رواية كبرياء حب الفصل السابع 7 - بقلم ندى أحمد

في الشركه، في مكتب إيهاب. ياسمين: حضرتك كده مضيت على كل الأوراق، حضرتك عايز حاجة تاني؟ إيهاب: ياسمين، تتجوزيني؟ ياسمين بصدمة وفتحت بوقها: ها؟ إيهاب قام من مكانه وراح عندها: ها؟ إيه؟ انت اتشليتي ولا إيه؟ ياسمين مبرقة ومش بترد. إيهاب: انتي يا بت. ياسمين: نعم يا فندم. إيهاب: بقولك تتجوزيني. ياسمين: ده إزاي وليه أصلاً؟ إيهاب: يعني إيه إزاي وليه؟ الناس بتتجوز إزاي وليه؟ عشان مؤدبة ومحترمة ومتربية.

ياسمين: فيه بنات كتير فيها كل اللي قولته ده، ويمكن أكتر مني على فكرة... لكن آسفة، مش أنا البنت اللي مديرها يشوفها غلبانة وعلى قد حالها وهو عايز واحدة يتجوزها تكون متربية، فيتجوزها بقى، ما هي غلبانة يا عيني. آسفة، طلبك مرفوض يا مستر إيهاب. إيهاب بصدمة: ياسمين، إيه اللي بتقوليه ده؟

أنا مجاش في بالي كل اللي بتقولي عليه ده أصلاً. ياسمين، مش هقول إني بحبك عشان مكونش بكذب، بس أنا منجذب ليكي وكنت بكذب ده، واللي خلاني أتأكد إني من خطوبة مازن وميرنا، وانتي على طول في بالي. وعلى قد ما أنا اتضايقت من اللي كاميليا عملته، على قد ما فرحت عشان شوفت عينك الحمراء لما عيطي، وده شجعني إني أطلب منك إننا نتجوز. أنا مجاش في بالي كل اللي قولتي عليه ده. ياسمين سكتت بصدمة. إيهاب: ياسمين، قولتي إيه؟ ياسمين

وشها أحمر من كتر الكسوف: أنا عايزة أروح. إيهاب ضحك جامد: استنى أوصلك طيب. ياسمين: لاااااا، أنا هروح لوحدي. إيهاب رفع حاجب: لا، هوصلك. امشي قدامي. طول الطريق سكتوا، وكسر الصمت. ياسمين: خلاص هنا. إيهاب: ماشي يا قلبي. ياسمين بصدمة: ها؟ إيهاب بضحك: هنقضي كل حياتنا كده؟ طيب الله المعين. وقولي لمامتك إني هاجيلكم بكرة الساعة ٨ عشان أتقدملك، ومتجيش بكرة الشغل. لقى إيهاب تليفونه بيرن. على: ها؟ أختك وافقت ولا أقتلها؟

إيهاب: تصدق نسيت أسألها. على: انت بتهزر صح؟ إيهاب: لا والله ما بهزر. على: إيهاب، انت بتستهبل؟ يعني أنا بقالي أربع أيام مش بروح الكلية، قال عشان تفكر براحتها وتاخد قرار، وانت تقول مقولتلهاش من الأساس؟ إيهاب: خلاص خلاص، روّق. هكلمها النهارده. على: لما نشوف. غور. ************* في مكتب مازن. يتحدث مع مجهول. مازن: عرفتلي اللي قولتلك عليه؟ المجهول: ........ مازن: تمام، حلو الأخبار دي. كمل زي ما انت. المجهول: .........

مازن: متخافش، قولنا فلوسك وكل حاجة اتفقنا عليها، ويمكن أكتر كمان بعد ما كل حاجة تخلص زي ما أنا عايز. هو انت أول مرة تشتغل معايا؟ المجهول: .............. مازن: تمام. ************* في مكتب ميرنا. ميرنا قاعدة بتشتغل، لقت كريم داخل عليها. كريم: ازيك يا ميمي؟ ميرنا بزعيق: إيه يا حيوان أنت؟ هي وكالة من غير بواب؟ مفيش باب تخبط عليه وأقولك ادخل ولا لأ؟ كريم: يعني كنتي هتقولي لأ مثلاً؟

ميرنا: آه، كنت هقول لأ. واتفضل اطلع برا، بدل ما أندهلك الأمن. كريم: كده برضو؟ كوكي يزعل. ميرنا: عايز إيه يا كريم؟ كريم: عايز نرجع أيام زمان. ميرنا: احترم نفسك يا حيوان أنت، أنا متجوزة دلوقتي. كريم: عادي، تتطلقي. على دخول مازن اللي كان سمع كل الحوار. مازن مسكه وفضل يضرب فيه. مازن: اطلع برا ومش أشوف وشك هنا تاني، والعقد اللي بينا ملغي، وهدفعلك التعويضات على الجزمة. ولو لمحتك جمب مراتي، ساعتها هفرمك.

ميرنا: مازن، واللهي هو اللي دخل وفضل... مازن: هش، هش، هش. اهدى، اهدى. وخدها في حضنه. ... يالا عشان الناس بتاعت تصميم الجناح عايزين ياخدوا رأي العروسة. ********************* بالليل، عند إيهاب وليلى. إيهاب: لولو حبيبتي، تعالي عايزك. ليلى: إيه يا هوبا؟ خير؟ إيهاب: كبرتي يا بطة، وبقى يجيلك عرسان. ليلى: عرسان؟

إيهاب: إن تصدقي، عريس ابن مجنونة، بس هو كويس ومحترم وابن ناس، وأنا عارف إنه هيخاف ربنا فيكي. على اتقدملك وعايز يجي يخطبك. ها، انتي إيه رأيك؟ ليلى وشها أحمر وبصت في الأرض. إيهاب بخبث: خلاص، هقوله لأ، بدل انتي مش موافقة. ليلى بسرعة وتلقائية: لأ، موافقة. إيهاب ضحك على أخته: كبرتي وهتبقي عروسة يا بطة انتي. ... عندي ليكي خبر حلو. ليلى: إيه؟ إيهاب: أنا هخطب ياسمين. ليلى بفرحة: بجد؟ والنبي؟

إيهاب: آه واللهي، حتى هنروح بكرة نتقدم الساعة ٨. ليلى: ألف مبروك يا حبيبي، ربنا يتمملك على خير يارب. ********************* في فيلة الشازلي. قاعدين كلهم في الجنينة يضحكوا ويهزروا. دخل إيهاب. إيهاب: السلام عليكم. الكل: وعليكم السلام يا ابني، ليك وحشة واللهي. بعد السلامات. إيهاب: عم أحمد، أنا طالب منك طلب، بعد إذن حضرتك. أحمد: اتفضل يا ابني. إيهاب: أنا بكرة رايح أتقدم لياسمين، السكرتيرة بتاعتي وصاحبة ميرنا.

الكل: ألف مبروك يا ابني، ربنا يتمملك على خير. إيهاب: الله يبارك فيكم. ... أنا بس كنت عايز حضرتك تيجي معايا، كبيري يعني. أحمد: طبعاً يا ابني، من عيني. على: ولا انت عملت إيه في موضوعي أنا وأختك؟ إيهاب: لسه مسألتهاش يا علول. على: طب بص بقى كده، أبويا مش ماشي معاك خطوة غير لما تشوفلي موضوعي أنا وأختك. ماشي؟ إيهاب ببرود: انت مستعجل ليه بس؟ لما يبقى ليا مزاج، هبقى أقولها.

على: ولا أنا استحملتك كتير يا ض. وقام عشان يضربه. بقى أنا أتقدم من 3 أيام وانت مش راضي تقولها حتى؟ وانت تعرفها؟ النهارده آخر النهار رايح تقرا فاتحة، بكرة بليل؟ يرضا مين ده يا ناس؟ كله عمال يضحك. إيهاب بضحك: بس خلاص، صعبت عليا واللهي. ... سألتها النهارده وقالت ماشي. زي بعضه. على قام وقف وزغرط وفضل يغني: هتجوز، هتجوز. والكل عمال يضحك عليه.

إيهاب: عمي، بعد إذن حضرتك. وانت بتتفق بكرة مع ماما ياسمين، خليها خطوبة وكتب كتاب الاتنين مع بعض، والفرح بعد شهرين. على: شوفت اللي انت قلته ده؟ إيهاب باستغراب: ماله؟ على: عليا وأختك برضه؟ ويبقى خطوبة وكتب كتاب لينا احنا الاتنين، وجواز لينا احنا الاتنين. حلو كده يا معلم؟ إيهاب: بس... الكل: إيه تاني؟ إيهاب: ماشي. منى راحت فضلت تزغرط. ********************* في الفندق عند أمجد. أمجد: حسام، عايز بكرة أروح لشركة الشازلي.

حسام: حاضر. أمجد: جبتي اللي قولتلك عليه؟ حسام: هي برا مصر دلوقتي، وهترجع كمان أسبوع. بس أنا عملت حركة كده تسخين. أمجد: تمام. ... عملت إيه في الشحنة؟ حسام: كل حاجة تمام، وهنسلمها كمان 3 شهور. ********************* تاني يوم في الشركة. في مكتب مازن. مازن وميرنا بيشتغلوا على صفقة واحدة، وقاعدين على الكنبة. ميرنا عمالة تشرح لمازن حاجة هي شايفاها، وهي لما شعرها بـ قلم. مازن راح شد القلم من شعرها.

ميرنا: يا مازن، حرام عليك. الجو حر وأنا قعدت كتير على ما عرفت ألم كل شعري. مازن: كده أحلى. ميرنا: هات بقى، بطل رخامة. وبتحاول تاخد منه القلم، فوقعت عليه. فضلوا باصين في عيون بعض أوي، وراح مازن طبع بوسة خفيفة أوي على شفايفها. اترعشت وقامت بسرعة، وشها أحمررر. ولسه هتخرج، مازن مسك إيدها. مازن: ميرنا، على فكرة انتي مراتي. ميرنا: إحنا متفقين يا مازن. مازن لسه هيتكلم، لقى الباب بيخبط، ودخلت راندا السكرتيرة.

راندا: مستر مازن، فيه واحدة اسمها أسيل عايزة حضرتك. مازن: خليها تتفضل. أسيل دخلت وهي ترتدي فستان يقال عنه قميص نوم. أول ما دخلت مشفتش ميرنا. أسيل: ميزو، كده قلقتني عليك. بقالي شهر مشفتكش، ينفع كده يا وحش؟ وراحت حضناه وبسته من شفايفه. مازن عمال يبعدها عنه مش عارف. كل ده تحت أنظار ميرنا اللي بتشاهد بصدمة. ميرنا خرجت وراحت على مكتبها. مازن: انتي مين؟ حد حذف عليكي حاجة يا بت انتي؟

قضينا يوم مع بعض وخلاص، مش عايزة أشوف خلقتك تاني. اطلعي برا. ميرنا في مكتبها سرحت، وجه في بالها نفس المشهد لما شافت كريم دخل مازن. مازن: ميرنا، واللهي البت دي أنا مش هقولك مكنتش أعرفها، أنا أعرفها. بس... قاطعته ميرنا.

ميرنا: مازن، أنا مش عايزة أعرف. دي حياتك وانت حر فيها. تعرف بنات متعرفش بنات، انت حر. بس بعد إذنك يعني، الناس كلها عارفة إن أنا مراتك، فـ معلش، في السنة اللي هنتجوزها دي، حافظ على شكلي زي ما أنا هحافظ على شكلك. مازن مصدوم من اللي قالته: حاضر يا ميرنا. دخل أمجد المكتب عليهم. أمجد: العرسان هنا. ... أنا آسف جداً، معرفتش أجي الخطوبة عشان كنت مسافر. مازن: لا، ولا يهمك يا أستاذ أمجد. ... كنت جاي في حاجة؟

أمجد: جيت أشوف الشغل ماشي إزاي، مش أنا شريك فيها ولا إيه؟ مازن: آه طبعاً، تيجي وتنور. بس الصفقة بتاعتك مع أستاذ إيهاب وأستاذ معاذ؟ أمجد: إيه ده؟ هو انت والأستاذة ميرنا مش ماسكينها ليه؟ مازن قرب على ميرنا وحضنها. مازن: أصل أنا وميرنا، ده آخر أسبوع لينا في الشركة. أمجد: يعني إيه؟ مازن بخبث: أصل أنا وميرنا فرحنا آخر الأسبوع اللي جاي، فهنخلص في الأسبوع ده شغلنا عشان منعرفش بقى هنرجع إمتى من شهر العسل.

أمجد بصدمة: آه، ألف مبروك. مازن: الله يبارك فيك. ... معلش بقى، إحنا لازم نمشي عشان عندنا معاد مع مصمم الديكور. يالا يا روحي. وسابوه ومشوا. في العربية. مازن: هو انتي هتفضلي كل ما تشوفي زفت ده ترتعشي، وشك يبقى أصفر كده؟ ميرنا: معرفش. أنا بحس إن مفيش نفس داخلي. مازن خدها في حضنه وفضل يطبطب عليها، وفي نفسه: أنا هعوضك يا ميرنا على كل لحظة خوف مريتي بيها. *********************

عدى يومين، ومكنش فيهم أي حاجة تذكر، غير إن إيهاب اتقدم لياسمين، وعمر اتقدم لليلى، وكل واحد نزل يجيب الفستان مع حبيبته. إيهاب: حلو ده يا ياسمين. ياسمين: لا، مش بحب اللون ده، وكمان ده عادي خالص، مفيهوش أي حاجة. إيهاب: طب يا حبيبتي، نقي اللي يعجبك. ياسمين: إيهاب، حلو ده. إيهاب: لا يا ياسمين، مش حلو. إيه ده إن شاء الله؟ ده لا ساتر فوق ولا ساتر تحت. إيه ده؟ ده قميص نوم ده، مش فستان. ياسمين بزعل: ده حلو أوي يا إيهاب.

إيهاب: مش هيتلبس قدام حد ده يا ياسمين. ... نقي حاجة تانية. ياسمين: طب ده. إيهاب: لا، فتحت الظهر كبيرة. ياسمين: يا إيهاب بقى، أنت مفيش حاجة راضي عليها. إيهاب بزعيق: متفقي أنتِ حاجة عدلة. ياسمين راحت عيطت. إيهاب: طب خلاص، أنا آسف. حقك عليا. ... انتي عايزة ده يعني؟ ياسمين هزت راسها بمعنى آه. قالها: طيب، ماشي. ياسمين مبين دموعها: بجد، هناخده؟ إيهاب مسح دموعها: آه، بجد. ومسك إيدها وباسها،

وقالها: متعيطيش تاني طول ما أنا جنبك. عند ليلى وعلي. علي: اختاري، اخلصي. رجلي ورمت. أبوس إيدك، ده المحل العشرين اللي ندخله. ليلى: الله، مش بنقي حاجة حلوة؟ وأنا كل ما أنقي حاجة تقول لي عليها لأ. أعملك إيه؟ علي: أنا غلطان، معلش. أنا اللي بنقي فساتين متتلبسش. معلش. ليلى: طب أنا عايزة ده. علي: ليلى، بصي، فتحة الرجل لحد فين؟ ليلى: عشان خاطري، عشان خاطري. علي: لا. ليلى: طب خلاص، نقي أنت بقى، وسبته ومشيت،

وقالت له: أنا عايزة أروح. علي: هو يا الفستان ده، يا أنقي أنا وتروحي. ليلى: أنت مش عاجبك أي حاجة. كل حاجة عمال تقول لي عليها لأ، لأ، لأ، لأ. خلاص، نقي أنت بقى، هتوجع دماغي ليه؟ روحني. علي: طيب، استنى. بما إن أنا اللي هنقي، فـ فستان جوه عجبني، هجيبه وبعد كده أروحك. وراح جاب الفستان اللي هي اختارته. ... خد انتي اللي قولتي، أنا اللي هنقي. يالا عشان أروحك.

ليلى طول الطريق عمالة تعض في إيدها وتأكل في ضوافرها. وصلوا، نزلت من العربية وزرزعت الباب. على نده عليها. ليلى: عايز إيه؟ علي: الفستان، خدي. ليلى خدت الفستان، ولسه هتمشي. علي: افتحيه كده وشوفيه. ليلى: ليه؟ مش أنت اللي منقي؟ أنا رأيي يهم في إيه؟ علي ببرود: معلش، برضه افتحي. ليلى فتحته، لقت هو الفستان اللي هي اختارته. ضحكت وحضنته، ولما استوعبت اللي عملته، بعدت بسرعة، وشها أحمر أوي. علي بضحك: احمرتي ليه؟

أنا بكرة هبقى جوزك. ليلى خدت الفستان وطلعت تجري. عند مازن وميرنا. مازن: ميرنا، يالا عشان نشتري الفستان اللي هتلبسيه في الخطوبة. ميرنا: متشغلش نفسك يا مازن، أنا هروح. مازن: هتروحي مع مين؟ و ليلى وياسمين كل واحدة فيهم مع جوزها. ميرنا: لا، مش هروح في حتة. أنا هشوف أي فستان من على النت. مازن: طب ما ننزل نشتري مع بعض يا ميرنا. أنا جوزك على فكرة، واللهي.

ميرنا: مازن، مش كل شوية هقعد أقول نفس الكلام. انت عارف إن جوزنا مش جواز طبيعي. فـ متتمثلش الدور. مازن: ميرنا، أنا ليه كل ما أقرب منك، تبعديني عنك أكتر؟ ميرنا، انتي قولتي هنكون صحاب، صح؟ ميرنا: آه. مازن: اتفضلي بقى عشان ننزل نشتري الفستان. ميرنا: ماشي. ميرنا ومازن في المول. ميرنا: مازن، حبيبي، أنا عايزة الفستان ده. مازن: آه، أنا قلت كلمة "حبيبي" اللي بتتقال من ميرنا دي، يبقى وراها مصيبة. ميرنا: لا.

ميرنا: عشان خاطري، الفستان حلو أوي، وأنا بحب الموديل واللون ده. عشان خاطري. مازن: أنا ألبس مراتي كده. ميرنا: المرة دي بس، واللهي. الفستان ده لو ملبستهوش، هموت. ده حلو أوي واللهي. وهسمع كلامك. أنا عايزاه يا مازن. مازن: أشوفه عليكي الأول. ميرنا: ماشي. دخلت ميرنا لبسته وطلعت. مازن: ادخلي غيري، بدل ما أغير ملامح وشك. ميرنا: عشان خاطري، ده عجبني أوي. مازن: خلاص يا ميرنا، ماشي. بس بشرط. ميرنا: إيه؟ مازن شاور على خده.

ميرنا: عايز قلم من عيني. مازن فضل يضحك، وراحوا اتغدوا وخرجوا وقعدوا يتكلموا مع بعض. ********************* يوم خطوبة إيهاب وياسمين، وعلي وليلى. ارتدت ليلى فستان (أحمر طويل، حملات رفيعة، ستان، وبه فتحة من فوق الركبة بحبها للآخر من الرجل اليمين) ارتدت ياسمين فستان (بينك طويل، حملات رفيعة، وبه فتحة سبعة من الظهر كبيرة) ارتدت ميرنا فستان (بيبي بلو تول، كاب فوق الركبة، وذيل طويل) ارتدى إيهاب (بدلة رصاصي، و ببيون أحمر)

ارتدى علي (بدلة كحلي، و ببيون بينك) ارتدى مازن (بدلة سودة) العرسان بيرقصوا سلو، وميرنا واقفة، لقت حد بيحضنها من ضهرها، وحط دقنه على كتفها. ميرنا اتخضت بشهقة جامد. مازن: إيه؟ بس بس، اهدى. تفتكري يعني مين يقدر يعمل الحركة دي؟ وباسها من رقبتها. ميرنا: مازن، احترم نفسك وابعد. مازن: أنا مبسوط كده. ميرنا بعصبية: يا ربي. الخطوبة خلصت، وقرروا يروحوا يحتفلوا لوحدهم. في أحد الكافيهات الراقي.

إسلام، وعلي، وإيهاب، ومازن، وإيات، وليلى، وياسمين، وميرنا قاعدين بيهزروا ويضحكوا. فجأة، جه صوت أنثوي. "إيه ده، مازن؟ ازيك؟ إيهاب وعلي بصوا لبعض وبرقوا جامد. مازن بصدمة وضم ميرنا ليه: سمر؟ ازيك؟ سمر: أنا الحمد لله. انت عامل إيه؟ وحشني أوي. أنا كنت مسافرة، بس دلوقتي خلاص رجعت مصر من يومين، وشوفتك أهو. مازن: حمد الله على السلامة. سمر: هي دي بقى اللي بتملي بيها الفراغ اللي أنا سبته؟

ميرنا الدم ضرب في عروقها، وكانت هتقوم تقتلها. مازن: ميرنا، مراتي. سمر: أووه، بجد؟ ميرنا: آه، شوفتي بقى خسارة، مش كده؟ سمر: سوري، مكنتش أعرف إنك مراته. أصل أنا عارفة إن هو كل يوم مع بنت شكل، فـ افتكرتك واحدة من اللي بيقعد معاهم. ميرنا: لا يا حبيبتي، مراته، وأديكي عرفتي أهو. بقى يالا كده، ورينا عرض قفاكي، أصل إحنا عيلة في بعض. سمر: عن إذنكم. ميرنا: أنا عايزة أروح.

وقامت وراحت ناحية العربية. طول الطريق مازن عمال يتكلم، وميرنا ساكتة. فجأة. ميرنا بزعيق: بسسسسسسس! مش عايزة أسمع حاجة. وابتدت تترعش وتعيط. مازن جه يهديها، لقى تريلا جاية عليهم. ميرنا: مازن، حاااااااااااااااااااااسب.