رواية خفايا القدر الفصل الثامن 8 - بقلم دعاء تهامي

رجعوا البيت من غير أي كلام تاني. غزل طلعت على أوضتها. عاصف راح عند أبوه. محمود: انت جيت يا عاصف. عاصف: انت تعرف أبو غزل منين؟ محمود: ما أنا قولتلك يا ابني. عاصف: عرفته إزاي؟ أمال إيه اللي هو بيتكلم عنه؟ انت مخبي إيه؟ محمود: قصدك إيه؟ عاصف: النهاردة قابلنا أبو غزل، وهو قال إنك شخص مش كويس وعكس ما بتظهر. انت فيه حاجة مخبيها عليا. محمود: وانت أي حد يقولك حاجة عن أبوك تصدق؟ هو راجل مش كويس وعايز ينزع صورتي قدامك.

عاصف: بس أنا مصدقه ومتاكد إن فيه حاجة مخبيها. محمود: صدقني يا ابني مفيش. عاصف: أتمنى اللي مخبيه ميكنش له علاقة بالماضي. وأكيد مع الوقت هعرف كل حاجة. تصبح على خير. محمود: مستحيل تعرف حاجة. الماضي هيفضل في الماضي. اللي حصل من سنين لو اتكشف أنا هدمر. مينفعش يتكشف. مسك تلفونه ورن على شخص ما. محمود: هبعتلك صورة شخص وعنوانه. عايز يكون آخر يوم له انهارده. الرجل: أوامرك يا باشا. بس الفلوس.

محمود: خلص أنت واللي أنت عايزه هتاخده. ده مش أول تعامل بينا. الرجل: ربنا يديم المحبة. هخلص وأرن أديك البشارة. محمود: هستنى تلفون منك. قفل مع المجهول وبعتله الصورة. عند عاصف في الأوضة، رجع بالماضي لورا بيحاول يفتكر إذا كان شاف إبراهيم أبو غزل في أي وقت، بس مفيش فايدة. وهو بيفكر تلفونه رن. عاصف: ألوو.

الشخص: يا باشا الراجل اللي مكلفني بمراقبته، فيه واحد نط من فوق السور. وبعدها سمعت أصواتهم وضرب نار. وطلع الراجل نط من على السور تاني. عاصف: إيه؟ طب دخلت شفت فيه إيه؟ الشخص: لا يا باشا أنا اتصلت بيك عشان تقولي أعمل إيه. عاصف: ادخل من غير ما حد يشوفك شوف حصل إيه، وبعدها تطلع. بس ملقش دعوة بأي حاجة. الشخص: طب خليك معايا على التليفون. عاصف: متخافش أنا معاك. دخل البيت لقى أبو غزل مرمي على الأرض ومضروب بالنار.

الشخص: يا باشا الراجل غرقان في دمه هنا. عاصف: حاول تقرب منه شوفوا لسه عايش ولا لأ. الشخص: لأ يا باشا مات. الضربة في قلبه. عاصف: طب اطلع من عندك فوراً متخليش حد يشوفك وأنا هتصرف. الشخص: أوامرك يا باشا. عاصف: يا ترى مين ورا قتله وليه يعمل كده؟ عند محمود تلفونه رن. محمود: هاا؟ الرجل: ادعيله بالرحمة يا باشا. محمود: برافو عليك. بكرة هعدي عليك وأديك الفلوس وبعدها تختفي. محدش يعرف طريقك. الرجل: أوامرك يا باشا.

محمود: كده السر هيدفن معاك. عند عاصف رن على واحد صحبه من الشرطة وبلغه بكل اللي حصل وطلب منه ياخد فريقه ويروح على الفلة. عاصم: تمام يا عاصف متقلقش. وأكيد هنحتاج الراجل بتاعك عشان ناخد إفادته. عاصف: أكيد يا عاصم. أنا هجيبه بنفسي وأجي على القسم. بس انتوا خلصوا الإجراءات. عاصم: تمام يا صاحبي. قفل مع عاصم وبيفكر هيقول إيه لغزل. وبعدها قرر يروح عندها ويحاول إن يقولها. طلع من أوضته واتجه لأوضتها.

خبط على الباب مفيش أي رد منها. فتح الباب ووو.