رواية قبل تنفيذ الاعدام بدقائق الفصل التاسع 9 - بقلم عادل عبد الله

قررت إني أواجهها هي الأول، اتصلت بيها، لكن أول ما سمعت صوتها ضعفت ولساني عجز إنه يتكلم! مكنتش عايزة أشوفها، قولتلها تخلي البنات عندها لأني تعبانة ومش قادرة أروح أخدهم. وصلت البيت وقعدت وقررت إني أواجه علاء أول لما يرجع. لكن برده بمجرد ما دخل البيت كل ما أحاول أتكلم كان لساني بحس إنه عاجز ومش قادرة أتكلم ولا عارفة هقوله إيه! علاء أول لما شافني سألني: "مالك في إيه؟ أنا أول مرة أشوفك بالشكل ده!

مكنتش عارفة أرد ولا أتكلم، الكلام في دماغي لكن كل ما أحاول أنطق لساني يتشل. في الآخر كذبت وقولتله إن في حرامية حاولوا يخطفوني النهاردة بالعربية. انزعج أوي وسألني: "وعملتي إيه؟ قولتله: "الحمد لله ربنا ستر." سألني إذا كنت عملت محضر في قسم الشرطة؟ قولتله: "لأ لأني تعبانة من الصدمة." قالي: "لازم نعمل محضر علشان المجرمين دول يتمسكوا." قولتله: "فعلاً لازم كل مجرم يأخذ جزاؤه."

(وبعد فترة بكاء لأحلام أثناء التسجيل الصوتي لها) كملت كلامها: "أنا عايزة أي حد بيسمعني يقول كان ممكن يعمل إيه لو مكاني. المهم إني مقدرتش أواجهم فقررت إني لازم آخد بناتي و فلوسي وأبعد خالص عن حياتهم القذرة." تاني يوم روحت الشغل وكل اللي يشوفني يسألني مالك. كان واضح عليا أوي إن عندي مشكلة كبيرة. أي حد يسألني مالك كنت بقول إني تعبانة إلا ماجد لما سألني طلبت منه إننا نقعد نتكلم بعد الشغل.

وفعلاً بعد الشغل روحت أنا وماجد وقعدنا في كافيتريا. وأول ما قالي مالك في إيه انهرت من العياط. حاول يهديني لكن فضلت كتير أعيط، كنت عايزة أحكيله لأني كنت حاسة من كلامه أثناء سفرنا إنه إنسان كويس فعلاً. لكن برده لساني عجز إنه ينطق ويحكي اللي حصل. وبعد طول بكاء كان مصمم إنه يعرف في إيه قولتله: "أنت لما كلمتني إنك عاوزني أطلق من جوزي ونتجوز كنت بتتكلم جد؟ رد وقالي:

"أيوه طبعاً، أنتِ متعرفيش أنتِ إيه بالنسبالي، إيه بس اللي حصل احكيلي؟ قولتله: "حصلت مشكلة كبيرة بيني وبين جوزي وخلاص كده لازم نتطلق، بس بناتي هيعيشوا معايا." لكن للأسف برده كنت غلطانة، أول لما ماجد حس بضعفي واحتياجي له أو يمكن لما قولتله إن بناتي هيكونوا معايا كان عاوز يستغل الموقف وعرض عليا إني أعيش معاه في بيته لحد ما أطلق.