رواية حين تقع في الحب الجزء الثالث الفصل السابع والعشرون 27 - بقلم ندى علي

الصبح الكل اتجمع عند الطباخ ونور بتلبس عاصي. نور: عاصي اوعى تبعد عن البيت يا عاصي، اوعى تمشي بعيد يا عاصي، أنا حذرتك أهو، خليك مع أبوك على طول. عاصي: يا ماما حاضر والله، أنا هلعب قدام البيت بس أنا عاوز فلوس علشان أشتري. نور: معيش فلوس فكة، روح خد من بابا يا حبيبي. عاصي: حاضر يلا أنا ماشي. ونزل. نور شالت حبيبة: وأنتِ يا ست حبيبة بتسكتي هنا، وتيجي قدام الجدة تقومي تعيطي وتجيبي ليا الكلام، دا ينفع؟

حبيبة ضحكت ليها، ونور شالتها ونزلت على تحت. قدام المخزن. محمد في الفون: يا حبيبتي أنتِ دلوقتي روحتي الكوافير صح؟ يمنى: أيوا. محمد: طيب إيه المشكلة بقى؟ زعلانة ليه؟ يمنى: أنا عايزة أسيب شعري وخايفة أقولك. محمد: لأ يا يمنى، الحجاب هيكون جميل ورقيق عليكي أكتر. يمنى: يعني يوم فرحي وألبس حجاب؟

محمد بصرامة: أيوا يا يمنى، أنا مش هسمح إن مراتي تمشي من غير حجاب قدام زمايلي وإخواتي أبدًا، وبعدين حرام، أنتِ محجبة لربك مش لناس، وصلت؟ يمنى بعبوث: خلاص ماشي أنا هقفل علشان أبدأ ميكب، يلا باي. محمد: أوكي باي باي. وقفل. غسان واقف مع المعازيم بيسلم، إجه الطباخ عليه. الطباخ: يا حضرة الرائد. غسان: اؤمر يا شيفنا. الطباخ: إحنا كدا الرجالة كلها أكلت، لسه سفرة الحريم. غسان: خلاص تمام، جهز السفرة وأنا هجيب الحريم هنا.

وطلع على فوق. غسان: نور نور. نور إجت من الصالون وهي شايلة حبيبة: نعم يا غسان. غسان بصوت عالي: يلا يا جماعة السفرة جاهزة، الأكل بدأ ينزل. نور: حبيبي ممكن تجيب أكل ليا أنا ونورهان ونسمة بدل ما ننزل، غير إن الأولاد هيبهدلونا. الجدة بصرامة: ومن العادات والتقاليد إن كناين العيلة ياكلوا مع المعازيم، دا من الأصول. نور باحترام: بس يا جدتي الأولاد بيبهدلوني فعلًا وحبيبة صعبة ومش بتسكت.

الجدة: غسان نزل مراتك تاكل مع الكل، ويلا. ونزلت. نور إجت تنزل، غسان مسك إيديها وهي استغربت. غسان برفع حاجب: رايحة فين؟ نور: هنزل علشان مش عايزة كلام معاها. غسان: هي قالت أنتِ هتنزلي، بس أنا طلبت إنك تنزلي؟ نور باستغراب: مش فاهمة، أومال هعمل إيه؟ غسان: هتعدي في الشقة هنا والأكل هيجي ليكي تاكلي أنتِ وعاصي وأسر والبنات. نور: بس لو اتكلمت؟ غسان حط إيده على خدها: تتكلم وإيه يعني؟

وقتها هتكلم أنا، مراتي ست الستات وملكة على الكل. نور بحب: ربنا يخليك ليا. غسان بهمس: أبوس أنا بقى؟ نور دخلت جري على جوا بكسوف، وغسان ضحك ونزل على تحت. ************* في الكوافير. سما اللي هتعمل الميكب: قوليلي يا عروسة، عايزة الميكب إزاي؟ يمنى: بصي أنا مش عايزاكي تغمقي بشرتي، أنا عايزة نفس لوني كدا، والروج يكون لون طبيعي مش فاقع، والحجاب والباقي على ذوقك بس الآي شادو مش عايزة فيه لمعة.

سما بابتسامة: خلاص تمام، ألف مبروك. يمنى بابتسامة: يبارك فيكي يا رب. وسما بدأت تجهزها. ******************* الساعة 5 المغرب، محمد بيلبس في شقته علشان يجيب يمنى ويروحوا السيشن، والابتسامة على وشه، لبس البدلة ورش برفانه وهو حاسس بفرحة أول مرة يحسها، خلص ونزل. غسان ابتسم أول ما شافه: مع إن مش أول مرة تلبس بدلة بس المرة دي مختلفة، كلها كام ساعة وهتكون راجل متجوز وتودع العزوبية يا صاحبي.

محمد حضنه بشدة: ربنا يخليك ليا وتفضل أخويا اللي محبتهوش أمي يا غسان، أومال الشباب فين؟ غسان: بيخلصوا الحسابات مع الإضاءة علشان نلبس كمان ساعة ونكون في القاعة قبلك. محمد: طيب هسبق أنا علشان ألحق السيشن. غسان: تمام. ومحمد ركب عربيته وانطلق على الكوافير، وغسان طلع على فوق. *************** في شقة نفين. نفين بتطبطب على غسان: أظن ولا كلت ولا شربت النهاردة يا نن عيني. غسان باس إيديها: لأ يا أما أنا كلت أنا والشباب،

وكمل بمرح: قولي مبطلناش أكل. نفين: بالهنا على قلبكم. غسان بهمس: إلا قوليلي ستي فين؟ البيت ساكت كدا. نفين بضحك: دخلت تريح شوية. غسان: طيب إيه يا نور أنتِ والبنات، هتأخدوا وقت في اللبس؟ اطلعوا اجهزوا من دلوقتي يلا وجهزوا العيال. نور بابتسامة: كنت لسه هقولك، وقربت منه: بس تعالى فوق عايزاك. غسان بهمس: في حاجة ولا إيه؟ نور: لأ متقلقش بس عايزة منك فلوس علشان عاصي بيطلب مني وأنا معايا في الفيزا ومش عايزاه يحرجني.

غسان بابتسامة: حاضر يا حبيبي، اطلعي اجهزي وأنا هطلع أجيبلك اللي أنتِ عايزاه. نور ابتسمت وأخدت حبيبة وعاصي وطلعت، ونسمة أخدت زهرة وطلعت، ونورهان أخدت فرحة وراحت شقتها، وغسان نزل عند الشباب. عمر: أنت يابني بندور عليك وعلى محمد رحتوا فين؟ غسان: أنا هنا، قولت للبنات يلبسوا علشان هيتأخروا، ومحمد راح يجيب مراته ويروحوا على السيشن.

قاسم: طيب إحنا كدا خلاص مفيش حاجة تتعمل، كله اتحاسب والدنيا تمام، نطلع نجهز إحنا كدا وناخد دش ونظبط نفسنا. غسان: كنت هقولكم كدا، روحوا ظبطوا أموركم وأنا طالع أشوف هعمل إيه علشان نلبس علشان عايزين نكون قبل محمد في القاعة. عمر: والأتوبيس اللي هياخد المعازيم من هنا للقاعة هيوصل كمان ساعة. غسان: يبقى يدوب نطلع نلبس. وطلع غسان وقاسم وعمر راح على بيته. ************** في الكوافير.

يمنى واقفة وفستانها منفوش وجميل ومطرز بالخرز الأبيض ولون الفستان مقارب للبيج. محمد دخل وسط الزغاريط والفرحة واتفاجئ بشكلها الجميل والرقيق، قرب منها وباس إيديها وسلمها بوكيه الورد وأخدها من إيديها ركبها العربية ومشي. محمد: إيه الجمال والروعة دي! أنا قولت حلوة بس مش أوي كدا. يمنى بكسوف: أنت كمان شكلك حلو أوي... هنروح فين دلوقتي؟ محمد: هنروح السيشن، وبعد السيشن على القاعة.

وكمل بخبث: وبعد القاعة على البيت، وفي البيت آآآه. يمنى بكسوف ومقاطعة: اسكت، اسكت مش عاوزاك تقاطع، سيب كل حاجة لوقتها. محمد ضحك عليها وعلى خوفها وكسوفها. *** في بيت يمنى، أبوها لابس بدلة رصاصي وماهر لابس بدلة كحلي ومتشيكين آخر شياكة. سمير: ماهر، الأتوبيس وصل ولا لسه؟ ماهر: أنا رنيت على غسان قالي هيوصل على الساعة سبعة. سمير: طيب اتصل بأختك شوفها مشيت من الكوافير ولا لسه. ماهر: بكلمها فونها معطل، أكيد في السيشن دلوقتي.

سمير: طيب شوف أعمامك لو ناقصهم حاجة. ماهر بتذمر: المهم ما ترتحش يا زفت، دا المطلوب مني واللي عايز تقوله أصلاً. وراح يشوف أعمامه. ماهر: إيه يا جماعة في أي حاجة محتاجينها؟ سالم عمه: احنا هنروح أمتى يا ابني؟ لبستونا بدري وقعدتونا وخلاص. ماهر: ماهو مش معقول هنروح بدري أوي كدا. سالم: هو الأتوبيس وصل ولا لسه؟ ماهر: على وصول. جميلة مرات عمه: معلش يا ماهر ودي أحمد ابني يشرب لو مش هنتعبك.

ماهر بغيظ مخفي: لاء يا مرات عمي ولا تعب ولا حاجة. ومسك الواد من قفاه وأخذه وطلع البيت يشربه. *** في السيشن. محمد لابس بليزر أبيض وحاطت ايده حوالين وسط يمنى، ويمنى حاطة ايد على كتفه وايد على قلبه، وجدها اليمين مقابل ليه. المصور: بقولك يا عريس بوسة رقيقة بقى! محمد بخبث: حبيتك فجأة يا أخي من عند الله، ربنا يفتحها في وشك. ولسه هيبوس. يمنى بكسوف زقته: محمد انت بتعمل إيه؟ عيب ابعد. محمد: يا بت هتخليني أصوت!

أنا جوزك، هي البدلة البيضة مش مالية عينك ولا إيه؟ يمنى بخجل: لما نبقى لوحدنا مش قدام الناس عيني عينك كدا. المصور: ما فيش حاجة يا عروسة، دي بوسة بسيطة من الخد بس علشان الصورة. محمد: يلا بقى دا أنا لما أروح هطلع كل دا عليكي، اخلصي. وباسها من خدها وسط كسوفها الشديد. المصور: بس حلو أوي كدا. محمد بصدمة: إيه يا عم أنا لسه كنت باخد الوضع وانت تقول خلاص؟ طب قدر دا احنا رجالة دي بعض يعني.

المصور بضحك: يا عم اهدى كلها ساعتين تلاتة وتقول يا ليتني. محمد بضحك بص ليمنى: مجرب قلب أمه. وكملوا تصوير وفضلوا فترة كبيرة جدًا. *** في شقة نور. نور بتجري من الأوضة دي للأوضة دي. نور بصويت: عاصي البس الجزمة بسرعة وهات الشنطة السودا اللي فيها الميكب من الأوضة بتاعتك يا روحي. عاصي راح جابها: خدي أهي، حاجة تانية؟ نور بسرعة: افتح درج الكومدينو وهات علبة مناديل بسرعة. غسان اللي

شايل حبيبة وواقف مصدوم: يعني مطلعك بقالي ساعتين وبرضو اتأخرنا. نور بضيق: يا غسان لما لبست عاصي وحبيبة أخدوا وقت. غسان بعصبية: لما وقفت شوية قدام المراية أشوف تخنت كام كيلو، وشوية أنا لازم أخس، وشوية أنا طولت، وشوية حاسة بهالات تحت عيني، عارف القصص دي كلها مرت عليا في ألف فرح روحت معاكي فيه. نور مركزة في الأيلينر اللي بترسمه والماسكرا، وبعد وقت كبير خلصت ميكب ولفت الطرحة وخلصت كل حاجة. نور بصت لغسان: إيه غلط فيا؟

غسان بغضب: المكياج زفت على دماغك ولا بحب القصص دي كلها، دي مرقعة. نور بترجي: حبيبي انت وعدتني انك هتسيبني أحط ميكب في فرح محمد ويمنى. غسان: أستغفر الله العظيم، ما علينا انتي قمر، يلا بقى ننزل اخلصي. نور بضحك: انت وعاصي شبه بعض أوي في اللبس دا. نور كانت لابسة فستان كشميري محتشم وطويل بحزام أبيض وجزمة بيضة وأسبنش أبيض وشنطة دهبي والسلسلة اللي عليها اسم غسان والدبلة والأساور الدهبي وكانت ملكة.

غسان كان لابس بنطلون أسود وبليزر رصاصي تحته قميص أسود وجزمة رصاصي، وكانت ذوق وقوامة في لبسه. وعاصي لبس نفس لبس غسان بالظبط، وحبيبة لابسة سلوبيت شورت كشميري لون فستان نور. نور مركزة مع نفسها في المراية أوي. غسان: يا بنتي اخلصي يلا. وأخد حبيبة وعاصي ونزل قبلها. *** عمر وقاسم لابسين نفس لبس غسان علشان متفقين على كدا، وأسر نفسهم. قاسم

نازل بغضب وفي ايده أسر: وبقالي ثلاث ساعات بنقول اطلعوا البسوا وكل دا ما خلصتش، لا حول الله. غسان: في إيه بتزعق ليه؟ قاسم بغيظ: دي عيشة تحرق الدم، الساعة بقت سبعة ونص ولسه الهانم ما خلصتش. غسان بص لنور بغيظ: لو ما كنتش زعقت كانت فضلت أسبوع، بس قدر ولطف. نسمة: مش فاهمة بتزعق ليه؟ أهو خلصت ونزلت. قاسم بغيظ: بعد إيه دا انتي سحلتيني من الوقفة. نور: إش إش إش إيه الحلاوة دي يا نسوم.

نسمة كانت لابسة فستان لبني سك وبديل من ورا وعليه بعض الخرز وسمبل أوي وجميل مع الميكب الهادي والأسبنش الجميل نفس لون الفستان. نسمة: بجد حاسة نفسي تخينة في الفستان أوي. غسان بسرعة: قاسم أنا سابق ما بحبش سيرة التخن دا أبداً. الكل ضحك ونزلوا على تحت. نور: غسان الله يخليك أنا هنزل على العربية على طول مش عاوزة أقابل ستك دلوقتي خالص. غسان بضحك: احنا كلنا هننزل في العربية علشان هي ركبت مع أبويا تحت. نور حطت ايدها على قلبها

هي ونسمة وفي صوت واحد: الحمد لله. غسان وقاسم بضحك: دا ستي عاملة شغل تمام أهي. ونزلوا على تحت اتقابلوا في عمر ونورهان وفرحة. عمر: إيه يلا، محمد طلع من السيشن ورايح على القاعة، والأتوبيس بتاع العروسة مشي وبتاعنا لسه ماشي حالاً، وأبوك وأمك وستي سابقوا أهو حالاً. غسان بص في ساعته: واحنا يا دوب أوي نوصل. يلا كل واحد ركب عربيته مع مراته وعياله ومشيوا. *** في أتوبيس العروسة. الحريم كلها بتسقف وبتغني وبترقص وفرحانين أوي.

أم لمياء: مبروك يا أم ماهر، عقبال ماهر يا رب. دنيا: الله يبارك فيكي يا أم لمياء، ما انحرمش منك أبداً. زينب جارتهم: إلا أنا نفسي أشوف العريس دا أوي. دنيا: دلوقتي تروحوا وتشوفوه أهو. زينب: لا إيه يا ستات عاوزين أغاني زمان الحلوة دي، يلا عقبالكم حداكم واستغلوا أغاني تانية. *** بعد وقت كبير وصل الكل القاعة ودخلوا وانبهروا بشكل القاعة وجمالها.

غسان ماسك ايد نور وشايل حبيبة، ونور ماسكة عاصي في ايدها، وغسان راح على ترابيزة أمه. غسان: السلام عليكم، أمه نور معاكي أهي. نور خلي بالك على حبيبة، عاصي معايا ما تقليش عليه. نور: طيب بس عاوزة أقوم استقبل العروسة. غسان بص ليها بصة هي عارفاها: أنا لو لقيتك قمتي من مكانك هاجي أكسرك مكانك، اشطا؟ نور بغيظ: طيب. غسان أخد عاصي ومشي، وحبيبة بدأت تعيط وراه، نور استلمتها وطبطبت عليها، وشوية نورهان ونسمة وصلوا وراحوا جنب نور.

نور: إيه اللي أخركم كدا؟ نورهان: احنا وصلنا من شوية بس استنيت نسمة. نسمة: قاسم كان مهدي السرعة علشان زهرة. نور: مش دي مامت يمنى اللي جاية علينا دي؟ نورهان: أيوه هي. دنيا راحت عليهم وسلمت. نور بابتسامة: نقول مبروك علينا يمنى بقى! دنيا: يهنيهم يا رب، عقبال ما تشوفوا اليوم دا لعيالكم يا رب. البنات: يا رب. ودنيا بدأت تتكلم مع نفين.

وفجأة الأغاني اشتغلت وأغنية "طلي بالأبيض"، ودخل محمد ويمنى من باب القاعة الكبير، الكل سقف مع همسات الكل عليهم. نسمة: الفستان مش أبيض. نورهان: ما بحبش كدا، هو معروف فرح يبقى أبيض. نور: هو ذوق يمكن هي مش حابة الأبيض. يمنى دخلت وهما شوروا ليها وهي ابتسمت وشاورت ليهم. غسان اللي عينه على نور وعياله وهكذا قاسم وعمر. قاسم: غسان الفرح في كل الكتيبة باين. غسان بضحك: تقريباً كدا.

والكل إجوا عليهم وبدأوا يسلموا عليهم في فرح وسرور، والكل بيسلموا ويبوسوا عاصي وأسر. وبدأت الرقصة الأولى ويمنى ومحمد بيرقصوا، ويمنى مش عارفة تجيب عينها في عين محمد من الكسوف. محمد: يمنى خليكي معايا أنا، سيبك من كل اللي حواليكي دول يا حبيبتي. يمنى بكسوف: أنا معاك أهو، أنا روحت فين؟ محمد: أقصد قلبك وروحك معايا مش جسدك، أنا عاوز عيونك يا يمنى يكونوا في عيوني من غير كسوف يا حبيبتي. يمنى بصت ليه بحب ممزوج بكسوف: حاضر.

وأول ما خلصت الرقصة طلع غسان على المسرح. غسان مسك المايك: اسمع بقى يا معلم انت وهو، الفرح دا فرح أخويا، يعني عاوز دمار يحصل النهارده، وسمعني حاجة لعبد السلام بسرعة. ضحك الجميع عليه واشتغل مزمار عبد السلام، والرجالة بدأت ترقص مع محمد وقاسم وعمر، وغسان قاموا بالواجب وزيادة. والبنات ولاد عمات يمنى وقرايبهم قاموا يرقصوا معاها. نورهان بحماس: بنات قوموا نروح نقف معاهم على المسرح.

نسمة: اشطا يلا، هادي زهرة لماما ونروح، يلا يا نور. نور بتذمر: آسفة محكوم عليا عدم طلوعي على المسرح أو التحرك من مكاني. نورهان بغيظ: يعني إيه دلوقتي؟ نور: يعني اتنيلي اطلعوا لوحدكم وأنا هفضل هنا. نسمة: هنطلع علشان يمنى ما تزعلش بس، لو ما نكدتيش عليه النهارده تبقى غلطانة. وطلعوا. نور بغيظ: دا أنا هنكد نكد ما شافهوش في حياته. نفين: نور قومي معاهم يا حبيبتي افرحي. نور: نفسي بس غسان مشرط عليا ما اطلعش على المسرح.

نفين: دا إيه دا! اطلعي واتبسطي معاهم، سيبك منه. نور بضحك: هيزعق ويتخانق ليه؟ أفضل باحترامي وخلاص. نفين ضحكت عليها، والجدة باصة للكل ومش عاجبها الوضع. نور بضحك على شكل الجدة: لا حول ولا قوة إلا بالله يا ربي.

غسان قلع البليزر وبص لنور وحدفه عليها، نور اتخضت بعدين شمت ريحة برفانه عرفت أوه غسان، بصت ليه لقيته بيرقص وبيعكب مع الضحك والفرح المتبادل للجميع، مسكت البليزر عدلته وحطيته على رجليها وفضلت تلاعب حبيبة اللي قاعدة قدامها. بعد وقت نزلوا الشباب من على المسرح علشان العرسان يرتاحوا. غسان راح قعد جنب نور بتعب وعرقان. نور: غسان اهدى شوية، العرق دا هيتعبك. غسان قرب منها وحط ايده على كتفها بهمس: قومي تعالي معايا.

نور: هنروح فين؟ غسان: هنروح نسلم على يمنى ومحمد. نور قامت: ماما خلي حبيبة معاكي أما أروح أسلم على يمنى وأجي. نفين: روحي يا حبيبتي. غسان مسك ايد نور وأخدها وطلع على المسرح. نور بابتسامة حضنت يمنى: ألف مليون مبروك يا يمنى، نورتي عيلتنا والله. وسلمت على محمد. يمنى: يبارك فيكي يا حبيبتي. غسان بارك هو كمان، ويمنى اتكلمت مع يمنى علشان لحظة توترها. غسان بهمس: محتاج حاجة يلا؟ أي مساعدة؟ محمد: مساعدة في إيه؟

انت وعمر وقاسم سألتم نفس السؤال. غسان بخبث: مجربين احنا، تاخد فكرة يعني. محمد: لولا المعازيم كنت قتلتكم الثانية دي. غسان بابتسامة: ألف مبروك يا صاحبي، تتهنى بيها يا رب. محمد بحب: يبارك فيك يا صاحبي. غسان أخد نور ونزلوا وقعدوا يتصوروا كتير، وحبيبة شبطت في غسان، وكل شوية ناس صحاب غسان يجوا يسلموا عليه، وبعد وقت كبير انتهى الفرح والكل أخد عيلته وروح، ومحمد ركب العربية بتاعته ومشي، وغسان وعمر وقاسم وراه بيزفوه.