رواية خادمة قلبي الفصل التاسع والخمسون 59 - بقلم زهرة عصام

عدي سبع ساعات والشباب جهزوا واتحركوا لبيت منال، وأول ما وصلوا اتصدموا من وجود فادي وصوت منال اللي بيقول لهم: اتفضلوا ادخلوا واقفين ليه. وليد بتساؤل: مين ده يا منال؟ ضحكت بخبث وقالت: فادي راجل البيت واللي هيتقال لـ رهف. مالك بصدمة وصوت مهزوز: راجل إيه يا بنتي راجل البيت؟ حازم بصدمة: ده اللي هو إزاي معلش، ده إحنا عارفين بعض يا منال، إيه اللي إنت بتعمليه ده؟ منال قعدت على الكرسي وحطت رجل على رجل وقالت:

والله ده بيتي وأكبر فيه اللي أنا عاوزه، أنا نسيت أقول لكم كمان إنه خطيب ملك، تخلص شهور العدة من هنا وهي هتتجوزه من هنا، حبايبي لايقين على بعض ربنا يحفظكم من العين وخصوصًا عيون حد أعرفه. فادي واقف مش فاهم حاجة بس بيجاري منال في كلامها وبيقول: هعمل لك أكبر وأحسن فرح في الدنيا يا حبيبتي، فرح هيبقى تريند مصر لمدة أسبوع. ملك فاتحة بوقها ومش فاهمة حاجة ومالك خلاص صبره نَفَذ، فقال بعصبية:

جواز إيه يا منال اللي بتتكلمي عنه، لا اقفلي كده يا بنتي. منال برقت وقفت مرة واحدة وقالت: لما تتكلم في بيتي تتكلم بصوت واطي، الصوت العالي ده للأماكن اللي إنت جاي منها، لكن في بيتي ها بيتي تتكلم باحترام. ملك بص لها بقرف وقالت: والله؟ ضغط على سنانه وقال: جواز إيه اللي البرنسيسة منال بتتكلم عنه حلو كده. مش بطال، ها كنت بتقول إيه بقى؟ مالك بعصبية: إنت هتستعبطي يا منال، عاوزة تجوزي مراتي؟ منال وقفت قصاده وقالت:

تقصد طليقتك، ولا إنت ناسي إنك طلقتها؟ مالك بشماتة: وردتها يا منال، طلقتها وردتها. ملك اتصدمت من كلامه وقالت: يعني إيه ردتها، إنت إزاي تعمل كده من غير ما تاخد رأيي؟ مالك رفع عينه لها ونزلها بسرعة وقال: اسكتي إنتي. وبص لـ منال وقال: ها برنسيسة حماتي عاوزة تجوزي بنتك وهي متجوزة؟ منال بعصبية: وإنت إزاي ترد بنتي ليك تاني من غير ما تاخد إذني، إنت طلقها دلوقتي حالا. مالك واقفة مصدومة وبتقول: اسكتي إنتي. وقفت جنب منال وقالت:

استني يا منال لحظة يعني إيه اسكتي إنتي، إنت عاوزني اسكت ليه؟ دا حقي و بدافع عنه. ملك بص لـ مالك بعصبية وقال: يعني زي ما سمعتي، تسكتي إنتي دلوقتي على ما أشوف أمك آخرها إيه. وبص لـ منال ولسة هيتكلم لقي رهف بتقول: أي أمك دي بيئة أوي الكلمة يا مالك، إسمها مامتك. مالك بص لـ حازم وقال بعصبية: سكت البغبغان دا بدل ما اسكتكم إنتوا الاتنين. حازم في سره: الله وأنا مالي يا لمبي، وأنا كنت جيت ناحيتك. منال بصت ليه وقالت:

خليك معايا، أنا طلق بنتي اللي رديتها من غير ما تعرفني ولا تاخد إذني. مالك بعناد وعصبية أكبر: مش هطلقها يا منال، وأعلى ما فخلك اركبيه. أقولك دا أنا هاخدها معايا وأنا ماشي. وليد باصص لـ منه اللي واقفة تبص هنا شوية وهنا شوية ومتابعة الحوار باهتمام وبتستعد للدخول في المعركة دي. قرب منها وقال بصوت مستهتر: منه إزيك؟ منه بصت ليه من فوق لتحت ورجعت تبص لـ خناقة ملك ومالك تاني ومدتوش أي اهتمام. وليد نفخ وقال بهدوء:

أنا عارف إنك زعلانة مني ومش عاوزة حتى تبصي في وشي، بس علفكرة إنتي ظالماني. هو أنا حبيت ولا هحب حد قدك. منة رفعت حاجبها وبصت ليه نظرة احتقار وقالت: شوفولي مين اللي قال إن في حد بيتغير عشان أديله بالشبشب، أصل ديل الكلب عمره ما يتغير يا ولا. بلاش بينا عيش وملح وطفل صغير. وليد مسكها من دراعها وقال: قصدك إن أنا كلب؟ هي حصلت تشتميني يا منه؟ منه شالت إيديها بقوة وقالت:

والله اللي على راسه بطحة يحسس عليها، يخويا. وكويس إنك عارف نفسك. وليد بعصبية: لا دا إنتي لبختي في الكلام أوي، لاحظي إنك بتكلمي جوزك يا هانم. منه بصوت عالي: الخاين البصاص اللي مش عامل أي احترام لمراته. -خاين إيه؟ كنتي قفشتيني في أوضة نوم معاها. ما مالك اللي جايبها وإنتِ عارفة. -مالك جايبها وإنت تبصلي عليها يا أخي، اتقي الله. دا حتى ربنا أمرك بغض البصر. وليد بوقاحة:

دلوقتي إنتي اللي بقيتي الست الخضرة الشريفة اللي مبتغلطش خالص؟ دا إنتِ بنت منال يعني، منتهي قلة الأدب و... منه زقته من كتفه وقالت: ولا كلمة عشان مش هسمحلك تغلط بكلمة في حقي ولا في حق أمي، انت فاهم ولا لا. وليد بعصبية: لا مش فاهم. أنا كل اللي فاهمه إن مراتي بتطول لسانها عليا وبتتكلم بطريقة لا تليق بيا كزوج أبداً.

-محسسني إنك جاي من المسجد أو قايم من على سجادة الصلاة. دا إنت لسه امبارح عمال تبحلق في البت، مسبتش حتة في جسمها إلا وبصيت عليها. -براحتي، أنا راجل أعمل اللي أنا عاوزة. منه بصوت مرتفع: اللي زيك ميتقالش عليه راجل، عارف يتقال عليه إيه؟ لامؤاخدة، واحدة ست. وليد بص ليها والشر بيخرج من عينه و... حازم ورهف واقفين في جنب وبيتكلموا و بيهزروا مع بعض. حازم بصلها وقال: مقولتليش يا رهوفة، بتحبني زي ما أنا بحبك؟ رهف

بصت للوضع وبصت ليه وقالت: بزمتك دا وقت محن؟ مش شايف الهم اللي إحنا فيه؟ حازم بص عليهم وبعدين بص لـ رهف تاني وقال: أي اللي إحنا فيه دي أحلى حاجة يا بنتي. سيبك منهم، هما شوية وهيتهدوا ونقعد نتفق ليك يا جميل. تعرف إني بجد فرحان أوي النهاردة. رهف ضحكت وبصت لية وقالت: فرحان بالدوشة دي يا حازم؟ طب قول، كنت أتمنى اليوم يعدي على خير مش كدا. حازم ضحك وقال: والله يا بنتي أنا كنت عارف إن في حاجة هتحصل تدري. لأن الأشكال دي

(والمقصود بيها أنا وإنتي) مش وش فرح أبداً، مكتوب عليها الحزن والأسى طول العمر. رهف بابتسامة: لا متقولش كدا. بكرة تتعدل. أجيبلك عصير تروق دمك ولا نكمل فرجة على الخناقة. حازم ضحك وقال: كملي يختي فرجة، كملي. أنا عارف إن فاتك حاجة هتموتي فيها. رهف ضحكت وتابعت اللي بيحصل. فادي واقف مصدوم من اللي بيحصل، هو مش فاهم حاجة وكل حاجة جت مرة واحدة. يبص هنا شوية وهنا شوية. فجأة قال بصوت عالي: بااااااااااس خلاص، اسكتوا.

الكل انتبه ليه فكمل وقال: نقدر نحل كل المشاكل دي بالهدوء علفكرة، العصبية دي عمرها ما هتنفع. لازم نكون هاديين. منال بصتله وقالت: والنبي إنت اللي فيهم. شوفلك كنبة اقعدلك عليها عقبال ما نخلص. وبصت لـ مالك تاني وقالت: تاخد مين معاك وانت ماشي؟ إنت مفكرها سايبة ولا إيه؟ تطلقها وقت ما تحب وترجعها وقت ما تحب؟ إنت مفكر إن مفيش حد هيقولك ولا إيه؟ يبقى متعرفش منال يا بيه، فوق كدا واعرف إنت بتكلم مين. مالك بوقاحة:

هيكون مين يعني؟ إنجلينا جولي؟ دا إنتي منال يا منال. -ومالها منال يعني؟ خد بالك بكلمة واحدة مني ترجعلك. طول ما أنا مش راضية عنك، يبقى تنسيها خالص. وأفضل زود غلطانك كدا. وليد بص ليها والشر بيخرج من عينه وقال: أنا مش راجل، طب؟ المكان سكت من صوت الكف اللي منه اخدته، وصوت وليد وهو بيقولها: إنتي طالق. طلما مش شيفاني راجل، يبقي متقعديش على ذمتي نص ساعة. بص لـ منال وقال:

بنتك عندك أهي يا منال، ربيها وعلميها تكلم جوزها إزاي. ولا جوزها إيه؟ بقي معي خلاص، بقيت مطلقة. مش دا اللي كنتي عاوزاه؟ أهو حققتلك أمنيتك أهو. منه واقفة وبتنزف من أنفها وبت بص على وليد بعيون حمرا والدموع في عينها مش راضية تنزل نهائي. دخلت في صدمة وودنها مصفرة مش سامعة حاجة نهائي.

حازم اللي اتعدل في وقفته وجرى على وليد يشده لبرا عشان ما يلبخش في الكلام أكتر من كدا، ورهف اللي وقفت جنب منه بتهز فيها عشان ترد أو تدي أي رد فعل، لكنها واقفة زي الصنم. فادي فاتح عينه ومش مصدق اللي حصل واللي بيحصل عموماً، وحلف في سره وقال: أقسم بالله عيلة مجنونة، واللي يدخل ما بينها خسران. أنا كان إيه اللي رماني الرمية السودة دي؟ هما عارفين بعض وخافيين بعض، أدخل أنا ليه؟ اتقدم خطوة لـ مالك وقال:

أظن إنهم لازم يكونوا لوحدهم دلوقتي عشان المشاكل متزدش. لازم ننسحب. مالك بص لـ فادي بضيق وقال من بين سنانه: كل دا بسببك إنت، وأقسم بالله ما هسيبك. أقولك، خد. فادي خد بوكس من مالك، ومنال صوتت وقالت: جرا إيه يا شوية بلطجية! واحد يضرب البت والتاني يضرب الضيف. غور اطلع بره ومش عاوزة أشوف حد فيكم غير ما تتربوا من أول وجديد وترجعوا لعقلكم من تاني. بره بقولك.

مالك خرج بره البيت وهو بيفف وبيلعن غباء أخوه وعصبيته اللي طلعت في وقت مش مناسب. نزل لقي وليد واقف يبص على شباك منه وعيونه حمرا. مالك كان ناوي يضربه هو كمان، لكن لما شاف حالته سكت. حازم اللي واقف بيبص على وليد ومستني أي رد فعل منه ومستعد إنه يمسكه ويبعده عن أي شئ إجرامي ناوي يعمله. مالك شده دخله العربية وهو رجله زي الحجر مش راضي يتحرك ودموعه ابتدت تنزل في صمت وما زال باصص ناحية شقة منال.

مالك اتحرك بالعربية وعيون وليد على البيت لحد ما اختفى عن نظره. الوضع فوق مكنش أحسن حاجة. منه مكانها وأنفها بينزف وحاطة إيديها مكان القلم اللي اخدته، ومنال جنب فادي بتقومه من الأرض وبتقوله: معلش يبني، أنا السبب في اللي حصلك دا، لامؤاخدة. فادي من ذوقه قالها:

محصلش حاجة يا أمي. بس حاولوا تحلوا مشاكلكم بأسلوب أرقى وأحسن من كدا. الخناق مش هيفيد بحاجة، بالعكس دا هيعقد المشكلة أكتر زي ما حضرتك شوفتي دلوقتي. أنا هستأذن دلوقتي وأتمنى إن الآنسة (وشاور على منه) تكون بأفضل حال. بعد إذنك. منال بحسرة: شوف البني آدم الزوق، مش اللي بلطجية اللي اخدتواهم. منه بصت ليهم كلكم ودخلت أول أوضة قابلتها وقفتلت عليها الباب ودموعها نزلت بصمت.