رواية خادمة قلبي الفصل الثالث والعشرون 23 - بقلم زهرة عصام

منال: انتي كويسة يا بت؟ منه: لوز اللوز. دماغي صدعت من الخناقة دي، هنفضها إزاي؟ منال بخبث: أنا هقولك هنفضها إزاي. منه بتعجب: تعجبني، هاي الدماغ الشريرة. وضحكت بخبث وقالت: عندي خطة أحسن. منال: اتحفيني، دا أنا أمك حبيبتك. منه دخلت الحمام و جابت خرطوم ماية وقالت: بعد إذن سيادة الوالدة، ممكن تفتحي الماية؟ منال دخلت جري فتحت الماية وخرجت بسرعة تتفرج. منه واقفة في الشباك و موجهة الخرطوم على تحت، والماية نازلة على دماغ الكل.

أهالي الحارة بقت تجري، كل واحد عاوز يتحامي في شقته. منه لمحت إسماعيل بيتسحب، ووجهت الخرطوم عليه. إسماعيل بقي يقع و يقوم و يقع و يقوم و يقع، لحد ما استسلم للأمر الواقع. بص لها بغيظ وقال: ماشي يا منه، ماشي. منال قفلت الماية. ومنه قالت بصوت عالي: حاج إسماعيل، إلا أنت كنت معاهم يا راجل؟ طب مش تكح عشان أعرف و آخد بالي منك. إسماعيل: ابقي افتكري اللي انتي عملتيه دا، عشان مش هيعدي بالساهل.

منال بسخرية: يلا يا إسماعيل من هنا، أنا ماسكاها عندك بالعافية أصلاً. اتكل على الله يخويا. إسماعيل مشي وهو بيتوعد لهم إنه هيطربقها فوق دماغهم. منه: منولة، عندك قلة نكسرها وراه؟ منال بصت لها من فوق لتحت و قلعت الشبشب وقالت: دا أنا اللي هكسر عضمك في بعضه يا بنت الـ... بقي تقومي الحارة كلها حريقة و جاية تشقي في اللبانه قدامي كدا عادي؟ منه وقفت وراها وكملت

أكل في اللبان وهي بتقول: خلاص هشقي من وراكي يا منولة، ولا تزعلي نفسك يا قلبي. منال بصت لها بغيظ وبعدت خطوة وحدفتها بالشبشب. منه بفرحة: مجاتش فيا يا منو. مكملتش الكلمة و لقت فردة الشبشب التانية في وشه. منه بدوخة: نشنت يا معلم، تسلم إيدك يا سيد المعلمين. *** مالك كان شايف نظرات الإعجاب من حازم، اتعصب وقال: حازم، كام مرة هنهبطك؟ وأنت بص لـ ملك وقال بحزم: اللي قولتهولك يتنفذ دلوقتي حالا. ملك: استني أخلص اللي في إيدي بس.

وبصت لريا بشر وقالت: بقي إنتي بقي بتخلي بالاتفاق؟ تعالي بقي يا حلوة. وليد: يمين يا جميلة، شمال، يمين، شمال، القاضية يا جميلة. منخير ريا نزلت نقطتين دم. وليد هيص وقال: الله أكبر، شبح المنطقة والمناطق المجاورة. ملك قامت من على ريا وبصت لها بقرف وهي بتقول: يا ربي، لازم أربي الأشكال اللي زي دي على الصبح كل يوم كدا. ومشيت على أوضتها وهي بتبرطم وتقول: دهية لما تاخدكم كلكم. يلا. ورزعت الباب وراها.

مالك: البنت دي اتهبلت، والله العظيم فيوزتها ضربت. حازم قام دخل أوضته، ووليد ساعد ريا بأمر من مالك ودخل أوضته. ريا بغيظ: جربوعة أوي، ورحمة أمي لاوريكي يا جميلة الكلب. يومين بالظبط وهتبقي بره الفيلا دي، وساعتها بقي مالك وفلوسه هيبقوا ملك ليا أنا وبس. دخلت أوضتها ومسكت التليفون وقالت: الو، جهزتوا الورق كله؟ -كل حاجة جاهزة، مستنين أوامرك بس. هتخليه يمضي امتى؟

ريا: الصفقة ليكم، أما العز دا ليا أنا. انتظر مني تليفون خلال الأيام الجاية. وقفت وهي بتفكر في فكرة خبيثة تطلع بيها ملك من البيت. *** ملك رجعت لبست الجلبية الرجالي تاني وعملت مكياج خلاها زي العفاريت بالظبط. وظبطت شعرها وخرجت بره. حازم بالصدفة كان خارج يشرب، شافها وصرخ جامد وقال: أعوذ بالله من الشيطان الرجيم. ملك: إيه يا سعادة البيه كريم شانتيه؟ شوفت عفريت؟ يخويا ما أنا متلقحة قدامك طول اليوم.

حازم: كنت مفكر مش هتلبسي الهدوم والمكياج تاني. ملك: لا، البيت دا طاهر وهيفضل طول عمره طاهر. وبعدين كل واحد بيرجع لأصله يا سعادة البيه كريم شانتيه. أقولك إيه بس يخويا، أحزان، عليا الطلاق أحزان. مالك شايفهم بيتكلموا مع بعض، الغيرة اتملكت منه. راح لهم وقال بغيظ: انتوا بتعملوا إيه؟ حازم: تعال يا مالك شوف جميلة رجعت سيد قشطة تاني. ما كنت خليكي بسبوسة بالقشطة. مالك بغيظ: حازم، يلا أوضتك دلوقتي.

حازم مشي وهو مش فاهم حاجة، بس مشي عشان ميحصل مشاكل. ملك بصت لـ مالك بعيون قطة. وهو ضحك من جواه على منظرها، بس تصنع الصرامة وقال: انتي ماشية توزعيلي ابتسامات وضحكات وبتحكي مع الكل؟ ينفع؟ ملك هزت راسها بالنفي وقالت: حقك عليا يا سيد الناس. وغمزت: بتغيري يا بيضة؟ وبعدين دا حازم عادي يعني. مالك همس ليها وقال: لو من أبوكي وأمك نفسهم هغير، انتي بتاعتي. ضحكتك، كلامك، شكلك، كله بتاعي. فاهمة يا ست الحسن؟

ملك بهيام: بجد يا مالك، أنا ست الحسن بتحبني قد إيه؟ مالك بص في عينيها وقال: زاد حبك بقلبي لدرجة لو خيروني بين كنوز الأرض وعشقك، لاخترتك دون تفكير. ملك بصت في عيونه ودمعت وهي بتقول: أد كدا بتحبني يا مالك؟ صدقني بحبك أكتر. وهمست في ودنه: وهحبك أكتر لما تمشي رشدي أباظة اللي جوه دي. مالك ضحك بصوته كله وقال: انتي مشكلة كبيرة. *** ريا قاعدة في الأوضة وعمالة تاكل في ضوافرها خايفة تخرج لحسن ملك تضربها تاني.

وعمالة تفكر هتخلص منها إزاي. فجأة عينيها وقعت على خاتم ليها، بصت له قوي وضحكت بخبث وقالت: قولتللك هخرجك بفضيحة يا جميلة الكلب. وضحكت بصوت عالي. *** منال ومنه قاعدين بيتفرجوا على مسرحية العيال كبرت. فجأة الباب خبط. منه: ما براحة يا جدع، إيه؟ قاعدين ورا الباب؟ فتحت الباب لقت قدامها تلت ستات. منه: خير يا ست منك ليها، عاوزين إيه؟ -انتي بقي منه شبح المنطقة واللي علمتي على الحاج إسماعيل؟ منه: أيوه أنا يا عنيا، في حاجة؟

وبعدين لحظة، الحاج إسماعيل؟ أممم، كدا بان على الآخر. وشمرت كومها وقالت: اتفضلوا اتفضلوا، دا إحنا هنكرموكوا آخر كرم. الستات دخلوا وهما عاملين حسابهم إنهم هيطحنوا منه. فدخلوا ببرود. منال بحاجب مرفوع: ودا من إيه إن شاء الله؟ مالهم داخلين فارين بجناحتهم كدا؟ منه بلوية بوز: قرايب الحاج إسماعيل. ختمت كلامها بغمزة. فمنال فهمت هما جايين ليه.

منال: امم، الحاج إسماعيل. طيب، خلصي بسرعة على ما أجيب شوية لييب من جوه. الحتة الجاية من المسرحية دي هايلة، لازم أشوفها بمزاج. وسابتهم ودخلت. منه بخبث: ها يا حلوين، تحبوا نبدأ بمين فيكم؟ واحدة من الستات خلاص جابت آخرها من برد. منه هجمت عليها وهي بتقول: دا انتي متوصي عليكي أوي يا به. منه: به؟ أنا يتقالي به؟ حلو، غلطت. وأنا كنت مستنياها تغلط. منولة، تعالي إيدك معايا يختي. ***

ريا بتتسحب عاوزة تدخل أوضة ملك، لكن مش لاقية الفرصة المناسبة. ملك بحاجب مرفوع: مالك واقفة مش على بعضك ليه؟ ريا: ها؟ وإيه اللي مش هيخليني على بعضي؟ ركزي في شغلك أحسنلك. أنا أصلاً عيني عليكي. ملك بلوية بوز: قطيعة تاخدك إنتي وشعرك في ساعة وحدة. وسابتها ومشيت. ريا بصت يمين وشمال، ملقتش حد. دخلت بسرعة الأوضة وقفلت وراها وهي بتبتسم بخبث.