رواية خادمة قلبي الفصل الأربعون 40 - بقلم زهرة عصام

حازم نايم و ملوك و ملك بيتسحبوا على اوضته. ملوك ميلت رأسها و باقي جسمها ورا الباب و ملك فوقها و بصوا لبعض و ملك همست: -كله تمام يا ملوكة الجثه نايمة مش حاسة بحاجة. ملوك : -حلو أوي كدا إليك الخطة يا ملك أنا هتسحب احط الصاروخ في رجله و أخرج جري و انتي تتسحبي تولعي فيه و تجري على بره نحط البتاع الأبيض دا على وشنا أول ما يخرج نفجعه و لما نشيله يلاقي دبل جميلة في وشه. ملك بصت ليها بفخر و قالت:

-طبعا لازم تطلعي ذكية مش بنتي جينات هي جينات و انتي اخدتي جينات الذكاء مني. ملوك بسخرية: -و يا ريتني ما خدتها دا انتي اذكي خلق الله. ملك ضربتها في كتفها و قالت: -طب ادخلي يختي حطي الصاروخ في رجله خلينا نخلص من الخطة الهباب دي. ملوك بغضب طفولي: -متقوليش على خطتي هباب أحسن ما أخطط ضدك انتي. ملك : -طب اخلصي ادخلي. ملوك اتسحبت و هي متوترة جدا و بتلف يمين و شمال كانها في مهمة فعلا.

حاولت تحط الصاروخ بين صوابع رجله لكن حازم اتحرك فجأة و ملوك نزلت تحت. ملك كانت مراقباهم من على الباب و حازم أول ما حرك رجله حطت ايديها على بوقها بخوف و بعدين لما الوضع هدي حطت ايديها على صدرها و خدت نفس. ملوك قامت تاني بالراحة و حطت الصاروخ بين صوابعه و خرجت تتسحب. أول ما خرجت من الاوضة خدت نفس و قالت بسعادة : -لقد فعلتها فعلتها و بقت تعمل حركات تعبر بيها عن فرحتها.

ملك بصت ليها و بصت للاوضة و دخلت تتسحب و الولاعة شغالة لحد ما ولعت الصاروخ و خرجت جري و بصت لـ ملوك و الاتنين حطوا صوابعهم في ودانهم و عدوا على صوابعهم واحد اتنين تلاتة و لقوا صراخ حازم خارج من الاوضة. الاتنين ضربوا ايديهم في ايدين بعض و قالوا: -تمت المهمة بنجاح. حازم خارج شايط و على آخره لقي قدامه اتنين لابسين أبيض فـ أبيض اتخض و رجع لـ ورا بصراخ و قال: -أعوذ بالله من الشيطان الرجيم انا موت وإلا إيه.

قرب منهم و ايديه بتترعش و شال من عليهم الغطا الأبيض بص لقي الاتنين محولين بطريقة تخوف و تضحك في نفس الوقت قال بخوف مصطنع بعد ما استوعب الموقف: -جميلة تاني في البيت و اتنين مش واحدة كدا كتير. فجأة حازم لقي كف نازل على قفاه و ملك بتقول: -جميلة هانم يا كلب أنت هتنسى نفسك وإلا إيه. ملوك شدت حازم من البنطلون بصلها بصدمة من الكف اللي خده. رفعت ايديها و قالت: -شيلني يا حازم عاوزة أقولك على سر. حازم شالها و ملوك قربت من ودنه

و قالت بصراخ و صوت عالي: -توووووووت. حازم حدفها على الأرض و هو بيقول: -يلا يا بنت الكلب من هنا و حط ايده على ودنه. ملوك مسكت ظهرها و قالت: -كسرت ضهري روح يا شيخ منك لله. رفعت ايديها للسما و قالت: -يا رب يا حازم تتجوز واحدة أهبل من ملك و منه ها. و قامت دخلت اوضيتها و هي بتبرطم. ملك بصت ليه لقته مصدوم رفعت ايديها و قالت بصوت عالي: -آمين يارب آمين. حازم بصلها و ملك بصتله من فوق لتحت و قالت:

-و ريا يا كريم شانيه على المطبخ ورانا شغل كتير و سابته و مشيت و هي بتغني. حازم : -دا إيه بيت المجانين اللي أنا دخلته برجلي تاني دا مش كنت مستريح من الهبل دا. ملك : -حازم سمعاك. حازم : -وراكي عشان المطبخ هو أنا أقدر و كمل بصوت واطي ربنا على الظالم المفتري. منه قاعدة باين عليها التعب و منال قاعدة قصادها بتحضر في الغدا. منال : -تاوّليني يا بت معلقة من عندك. منه جت تقوم مش قادرة و الضرب اشتغل في بطنها. منه بصراخ:

-الحقوني أنا بولد يا بشر يا اللي عايشين في البيت أنا مش قادرة حد يكلم سبع البرومبة بتاعي يجي. ملك دخلت على صوتها و قالت بسخرية: -و سبع البرومبة بتاعك هيعملك إيه يختي هيشد راس العيل. حازم جه جري على صوتها و قال: -اية في اية. منه بصراخ: -هولد هولد. ملك : -انت لسة هتسال و تنبهر شيل يلا ارميها في أي عربية من اللي برة و على المستشفى عدل. حازم شال منه فعلا و الكل جري وراه و ملوك نزلت جري عشان تروح معاهم. ملك لسه جاية

تركب حازم وقفها و قال: -انتي هتروحي إنتي و بنتك كدا الناس هتترعب من شكلكم. ملك بفخر: -لا متخافش جبت اسيتون معايا و المناديل كدا كدا في العربية أخلص البت هتولد مننا في الشارع. حازم ركبهم و طار بالعربية و ملك اتصلت بمالك و هي بتشيل الميكب. ملك بابتسامة: -اية يا حبيبي عامل ايه يا روح قلبي. حازم بص لـ ملك و رفع نص شفته و قال في نفسه: -اية النيلة دي يا ربي. مالك : -اية يا حبيبتي عاملة اية و الدنيا معاكم عاملة اية.

ملك لسة هترد سمعت صوت جمبه فقالت بغيرة: -مين أم صوت عرسة اللي بتتكلم جنبك دي. مالك بحذر: -السكرتيرة يا روحي. ملك : -اممم قولتلي السكرتيرة. منه صرخت جامد و قالت: -هو دا وقته يا بنت الصرمة. منال : -ما تسيبي البت تلقط رزقها و تنكد على الراجل. ملوك سقفت و قالت: -البطيخة بتاعت منه هنفرقع هيه هيه و هتجيب بيبي ألعب بيه و اضربه هيه هيه. ملك : -حازم اطلع بينا على الشركة دا بيقولك سكرتيره و صوتها مسرسع. منه : -اية و وليد معاه.

ملك بخبث : -أكيد يعني هو دا بيفوت أي حاجة فيها موزز يا منه ما انتي عارفه جوزك. منه صرخت من الوجع و قالت: -مهو المشكلة إني عرفاه اطلع على الشركة يا حازم لازم اقفشه متلبس. ملك نسيت إن مالك لسة على التليفون فقفل و رن تاني. ملك : -اية يا بتاع السكرتيرة متقولش حاجة إحنا هنيجي نعاين البضاعة بنفسنا. مالك : -طيب طيب منه بتصرخ ليه. ملك بلا مبالاة:

-مفيش أصلها بتولد أهي على الحالة دي بقالها ربع ساعة لحد ما خرمت طبله ودني يرضيك يا لوكا. مالك بخضة: -اية بتولد طب انتوا فين دلوقتي. ملك بانشراح: -حازم جايبنا و جايين نقفشكم متلبسين في الشركة. مالك لطم على وشة بصمت و قال في نفسه: -ينهار أسود ينهار أسود أنا مش عارف هيعملوا فيا إيه تاني. تمالك نفسة و قال لـ ملك: -حبيبتي اديني حازم ثواني. ملك : -حاضر يا حبيبي. ملك مد اديها بالتليفون لـ حازم و قالت: -خد أخوك عاوز يكلمك.

ملوك شدت التليفون منها و قالت بفرحة: -بابي شوفت منه البلونة بتاعتها هتفرقع و يطلع منها نونو صغير. مالك : -كانت ناقصاكي انتي كمان. و كمل بهدوء و قال: -ملوك حبيبتي إدي التليفون لـ حازم. ملوك مدت التليفون لـ حازم و قالت: -خد كلمه يخويا أصل انت أخوه و أنا لقيتني على باب جامع. حازم كلم مالك و قال: -ها يا مالك. مالك بزعيق: -انت إزاي تسمع كلامهم و تجيبهم على الشركة طير بيهم على المستشفى. حازم : -انت بتزعق

كدا ليه و كمل بزعيق و قال: -ما أنا متنيل على عين أمي اهو و واخده و ماشي اية في اية بقي. مالك : -انت بتعلي صوتك عليا طب لما اجيلك يا إبن الكلب. حازم قفل في وشة و هو بيقول: -ناقصة عطلة هي وإلا تهديد. منه شدت حازم من شعره و قالت: -أخلص يا كلب انا تعبانة قوي والله. حازم : -ما أنا شايق على أعلى سرعة اهو انتي اللي مش صابرة. وليد قاعد في المكتب ولا في دماغه أي حاجة فجأة لقي اللي دخل عليه المكتب بسرعة. وليد بغيظ :

-اية في اية حد يدخل على حد كدا. مالك : -اخرس و يلا قدامي. وليد وقف مكانة و قال: -لا أنا مش هتحرك من مكاني غير ما أعرف إحنا رايحين فين و شوح بايده. ملك : -انت هتردحلي يا إبن الكلب قدامي مراتك بتتنيل بتولد. وليد اتصدم و قال في سره: -منه بتولد إزاي و لية و بص لـ مالك و قال: -بس يا عم بقي بطل هزار ورايا شغل. مالك سحبه من قميصه و قال: -انت لسة هتتصدم أخلص يا إبن الكلب البت زمانها ولدت أصلا. و خده

جر لحد العربية و هو بيقول: -يا رب الصبر على أم العيلة دي بدل ما انتحر. حازم وصل على المستشفى و كلهم نزلوا و حازم شال منه و دخلها على جوه. حازم : -دكتور بسرعة. الدكتورة جت و قالت: حطها هنا. كشفت عليها بسرعة و قالت: -دي لازم تدخل العمليات حالا دي خمس دقايق و هولد. منه : -أبدا مش هولد غير ما الباد بوي بتاعي يجي و اصرخه زي ما ملك عملت مع مالك. ملك بصدمة:

-اه يا بنت الجزمة وخداني قدوة ليكي اخلصي يا بنت الصرمة الواد اللي في بطنك هيجراله حاجة. منه بصت للدكتورة و قالت: -هو مينفعش نستنى شوية صغيرين. الدكتورة للتمريض اللي واقف يضحك : -خدوها دي شخلها مخبول جهزوا العمليات بسرعة على ما أجهز و أجي. التمريض خد منه اللي بتصرخ و بتقول: -ملحقتش اشتمه و اعضه محظوظ من يومك يا وليد بس انا وأنت و الزمن طويل. و بصت للممرضة و قالت:

-جري بالراحة يختي بدل ما أنزل اجيبك من حواجبك دي و أنا لا بيهمني حمل ولا نيلة. يدوب منه دخلت العمليات و مالك و وليد جم. وليد بقلق: -ها منه حصلها حاجة. ملوك بزعل: -اه دخلت تفضي كرشها و هي زعلانة. وليد : -زعلانة. ملوك: عشان ملحقتش أشردك يا وليد وأعض فيك، بس أنا مش بحب منه. زعلانة؟ هات إيدك كدا. وليد اداها إيده باستغراب، وملوك عضته جامد. وليد: آه يا بنت الـ*ـلب، بقِي أنا أخلص منها وتجيلي إنتي؟

ملوك: متشتمش يا وليد، بدل ما أضربلك البيبي أول ما يجي. وليد بصلها من فوق لتحت وقال: قادرة وتعمليها يا ملوك. منه جوه عمالة تصرخ لحد ما ولدت وقالت: الحمد لله. جعبل الشرف بالسلامة، أنام أنا بقي. ونامت فعلاً. وليد واقف بره، أول ما سمع صوت البيبي جري على باب الأوضة وهو مش مصدق. أول ما الممرضة خرجت، أخد منها الولد بلهفة وقال: حبيبي، نورت الدنيا يا روح قلبي. وبقي يبوس فيه وعيونه دمعت. أخد الولد وراح لمالك وقال:

أنا بقيت أب يا مالك. مالك هز رأسه وقال: مبروك يا حبيبي، يتربى في عزك وحياتك يا رب. وليد ناوله البيبي وقال: أذن في ودن مالك الصغير يا مالك. مالك بص له بصدمة وقال بصوت مهزوز: يعني إيه؟ وليد: يعني أنا قررت أسمي ابني على اسمك يا مالك، وأتمنى من ربنا إنه يطلع شبهك في كل حاجة. وباس على إيد مالك وهو بيقول:

انت بالنسبة ليا مش أخ وخلاص، انت صاحبي وأخويا وأبويا كمان، علطول في ظهري من غير ما أطلب، والأهم من كدا إنك بتحبنا زي ولادك بالظبط مش إخواتك. مالك ناول مالك الصغير لملك وحضن وليد وهو بيقول: انت فعلاً مش أخويا، انت ابني وصاحبي وكل ما ليا في الدنيا يا وليد. حازم بدموع من الموقف: طب ما تحبوني معاكم. التلاتة حضنوا بعض، وملك دمعت. ومنال جت لقتهم كدا، شهقت وقالت: في المستشفى يا كلاب؟ هتتفاهموا غلط يا ولاد الـ*ـلب.

التلاتة بصولها وضحكوا لأن كلامها مش ماشي مع الموقف. ملوك عمالة تحاول مع ملك عشان تاخد منها مالك. ملوك: يا مامي بقي، عاوزة ألعب معاه، هاتيه أشيله شوية. ملك: تؤ تؤ، غلط عليه، آخرك بوسة ومن بعيد كمان، وهتدفعي حقها. ملوك ضربت رجليها في الأرض وراحت لحازم وقالت: حازم، عاوزة أشيل النونو. حازم بغمزة: هخليكي تشليه بس متقوليش لحد. ملوك هزت راسها بفرحة وقالت: ماشي. حازم شال ملوك وباسها وهو بيقول: يخربيت طعامتك يا بنت انتي.

منه خرجت من العمليات والكل التفت عليها. منه بخطرفة: ملحقتش أضربـ*ـه وأشتمـ*ـه. لازم نعيد الولادة من الأول. ملك: البت اتهبلت، كفاية مرة واحدة يختي، أنا طبلة ودني خلاص. مالك شال مالك الصغير وأذن في ودنه، وملك أخدته منه تاني وقالت: بسم الله ما شاء الله، الخالق الناطق. خالتك ياض، هات بوسة بقي. وقعدت تبوس فيه. الكل بصلها باستغراب لأنه مفهوش شبه منها، وكله ملوك. منال: شبهك منين بقي؟

الواد هيطلع وحش كدا، دا طالع قمر للبت ملوك. ملوك بفرح: أنا شبهي أنا يا تيتا. منال: أيوة يا قلب تيتا، من كتر مناكفتك في منه وهي حامل، الواد طلع شبهك بالظبط. ملوك بقت تتنطط وتقول: هيه هيه هيه. منه بخطرفة: يلا يا وليد يا ابن الـ*ـلب، انت السبب في اللي أنا فيه دا. انتِ يا أم حواجب مش حواجب، جري السرير عدل بدل ما أقوملك. فتحت عينيها وقالت: وليد انت فين؟ وليد بضحكة مكتومة: أنا أهو يا منه، عاوزة حاجة يا روحي.

منه بصت لإيديها وقالت: وليد، صوابعي يا وليد، الدكتورة بنت الـ*ـرمة خدت منهم صباع. وليد بضحك: لا يا منه، صوابعك كاملين. منه بخطرفة: لا، خدت صابع من إيد حطته في الإيد التانية. مالك همس لملك وقال: شايفة كانت عاوزة تعمل زيك. ملك: أنا محدش يقلدني يا حبيبي. مالك: فاكرة يوم ولادتك يا لوكا. ملك هزت راسها وقالت: وهو دا يوم يتنسي. وضحكت وقالت: من أوله وهو باين. مالك ابتسم للذكري وقال: بس جاتلي فيه أجمل هدية في العالم.