رواية خارج عن المألوف الفصل الثالث والأربعون 43 - بقلم نشوه عادل

وقفت الأفعى الذكر تراقب الشاليهات بتركيز وفجأة اختفت. تاني يوم الصبح صحي حازم وقال: "إيه يا جدعان مشبعتوش نوم؟ مش كفاية ضيعنا يوم كامل في النوم؟ فارس: "يا عم بقى، الواحد كان هلكان من الطريق، ارحمنا." آدم: "الواحد الطبيعي على الصبح بيقول صباح الخير يا عم الحازم." حازم: "الطبيعي بقى أنا هروح أصحي البنات على ما تفوقوا، خلونا نروح ناكل."

خرج حازم من الشاليه وكان المنظر يجنن بشكل المياه والجبال عن بعد، لكن بالرغم من جماله إلا أن هدوءه مخيف. راح حازم على الشاليه وخبط لحد ما صحيوا. روان بنوم: "صباح الخير." حازم: "صباح النور، يلا فوقوا بقى عشان نروح نفطر ونحضر البروجرام اللي هنعمله النهاردة." روان: "أوك." بالفعل صحي الكل وراحوا فطروا وقضوا يوم لطيف جداً برة، واندَمَج ياسين معاهم بشكل كبير، ورجعوا على الشاليهات ياخدوا شاور ويرتاحوا. مازن:

"طب يلا يا حلوين جهزوا نفسكم واخرجوا، هعملكم سفاري نايت محصلتش." هبة: "أيوه بقى دلعني." بالفعل جهز مازن النار وكل حاجة لزوم القعدة. فارس: "إيه الملل ده يا جدعان؟ ما تيجوا نلعب ولا نعمل أي حاجة؟ ماسة: "حلو بس هنلعب إيه؟ فارس: "أي حاجة." مارينا: "ما تيجوا ندور في أم الشاليهات دي على كوتشينة ولا دومنة ولا أي حاجة تسلينا." مازن: "والله فكرة، أنا شوفت مخزن سري جوة في الشاليه أكيد هيكون فيه حاجة." حازم: "فين ده؟ مازن:

"تعالوا ورايا." قام الكل وراح وراه لمكان المخزن. حازم: "الله يخربيت عقلك، عرفت مكان المخزن ده منين؟ مازن: "ما أنت عارف مابيهداش ليا بال غير لما اكتشف المكان اللي عايش فيه." فتح مازن المخزن ولقوا حفرة بسلم لمكان تحت الأرض. ياسين: "إيه ده؟ بصوا ده سرداب ولا نفق؟ آدم: "عندي فضول أعرف في إيه." حازم: "يا جماعة بلاش يمكن تكون حاجة خاصة بالناس أصحاب الشاليه ولا حاجة." آدم:

"يا عم حازم ما تعقدهاش، وبعدين لو مهمة زي ما بتقول كان السمسار قال لينا ملكوش دعوة بيه." فارس: "والله الراجل ده بيقول كلام زي الفل." شغل الكل الكشافات ونزلوا واحد ورا التاني، مشيوا في نفق طويل وفجأة وصلوا لترابيزة عليها صندوق غريب وقديم. مازن: "إيه الصندوق ده؟ مسكته ندى وقالت: "شكله قديم بس إيه الرسومات اللي عليه دي؟ هبة: "حاساها شبه الكتابة الفرعونية القديمة." مارينا: "أيوه صح جداً، استنوا أعمل سيرش كده."

فتحت مارينا الجوجل لكن ملقتش شبكة وفجأة جه صوت من وراهم: "بتعملوا إيه هنا؟ صرخت البنات والشباب وقفوهم وراهم. ياسين: "أنت اللي مين وإزاي تدخل كده من غير استئذان؟ الشخص: "أنا نائل المرسي سمسار هنا وكنت فاكر إن الشاليه فاضي، إيه اللي جابكم هنا؟ آدم: "ولا حاجة، مجرد فضول بس يا حاج نائل." خبطه حازم في رجله. نائل: "طيب الأحسن نخرج من هنا، النفق مفيهوش أكسجين كتير." حازم: "أحسن حاجة، يلا يا شباب." مازن:

"ممكن ناخد الصندوق ده معانا ولا فيها مشكلة؟ نائل: "لا عادي هاتوه." بالفعل خرج الجميع ومعاهم نائل. حازم: "هو إيه جاب حضرتك هنا؟ نائل شاور على واحد من الشاليهات: "أنا ساكن هنا، الشاليه ده بتاعي." آدم: "غريبة بس إحنا مش شوفنا حضرتك امبارح." نائل: "رجعت بليل متأخر وماكنش فيه صوت عشان أعرف إن فيه حد هنا." فارس: "معلش أنا آسف على سؤالي السخيف، أنت إزاي عايش في المكان ده لوحدك وهو مقطوع؟ نائل:

"بحب الهدوء والانسجام والمكان ده أفضل مكان للتأمل." ندى: "كفاية كلام بقى ويلا نفتح الصندوق ده نشوف جواه إيه." فتحوا الصندوق ولقوا جواه ورق غريب وقديم جداً. مازن: "إيه الورق ده؟ كوتشينة دي ولا إيه؟ حازم: "كوتشينة إيه يا أهبل أنت؟ آدم: "أومال إيه الورق ده؟ شكله قديم ومرسوم بالإيد على فكرة." مسكه ياسين وقال: "ده ورق تاروت." فارس: "يعني إيه تاروت؟ ياسين:

"ورق كده بيستخدموه المنجمين والفلكيين في قراءة الأبراج والتنبؤ بالمستقبل، بس كل ده هبل وحرام طبعاً لأنه لا يعلم الغيب إلا الله." ماسة: "واااو وأنت عرفت الموضوع ده منين؟ ياسين: "بحب القراءة وكان جه عليا فترة وانغمست شوية في العلم ده بس بعد كده سيبته لأنه كان حرام." مارينا: "بليز اقرأ ليا برجي عشان خاطري." ياسين: "أنا وقفت الموضوع ده من زمان وزي ما قلتلك حرام." مارينا:

"بليز أرجوك، دي لعبة يعني مش حاجة هنصدقها بس أهو تغيير بدل الملل." حازم: "خلاص يا ياسين معلش خدها على قد عقلها، عيلة وشبطت." مارينا وهي بتطلع لسانها: "ده أنت رخم." مسك ياسين الورق وبدأ يفنطه على شكل وردة وفي النص الورقة الأخيرة وقال: "أنتِ برج العقرب." مارينا بتفاجئ: "مضبوط، إيه باين قدامك بقى؟ ياسين:

"الفترة الجاية وقريب قوي هتكسبى فلوس من لعبة أو رهان حاجة شبه القمار بس هيجيلك دولارات بعدد فردي، أنتِ طموحة جداً بس عنيدة، عارفة طريقك بس مجرد عندك ممكن يخليكي تمشي في الطريق الغلط." مارينا: "وااااو أنا فعلاً كنت مراهنة على سباق حصان بس لسه لحد الآن ما جاش ليا حاجة، طب إيه الورقة الغريبة اللي في النص دي؟ ياسين: "ده ساحر في السيرك، خلي بالك تحبسي نفسك جوة صندوق لأن دي نهايتك." استغربت مارينا بس ضحكت عادي. روان:

"طب شوفلي أنا كمان." ياسين: "كده مش هنخلص." آدم: "لا ما أنت هتشوف لينا كلنا ومش هتخلص مننا، يلا." ياسين فنط الورق وقال: "أنتِ برج الجوزاء." روان: "أيوه حصل، قولي بقى هيجيلي فلوس زي مارينا؟ ياسين: "لا بس تفوق دراسي وعلى الأغلب هيختاروكي في منحة دراسية لدولة آسيوية." روان: "أنا فعلاً مقدمة على منحة كوريا يا رب يوافقوا." ياسين: "بلاش فضولك ياخدك في مكان أنتِ متعرفهوش وتطلعي السلم." روان:

"سلم إيه يا عمنا، ما علينا أهم حاجة المنحة." طلبت ماسة يقرأ ليها. ياسين: "برج العذراء، أنتِ متخيرة ما بين شخصين والاثنين متعرفيش تعيشي من غيرهم بس أنتِ هتختاري اللي بيفهمك مش اللي بيحبك، خلي بالك أوعي تمشي في الطريق الغلط عشان المهرج مش هيسيبك." بعد كده جات هبة. ياسين:

"برج الحوت، بتحبي المغامرة واكتشاف الجديد بس من النوع الجبان اللي بيهرب من خوفه بدل ما يواجهه، بس خلي بالك الحبل اللي هتفكري إنه طوق النجاة هو سبب موتك ووووو.....