رواية خادمة قلبي الفصل الثامن والخمسون 58 - بقلم زهرة عصام

الفصل اللي فات وصلنا إن البنات سابوا الشباب و راحوا عند منال بسبب روزيتا. حازم شفولي حل اخليها تنسي البكيني الأحمر ده بدل ماهي قايمة عليا الحد كده. وليد بص له بسخرية وقال: كان القرد نفع نفسه يا خويا، ده البت منه لمّت هدومها وطفشت من البيت نهائي. حازم بتسرع: ما إنت اللي عينك زايغة يا وليد، إحنا مش هنضحك على بعض. وليد وقف وحط إيده وقال بعنف: عين مين اللي زايغة يا محترم، إنت نسيت إني أخوك الكبير. حازم بخبث:

الكبير كبير أفعال لا أقوال يا حبيبي. مالك وقف وقال: خلصوا يلا نروح الفيلا ونفكر بهدوء كده هنعمل إيه في أم الليلة دي. خرجوا لكنهم اتصدموا لما لقوا روزيتا لسه قاعدة. مالك قرب منها وقال: إنتي بتعملي إيه، إنتي لسه ممشيتيش. روزيتا: كله مشي وساب روزيتا، مالك حتى المتوحشة اللي ضربتني مشيت وأنا مش عارف يروح فين. مالك نفخ بضيق وقال: يستحسن إنك ترجعي على بلدك لأنك مش هتاخدي من حد فينا اللي إنتي عايزاه. روزيتا: بس يا مالك.

مالك قطع كلامها وقال: بلا مالك بلا بتنجان بقى، اقفلوا الشقة وحصلوني. حازم بص لها بقرف وقال: كله منك إنتي، ربنا يسامحك يا مالك يعني عشان تضايقي ملك تخربيلنا حياتنا كلنا. روزيتا: بس أنا حبيته كتير يا حازم. حازم بص لها من فوق لتحت وقال: والنبي ياختي ما بياكل معايا جو المحن ده، هو أنا حبيت سيد قشطة اللي هناك دي من شوية. عدي كده يا ولية الله يستر، عاوز أقفل الباب وأصالح البت بدل ما يتأخذ عليا غلط تاني.

روزيتا نازلة على السلم بضيق وهدوء، وحازم قفل الباب ونزل وراها، زقها على جنب وقال: هي مش ناقصة مرار طافح، غوري من وشي وعديني كده خلينا نخلص بقى. *** ادخلي ياختي منك ليها، يا آخر صبرك يا منال، واحدة مطلقة والتانية غضبانة وهتطلق والتالتة هتعنس جنبك. رهف نفخت بضيق وقالت: بقولك إيه يا منال، النبي سيبنا في حالنا، كفاية اللي إحنا فيه، مش شايفين قدامنا من كتر الخوازيق اللي بتتحدف علينا. منال بصت لها بسخرية:

كل واحدة كان ده اختيارها، مش عاوزاها ترجع تندب لي وتقول سيبيني في حالي؟ أنا سبتكم براحتكم وأنتم اخترتوا وجبتوهم وقلتوا عاوزين حصل وإلا محصلش. الثلاثة في صوت واحد: حصل يا معلمة. ملك قعدت على الكرسي وحطت رجل على رجل وقالت: اتس اوكي يا منال، شيلي إيدك مني خالص، أنا عارفة هجيب مالك راكع تحت رجلي إزاي، ركزي مع الاتنين دول. منال بصت لها بسخرية وقالت:

النبي ياختي بلاش النفخة الكدابة دي، ده أنا لسة جايباكي من حضنه، ده لو جه قالك يا ملك مش هيكمل اسمك هتقوليله مسمحاك يا حبيبي وهتروحيله راكعة. منه قعدت والدموع في عينيها وقالت: أنا لازم أطلق، أنا مش هفضل على ذمة البني آدم ده أكتر من كده، بني آدم بصباص وميملى عينه التراب. رهف قعدت جنبها وطبطبت على كتفها وقالت: متزعليش يا حبيبتي، بكرة يعرف قيمتك الحيوان ده. منه بدموع:

متقوليش عليه حيوان، أنا لسة بحبه، ولا أقولك قولي براحتك، هو ميستاهلش إني أدافع عنه أصلاً. منال قعدت وحطت رجل على رجل وقالت: محدش ضربك على إيدك عشان توافقي، واحد جاي يخطبك بباكو شاي العروسة، متوقعة منه إيه؟ أنا أصلاً مكنتش موافقة على الجوازة دي، فعلاً ديل الكلب عمره ما يتغير. رهف بتسلية: اهدي يا منال، اهدي ياختي ليجرا لك حاجة. منال ضحكت بجنب وقالت: مين دي اللي يجرا لها حاجة يا بت؟

ده أنا أوديكوا إنتوا الستة البحر وأرجعكم تلهثوا من شدة العطش. ملك بضحك: يا واثق إنت يا واثق. بصوا بقى، إحنا عاوزين حد يكون ثقة يبقى معاهم وينقل لنا الأخبار أول بأول، ولازم الحد ده يكون مننا. كل الأنظار اتوجهت لرهف اللي قالت بخوف: فيه إيه يا جدعان، أنا والله أغبى من إنكم تحطوني في مكان خطير ومهمة زي دي. منال ابتسمت باتساع وقالت:

بالعكس، ده إنتي أنسب خيار لينا دلوقتي، اسمعي يا بت الكلمتين دول وحطيهم حلقة في ودنك اللي عاوزة تنضيف دي. طرقعي عينيكي وفتحي ودنك، دبة النملة هناك أعرفها. بصت لبناتها لقتهم بيبصولها، فرجعت في كلامها وقالت: قصدي يعني نعرفها كلنا، ما إحنا تيم مع بعض، أسرة في بعضينا. ملك سألتهم وقامت وهي بتقول: أسرة واطية يا منال، أنا قايمة أتخمد عشان ضهري مش قادرة والحمل تاعبني أوي النهاردة. منال بسخرية:

وهرمونات الحمل التي تحتاج إلى حضن حنين يداوي الحب الحب الشوق الشوق. منه ورهف بصوت واحد: بلوبيف بلوبيف. ملك بصت لهم بغضب وقالت: والله العظيم إنكم شوية عيال ها. منال بصوت عالي: حاسبي بس على نفسك لحسن الشوووووووق الشوق خلاني أرجع من تاني وأنسى كل إهانتي. ملك بصوت عالي من جوه بعد ما قفلت الباب: ماشي يا منال، مااااشيييي. رهف بتسائل: المهم يعني دلوقتي يا منال، أنا هرجع لحازم إزاي؟

ماهي دي الطريقة اللي ممكن أبقى معاهم أغلب الوقت بيها، ومش بعيد كمان نرجع مالك وملكه بيها. منال فردت دراعها وقالت: لا سيكسكيوز مي، أفهم الأول إزاي ترجعي الحلاليف دي وبعدين أقولك هترجعي إزاي للهبل التالت. يعني يا منال في خطوبتي أنا وحازم، فرح الحورات دي، أكيد مالك هيبقى موجود وملكه كمان، كده نديهم مساحة أكتر يكونوا مع بعض فيها. منال ابتسمت بخبث وقالت:

ويجي يطلبك مني، وهنا في بيتي، ووقتها أنا هعرف أطلع عليهم القديم والجديد، ويبقوا يوروني هيعملوا إيه، يا أنا يا إنتوا يا شوية كلاب. بصت لرهف وقالت: المهم دلوقتي إنتي لما الواد حازم يكلمك، تتقلي عليه بس مش أوي، وتفتحي له مجال يصالحك وترمي له كلام عاوزك يجي يطلبك هو وأخواته مني، وتديله مهلة من وقت ما يكلمك يوم واحد فقط لا غير، فاهمة يا بت. رهف بضحك: علم وينفذ يا منال. منال بخبث:

أنا أنا أنطرد من البيت ويقول عليا أم المشاكل؟ أنا أنا يبصص للبكيني الأحمر ويسيب بنتي في سبوع ابنهم؟ أيوه أنا اللي هبقى حماته الحرباية، صبركم عليا صبركم عليا، أما أربيكم من أول وجديد ميبقاش اسمي منال. *** كانوا قاعدين مع بعض في الجنينة وكل واحد بيفكر في حاله، لحد ما حازم نفخ وقال: أنا دماغي وقفت ومش لاقي حل للمشكلة الشنيعة دي، أبوس إيديكم شفولي حل أصالح بيه البيت، وبعدها هبقى أشوفكم وأساعدكم ترجعوا مراتاتكم.

وليد بشماتة: والله محدش طلب منك مساعدة، وزي ما عكيتها لوحدك صلحها لوحدك يا فصيح ويا أذكى أخواتك. حازم باعتراض: لا دي مبقتش عيشة دي، يعني أنا أساعدك تتجوز البت وتخلف منها سحلية صغيرة، ولما أجي أظبط مع بنت خالتها تعترضلي ومش راضي تساعدني؟ ماهي الخناقة والعركة اللي حصلت بينا دي بسببكم يا شوية أوباش. وليد ضحك بسخرية وقال: ليه كنا ضربناك على إيدك وقولنالك اتغزل بجمال البت قدامها؟

ولا قولنالك عاند معاها، وهي العناد اتخلقت عشانها. حازم بيأس: لا أصل أنا شفتكم بتعملوا كده، قولت البنات كلها بتيجي كده، فعملت زيكم، أبقى أنا غلطان. مالك بقلة صبر: غلطان وغبي ومحتاج ضرب الشبشب كمان يا حيوان! هو إحنا كل حاجة نعملها تقلدنا، مش يمكن الحاجة دي غلط؟ طب والزفت وليد، وهو عارفين إنه من يومه فلاتي و بتاعي نسوان، تقدري تقلديني أنا؟ طب أنا عارف أنا بعمل إيه وهعمل إيه مع ملك، حضرت جنابك هتعمل إيه دلوقتي؟ ساكت ليه؟

ما ترد! أهي بقت خراب على الكل يا فصيح، عشان تبقي تشغل دماغك تاني في حاجات إنت ملكش دعوة بيها ولا تعرف عنها حاجة. حازم بص له بصعوبة وقال: ما خلاص بقى يا مالك، إنت هتقعد تفطم فيا كده كتير؟ ده بدل يا أخي ما تشوفلي حل. مالك بسخرية: يبني إنت ليه غبي كده؟ أهو إنت الوحيد اللي مشكلتك محلولة، هتكلم رهف وكلمتين حلوين وهتنسى، متخافش يسطا إنت ملحقتش تعكس أوي. حازم بص له بترقب وقال:

ده بجد يا مالك، يعني لو كلمتها دلوقتي هترد والأمور هتبقى تمام، وإلا هتف في وشي ومش هتسأل فيا. وليد بسخرية: إنت أهبل ياض، قوم كلمها وحل عن سمايا وسبني أفكر هتعامل إزاي مع منه اللي حالفة عشرين يمين إنها تطلق. حازم ابتسم وقام جري على أوضته، أما وليد قال: يا بختك يا ابن المحظوظة، ظبط أمورك في دقيقة. مالك بخبث: متقلقش، أهو الأاهبل ده اللي هيسهل لينا الأمر. وليد انتبه لكلامه وقال:

أيوه كده، أحبك وإنت بتفكر، شجيني وقولي اللي بتفكر فيه. بص يا ابني عشان تخلي حد يحبك لازم تبقى قدامه على طول، وعشان منه تتنيل تسامحك لازم حضرتك تبقى قدامها وتحاول على الأقل معاها، وجوازة حازم من رهف هي اللي هتسهل لينا الأمور دي. وليد بضحك: أما إنت جريء والله وبجح كمان، بس أموت في تفكيرك ودماغك السم دي. *** رهف حبيبتي والله مكنش قصدي، ده أنا كنت بناكف فيكي بس مش أكتر. رهف بضحك مكتوم لكن سيطرت عليها:

بص يا حازم، أنا مش هفضل كده، ولا يا خويا يعجبني الحال المايل، عاوزني بيت منال مفتوح، غير كده لا، وأه مقدمكاش كتير برضوا هنا أربعة وعشرين ساعة وبس. بس يا رهف كده مينفعش، إنتي مش مديني وقت أفكر نهائي. رهف بصدمة مصطنعة: تفكر في إيه؟ في جوازك مني؟ إنت مبتحبنيش يا حازم، اقفل واعتبر الموضوع ده متغلف للأبد، سلام يا سعادة البيه كريم شانتيه. رهف قفلت الخط،

وحازم بص في الموبايل وقال: مجنونة بس بحبك، جايلك يا رهف يا بنت أخت منال، جايلك وجايب الحرب معايا. *** تاني يوم الصبح ملك صحيت من النوم لقت البيت كله نايم، فلبست ونزلت الشغل وقالت بخبث: استعنا على الشقا بالله. دخلت الشركة بخطوات واثقة ومنها على مكتبها على طول، وبدأت تترجم الإيميلات وتخلص الشغل اللي عليها. مدام ملك، بشمهندس فادي عاوزك في مكتبه. ملك هزت راسها بملل وقالت: تمام، دقايق وأكون عنده.

ملك أخدت موبايلها ودخلت لـ فادي اللي بص لها بإعجاب، وده خلى ثقة ملك تزيد في نفسها وقالت: حضرتك طلبتي يا بشمهندس؟ فادي هز رأسه بإيجاب وقال: أيوه، حضرتك ترجمتي الفاكس اللي وصل من شركة *****. ملك هزت راسها بإيجاب وقالت: أيوه يا بشمهندس، فاضل بس مراجعة بسيطة عليه وهسلمه لحضرتك. موبايل ملك رن وكانت منال، وملك استأذنت ترد. أيوة يا منال، فيه إيه. منال بزعيق: إنت فين يا بنت من الصبح، مالك والشاب جايين بليل يطلبوا إيد رهف.

ملك بصدمة: قولي أقسم بالله كده، وحصل إمتى الكلام ده، وإزاي ليه عين يجي عندنا البيت، هنعمل إيه يا منال؟ فادي لاحظ معالم وش ملك وقال: هو في حاجة يا أستاذة. ملك بخجل: لا والله مفيش حاجة، مجرد مشاكل عائلية. منال بخبث: بت يا ملك، ادي المدير الموبايل كده. ملك بتسائل: ليه يا منال؟ منال بعصبية: ما تخلصي يا بنت الجز.مة، إنتي اديلن الموبايل. ملك مدت إيديها بالموبايل لـ فادي وقالت بخجل: مامتي عاوزة تكلمك يا بشمهندس.

فادي فضل يسمع كلام منال وابتسم وقال: حاضر يا أمي، اللي إنتي عايزاه. أدي الموبايل لـ ملك وقال: تقدري تاخدي باقي اليوم إجازة، والفاكس ابعتيه لحد يراجعه ويجيبه. ملك هزت راسها ببلاهة وقالت: ... عدى سبع ساعات، والشباب جهزوا واتحركوا لبيت منال، وأول ما وصلوا اتصدموا من وجود فادي وصوت منال اللي بيقول لهم: فادي راجل البيت واللي هيتقال لرهف. مالك بصدمة وصوت مهزوز: را إيه يختي، راجل البيت.