رواية قضية خلع الفصل الرابع والثلاثون 34 - بقلم عمرو راشد

= هو انا عشان بايتة عندك هتفتكرني رخيصة ولا إيه. لو ناوي تتجوزني فعلاً يبقى رسمي. = أنا مقصدش حاجة، أنتي ليه فهمتيني غلط؟ أنا كنت أقصد يعني نتجوز عرفي لحد ما عدتك تخلص وبعدها نتجوز رسمي قدام كل الناس. = لأ وأنا مش هوافق على حاجة زي كده. = أنتي مش واثقة فيا؟ = ملهاش علاقة بالثقة، بس أنا مستحيل هقبل بوضع زي كده. = مش أحسن ما نكون بعيد عن بعض طول مدة العدة؟ = ومين قال إننا هنكون بعيد؟ ولا أنت مش هتبقى عايز تشوفني؟

= لأ طبعاً هكون عايز، دا أنا أتمنى. = هحاول أصدقك. "كنت عارف إنه هيعمل كده وهيحاول يستفزني عشان أبدو في أسوأ صورة قدام نادية، ده غير إنه عايز يثبت لي إنه هو اللي كسبان المرة دي. هو فعلاً كسب، بس الجولة مخلصتش. فريدة جات قعدت جنبي. = 10 دقايق والغدا هيكون جاهز. = عادي، خدي وقتك. = مين كان بيكلمك؟ = هو في غيره؟ = قصدك طارق. = طبعاً. = كان عايز إيه ده؟ = الباشا بيكلمني يسألني إذا كانت نادية تلزمني ولا لأ.

= وأنت قلت له إيه؟ = تفتكري هقول له إيه مثلاً؟ = قلت إيه يا حسام؟ = باركت له على الجواز مقدماً. = يعني زي ما توقعت.. ليه كده يا حسام؟ أنت لسه بتحبها. = مش أنا اللي أربط حياتي بواحدة. كنتي عايزاني أقول إيه؟ اللي أنا عملته هو الصح. = لأ مش صح.. أنت بتحبها يبقى تروح وتتكلم معاها وتشوف هي عملت كده ليه. = حد قال لك إنها دست على الكوتشي الأبيض بتاعي ولا تكونش حرقت لي القميص الكاروهات؟ في إيه يا فريدة مالك؟

دي ندهتني باسم واحد تاني ولا إنتي مش عارفة. = من غير ما تتعصب عليا بس. ليه مفهمتش منها هي إزاي قالت كده؟ = وهو أنا لسه هقعد وأسمع؟ وبالمرة بقى نعمل قهوة وشوية فشار لزوم التسلية. أنتي إيه رأيك؟ = أنت عايز تثبت لطارق إنك مش همك حاجة ولا فارق معاك نادية، مع إنك هتموت من غيرها. = مش أنا لا.. الكلام ده مش بتاعي، مبياكلش معايا. أنا حسام الهواري، لو عايز أتجاوز ممكن من بكرة أتجاوز أي واحدة ومش هيهمني.

= عارف إيه أكتر حاجة صادقة في كلامك؟ حسام الهواري.. حسام الهواري مرجعش من الموت. حسام الهواري رجع زي زمان. أنت فاكر يا حسام إحنا قطعنا كلام مع بعض زمان ليه؟ = ليه يا ترى؟ = عشان طريقتك دي. أي واحدة هتشوف هتنبهر بشياكتك وأسلوبك وريحة البرفيوم بتاعك، بس أول ما هتعرفك مش هتكمل معاك دقيقة تاني. نادية غيرت فيك كتير قوي يا حسام ولا أنت مكنتش حاسس؟ = لأ كنت حاسس، بس أنا استفدت إيه من التغيير ده؟ ولا أي حاجة. = مقتنع إنك صح؟

= جداً. = مش بقولك حسام الهواري رجع تاني زي زمان. على العموم براحتك يا حسام، شوف إيه اللي هيريحك واعمله. "قامت من جنبي ودخلت أوضتها. فضلت قاعدة جوا، وبعد نص ساعة خرجت وحضرت الأكل. = الأكل عندك أهو، بالهنا والشفا. = مش هتاكلي معايا؟ = لأ، أنا تعبانة هدخل أنام. "مسكت إيدها. = فريدة مش هينفع، إنتي كمان تزعلي وتمشي. أنا دلوقتي معنديش غيرك. = ماهي دي المشكلة يا حسام، إنك بتلجأ لي بس لما يكون عندكش حل تاني غيري.

= والله مش كده، أنا مقصدش. = عادي خلاص، حتى لو تقصد. = فريدة، إحنا مش صحاب بس، إحنا أكتر من كده بكتير أوي. إحنا في يوم من الأيام كنا هنبقى متجوزين. = كنا يا حسام، وطبعاً أنت فاكر إحنا متجوزناش ليه. فلاش باك = حسام، أنا عايزة أقابلك ضروري. = بعدين يا فريدة، عندي شغل مش فاضي. = المرة دي عايزك بجد يا حسام. = خير. = مش هينفع في التليفون. = ومينفعش موضوعك ده يستنى لبكرة؟ = لأ للأسف مينفعش. الموضوع متوقف عليه حاجات كتير.

"روحت وقابلته فعلاً في الكافيه اللي متعودين نقعد فيه دايماً. = يا ريت يكون الموضوع مهم فعلاً زي ما بتقولي. = حسام، أنا فكرت في موضوع الخطوبة. = هايل، وبعدين؟

= إحنا مش هينفع نكون مع بعض. أنت طول الوقت مشغول ومش هتبقى فاضيلي حتى نتكلم. بس ده طبعاً غير طريقتك معايا. أنت شخص كويس جداً على فكرة، بس أنا عارفة أتقبلُك أو أتقبل طريقتك. أنت بني آدم صعب، صعب في كل حاجة، ومع الوقت أنا مش هعرف أكمل وهتحصل مشاكل كتير. فبعد إذنك خلينا صحاب بس. = بيرفكت، ده أحسن قرار خدتيه في حياتك. = برضه طريقتك مش هتتغير، مفيش فايدة فيك.

= عشان أنا مش هقف عليكي. هقابل واحدة وواحدة واتنين وتلاتة وعشرة. ولو كنا اتجوزنا كنتي إنتي اللي هتكوني الكسبانة. ماهو إنتي مش متجوزة أي حد برضه. أنا حسام الهواري لو إنتي ناسيا. = أنا مش هتجوزك عشان اسمك. أنا هتجوزك عشان هكون بحبك. = وماله، الحب حلو برضه. الشيك لو سمحت. = أنت هتمشي؟ = تقريباً إنتي خلصتي كلام، صح ولا مخلصتيش؟ عموماً أنا مستعجل. لو افتكرتي حاجة ابقي ابعتيهالي في رسالة. بعد إذنك. باك : راشد

"اليوم ده عدى عليه 7 سنين، 7 سنين وأنا لسه مش عارفة أنساه. أنت دوست عليا في اليوم ده. دوست على قلبي. عارف لو كنت بس قلت لي خليكي معايا، كلمتين بس كنت على الأقل أحس إنني فارقة معاك. بس أنت مشيت. ورغم ده أنا كنت واقفة جنبك ومازلت جنبك. أرجوك كفاية بقى. جايز كل اللي حصل ده يبقى درس ليك. جرب تستغله بس استغله صح يا حسام. تصبح على خير.

"شدت إيدها مني ودخلت أوضتها. فضلت قاعد أفكر، مكنتش عارف إيه الخطوة اللي جاية. مش عارف هعمل إيه في حياتي. غيرت هدومي ونزلت ركبت العربية ومشيت. طول الطريق كلمتها بترن في ودني. = جرب تستغله يا حسام بس استغله صح. "كل كلامها كان بيرن في ودني. هو أنا ليه عامل في نفسي كده؟

عايش باسم واحد تاني. مستخبي وخايف حد يشوفني. بقالي 5 سنين واقف مكاني مبتحركش. وجه الوقت اللي أتحرك فيه. روحت على المكتب بتاعي. فتحته. التراب في كل مكان. كانت حالته سيئة جداً لأنه طبعاً بقاله أكتر من 4 سنين مقفول. قررت أفتحه من تاني. ومن تاني يوم اتصلت بأكتر من صنايعي عشان هغير شكل المكتب. فضلنا 10 أيام على الحال ده لحد ما خلصت. المكتب بقى جاهز عشان أبدأ الشغل. وبدأت في تنفيذ الخطوة المنتظرة. أعلنت في الجرايد كلها

وعلى كل مواقع التواصل الاجتماعي. اسم حسام الهواري كان تريند تحت هاشتاج "الرجل الذي عاد من الموت". قنوات كتير بدأت تكلمني عشان تستضيفني عندها. الأضواء كلها متسلطة عليا. مكنش فيه خبر بيعدي إلا لما أكون موجود فيه. ماهو مش طبيعي يعني واحد يرجع من الموت بعد 5 سنين...

"كنت بقلب في التليفزيون وشايفاه قاعد بيتكلم عن الفترة اللي كان مختفي فيها وكان بيقول: "في الحقيقة كان لازم أختفي أطول فترة ممكنة. كان في تهديدات كتير بتجيلي وأنا بصراحة كنت بدأت أقلق. ماهو برضه الكثرة تغلب الشجاعة. وبالفعل حصل وفي ناس اتجمعت عليا أنا وصاحبي وضربونا بالنار، بس كان نصيبي إني أعيش. قررت أسافر وطبعاً كان لازم الناس تعرف إني ميت." = خلال الفترة دي كلها مكنش في أي حد معاك، متواصلتش مع أي حد؟

= في الحقيقة لأ، أنا مكنش عندي أي علاقات مع أي حد. "قفلت التليفزيون وفضلت أعيط. حسام نسيني خلاص، شالني من حياته. في نفس اللحظة جالي تليفون من طارق. = شفتي البيه وهو بيتكلم؟ شخصية متصنعة أوي، لأ وقال إيه مكنش في حد معاه طول فترة السفر. الباشا عامل إنه مش فاكرك، وإنتي لسه مش عايزة تنسيه يا نادية. = بعد اللي هو قاله ده أنا خلاص هنساه وهعيش حياتي زي ما هو عايش حياته. = يعني موافقة نتجوز؟ = موافقة.

"الوقت كان بيعدي بسرعة جداً. مكنش فيه أي حاجة في حياتي تقريباً. حتى فريدة مش موجودة. ولما بكلمها مبتردش عليا. حتى لما روحت لها البيت ملقتهاش. بقيت لوحدي تماماً. كنت بقعد في الشغل أطول وقت ممكن عشان محسش بالوقت ويبقى اللي فاضل ليا كام ساعة هنام فيهم عشان أصحى أروح الشغل تاني. فضلت على الحال ده 4 شهور، وفي يوم جالي رسالة. كانت من طارق. = الفرح بكرا الساعة 5 في قاعة ****** في ****. هستناك تيجي يا حس.

"نبضات قلبي زادت. حسيت إحساس غريب. مكنتش عارف أزعل ولا أفرح ولا حتى مش فارق معايا. معرفش حصلي إيه ساعتها. كنت كل اللي أنا متأكد منه إن لسه فيه حتة جوايا بتحن. حتة من قلبي كان لسه صاحية، بس قررت أموتها ودوس على قلبي أكتر وروحت الفرح. كنت لابس أشيك بدلة عندي. دخلت القاعة وشايفها قاعدة جنبه. مش هكدب إن كنت مضايق، بس مكنش لازم يبان عليا نهائي. ابتسمت وبصيت على يميني بالصدفة شوفتها. كانت لابسة فستان بيبي بلو طويل. شعرها مفرود. الميكب كان خفيف.

كانت زي القمر. هي كمان شافتني. قربنا من بعض ولمست إيدها. "أخبارك إيه؟ "تمام، وانت؟ "بقيت كويس لما شوفتك." "طب كويس. ألف مبروك على المكتب وعلى رجوعك مرة تانية." "لولا كلامك مكنتش رجعت، وكان زماني فضلت تايه لحد دلوقتي." "امممم، الحمدلله." "وانتي كنتي فين؟ "سافرت شوية، كنت بغير جو." "كلمتك كتير على فكرة." "كنت عايزة ابعد شوية لحد ما أحس إني بقيت كويسة." "ودلوقتي؟ "أحسن شوية." "وايه اللي جابك النهاردة؟

"نادية بعتتلي رسالة امبارح، فقلت لازم أجي وأباركلها." "ولا عشان كنتي عارفة إني هبقى موجود؟ "أنا قولتلك سافرت أغير جو مش أتعلم السحر." ضحكت على كلامها. "استنيتك كتير." "وأنا بقيت موجودة أهو." "طب يلا بقى نروح نباركلهم." مسكت إيدها ورحنا عشان نبارك للعرسان. طارق أول ما شافني ضحك وقام وقف. "كنت عارف إنك مش هتفوت مناسبة زي دي." "وأنا أقدر برضو مجيش." "مبروك يا عروسة." مردتش عليا، حتى عينيها كانت في الأرض.

"عقبالك بقى يا عم حسام لما نفرح بيك." "بس متقولش كدا عشان فريدة بتزعل." شبكت إيدها في إيدي. "معلش أنا نسيت أقولكو.. أنا وفريدة اتخطبنا!!