل أصلي، مش عايزة حاجة؟ نور: لأ أنا هنام بس ما تتأخرش علشان خاطري. غسان: حاضر. ونزل على تحت قابل عمر وقاسم ومحمد ومنير. غسان: صباح الخير يا شباب. وباس راس أبوه.

الكل: صباح النور. غسان: طيب يلا ما عادش حاجة على الأذان. وأخدوا بعض وراحوا على المسجد صلوا وخلصوا وطلعوا. قاسم: مالك كدا صاحي من بدري ولا إيه؟ غسان: أيوا صحيت أشتغل شوية وأشوف كام اسطوانة لقضايا قديمة متجددة وملحقتش أخلصها في المركز جبتهم البيت هنا، وجيت أشتغل لقيت الملف ممسوح. قاسم باستغراب: ممسوح إزاي؟ حد مسحه ولا ملعوب فيه؟

غسان: دا اللي مش عارف أحدده، أنا مش عايز أعمل قلبان على الفاضي وفي نفس الوقت خايف يكون حد من العيال لعب فيه. محمد: وما سألتش مراتك ليه؟ غسان: سألت بس قالت لأ محدش جه جنبه، بس أنا قولت يمكن خايفة على عاصي مني أو حاجة. محمد: لأ بس أنت لازم تعرف يا معلم، علشان لو محدش من العيال لعب فيه يبقى مسح الملف متدبر ليه. غسان بغموض: نفس تفكيري، دا الملف الوحيد من بين 50 ملف هو اللي اتمسح، ودا اللي مخليني مش عارف أعمل إيه.

عمر: الله يخليكم بلاش نقضي الإجازة في الكلام في الشغل، عايزين نقضيها مع العيلة يلا. غسان: تعالوا نقعد تحت المخزن في الهوا هنا شوية. جابوا كراسي وراحوا عند المخزن وحطوها وقعدوا. نورهان نور كلمتها وعرّفتها إنها تعبانة ومش هتقدر تنزل، بدأت هي تعمل الفطار للبيت وفرحة بتلعب في العربية بتاعتها. *************** في شقة نسمة. نسمة: يا سوسو ما عدتش قادرة آكل لقمة تانية، أكلت كتير أوي كفاية كدا علشان خاطري.

سكينة: طيب خدي دي آخر حتة. نسمة أكلتها: خلاص كدا معدتي ما عدتش تستحمل. سكينة راحت حطت الأكل في المطبخ ورجعت لـ نينوش وشالت زهرة: يلا يا نسمة يا بنتي علشان ترضعيها. نسمة شالت زهرة وبدأت ترضعها بحب وابتسامة. نسمة: سوسو البت دي إيه تخينة لمين؟ سكينة: خمسة وخميسة في عينك يا نسمة، الله أكبر ربنا يحميها. نسمة بذهول: إيه سوسو كل دا؟ هو أنا هاحسد بنتي؟

سكينة: بيقولك ما يحسد المال غير صحابه، واسكتي خلي بنتك ربنا يقومك بسلامته. نسمة: يا رب. المهم أنا عايزة أدخل الحمام. سكينة شالت زهرة نيمتها مكانها وسندت نسمة لحد الحمام. *************** في منزل أحمد وسلوى. أحمد صحي لقى سلوى نايمة في حضنه وماسكة فيه بقوة، ابتسم على شكلها وإيه يتحرك سلوى صحت. سلوى بخضة: أحمد أنت رايح فين؟ أحمد: في إيه يا حبيبتي مخضوضة ليه؟ أنا قايم أتشطف وأشوف الساعة كام.

سلوى ارتاحت ونامت تاني: طيب أنا جعانة أوي. أحمد: طيب يلا ادخلي خدي شاور على ما أقول ليهم يحضروا غدا. سلوى لمحت قميصها في الأرض قامت أخدته ولبسته بسرعة من نظرات أحمد اللي بتحرقها ودخلت على الحمام بكسوف. أحمد بتوهان: هاحبك إزاي ولا فين أكتر من كدا يا سلوى. وطلع يعرف الخدم يجهزوا الأكل. سلوى أخدت شاور ولبست البورنص وطلعت وقفت قدام الدريسنج روم تطلع هدوم ليها. أحمد دخل عليها وفي إيده صينية أكل.

أحمد: سولي تعالي كلي الأول يلا. سلوى: حاضر ثواني هالبس بس وجاية. خلصت لبس اللي عبارة عن شورت وتوب أبيض كت وسابت شعرها وكانت جميلة أوي. أحمد بخبث: كان فين الحلوة دي من زمان طيب؟ سلوى بضحك: اصبر على رزقك بقى. أحمد بمشاكسة: صابر أهووو. وأكلوا في جو من الرومانسية والحب. ******************** عاصي وأسر صحوا خبطوا على باب أوضة نور. نور: تعالوا ادخلوا.

عاصي: صباح الخير يا مامي، احنا هننزل سمعنا صوت بابا وكلهم هننزل نقعد معاهم. نور باست عاصي وباست أسر: تمام بس تحت البيت يلا. عاصي أخد أسر ونزل جري. أسر: أيوا هنروح فين؟ عاصي: هنشوف أختك الأول وبعدين ننزل نقعد معاهم تحت أو نلعب دور كورة. أسر: طيب تعالى يلا.

نور حست نفسها كويسة شوية قامت وحطت مخدة جنب حبيبة، رتبت الأوضة ووطّت التكييف وطلعت وراحت على أوضة عاصي قفلت التكييف ونضفتها وغسلت المواعين ورتبت الصالة مكانهم ودخلت أخدت شاور وطلعت كانت حبيبة صحت. نور: صحي النوم يا روح ماما، حبيبي صحي حبيبي شبع نوم بقى. وأخدتها غيرت ليها هدومها ونضفتها ورضعتها. ودخلت المطبخ ما لقتش لبن صناعي. نور: علبة اللبن خلصت، تؤ. وراحت على الأوضة مسكت فونها ورنت على غسان. غسان: ألو، أيوا يا نور.

نور: حبيبي عايزة لبن صناعي لحبيبة من الصيدلية. غسان قام بعيد عن الشباب: حاضر. أنتي عاملة إيه دلوقتي؟ بطنك لسه بتوجعك؟ نور: لأ أنا كويسة دلوقتي بس اسمحلي أنزل أقعد مع العيلة شوية وأشوف نسمة. غسان: طيب انزلي علشان تفطري وبعدين ابقي اطلعي ارتاحي شوية. وقفل. ونور لبست هدومها وأخدت فونها ومفاتيح البيت ونزلت على تحت. والشباب طلعوا علشان الفطار، قعدوا على السفرة كلهم. حبيبة لما شافت غسان عيطت علشان ياخدها.

غسان: قلب بابا عايزاني؟ تعالي يا عمري كله. نور دخلت المطبخ تساعد نورهان. نورهان: اقعدي يا نور، أنتي مش قادرة تقفي، ارتاحي يا حبيبتي وأنا هاطلع الأكل. وطلعت الأكل على السفرة ونور راحت قعدت على السفرة. غسان: هو عاصي وأسر فين ما نزلوش معاكي ليه يا نور؟ نور: نزلوا قبلي راحوا عند نسمة يشوفوا زهرة. غسان قام وقف على الباب: عاااصي! أسر! عاصي: أيوا يا بابا نعم؟ غسان: انزلوا علشان الفطار اتحط يلا.

أسر: احنا فطرنا عند نسمة خلاص. غسان: خلاص ماشي بس انزلوا علشان ما تتعبوش نسمة. عاصي بغيظ: هي مش تعبانة، هي قالت كدا. نسمة ضحكت عليه من جوه. غسان بصوت عالي: انزل يا حيوان اخلص. سكينة بضحك: سيبه يا غسان ما تقلقش نسمة مبسوطة بيهم. نور قعدت أكلت أكل بسيط وغسان أكل وشرب الشاي. نور بتعب: ماما هاطلع أبص على نسمة شوية. نفين: اطلعي يا قلبي. نور: أظن لو اتشقلبت حبيبة مش هتيجي ليا. إذن خليها معاك بقى وهات الحليب بتاعها.

محمد بضحك: يا عيني على الحلو لما يبهدله الأيام. غسان بغضب: اخرس يلا أنت. نور طلعت على فوق ونورهان ونفين لموا السفرة وغسلوا المواعين ودخلوا ونورهان أخدت فرحة وراحت بيتها ترتاح شوية. ************* في شقة نسمة. نور: نسووم بت. سكينة طلعت من الأوضة: اسكتي سيبيها تنام، ما صدقت نامت حبيبتي تعبانة. مالك وشك أصفر إيه كدا؟ نور بتعب: مفيش ما تقلقيش تعبانة شوية، المهم هانزل أرتاح شوية أنا.

سكينة: اقعدي يا بت وقوليلي مالك تعبانة إزاي ومن إيه؟ نور: يا ماما ما تقلقيش تعب طبيعي بس المرة دي تعبانة شوية. سكينة بفهم: آآآه طيب يا حبيبتي انزلي ارتاحي شوية. نور: فين عاصي وأسر؟ سكينة: جوه بيلعبوا في أوضة أسر أهو. نور: طيب عايزة حاجة؟ سكينة: سلامتك يا قلبي اطلعي أنتي.

نور طلعت قلعت هدومها ولبست بيجامة عبارة عن بنطلون أسود ستان وتوب أبيض كت وسابت شعرها ودخلت عملت شاي وحطت جواه نعناع وأخدته وراحت قعدت قدام التليفزيون.