رواية خاينة الفصل الخامس 5 - بقلم احمد عبد المعز

جاسر بان عليه الارتباك أوي، بس لحق نفسه وقال لعمر: "اصل أنا قابلت رحاب وأنا جايلك، شوفتها سايقة عربيتها وكانت منهارة وبتعيط. وقفتها وهدتها شوية، وقلت أجي أتكلم معاك عشان تفهمني في إيه." عمر حس إنه شكله بقى وحش أوي قدام جاسر عشان شك فيه، وجاسر كمان حس إن عمر بيشك فيه. عمر: "طب هي قالتلك هي رايحة فين دلوقتي؟ جاسر: "أيوا طبعًا، قالت إنها رايحة بيت أهلها." عمر: "طب هي قالتلك إن أهلها مسافرين الفيوم؟ جاسر: "لأ."

عمر: "طب يالا بسرعة نروح عند بيت أهلها، فرصة إنهم مش هناك عشان أعرف أصلحها وأرجعها معايا." جاسر: "اللي تشوفه يا عمر." عمر خد جاسر وخد عربيته ومشيو، وسابو عربية جاسر عند بيت عمر. ولما وصلوا عند بيت أهل رحاب، نزلوا من العربية. عمر فضل يبص على عربية رحاب قصاد بيتها، بس العربية مكنش ليها أي أثر.

عمر اتغاظ أوي واتخنق، وراح طالع هو وجاسر على بيت أهل رحاب. وفضلوا يخبطوا على الباب جامد ويرنوا جرس الشقة، بس للأسف مكنش في حد في الشقة خالص. عمر نزل هو وجاسر ومش عارفين يعملوا إيه. عمر: "بقولك يا جاسر هنعمل إيه دلوقتي؟ جاسر: "روح دلوقتي يا عمر، وأنا هتصرف. يمكن رحاب راحت تتمشى شوية من زعلها، أو راحت شوية على الكورنيش." عمر: "يعني انت شايف كده؟ جاسر: "طبعًا يا عمر، وأول ما أعرف أي شيء هبلغك بيه على طول."

عمر: "حاضر يا جاسر." جاسر: "يالا يا عمر وصلني عند بيتك عشان أخد عربيتي." عمر خد جاسر وراحوا عند البيت، وجاسر خد عربيته ومشي. عمر فضل قاعد شوية في عربيته بيفكر، مش عارف يعمل إيه. شوية كده وتليفون عمر رن. عمر: "الو، ازيك يا مايا؟ مايا: "الحمد لله يا عمر بيه، أنا آسفة إني اتصلت وحضرتك في إجازة زواج، بس غصب عني صدقني."

عمر: "مفيش حاجة يا مايا، انتي سكرتيرتي ومن حقك تتصلي بيا في أي وقت، خصوصًا إنك إنسانة نشيطة جدًا في شغلك وذكية." مايا: "اصل أستاذ هاني أبو النيل المحاسب مقدم عندي تقرير بفرق مصاريف ييجي مليون جنيه، ولما سألته رد عليا وقال إن أستاذ جاسر بيسحب على مكشوف من الشركة." عمر: "والكلام ده من إمتى؟

مايا: "الكلام ده من حوالي خمس شهور، بس المصاريف زادت أوي عن حدها، الشئ اللي خلاني أستغرب وأتصل بحضرتك في يوم زي ده، يمكن حضرتك تفيدني بأي شيء." عمر: "خلاص يا مايا، أنا هتصرف، ويا ريت محدش يعرف جاسر إني عرفت حاجة عن الموضوع ده. ويا ريت تخلي المحاسب هشام إمام والمحاسب سامح سليمان يتصلوا بيا ضروري، وبلغيهم إنهم ميجيبوش سيرة لحد إنهم هيكلموني." مايا: "تحت أمرك يا عمر بيه."

عمر قفل التليفون مع مايا، وبدأ يفكر في جاسر بطريقة تانية خالص. عمر فكر يروح لجاسر البيت يتكلم معاه عن الشركة من غير ما يعرفوا حاجة عن اللي سمعه. عمر حب يكلم جاسر ويجس نبضه عن الشركة. وفعلًا عمر خد عربيته وراح على بيت جاسر، وهنا كانت المفاجأة الكبيرة. عمر شاف عربية رحاب عند بيت جاسر. عمر نزل من عربيته.