رواية حين تقع في الحب الجزء الثالث الفصل الثلاثون 30 - بقلم ندى علي

بعد أذان المغرب، محمد صحي على رزع على الباب بقوة أفزع يمنى. يمنى بفزع: محمد في إيه؟ الباب هيتكسر، قوم شوف في إيه؟ محمدددد أنت ساكت لييه؟ قووم. بتدور على إيه أنت؟ محمد وهو بيلف حوالين نفسه: اسكتي اسكتي، بدور على الفون. أهو يخراابي الساعة سبعة المغرب. يمنى عدلت الغطاء عليها كويس: طيب روح شوف مين اللي بيخبط بسرعة. محمد لبس بنطلونه وتيشرت من الدولاب وطلع، ويمنى قامت لبست روب طويل وقفلته وطلعت وراه.

الجدة بغضب: ساعة بتفتح؟ بتعمل إيه كل دا؟ الساعة بقت سبعة المغرب. محمد بصدمة: بعمل إيه؟ إمبارح كانت دخلتي يا جدتي لو فاكرة. الجدة دخلت بغضب قعدت على الصالون. يمنى طلعت سلمت عليها وباست إيدها. يمنى بابتسامة: نورتيني يا جدتي، تشربي إيه؟ الجدة بصت لمحمد: خير يا ابني، طمني على مراتك. محمد بفهم وابتسامة: الحمد لله كويسة يا جدتي. الجدة: كله تمام يعني؟ محمد هز راسه ومسك إيد يمنى وباسها: ربنا يبارك ليا فيها يا رب.

يمنى شدت إيدها بكسوف. الجدة: ما دام أنتو بخير يبقى أسيبكوا براحتكم، وبكرة خلي مراتك تاخد على العيلة وتعرفنا وتشوفنا. ونزلت على البيت. محمد قرب من يمنى وحط إيده على وسطها وباس شفايفها بابتسامة وبهمس: وحشتيني. يمنى بكسوف: أنا فعلاً مش قادرة أتحرك وقومت غصب عني علشان منظري قدامها، علشان خاطري سيبني أرتاح شوية. محمد بخبث وقربها أكثر: كل النوم دا ومرتحتيش؟

لا لا بتفرهدي بسرعة يا يويو، مينفعش تكوني مرات راجل مجهوده عالي أبدًا. يمنى بكسوف: مجهودي مش واطي بس أنا تعبانة شوية وأنت عارف إنك السبب. محمد وهو بيتكلم من رقبتها بخبث: السبب في إيه بقى؟ يمنى بتوتر: مش في حاجة. محمد قرب من شفايفها وباسها برقة مبالغ فيها وفونه رن. يمنى بعدت: الفون بتاعك بيرن، شوف ليكون حاجة مهمة. محمد: هش سيبك منه، مش شرط نرد دلوقتي. يمنى بابتسامة: يا محمد رد يلا ليكون حد من أصحابك هيقولوا إيه؟

محمد بعد ومسك الفون لقى غسان بيتصل رد عليه. غسان بضحك: لا لا، متقولش إنك لسه على وضعك يلا! دا أنا اتجوزت هو يوم اللي قعده في الشقة والصباحية بالليل كنت بفطر تحت. محمد بغيظ: أنت متصل تشمت فيا؟ أنا حر يا عم. غسان بضحك: خايف على منظرك يا ابني والله، المهم إيه النظام؟ نقول مبروك؟ محمد بثقة: عنك شك في كدا. غسان بضحك: بصراحة كان عندي شك من ربع ساعة. محمد: اطمن يا خفيف أنا نازل أهو، أنتو فين؟ غسان: على القهوة تحت. وقفل.

قاسم: إيه النظام؟ غسان بضحك: اطمن يا ابني، إحنا رجالة يلا. عمر: طب إيه مش هنطلع على القاهرة نسهر شوية؟ غسان: نطلع وماله، اطلعوا البسوا ومحمد نازل وننزل كلنا نسهر شوية. قاسم وعمر طلعوا على شققهم وغسان طلع على شقته. في شقة غسان: نور كانت بترتب الهدوم في الدولاب بتاع غسان. غسان دخل وقفل الباب ودخل على أوضة النوم. غسان: نوور. نور طلعت رأسها من الدولاب: أنا هنا يا حبيبي تعالى. غسان

راح عندها وحضنها من ضهرها: ياااه على القمر بتاعي اللي مش باين من الدولاب دا، ورجع بضهره شوية، على فكرة شعرك طول أوي ما شاء الله. نور بثقة: هو على طول طويل وأنا صغيرة كانت العيال في المدرسة بيقولولي يا روبانزل. غسان: اممم وأنا بقول عيالي شعرهم حلو ليه؟ أنا يا ريت شركة الإنتاج مضمونة. نور باستغراب: مين شركة الإنتاج؟ غسان باس خدها: أنتِ، أقولك ليه؟

واشتالها وقعد على السرير وقعدها على رجله، أنتِ الأم وموزة وقمورة كدا هما طالعين ليكي، إذن أنتِ الشركة وهما الإنتاج. نور ضحكت أوي: بص سيبك من الشركة ومن الإنتاج ومن الحاجات دي، وحطت إيدها على رقابته بدلع، أنت وحشتني أوي. غسان بخبث: رانتي وحشاني وأنتِ معايا. نور قربت من رقابته وباسته برقة. غسان: بس أنا خارج يا حبيبي، لما أرجع نسهر سوا للصبح. نور بغضب قامت من على رجل غسان: خارج فين بقى إن شاء الله؟

غسان برفع حاجب: مع أصحابي، إشمعنى؟ نور بصوت عالي: والله يعني أنت خارج وسايبني؟ غسان بتحذير: هو صوتك عالي ولا أنا بيتهيأ لي؟ علشان لو عالي أخرسك خالص. نور بغضب: يعني بقولك وحشتني وأنت عايز تخرج مع أصحاب وتسيبني؟ تمام أخرج. وجت تطلع من الأوضة، غسان مسك إيدها. غسان: خدي هنا. هو أنا خرجت أمتى الشهر دا معاهم؟

أنا مش باجي من الشغل نفضل قاعدين سوا وأحايل فيكي يا بنتي يا حبيبتي تقولي الولاد صاحيين، الولاد عايزين، الولاد وأم الولاد. ولما أجي أخرج مع أصحابي تعملي كدا؟ مش هيحصل. نور بغيظ: وأنا برضه معرفش أدخل أوضة وأقفل على نفسي أنا وجوزي وابني صاحي، دي مستحيل أعملها. غسان قعد على السرير بنفاذ صبر: إحنا سيبنا الموضوع الأساسي ودخلنا في موضوع تاني خالص، دلوقتي أنتِ عايزة مني إيه؟

نور: ولا حاجة، أخرج مع أصحابك ولا هتكلم ولا هقول حاجة. غسان بص ليها شوية: أصل فكرة إني هتصل بيهم وأقولهم إني أنا مش طالع يا شباب علشان مراتي زعلانة دي مش هتحصل. نور بزعل: خلاص ماشي، أخرج وتعالى الساعة اتنين بالليل والمفروض أكون صاحية علشان أطمن إنك وصلت بخير ولو نمت هنام وأنا قلقانة على حضرتك علشان لسه مرجعتش.

غسان وهو بيقلع التيشرت ولبس قميص أسود وجهز نفسه تحت نظرات نور الغاضبة وشال المحفظة وطلع منها ٥٠٠ جنيه وراح عند نور. غسان بغضب: أمسكي خليهم معاكي علشان لو احتجتي حاجة، وخلي طريقة الكلام أحسن من كدا علشان خلقي ضيق. نور بغيظ: مالها طريقة كلامي؟ فيها إيه غلط؟ غسان بصوت عالي: كلها غلط، وعدي الساعة دي على خير وقصري في الكلام بقى. وجيه يمشي. نور: أنا عايزة أروح لماما لقصد زيارة ليها. غسان

رزع الباب وبص ليها بغضب: يعني غضبانة؟ تمام يا روحي اغضبي واكسري راسك في الحيط بس اغضبي في بيتك وفي حضن جوزك، مش تفرجي علينا الناس. نور بدموع: أغضب في حضن جوزي فين بقى؟ ما هو سايبني وماشي أهو، أروح فين أنا؟ غسان بغضب: يعني أنا هسيبك يوم هتعملي دا كله؟ تمام يا حبيبتي وفتح دراعاته، أنا موجود أهو وحضني موجود، تعالي يلا. نور بدموع: لا مش جاية ليك ولا عمري هتكلم معاك تاني.

غسان شدها لحضنه وباس راسها بحنان وهي اتشبثت فيه بقوة وعياط. غسان بحب: خلاص اهدي متعيطيش، اسكتي يا حبيبتي أنا آسف يا ستي حقك عليا. نور بعياط: أنت بتعمل كدا علشان عارف إني بحبك ومش هعرف أبعد عنك ثانية، أنت بتستغل الحتة دي. غسان بضحك: يعني أنا بستغلك يا عمري؟ ما أنتِ زي القمر وتستحقي الاستغلال ولا أنا غلطان؟ نور مسحت دموعها: لا أنت قليل الأدب بس.

غسان قرب منها بخبث: ومش محترم وحياتك، المهم إيه هتسيبيني أخرج النهاردة مع العيال دي ولا إيه؟ نور: أوعدني إنك مش هتتأخر وأنت جاي تجيب ليا ريدبول وأنت راجع. غسان باس راسها: عنيا ليكي. وسمع الشباب بينادوا عليه من الشارع. غسان بصوت عالي: نااااازل يلاااااا. ونزل ليهم ونور مسكت فونها وقعدت تلعب فيه. في شقة محمد: يمنى بغيظ: يعني تاني يوم جواز ونازل تسهر مع أصحابك؟

محمد وهو بيلبس ساعته: يا روحي أنا لو جيتي عليا مش عاوز أتحرك من حضنك بس دول مش هيسيبوني في حالي وربنا ما يكتب عليكي الأصحاب دول أبدًا. يمنى: طب أقعد مع مين دلوقتي؟ محمد باس خدها: عندك نور مرات غسان أقعدي معاها يا روحي. يمنى بكسوف: يعني عادي أروح أقعد معاها مش عيب؟ محمد باستغراب: لا خالص، فين العيب في كدا؟ دي هتفرح بيكي أوي. يمنى بفرحة: إذن خلاص تمام، هطلع أقعد معاها شوية.

محمد بتحذير: البسي عباية واسعة وطرحة على دماغك وطلع الصالة. يمنى وهي ماشية وراه وحاطة إيدها ورا ضهرها. محمد باستغراب وضحك: ماشية ورايا إيه؟ يمنى رفعت حواجبها ببراءة: عادي عايزة منك حاجة بصراحة. محمد وهو بيلبس الجزمة: عايزة إيه يا حبيبتي قولي. يمنى بكسوف: عايزة فلوس أشتري حاجة حلوة وأتسلى أنا ونور فيها. محمد طلع فلوس من محفظته: بعد كدا قولي على طول يا روحي، فلوسي فلوسك بس أوعي تنزلي تروحي السوبر ماركت لوحدك يا يمنى.

يمنى باستغراب: ليه إشمعنى؟ محمد باس خدها: علشان نخلف يا عمري. وجيه يمشي. يمنى مسكت دراعه باستغراب: استني بس، إشمعنى إيه دخل دا بدا؟ محمد: هنا حاجة اسمها كبس، لازم أي عروسة متنزلش غير بعد ٣٠ يوم من دخلتها. يمنى باستغراب: إشمعنى أنت نزلت بقى؟ أنت كمان عريس. محمد بضحك: هو أنا اللي هحمل؟ أنا عادي. يمنى: طيب أنا هلبس وأروح عند نور وهنخلي عاصي يجيب الحاجة الحلوة.

محمد باس خدها بعشق: يلا باي يا روح محمد، أي حاجة حصلت رني عليا. ونزل على تحت لقى الشباب بيبصوا ليه بنظرة غريبة. محمد بفزع: بسم الله، النظرة دي أنا عرفها كويس أوي. غسان قرب منه وحضنه: مبروك يا صاحبي. وتبادلوا الأحضان والمباركات سوا. قاسم: يلا إحنا نمشي بقى، مش عاوز نسمة تقفش فيا، أنجزوا. عمر: يلا كلنا في عربية واحدة. وركبوا في عربية محمد ومشوا. نسمة شالت بنتها ونزلت عند نور اتقابلت بنورهان.

نسمة بضحك: ضحك عليكي أنتِ كمان وسابك ومشي. نورهان بغيظ: اسكتي بقى دا حارقني. يمنى من وراهم: ضيفوني ليكم، سابني في الصباحية ومشي هو التاني. نورهان ونسمة ضحكوا أوي. نورهان بضحك: عروستنا القمر مش مسيطرة خالص. يمنى: حكم القوي على الضعيف بقى. نور فتحت الباب وهي شايلة حبيبة بتنيمها: بسم الله في إيه التجمع على مين ولا لييه؟ نسمة: جايين زيارة ليكي. نور: والعروسة كمان؟ على كدا الموضوع كبير، ادخلوا تعالوا.

دخلوا البنات وقعدوا مع بعض. أسر: ماما فين عاصي؟ نور: جوه في أوضته، ادخل العب معاه يا روحي. وجيه يمشي حبيبة وفرحة عيطوا عليه. نورهان: خد حبيبة وفرحة معاك يا أسر بس أوعي يقعوا. أسر أخد حبيبة مرة وفرحة مرة. نور: يمنى طمنيني عنك، أخبارك إيه يا روحي وإيه رأيك في الجواز؟ يمنى بكسوف: أنا كويسة الحمد لله. نور بضحك: الكسوف دا مينفعش معانا، خدي علينا أكثر من كدا علشان نعرف نتعامل مع الجدة.

يمنى بضحك: أيوا دي صعبة أوي، جت ليا سلمت عليها مردتش عليا. البنات ضحكوا ونور قامت عملت قهوة وفضلوا يشربوا ويتفرجوا على التليفزيون في جو مرح وضحك.