رواية خديجه الفصل الحادي عشر 11 - بقلم امنيه سليم

الو. الو. أنتِ فين. مع خديجة. فرح من جواه لما سمع اسمها. احم مقولتيش ليه. أنت كنت مشيت وأنا استأذنت من بابا وماما. في حاجة اسمها زفت موبيل. اسفة بس النهاردة مكنش عندي محاضرات قولت أجي أقعد مع خديجة. هي جنبك. لا هي بتكلم البنات وأنا قولت أكلمك وخايفة تخلص القصة وأنا لسه بكلمك. قصة إيه. قصة كعب بن مالك. مين ده.

ده صحابي من أصحاب النبي صل الله عليه وسلم. يلا بقا عشان عايزة أشوف إيه العقاب أو الاختبار اللي ربنا عاقبه بيه في الدنيا وهل هو نجح في الاختبار ولا لا. احم طب سيبي الخط مفتوح وروحي اسمعي. بجد. اخلصي يلا. أوكيه. ابتسم وعنده فضول يسمع خديجة وهي بتتكلم وبرضه عايز يعرف مين كعب بن مالك. نروح عند خديجة بقااا قبل شوية.

بصي بقا ياحبيبتي كعب بن مالك الأنصاري أسلم في بيعة العقبة. طبعًا كلنا عارفين إن النبي صل الله عليه وسلم كان مابيصدق موسم الحج ييجي عشان يكلم الناس عن الإسلام. وطبعًا هما كانوا للأسف بيعبدوا الأصنام والنبي اتكلم مع مجموعة جاية من يثرب اللي هي المدينة المنورة دلوقتي والحمد لله دخلوا في الإسلام.

اهو كعب ده من الناس اللي سمعت النبي صل الله عليه وسلم وصدقته وأمنت بيه. ولما النبي صل الله عليه وسلم هاجر المدينة كان كعب بيقعد يسمع النبي ويعمل كل حاجة ربنا أمره بيها. ولما النبي طلع يحارب الكفار سيدنا كعب خرج معاه كل الغزوات. بس للأسف غزوة تبوك الوحيدة اللي تخلف عنها. والمصيبة الأكبر إنها كانت آخر غزوة في حياة النبي والغزوة اللي ربنا أنزل فيها "لقد تاب الله على النبي" يعني ربنا بشرهم بالتوبة في الغزوة دي.

تعالوا بقا نشوف كعب بن مالك تخلف عن الغزوة دي ليه. النبي أمر المسلمين إنهم يجهزوا للجهاد وطبعًا كل الصحابة ابتدوا يجهزوا نفسهم ما عدا سيدنا كعب ومرارة بن الربيعة وهلال. وطبعًا المنافقين اللي بيظهروا الإسلام وهما بيكرهوه. سيدنا كعب كل يوم يقول أنا لو عايز أجهز هجهز بس مش دلوقتي. وكل يوم يقول بكرة بكرة لغاية ما النبي أخد الجيش وراح للأرض المعركة.

ساعتها كعب ابتدأ يندم إنه ساب النبي ومراحش الغزوة. بس الندم بعد فوات الأوان مينفعش. ورجع النبي صل الله عليه وسلم والصحابة وانتصروا في المعركة. سيدنا كعب رايح للنبي صل الله عليه وسلم سمع المنافقين بيخترعوا أعذار كذب في كذب والنبي ساكت. سيدنا كعب دخل على الرسول وهو حزين ومكتوف مش عارف هيقول له إيه. هيكذب وينجي نفسه؟ طب ربنا أكيد عالم إنه كذاب. طب أصدق والرسول يزعل مني؟ وقرر كعب إنه هيقول الحقيقة واللي يحصل يحصل.

النبي بيبتسم لكعب بعتاب. ماخلفك عن الغزوة يا كعب. بكاء وحرقة: والله يا رسول الله أنا تخلفت عن الغزوة من غير عذر ولا بسبب مرض ولا قلة صحة والفرس بتاعي شديد ولكن غلبتني نفسي. كعب عمل زي ناس كتير كل يوم هنتوب بكرة بكرة. وأكبر غلط عمله إنه مفكر لما يقرر إنه يتوب هيتوب. لا لو ملحقتش دلوقتي تتوب يمكن تندم بعدين بس بعد فوات الأوان. النبي ﷺ بص لكعب وقال له: أنتظر حتى يحكم الله فيك. مشي كعب مش عارف يقول إيه.

سأل واحد من الصحابة. حد قال له. هيرد عليه؟ أيوه هلال بن أمية ومرارة بن الربيع. وطبعًا بعد ما قالوا راحوا بيوتهم يبكوا من شدة الندم واعتزلوا الناس. النبي ﷺ أصدر قرار إني محدش يكلم كعب أبدًا ولا الاثنين اللي معاه. متخيلين يابنات إنك تعيشي في الدنيا من غير ما حد يكلمك؟ صحابك يخاصموكِ وأهلك وعيالك وكل الناس. وهما مش أي ناس دول أصحابه حبايبه أخواته في الله. سيدنا كعب يكلم أي حد منهم محدش يرد عليه.

وفي يوم سيدنا كعب كان بيصلي وراح صلى جنب النبي صل الله عليه وسلم وأفشى عليه السلام والنبي ماردش عليه. سيدنا كعب نفسه يشوف النبي مبتسم له زي ما كان بيعمل. وقعد يذكر الله. شاف النبي بيبص له. وأول ما سيدنا كعب ينظر للنبي النبي ينظر للأرض أو أي مكان تاني. زعلان من كعب. تخيلوا يابنات حبيبي وحبيبك النبي صل الله عليه وسلم زعلان منك هتعملي إيه. البنات بيبكوا في صمت من قصة كعب بن مالك.

كعب تعب من شدة الندم وكمان محدش بيكلمه. كفاية العذاب اللي في قلبه لأنه فعل هذا الذنب وتخلف عن نصرة الدين. مرة كعب كان بيخبط على ابن عمه صحابي برضه. شافه مرضيش يفتح له. قام سيدنا كعب نط من على السور ودخل له. ببكاء: استحلفك بالله يا سعد أنت تعلم إني أحب الله ورسوله. سيدنا سعد مش راضي يرد عليه. بكاء شديد: استحلفك بالله رد عليا. أنت تعلم إني أحب الله ورسوله. رد عليه: الله ورسوله أعلم.

سيدنا كعب خرج وهو ماشي لقى واحد من جنود ملك الروم بيسأل عليه. رسول ملك الروم. خد الرسالة. ملك الروم بعتها له. سيدنا كعب فتح الرسالة لقى ملك الروم كاتب فيها إنه عرف إن محمد استغنى عنه ومش عايزه. تعالى عندي واحنا نواسيك. سيدنا كعب أخد الرسالة وولع فيها قدام الجندي اللي ملك الروم بعته.

ملك الروم بعت الرسالة لكعب بالذات لأنه كان قوي وشجاع. وبعدين عايز يهدم الإسلام ويحرق قلب محمد على أصحابه. النبي بيحزن حزن شديد لما يهودي يموت لأن نفس ماتت على غير الإسلام. فما بالك بقى لما مسلم يموت أو يكفر بالله. سيدنا كعب جاء له رسالة من عند النبي صل الله عليه وسلم إني زوجته تروح عند أهلها. بحزن: أمرك إني أطلقها ولا أتركها تروح عند أهلها. بس. لا تتركها. بس.

سيدنا كعب تعب بقى لوحده. فضل فوق السطح وفضل يدعو الله أن يغفر له ذنبه. معدش ملجأ إلا الله. وفجأة سمع حد بينادي عليه بصوت عالي: يا كعب بن مالك. يا كعب بن مالك لقد تاب الله عليك. واتنين من الصحابة جريوا يبشروا هلال ومرارة. سيدنا كعب لما سمع نزل يجري وراح عند النبي صل الله عليه وسلم. لقي النبي بيبص له بفرح وسعادة. وسيدنا طلحة جري عليه يحضنه من شدة فرحته.

بفرح وسعادة: أبشر يا كعب بخير يوم مر عليك منذ ولدتك أمك. لقد تاب الله عليك. من شدة الفرحة مش قادر يتلم على أعصابه: يارسول الله أم من عندك أم من عند الله. بفرحة وابتسامة كبيرة: من عند الله. شوفتوا بقا يابنات سيدنا كعب لما أذنب ذنب حصل معاه إيه. محدش يستعجل يابنات. اقفوا على باب ربنا وقولوا مش هنسيب بابك يارب. قال تعالى:

(وعلى الثلاثة الذين خلفوا حتى إذا ضاقت عليهم الأرض بما رحبت وضاقت عليهم أنفسهم وظنوا أن لا ملجأ من الله إلا إليه ثم تاب الله عليهم ليتوبوا) الثلاثة دول منهم كعب بن مالك. يلا كلنا نتوب من جديد ونرجع لربنا وصدقوني هيقبلكم. وبكده خلصنا قصة كعب بن مالك. إن شاء الله بكرة هنشوف القصة دي أثرت في باسم ولا لا وإيه موقفه. وياترى هيحصل إيه. انتظروني فيباذن الله.