رواية حين تقع في الحب الجزء الثالث الفصل الثالث 3 - بقلم ندى علي

نورهان قامت على صوت فرحة وهي بتعيط بشدة، قامت بخضة لبست الروب وراحت شالتها. نورهان: بس يا روحي بس هش هش اهدي خلاص تعالي يلا علشان ترضعي أكيد جوعتي يا عمري. وقعدت ترضعها لكن رفضت الأكل. نورهان بدموع: بس يا نور عيوني، أنتِ مش راضية تاكلي ليه بس. وحطت إيدها على راسها لقيتها نار. نورهان بعياط: عمر، عمر قووم بسرعة. عمر قام بقلق: في إيه مالك بتعيطي ليه؟ نورهان أخذت إيده وحطيتها

على راس فرحة بدموع: البنت راسها سخنة نار، ده من إيه؟ عمر أخذ فرحة شالها بقلق: اهدي اهدي البسي خلينا نروح للدكتور نشوف في إيه. نورهان راحت لبست بدموع وجت وعمر شال فرحة ونزلوا، عمر ركب ونورهان ركبت وشالت فرحة بدموع. عمر ركب بعصبية: نورهان بطلي عياط اسكتي. نورهان بخوف من صوته: عمر أنا خايفة عليها. عمر غمض عينه واستغفر: يا حبيبتي اهدي، كل الأطفال في السن ده بيتعبوا التعب ده، المهم إحنا رايحين أهو. ******************

عند نور وغسان: نور صحيت من النوم وملقتش حبيبة نايمة جنبها، قامت وحطت رجلها على الأرض بتعب وقامت بوجع. نور بوجع: آآآه أنا كده أو كده هقف وهمشي فا أحاول مع نفسي أنزل لتحت. وبدأت تنزل على الأرض وتمشي لحد ما وصلت عند الباب ومسكت بطنها بتعب. نور بتبص وراها: يااااه ده أنا مشيت كتير أوي. ما علينا غساااااااااان يا جووووووزي. غسان حط حبيبة على الكنبة وحط جنبها مخدة بعد ما نامت وطلع لنور.

غسان بضحك: إيه يا ملازم نور، أنتِ وقفتي على كده ليه كملي وتعالي هنا. نور بغيظ وهي ماسكة في الباب: على فكرة اللي أنا فيه ده بسببك أنت. غسان برفع حاجب وهو حاطط إيده في جيب البنطلون: بسببي أنا ليه يا حضرة الملازم. نور بغيظ: علشان أنا لو ما كنتش متجوزة دلوقتي كان زماني معلقة 3 نجوم وما كانش حصل فيا اللي حصل وبيحصل ده. غسان قرب منها وهو بيعدل التيشيرت عليه: حصل أنا السبب يعني في كل ده. وبيقرب منها.

نور بترجع بوجع وتوتر وخوف: أنت هتعمل إيه؟ عليا أصوت ألم عليك الكمبوند كله فا عدي اليوم على خير. غسان قرب منها وشالها وهي بتلقائية حطت إيدها على رقبته. غسان وهو نازل بيها: على فكرة بفكر أسيب الجمالية ونعيش هنا. ونزلها على الكنبة. نور برفض: لاء يا غسان أنا مش معاك في الموضوع ده خالص، أنا عايزة أعيش مع مامتك وبابا منير، ليه عايز تسيب الجمالية وتعيش هنا؟ إيه اللي حصل؟ غسان جاب كرسي

وقعد قدامها ومسك إيدها: أنا بفكر يا نور يعني لسه ما قررتش. نور: إيه السبب يا غسان؟ إحنا مرتاحين هناك يا حبيبي وماما وبابا ما يقدروش يعيشوا من غيرك وبابا محتاجك في الشركة، ليه عايز تحرمهم منك؟ غسان بهدوء: وهو مين قال إن أنا كده بمنع نفسي عنهم؟

أنا رائد يا نور شغلي في القاهرة ومن القاهرة للجمالية طريق كبير وتعب، فا أنا عايز أقصر المسافة والشركة هنا يعني الجمالية إقامة وبس لكن المكان الأساسي والشغل وكل حاجة هنا في القاهرة. نور بحيرة: مش عارفة بس هناك نسمة وماما كانوا مسهلين عليا تربية عاصي وبيساعدوني شوية وكنت في الوقت اللي أنت مش موجود فيه هنا كانوا بيسلوني لكن هنا هقعد مع مين أو حتى أتكلم مع مين؟

غسان: حكاية الولاد سهلة، أنتِ كنتي محتاجة حد يساعدك في تربيتهم هناك علشان بيكون عندك شوية شغل في البيت وكده لكن هنا الفيلا كل أسبوع هنجيب حد ينضف البيت كله وأمر الأكل أنا وأنتِ مش آكلين يعني وأرجوكي سهلي الموضوع علشان كده تعب ليا أنا. نور ابتسمت بحب: اللي أنت عايزه بس على ما أعتقد ماما وبابا مش هيوافقوا. غسان: سيبي أمي وأبويا عليا. نور بتفكير: طيب غسان أنا كمان فترة كده عايزة أركب وسيلة تمنع الحمل.

غسان بغضب: نعم يا نووور! في إيه؟ هو إيه اللي وسيلة تمنع الحمل؟ ليه خير؟ نور وقفت بتعب قدامه: يا حبيبي إحنا عندنا عاصي وحبيبة والحمدلله عليهم، دلوقتي نستنى لحد ما حبيبة تكبر شوية وبعدين أبقى أشيله لكن أنا مش عايزة أحمل دلوقتي خالص. غسان بغضب شديد: نووووور، ما فيش أم زفت متركبة! واللي ربنا يجيبه ألف حمد وشكر ليه، أنا عايز أولاد أكتر وأكتر، أومال أنا هسيب الدنيا دي ليه؟

علشان عايز حد يشيل اسمي من بعدي، في إيه يا نور ما تتعدلي كده. نور بصت ليه بهدوء: أفهم بس أنت متعصب ليه، أنا بتكلم بهدوء وأنت بتزعق وبتتكلم بعصبية، أنت اتناقشت معايا في موضوع إنك عايز تعيش هنا اتكلمت براحة والموضوع اتحل، أفهم بقى ليه حاجاتي أنا بتتعصب فيها. غسان بغضب: علشان كلامك غلط ويعصب. نور بزعيق: لاء مش غلط، دي حرية شخصية، أنا طلبت حاجة تخصنا إحنا الاتنين وأظن ليا حق أتكلم في دي صح ولا لاء؟ غسان

ربع إيده وبص ليها بغضب: كملي كملي، وإيه تاني؟ عارفة أنا مش هتكلم ولا هتعب نفسي، إحنا نتصل لأمك تيجي ونشوف معاها الموضوع ده وهي تحكم تمام. نور: أحسن برضه وتشوف طريقة النقاش معاك. غسان بص ليها بغضب شديد ولسه هيتكلم حبيبة عيطت بشدة. نور راحت عليها وشالتها: بس يا روحي خلاص بطلي عياط هش هش. وبصت لغسان وغمضت عينيها وقالت في نفسها: الحمد لله إنها عيطت ولا كان زمان هولاكو أكلني دلوقتي.

غسان بغيظ: ألو إزيك يا أمي أخبارك إيه وأخبار صحتك؟ سكينة: بخير يا نن عيني، أنت عامل إيه ونور عاملة إيه؟ أوعي تكون مزعلاك. غسان بص ليها بغيظ: مزعلاني هي تعرف النكد ده منين بس يا أمي، أنا بس عايز أعرفك إنها ولدت النهارده وقبل ما تتكلمي والله الموضوع ملخبط، إحنا في الفيلا جنبك هنا، هاجي أخدك علشان عايزك في موضوع. سكينة بفرحة: طيب تعالي يا ابني تعالي خدني بسرعة. غسان: تأمري يا أمي. وقفل. نور بتركيز: ماما قالت إيه؟

غسان أخذ المفاتيح من على السفرة: رايح أجيبها وراجع لو حصل حاجة رني عليا. وطلع من غير ما يسمع ليها كلمة. نور بغيظ وهي بترضع حبيبة: طبعًا الرائد غسان الألفي اللي مستحيل يسمع رأي حد، هو بس اللي شايف الدنيا صح وإحنا غلط أوووف. ******************* عند نسمة: كانت واقفة في المطبخ بتعمل شاي وبتكلم نورهان. نورهان بفرحة: يعني نور كويسة والطفلة كويسة أهم حاجة؟ نسمة: الاتنين كويسين الحمد لله، وفرحة يا نورهان عاملة إيه؟

الحرارة نزلت؟ نورهان بحزن: لسه أنا قاعدة في العربية لما عمر يجيب العلاج من الصيدلية أهو، الدكتورة بتقول سبب إن أنا صَيّفت ليها بدري والجو مش كويس أخدت برد. نسمة بعتاب: وده يصح يا نورهان؟ ده أسر وعاصي الكبار لسه ما صيفوش، الجو وحش يوم كويس و10 لاء يا نورهان وفرحة صغيرة لازم تاخدي بالك. نورهان: يلا الحمد لله، أنا هروح لنور بليل أشوفها ما دام هي جنبي هنا. نسمة: خلاص ماشي يا حبيبتي وخلي بالك على نفسك.

نورهان: وأنتِ كمان يا نسوم وحافظي على الحمل أنتِ لسه في الأول. نسمة بقرف: بالله قرفانة من كل حاجة في الدنيا يا نورهان. نورهان: هو شهور الوحم كده. نسمة: يلا الحمد لله، المهم أنا هطلع الشاي وأكلمك تاني. وقفلت. قاسم جه من وراها وباس خدها: القلب كانت بتكلم مين كده؟ نسمة بحب: كنت بكلم نورهان. قاسم بخبث: طب إيه مش ناويين نطلع بيتنا ولا إيه؟

نسمة بقرف: قاسم أنت عارف إن في شهور والوحم وأنا قرفانة من كل حاجة ومش عارفة السبب فا سيبني شوية ممكن؟ قاسم بهدوء: نسوم بس إيه فكرة إنك قرفانة مني دي يا حبيبتي أنا جوزك حبيبك، تقرفي مني أنا؟ نسمة: مش منك أنت، أنا قرفانة من كل حاجة عمومًا ده حاجة مش عارفة إيه سببها والله. قاسم: طيب اهدي وخدي وقتك المهم عندي صحتك يا روحي. وأخذ الشاي وطلع برا. نسمة حست

بقرف رهيب من ناحية قاسم: استغفر الله العظيم إيه ده يا ربي إيه القرف اللي أنا حاسة بيه ده. ومسكت بطنها: خير إن شاء الله. وطلعت تشاركهم الشاي. منير: آخر صفقة كسبناها دي عملت إعلان كبير أوي للشركة وأغلبية رجال الأعمال والشركات اللي برا بدأت تعمل معانا علاقات. قاسم وهو بيشرب الشاي: أيوه اسمنا أول صفحة في الجرايد الأسبوع ده، عايزين نعمل اجتماع لكل العملاء مع الشركة الأوروبية بس في وجود غسان.

منير: ما هو أنا مستني لما غسان يرجع بس وندي معاد لناس. قاسم: نسوم العيال فين؟ نسمة: العيال بيلعبوا في الشارع بالعجل. نفين: دول لو غسان هنا مش بيلمحوا الشارع. قاسم بضحك: ده غسان مربي ليهم الرعب بالله. وقعدوا في جو ضحك ومرح. ************** في منزل انتصار: سعاد: بالله يا انتصار ومليكي حلفان عليا ياسمين بنت نوال أختي اتجوزت وهما 5 شهور وكانت حامل في الشهر الأول.

انتصار وهي بتشرب الشاي: أيوه أيوه بس في بنات بتتأخر في الحمل برضه يعني عندك البت نسمة مرات قاسم ابن أخويا قعدت 4 سنين لما حملت ولسه في الشهر التاني، بتحصل يعني. سعاد: هش هش اسم الله يا اختي بعيد عننا سلوى تشد حيلها كده علشان ربنا يجبر خاطرها بحتة عيل كده. سلوى بهمس لأحمد: أحمد أنا حفظت الأموال ده كل ما أجي أسمعه لما بقيت عارفة أنا قاعدين بنتكلم في إيه. أحمد بضحك: هش اسكتي إحنا هنسمع واللي إحنا عايزينه نعمله.

سعاد: شوفي يا انتصار يا اختي حلوين إزاي جنب بعض، الله يبعد عنهم عين الحسادين يارب. انتصار: يارب يا اختي يارب. سعاد: سلوى إن تفرحني بحتة العيل اللي نفسي فيه قبل ما أموت دي بالدنيا وما فيها. سلوى بخجل: بإذن الله يا ماما بس يعني إحنا مأجلين الموضوع ده شوية كده. سعاد بصريخ: مأجلين إيه وليه ومين اللي سمح بكده؟ سلوى بصت لأحمد: يعني يا ماما إحنا مش عايزين أطفال دلوقتي ده قصدي.

سعاد: أنتوا مش عايزين أنا عايزة أطفال أنا اللي هربيهم هاتوا أنتوا بس. سلوى: لا بقى ده. أحمد بمقاطعة: بس يا جماعة اهدوا، في إيه يا سلوى؟ وبعدين يا ماما الموضوع ده خاص بيني وبينها ولما ربنا يأمر إحنا مش هنقول لاء. سلوى قامت بغضب على أوضتها. أحمد بغضب من تصرفاتها غمض عينه وقال في نفسه: اهدي اهدي لكل حاجة وقتها وأنتِ عند أهلها دلوقتي. وقعد يشرب الشاي معاهم ويتكلموا ويضحكوا وبعد وقت راح أحمد أوضة سلوى يشوفها.

سلوى بدموع: تعبت ومش قادرة أكمل، أنا عشق غسان بيجري في دمي مش قادرة أنساه مش قادرة، عارفة إن دي خيانة لأحمد بس مش بإيدي يا رب مش بإيدي. أحمد: سلوى. يا ترى أحمد سمع سلوى ولا لاء؟ ويا ترى سلوى هتنسى غسان ولا لاء؟