رواية حين تقع في الحب الجزء الثالث الفصل السابع 7 - بقلم ندى علي

أحمد أول ما دخل لقي سلوى لابسة قميص نو*م والروب بتاعها وعاملة شعرها على جنب ومتشيكة جدًا وريحتها جميلة جدًا. أحمد بصدمة: سلوى! سلوى بابتسامة وكسوف: نورت يا حبيبي. وقلعت الروب ورمته على الأرض. أحمد قرب منها وهي غمضت عنيها، ونزل على الأرض وجاب الروب ولبسه ليها. أحمد بسخرية: إيه اللي غيرك يا سلوى؟ مش انتي كنتي مانعة نفسك عني؟ إيه اللي اتجدد أو اتغير؟

آآآه أنا أقولك. لما عرفتي إن أنا ممكن أتخلى عنك، انتي عملتي كدا. قلتي يلا ليلة يسكت هو بعديها وخلاص. بس لأ يا سلوى، وأنا مش هلمسك، وحتى لو أنا بحبك، كبرياء رجولتي وكرامتي مش هجرحهم. فارتاحي يا حبيبتي، وآآه أوعي تنسي تلبسي البيجامة اللي بكمام علشان أنا مينفعش أشوفك بيها.

سلوى بدموع: أحمد اسمعني. أنا موجوعة، تعبانة، مفيش حاجة عجباني. الحياة اللي عايشاها مش عارفة أعيشها زي ما أنا عاوزة. مفيش حاجة بتيجي على مزاجي. أنا دخلت السجن ظلم 4 سنين، أنت لازم تقدر دا.

أحمد بسخرية: لو تفتكري إن السجن دا أنا كنت معاكي لحظة بلحظة. مكنتش بسيبك غير لما تنامي، وقبل ما تصحي كنت بكون قدامك. أحسن أكل وأحسن شرب كان بيتقدم ليكي. لو فاكرة إن اللي انتي كنتي فيه دا سجن، فأنتي غلطانة. السجن هو اللي أنا عايش فيه دلوقتي، ولا عارف أنا متجوز ولا مطلق.

وقرب منها أوي وكمل بغضب: أنا لما أجي أبص لحد بفتكرك، وأقول مراتك أجمل وأحسن منها مليون مرة. بس مراتي مانعة نفسها عني، وعلشان قلت لها هسيبك رجعت رضيت عني، وأنا لو هموت مش هقرب منها بالطريقة دي. وسابها ودخل الحمام. سلوى بقهر: أنا اللي عملت في نفسي كدا. أنا اللي حبيت واحد غير جوزي. أنا اللي طول حياتي هعيش في ذنب. أنا اللي أستاهل أوحش معاملة. بس الحب مش بإيدي ومحدش عارف كدا. يا رب خلصني من اللي أنا فيه دا.

أحمد في الحمام الدموع بتنزل من عينه بوجع وهو بيفتكر سلوى وهي كاتبة في المذكرات بتاعتها: غسان أنت الشخص اللي حبيته واللي هفضل أحبه طول الحياة، والشخص اللي ممكن أضحي بحياتي علشانه، ولو في فرصة أعيش معاك مش هتردد ثانية واحدة. بحبك. أحمد بوجع: لييه كدا يا سلوى؟ ليه؟ دا أنا كنت أتمنى ليكي الرضا ترضي. ابتسامة منك بتخلي يومي سعيد. قدمت ليكي كل الحب اللي في قلبي، بس انتي قدمتي إيه يا سلوى؟ الخيانة هي اللي انتي قدمتيها.

وغسل وشه وطلع نام في هدوء تحت نظراتها الحزينة. ************* عند غسان. غسان أكل وخلص وطلع فوق خبط على الباب. نور: تعالى يا غسان، ماما في الأوضة التانية. غسان دخل وأول ما شاف السرير اترمى عليه بتعب: آآآآآآه هموووت وأنام يا نور، هلكاااان. نور وهي بتلعب في شعره: نام يا قلبي نام. غسان اتعدل: عاصي فين؟ نور: عاصي ماما أخدته تنيمه معاها. غسان راح عند سرير حبيبة وباس خدها: روح أبوها دي. نامي. وغطاها كويس وراح على السرير.

غسان: نور اعدلي رجلك كدا. نور عدلت رجلها وهو نام عليها. غسان: بكرة يوم صعب أكيد في الشغل. نور وهي بتدلك راسه: ليه يا حبيبي أشمعنا بكرة؟ غسان وهو مغمض عينه: مش عارف بس أنا حاسس بكدا. التدريب كله هيكون عليا. نور: بصراحة أنت تدريبك صعب جدًا. ارحم شوية فيهم يا غسان. أنا مجربة وعارفة أنت مكنتش بترحم حد ولا حتى أنا.

غسان: يا نور أنا لازم أقسى عليهم علشان يتعودوا ويعرفوا التدريب الصح، وإلا إيه لازمة إن أنزل الطابور لو مش هدرب صح. وبعدين انتي كان عليكي شوية حركات بتخليني عاوز أقتلك. نور: غسان بص أنا مش هتكلم علشان مش عاوزين نتخانق ولا إيه؟ غسان اتعدل على المخدة وأخدها في حضنه بابتسامة: أنا برضو بقول كدا، ننام أحسن مش عاوزين أمك تتفرج علينا. نور نامت على صدره وحوطته من خصره وهو شدد عليها من حضنه وناموا في سبات. ************

تاني يوم الصبح الساعة 8. غسان قام من النوم على رنة المنبه اللي قلق نور. نور بنوم: غسان الساعة كام؟ غسان بهدوء: نامي نامي لسه بدري. أنا هقوم ألبس وأروح الشغل. نور: لا يا حبيبي هقوم علشان هعملك تفطر قبل ما تمشي. غسان: طيب يا حبيبتي قومي على ما آخد شور، اعمليلي. نور هزت راسها وقامت من السرير. بصت على حبيبة بابتسامة: غسان حبيبة غير عاصي خلاص. عاصي طول الليل كان صاحي لكن حبيبة نايمة ما شاء الله عليها. غسان ابتسم

وهو بيقلع التيشيرت بتاعه: شكلها هتكون هادية بس اسكتي خليها نايمة أحسن ما تقوم تعيط. ودخل الحمام ونور نزلت على المطبخ. *************** في الفيلا عند محمد. محمد كان لسه راجع من الجري اللي متعود عليه كل يوم. إيجي ودخل قلع الجاكت وقعد على الكنبة وهو مبتسم. محمد: طيب أنا بفكر فيها ليه؟ أنا مالي بيها؟ أنا أول مرة في حياتي واحدة تشغلني. بس يا ترى انتي مين ووراكي إيه؟ وقام من كتر التفكير ياخد شور علشان ينزل الشغل.

وبعد وقت طلع من الحمام وهو لابس فوطة محاوطة خصره. لبس بنطلون بدلة أسود وقميص أبيض وشمر كمامه وبانص أسود وسرح شعره وحط برفانه ونزل على المطبخ وقف قدام التلاجة. محمد بتفكير: ناكل إيه دلوقتي؟ وبعدين طلع كوباية لبن ساقعة وتوست ومربى وأكل وطلع ركب عربيته ومشي. ************** عند نورهان. كانت واقفة في المطبخ بتعمل الشاي وعمر بيلعب مع فرحة في البلكونة. عمر بزهق: نووورهاااان هتأخر. نورهان: خلاص أنا خلصت أهو.

عمر: عارفة يا فرحة أمك دي على ما اتأقلمت على الوضع طلعت ميتيني. كانت أفشل إنسان بالدنيا. اتنيلي يعني هي ربنا عدل حالها أصلاً. نورهان حاطة إيدها في وسطها: ومال حالي يا عمر بيه؟ مش عجبك؟ في إيه يا خسارة الشاي فيك. عمر: يا روحي دا أنا كنت بشيل العين عنك. نورهان حطت الشاي على السفرة بغيظ: طيب اشرب يا جوزي. ************* عند أحمد وسلوى. أحمد كان خلص لبس ولسه هيمشي سلوى وقفته. سلوى قامت: أحمد أنت رايح فين؟

أحمد من غير ما يبص ليها: رايح الشغل. سلوى بحزن: هتفضل متتكلمش معايا لحد أمتى؟ أحمد بص ليها بسخرية: وجعك تجاهلي ليكي؟ شفتي أنا برضه كنت موجوع وزعلان، وأنتِ أغلبية الوقت ساكتة يا سلوى. سلوى بحزن: أنا آسفة، أنا عارفة إني غلطانة بس سامحني. أحمد: عارفة أنتي متهورة جدًا، بس دا غلط. أنتي عقلك طايش، عاوزة أي حد يشاغلك وخلاص. بس آسفك دا بعد إيه يا سلوى؟ بعد ما... ولا أقولك ملهاش لازمة. سلوى: بعد إيه يا أحمد؟

قول أنا عملت إيه يخليك كدا؟ أحمد برفع حاجب وابتسامة ساخرة: بعد إيه فعلًا؟ أنا جاي عليكي معلش يا حبيبتي آسف مش هتتكرر. وكمل بعصبية: سلوى احنا لو اتكلمنا مش هنكمل مع بعض. فاسكتي يا حبيبتي وخليني ساكت. سلوى: وهتفضل ساكت لأمتى؟ أنا عاوزاك تتكلم. أحمد وهو طالع: لما ربنا يأمر. وآه أنا هتأخر، نامي بلاش تفضلي سهرانة علشان مش هتكلم غير لما أهدى وأعرف أنا بعمل إيه. وسابها ومشي.

سلوى فضلت تعيط وراحت على الدرج تشوف المذكرات بتاعتها علشان تكتب فيها أحزانها، بس ملقتش المذكرة بتاعتها. اتصدمت وفضلت تدور عليها بهستيريا. سلوى: لا لا لا بلاش يكون حد أخدها. دي فيها كلام لغسان. يا لهوي أعمل إيه؟ ***************** غسان خلص فطار. غسان: يلا أنا همشي علشان مش عاوز أتأخر ولو حصل أي حاجة اتصلي بيا. نور: حاضر يا حبيبي. غسان قرب منها وباسها من خدها: يلا يا حبيبي باي. ومشي.

ونور بدأت تلم في السفرة لقت عاصي صحي ونزل جري. عاصي: ماماااا ماماااا تعالي بسرعة حبيبة بتعيط جامد. نور طلعت جري على فوق وأخدتها في حضنها: بس يا روحي بس هش هش. وجابت الرضاعة بتاعتها وفضلت ترضعها. عاصي: ماما أنا عاوز الفون بتاعك ألعب بيه شوية. نور: على التسريحة أهو بس نص ساعة علشان عينك وتحطه على الشاحن علشان بابا ممكن يتصل. عاصي: حاضر. نور: سويو صحيت؟ عاصي: لأ هي لسه نايمة. نور: طيب تعالى العب هنا علشان متصحاش.

عاصي بخوف: بس بابا ممكن يزعق علشان أنا في الأوضة بتاعتكوا. نور: لأ يا روحي بابا مش هنا العب براحتك. وكملت بهمس: عامل رعب للعيال لا حول ولا قوة إلا بالله. عاصي نام على بطنه على السرير وفضل يتفرج على الفون. ****************** عند يمنى. يمنى كانت لابسة بنطلون أسود واسع وبلوزة بيج وجزمة كعب بيج وعاملة شعرها ديل حصان ولسه هتطلع من باب البيت اتصدمت من اللي واقف قدام الباب. يمنى بصدمة: ...