رواية قدري انت الفصل الثالث 3 - بقلم اية الشامي

نظر إليهم دكتور أحمد باستغراب: "انتو تعرفو بعض." علي بغضب: "دكتور أحمد بالله عليك متقولش إن دي الطالبة اللي هتساعدني اللي قلت عليها؟ ليه ملقتش غير دي؟ ودي أشكال أتعامل معاها." قاطعته سلمى بغضب وعصبية: "أنا مسمحلكش، على فكرة. لا تهيني ولا تقلل من كرامتي، وأنا أصلاً اللي مش عايزة أشتغل معاك علشان ميشرفنيش أشتغل مع واحد سطحي ومغرور زيك. إنت إيه مفكر نفسك؟ تحكم على أي حد كدا وخلاص؟ دا مين اللي اداك الحق ده؟

ووجهت نظرها لدكتور أحمد: "أنا آسفة يا دكتور وبستأذن عن إذنك." وتركتهم وخرجت. دكتور أحمد يجلس على كرسيه ويؤشر لعلي لكي يجلس هو الآخر ويقول: "بهدوء كدا عايز أعرف اللي حصل دا وإنت تعرفها منين." علي بحدة ويبدأ في إخباره بما حدث وكيف يعرفها. يرد عليه دكتور أحمد باستنكار: "مستحيل سلمى تعمل كدا، أكيد في سوء تفاهم. أنا أعرفها كويس دي تلميذة شاطرة جداً ونجيبة وعلى خلق، مستحيل تعمل كدا." علي:

"تعمل بقى ولا متعملش مش فارق معايا، اللي فارق معايا دلوقتي إنك تشوفلي حد تاني يساعدني علشان أحقق حلم أبويا اللي يرحمه إني أبقى معيد في الكلية ودكتور زي حضرتك. إنت عارف كان بيعزك إزاي." دكتور أحمد: "الله يرحمه وأنا والله بعزه، دا كان عشرة عمري يا ابني. بس أنا هحاول مع سلمى و... يقطع كلامه علي أول ما يسمع اسمها ويرد بعصبية: "سلمى إيه يا دكتور؟

أنا البني آدمة دي مش عايزة أشوفها تاني ولا أتعامل معاها حتى لو مفيش حد غيرها." يضحك دكتور أحمد قائلاً: "مهو فعلاً مفيش حد غيرها أقدر أثق فيه يساعدك ويشرحلك مناهجنا وكدا. وعلى العموم روح إنت دلوقتي وريح، وأنا هشوف أقدر أعمل إيه وأبلغك." يستأذن علي ويخرج. وعلى الجانب الآخر تنظر إيمان لصديقتها وهي خارجة من مكتب الدكتور ووجهها شديد الاحمرار من كتر العصبية. تجري عليه وتقول: "إيه يا بنتي مالك؟ في إيه؟ دكتور كان عايزك ليه؟

في حاجة ولا إيه؟ ماتنطقي." سلمى بتنهيدة من كتر العصبية: "أنا مش عارفة هو عايز مني إيه ولا أنا عملتله إيه علشان كل دا. أنا تعبت. أنا ليه بيحصلي كل دا مش عارفة. أنا بجد تعبت والله." وتذرف دموع اللي كانت حابساها في عيونها. تساندها صديقتها إيمان لأقرب كرسي وتحضنها وتطبطب على كتفاها وتقول: "طب اهدى طيب. أنا مش عارفة إنتي بتتكلمي عن إيه ولا إيه اللي حصل بس اهدى بس اهدى."

لحظات وهدأت سلمى ومسحت دموعها وبدأت في سرد ما حصل في مكتب الدكتور لصديقتها. إيمان: "فعلاً بني آدم غريب جداً. بس أقولك فكك منه، تعالي ننزل تحت نشرب حاجة في كافتيريا الجامعة تروقك وكدا وتهديلك بالك شوية." تهز سلمى رأسها بالنفى وتقول: "لا مش عايزة، أنا بس محرجة جداً من دكتور أحمد لأنه زمانه حكاله على كل حاجة (تقصد حادثة السرقة)

وأنا محرجة جداً منه ومش عارفة أوري وشي ولا أقابله تاني إزاي، ومش عارفة أصلاً دكتور أحمد زمانه مفكرني إيه ولا بيقول عليا إيه. حسبي الله ونعم الوكيل في اللي كان السبب." ترد إيمان:

"ولا تاخدي في بالك، محصلش حاجة ولا حد ليه عندك حاجة. وبعدين دكتور أحمد بيعزك جداً ومستحيل يصدق عليكِ الكلام دا. اطمني متقلقيش يابنتي، دي الدفعة كلها بتحسدك على معاملة دكتور أحمد ليكي ولا كأنك بنته. وخلاص بقى تعالي نشرب حاجة في كافتيريا، ولا تكوني مش عايزة تقومي مفكرة إنك هتحاسبي؟ لا ياختي متقلقيش، أنا اللي عزماكي." وتنهي كلامها بابتسامة وغمزة لسلمى. سلمى ترد مبتسمة: "إذا كان كدا ماشي."

ويضحكون وهم في طريقهم للكافتيريا. سلمى وإيمان قاعدين في الكافتيريا يشربوا عصير ويتحادثون عن المذاكرة والمناهج. يقطعهما رن فون سلمى. سلمى تنظر إلى هاتفها باستغراب وتقول: "دي نمرة غريبة." إيمان: "طب ردي شوفي مين." ترد سلمى على الهاتف: "آلو مين معايا؟ المتصل: "آه يا سلمى أنا يوسف، إنتي مسجلتيش الرقم امبارح ولا إيه." سلمى: "آآآه أهلاً أستاذ يوسف، معلش والله نسيت أسجله. هو خير في حاجة." يوسف:

"أيوه لاقيتلك شغل تبع واحد صاحبي وهتعملي إنترفيو النهارده كمان نص ساعة كدا. هو شغل من البيت علشان تعرفي تذاكري وكدا وكمان متتبهدليش، هتشتغلي في خدمة العملاء بتاعت شركة ...... وأنا وصيت عليكي صاحبي هناك وكدا." سلمى بفرحة: "بجد يا أستاذ يوسف؟ شكراً جداً ليك بجد. طب حضرتك ممكن تبعتلي العنوان؟ أنا في الجامعة ناو هطلع على المكتب بسرعة." يوسف: "إيه دا؟ إنتي في الجامعة؟

طب أنا قريب منك ممكن أعدي عليكي وأوصلك في طريقي علشان متتأخريش."