رواية خداع نفسي الفصل الثالث عشر 13 - بقلم الاء هاني

مرفت بزهق: قوم بقا يا بنى حرام عليك. رحيم بنوم: سيبنى شوية يا ماما. مرفت: يبنى قوم، فى عريس يبقى نايم كل دا. رحيم: بلا عريس بلا بتاع بقى. مرفت بزهق وهى طالعة من الأوضة: أنا زهقت منك. فى المطبخ. منى بانشغال: اطفي على اللحمة دي يا عطر. عطر: حاضر. مرفت دخلت المطبخ وباين عليها الضيق. منى: لسه مصحاش. مرفت بزهق: لأ،

وكملت بعصبية: أنا مش عارفة أنا إيه العريس اللي بينام للضهر دا، ولا فيه حماس ولا فرحة، كدا مش عارفة ماله، مش دا اللي كان مبسوط لما راح يتقدم؟ وكملت بخبث وهي بتبص لطيف: ماتطلعي تصحيه يا طيف. طيف بتوتر: ما بلاش يا خالتي، وبعدين أنا مش فاضية، أنا بنقيلكوا الرز، خلي رحيل. مرفت: رحيل أنا عايزها عشان تساعدنا نخلص باقي الأكل. طيف بضجر: حاضر، حاضر. فوق. طيف: رحيم. رحيم بنوم: اممم. طيف: اصحى يلا. رحيم بنعاس: خليني شوية.

طيف: انت أول مرة تنام كل دا. رحيم: كنت بكلم لوجي ونمت متأخر. طيف بغيظ: لوجي، ماشي يا رحيم. وجابت كوباية ميه من على الكمودينو وكبتها على وشه بغل. رحيم بشهقة: إيه، فيه إيه. طيف وهي تضغط على سنانها: قوم يا عريس، صباح الخير. رحيم بضيق: فيه حد يصحى حد كدا. طيف: آه، يلا قوم، جدك وعمك وآدم ويحيى من الصبح متبهدلين في التجهيزات وأنت نايم، آدم ويحيى راحوا أكتر من 50 مشوار وإحنا في المطبخ بنجهز الأكل وأنت مخمود.

رحيم وهو بيمسح على وشه: خلاص هقوم، بس أنا منمتش كويس. طيف بغيظ: عشان تسهر بعد كدا مع. و كملت بسخرية: لوجي. رحيم بابتسامة: مالك، حاسك مضايقة ليه. طيف بصتله نظرة هو مفهماش وقالت بخفوت: مش مضايقة، بس البيت مقلوب وأنت نايم ودوشة وشغل، يلا أسيبك عشان تجهز وتنزل. سعد: يلا يا ولاد. رحيم: أنا مش عارف البنات بتتأخر ليه. آدم بابتسامة: نازلين أهم. رحيل نزلت ووراها عطر، بعد شوية نزلت طيف. رحيم بتلقائية

ابتسم وقال بدون وعي: إيه الجمال دا. آدم بهمس: أنت رايح خطوبتك. رحيم بصتله بضيق. آدم: بفكرك، لتكون نسيت. يلا، طلعوا على بيت لجين. ثريا بابتسامة: أهلا أهلا. رحيم: ازيك يا طنط. ثريا: الحمد لله يا حبيبي، اتفضلوا. ثريا: محمود ادخل جيب لجين. محمود بضيق: حاضر. محمود دخل جابها وقعدها جمب رحيم في الكوشة. طيف كانت بتبصلهم بحزن شديد وتحاول متعيطش. آدم وقف جمبها وقال: بتحبيه صح. طيف: وبعدين.

آدم بتنهيدة: أنا معرفش هو بيعمل كدا ليه أو ليه لجين، بس أنا مش عارف أقولك. طيف بابتسامة: ادعيلي، ادعيلي يا آدم. آدم باس دماغها وقال: ربنا يهون عليك يا قلب أخوك. جيه وقت تلبس الدبل. لجين بخجل: ممكن تنادي رحيل تلبسهم لينا. رحيم بابتسامة: من غير ما تقولي. رحيم: ماما. مرفت: نعم يا ابني، خد الدبلة، لبسهالها. رحيم: معلش، نادي طيف تيجي تلبسهالنا. مرفت باستغراب: طيف. رحيم: معلش، اتلخبطت، هاتى رحيل. مرفت: حاضر. وشاورت لرحيل.

رحيل لبست لرحيم الدبلة وجيت تلبس لجين بصت لطيف بزعل وطيف هزت دماغها بمعنى يلا، ولبست للجين الدبلة. بدأ التصفيق يعلى، وجيه الشباب شدوا رحيم عشان يرقص، وجيت طيف شدت لجين عشان ترقص في وسط البنات معاها. بس لجين بصت لرحيم لقته بيبص جامد لطيف، وطيف خدت بالها، وفجأة سابت إيد لجين لما لقت رحيم جاي على ناحيتهم. رحيم بهدوء: أنت كنت هتعملي إيه. لجين: متخافش، أنا ما كنتش هر قص قدام الناس يا رحيم.

رحيم بص لجين وقال: مش أنت، أنت يا طيف كنت هتعملي إيه. طيف بخوف: كنت هاخدها ترقص في وسطنا، وكملت ببعض القوة: دي عروستك عشان نفرحها، حتى ولا إيه. رحيم بهدوء: لجين، أنت عايزة ترقصي. لجين هزت دماغها بلا. طيف بغيظ: طب تعالي حتى اقفي في وسطنا واحنا هنرقص. رحيم بص لها بغضب وقال وهو بيكز على سنانه: مين اللي هيرقص. طيف بثبات: أنا والبنات. قبل ما رحيم يرد كانت جيت مرفت. مرفت: إيه يا طيف مجبتيش لجين وجيتى ليه.

رحيم: هو أنت اللي بعتاها يا ماما. مرفت: أيوه، فيه إيه. طيف: أصل أستاذ رحيم مش عايزنا نرقص. مرفت: ودي تيجي، أكيد لأ. رحيم بضيق: خلاص خديهم ويدخلوا جوة يعملوا اللي هما عايزينه. وميل على طيف وهمس: إياك ثم إياك تنسي نفسك وأنت بترقصي، هكسرلك عضمك، ويا ريت مترقصيش خالص. طيف: خليك في حالك يا رحيم وروح شوف صحابك. رحيم لقى آدم ويحيى جاين عليه وخدوه بعيد. يحيى: هو إحنا آه مش طايقينك على عملتك السودة دي، بس لازم نوجب.

وبدأوا يرقصوا. = هتاكلي الواد بعينك. عطر بصتلها بخضة: حرام عليكي يا ميرا. ميرا: مركزة معاه ليه يا عطر. عطر: أصله قمر أوي، وحشني بقالي كتير أوي مشوفتهوش، سيبيني أملى عيني منه. ميرا: ولما هو وحشك نهيتي كل حاجة ليه. عطر بضيق: ملوش لزوم الكلام دا، ويلا عشان طنط مرفت بتنادي. البنات دخلوا جوة البيت. لجين بدأت ترقص مع أصحابها وطيف واقفة بتبص للفرحة اللي باينة على وش لجين. ميرا: إيه يا قمر، مش هترقصي. طيف بضيق: لأ.

ميرا بصدمة: لأ بقا، طيف اللي بتعشق الرقص مش هترقص. طيف بجدية: أرقص آه، بس مش قدام كل الناس الغريبة دي، اتحرج. ميرا: عين العقل. الخطوبة خلصت على خير وعدى 3 شهور عليها، طول الفترة دي وطيف بتحاول تتجنب رحيم على قد ما تقدر، وفي نفس الوقت مستغربة إن رحيم مش مشغول بلجين زي ما كانت فاكرة، وإن حياته ماشية عادي كأن مفيش لجين أصلاً.

ولجين اللي طول الفترة دي محدش عارف يمسك عليها غلطة، خلاص لجين بقت في نظر الكل البنت الكاملة المتكاملة. = جدي، أنا عايز أتجوز. سعد بصدمة: أنت عبيط يلا. رحيم: إيه العبط في اللي أنا بقوله. سعد: هو أنت مش كانت خطوبتك من 3 شهور. رحيم: حصل. سعد: أيوه، عايز تتجوز إيه بقا. رحيم: أنا خطبت، عايز أتجاوز بقا. سعد: مينفعش، إحنا قولنا كلمة للناس، اتجوز بعد 7 شهور من دلوقتي. رحيم بسرعة: لأ، عايز أكتب كتاب بس.

سعد بتنهيدة: ليه الاستعجال، اعرفها الأول. رحيم: أنا عارفها بما فيه الكفاية، بقالها معايا أكتر من 3 سنين. أحمد: بس يا ابني. رحيم: مفيش بس، أنا عايز أعمل كتب كتاب. سعد بيأس: اعمل اللي أنت عايزه. رحيم قام حضنه: ربنا يخليك لينا يا جدي. سعد: بس شوف رأي أم العروسة الأول. مرفت: هما زمانهم جاين. ثريا وبناتها ومحمود وميرا جم عشان معزومين على العشاء. بعد العشاء. رحيم: احم. محمود باستغراب: فيه حاجة يا ابني.

رحيم: بصراحة يا عمي، أنا عايز أكتب الكتاب. محمود بص له بضيق: الرأي رأي العروسة وأمها. رحيم: رأيك إيه يا لجين. لجين وهي بتبص للارض: اللي ماما تشوفه. رحيم: طنط ثريا. ثريا: ............ سعد بص لها بصدمة.