رواية كبرياء حب الفصل الحادي عشر 11 - بقلم ندى أحمد

قعدين كلهم قدام العناية، وفجأة الكل عمال يجري على العناية. ميرنا فضلت تعيط وماسكة في مازن، وكله عمال يدعي. بعد عشر دقايق خرج الدكتور. الدكتور: القلب اتوقف، بس الحمد لله قدرنا نرجعه تاني. الكل: الحمد لله. الدكتور: بس ده ميمنعش إنه لسه في خطر. ميرنا: أقدر أشوفه يا دكتور؟ الدكتور: آسف دلوقتي. ميرنا: طب هو هيفضل كده قد إيه؟ الدكتور: لا ده مش هيتحدد دلوقتي خالص. ... في الشركة عند إيهاب. دخلت كاميليا. إيهاب: إيه ده؟

انتي بتعملي إيه هنا؟ كاميليا: اهدى يا هوبا بس. وراحت قعدت على المكتب قدامه. إيهاب: بقولك اطلعي برا. كاميليا: هطلع برا، بس وصل لصاحبك إنه لو مجاليش بكرة الشقة بالليل، ففيديو ليه في أوضة النوم عندي هيوصل لمراته. باي يا هوبا. ومشيت. إيهاب واقف مصدوم، واتصل على مازن. إيهاب: مازن، تعالى لي الشركة دلوقتي حالا. مازن: في إيه يا إيهاب؟ انت عارف إني مش هعرف آجي. إيهاب: في مصيبة هتنزل على دماغك ودماغ اللي خلفوك لو مجتش دلوقتي.

مازن: طيب، جاي. ... في المول عند ليلى وياسمين. ليلى: إيه رأيك في ده يا ياسمين؟ ياسمين: حلو يا قلبي. ليلى: أجيب الأحمر ولا الأسود؟ ياسمين: الأحمر منه حلو أوي. ليلى: أنا برضه بقول كده. ياسمين، انتي مشترتيش أي حاجة خالص؟ ده أنا وإنتي كل واحدة فينا شايلة في إيدها الاتنين، وكل ده ليا. ياسمين: يا حبيبتي، ما أنا لو محتاجة حاجة هجيب. ليلى: ماشي. أنا جعانة، تيجي ناكل؟ ياسمين: ماشي. راحوا قعدوا وكلوا وخرجوا من المطعم.

ياسمين وقفت قدام محل شبابي. ياسمين: معلش يا ليلى، هجيب بس بنطلون وتيشيرت لآدم. ليلى: ماشي يا حبيبتي. جابت ياسمين البنطلون والتيشيرت. وليلى لقتها بتطلع من المحفظة بتاعتها. ليلى: هو مش إيهاب يا بنتي مديكي كريديت كارت تدفعي منها؟ ياسمين: ليه؟ ما أنا معايا فلوس. ليلى: ماشي، براحتك. ... في شركة الشازلي. دخل مازن مكتب إيهاب. مازن: إيه يا ابني؟ في إيه؟

إيهاب بزعيق: في إن بيتك هيتخرب بسبب إنك مش مبطل قرف، حتى بعد ما اتجوزت. ياشيخ خاف، لميرنا تضيع منك. وأحب أقولك بقى، إن ميرنا فعلاً هتضيع منك يا مازن. مازن: في إيه يا إيهاب؟ أنا مش فاهم حاجة. إيهاب: في إن كاميليا جت وبتقول لحضرتك تروحلها بليل الشقة عندها، يا إما الفيديو اللي هي مصوراهولك في أوضة النوم عندها هيتبعت لميرنا. البس بقى يا مازن عشان تعرف آخرت القرف اللي بتعمله. مازن بصدمة: ينهار أسود! الفيديو!

أنا أعمل إيه دلوقتي؟ إيهاب: انت حضرتك كده زي الشاطر هتروحلها بكرة بليل تشوفها عايزة فلوس ولا عايزة إيه، على دماغها ودماغ أهلها، وتاخد منها الفلاشة، ومش بعيد تطلب منك ليلة كمان. مازن بتركيز: إيهاب، عايز على بكرة الصبح أكون عارف كل حاجة عنها من أول ما اتولدت. إيهاب: مش عارف انت بتفكر في إيه، بس ماشي، لما نشوف. ... في المستشفى.

الدكتور: يا جماعة، انتوا مالكوش أي لازمة هنا. لو هو فايق هقول ماشي، لكن هو دايماً نايم ومش بيفوق. حتى مش بتشوفوه. روحوا شوفوا أشغالكم وتعالوا كل يوم في الزيارة. أحمد: أنا شايف كده برضه، أنا مش بنعمله حاجة. ميرنا: أنا مش هسيبه. مازن: تعالي نروح نرتاح ونغير هدومك ونجيبك تاني الصبح. ميرنا: بجد؟ مازن: بجد. ... في الشقة عند ليلى وياسمين. سعاد: ياله يا ولاد، الأكل جاهز.

إيهاب: ريحة أكلك يا ماما بتخلي اللي مش جعان يجوع، أصلاً. سعاد: بالهنا يا حبيبي. إيهاب: مالك يا آدم؟ آدم: مفيش. سعاد: سيبك منه يا إيهاب يا ابني وتعالى كل. ياسمين: يعني متأكد إن مفيش يا آدم؟ أومال ليه مية وحداشر دي؟ آدم: آه، مفيش يا ياسمين، بقى. ياسمين طلعت شنطة من ورا ضهرها. ياسمين: بتهيألي كده المية وحداشر دول هتتفك، صح؟ آدم خد الشنطة منها وفتحها، وفضل يحضنها ويبوسها.

ياسمين: مش عايزة أشوفك زعلان تاني. أنا سمعتك وانت بتتكلم مع ماما امبارح، متطلبش منها هي، تعال اطلب مني أنا. ماشي؟ آدم بفرحة وابتسامة: ماشي، ربنا يخليكي ليا. سعاد: جبتيله اللي هو عايزه برضه يا ياسمين؟ هتفضلي تدلعيه لحد إمتى؟ ياسمين: ده أنا حبيبي. كل ده تحت أنظار إيهاب وليلى. ليلى: اسكت يا هوبا، ده أنا متكسحة خلاص. إيهاب: ليه يا أختي؟

ليلى: نزلين من هنا أنا وياسمين رجعنا الساعة ٦.٣٠، وأنا عمالة أشتري، لما أنا والغلبانة دي مكنش فيه مكان في إيدنا تاني نشيل، بس مراتك غلسة مشترتش أي حاجة، اتكسحت معايا. ياسمين: إيه يعني يا ستي، ادينا اتفسحنا. خلصوا أكل، وإيهاب نادى لليلى الأوضة. إيهاب عايز يتأكد من حاجة. إيهاب: ليلى، هي الكريديت كارت بتاع ياسمين مش شغال ومكسوفة تقول؟ ليلى: هي استخدمته أصلاً عشان نعرف ده؟

حتى وأنا بنشتري هدوم آدم دفعت من فلوسها هي. ولما سألتها قالتلي أسهل. وبعدين ما أنا معايا. إيهاب اتنهد بعمق: طيب يا ليلى. ... في فيلا الشازلي، في جناح مازن وميرنا. ميرنا خدت شاور وخرجت، لقت أكل سايب، وراحت على السرير. مازن: مش هتفضلي من غير أكل كل ده؟ ميرنا: مش عايزة أكل، عايزة أنام. مازن: أنا جايبلك أكل خفيف، كلي وبعد كده نامي. وأدها الأكل، كلت ونامت على السرير. مازن نام جنبها وحضنها.

صحت ميرنا تاني يوم، فضلت سرحانة في ملامح مازن، ومشت إيدها على وشه، لقيت جفنه اتحرك. بعدت إيدها بسرعة. مازن: شيلتي إيدك ليه؟ ميرنا بتوتر: كان فيه حاجة على وشك، كنت بشيلها. وقامت وخدت هدوم من الدولاب ودخلت الحمام. مازن تليفونه بيرن. إيهاب. إيهاب: ده أنا عرفتلك عنها يا لوى سوووودة. مازن: حلو أوي، إيه هي؟ إيهاب: أنا بعتلك كل حاجة عن الحوار ده على الإيميل. مازن: تمام. ... على وليلى في أحد الكافيهات.

على: حبيبتي وحشتيني، عاملة إيه؟ ليلى: الحمد لله يا حبيبي، انت عامل إيه؟ على: أنا كويس، طول ما انتي كويسة يا حبيبتي. ليلى: على مالك، في إيه؟ على: لا يا حبيبتي، مفيش حاجة، تلاقيني مرهق بس. ليلى بعدم تصديق: سلمتك يا حبيبي. ... في الشركة عند إيهاب. إيهاب بيكلم ياسمين. إيهاب: إيه يا حبيبتي، عاملة إيه؟ ياسمين: الحمد لله يا حبيبي، انت عامل إيه؟

إيهاب: أنا الحمد لله يا حبيبتي. ياسمين، هعدي عليكي الساعة 3، تكوني جاهزة، هنروح مشوار. ياسمين: ماشي يا حبيبي. ... في المستشفى. ميرنا: يا دكتور، هو هيفضل كده لحد إمتى؟ الدكتور: منقدرش نحدد دلوقتي يا مدام ميرنا، القلب لسه ضعيف أوي، وهو مننساش إنه وقف مننا برضه، فاحنا ندعي ربنا يقومه بالسلامة. ميرنا: شكراً يا دكتور. مازن: ميرنا، ياله، معاد الزيارة انتهى، ياله عشان أروحك وعشان ترتاحي. ميرنا: ماشي. ... في عربية إيهاب.

ياسمين: إيهاب، إحنا رايحين فين؟ إيهاب: رايحين المول. ياسمين: ليه؟ إيهاب: عشان نشتري اللي ناقصك يا ياسمين. ياسمين: أنا مش ناقصني حاجة. إيهاب: ماشي، أنا عايزة أجيب لمراتي حاجات يا ستي، عندك مانع؟ ياله يا ياسمين انزلي، مفيش نقاش. إيهاب اختار فستان وحش. ياسمين: حلو الفستان ده. ياسمين: لا يا إيهاب، مش حلو. إيهاب: طب هتختاري انتي ولا أختار أنا؟ كل الهدوم وأنتي حرة بقى، يعني بالنسبالي ده حلو. ياسمين: خلااااص.

ونقوا فستان وتيشيرت وبلوزة وبنطلون. ياسمين: كفاية. إيهاب: ياسمين، اخلصي بقى. وفضل ينقي معاها واشتروا هدوم كتير، وهي نقيت معاه هدوم ليه. وجم عند محلات اللانجري، وإيهاب لسه هيدخل. ياسمين: انت رايح فين؟ إيهاب: إيه؟ هنقي. ياسمين: هي كوسة تنقي إيه؟ امشي من هنا يا إيهاب. إيهاب بغمزة: ليه؟ هما مش لازم يعجبوني؟ ياسمين احمرت ودخلت المحل. فضلت ساعة وهو واقف بره، وخرجت بالشنط. ياسمين: ياله. إيهاب: ياله. ...

وصل مازن عند كاميليا، خبط ودخل. لقى كاميليا لابسة قميص نوم بيكشف أكتر من اللي بيغطيه. كاميليا قربت منه وفضلت تمشي إيدها على شعره وهي لازقة فيه: أنا برضه قولت إنك هتيجي. مازن وهو بيزقها بعيد عنه: عايزة إيه يا كاميليا؟ كاميليا: امممم، لسه مش عارف، يا ميزو. ده حتى يبقى عيب في حقك. مازن: تاخدي كام وتجيبي الفيديو؟ كاميليا: مليون وليلتين. مازن: هديكي المليون، ماشي، لاكن الطلب التاني لا، أنا متجوز وبحب مراتي.

كاميليا: مش لو فضلت مراتك بعد ما تشوف الفيديو؟ أنا طلبي واضح. مازن: خلاص، ماشي، موافق.