رواية خطة 707 الفصل الخامس 5 - بقلم ميرنا ناصر

يُسر.. متجننيش.. احنا في مابينا مسافة كبيرة جدا.. انتِ أكيد ملبوسة. = ملبوسة؟! يعني إيه. فاكرة الـ جـ ن العاشق اللي حكى عنه صاحب بابا... يُـــــــــسر.. يانهار أسود... الحقوني يا ناس.. يا بابا.. يا ماما.. حد يلحقنا. *** بعد مرور خمس دقائق. = بس يا ستي فوقناكِ. = هو أنا أغمى عليا كتير؟ = لا لا عشر دقايق تقريبا. أنا آسف.. أنا السبب، أنا خوفتك.

= بصراحة.. آه أنا مت من الرعب، بس خلاص انت بتتأسفلي من وقت ما فوقت خلاص يا يسر حصل خير. = حقك عليا يا حبيبتي. = ياسر. = إيه. = هو.. ممكن.. ممكن يكون فعلا جـ ن وعفاريت والجو ده. = بصراحة ومن غير ما تخافي، ليه لأ.. انتِ فاكرة كلام عمو.. والحواديت اللي بنسمعها دايما من عمتو هدى. = بس كلام عمو مش صح، هو نفسه قال إنه مش حاسس إن ده كلام منطقي.

= طيب عمو جابر وهنعتبره مش صح، بصراحة هو راجل بيأفور كتير.. لكن عمتو هدى لأ دي بتاعت صلاة وعبادة.. وهي حكت حاجات من دي كتير. = بس هي عايشة في الصعيد، وخذ بالك إن الصعيد دي كلها سحر وشعوذة يعني ممكن تكون خرافات. = أنا عارفة إنك بتوجدي حاجات تطمنك، وإن دوري كمان أطمنك بس خلينا نحط الموضوع ده في الحسبان ونفكر في حاجات تانية. = إيه الحاجات التانية؟

= إن الصعيد دلوقتي بقى زي القاهرة بالظبط في اختلافات بسيطة خالص.. ومش كلهم مشعوذين ودجالين وده قالته برضه عمتو هدى.، تاني حاجة إنك بتصلي وبتصومي وعمتو قالت إن اللي بيصلي مبيمسهوش حاجة شر.. يعني ده ممكن يكون جـ ن طيب لطيف. = آه ومؤمن وموحد بالله وبيغسل سنانه وبيشرب لبن، بص ابعد عني يا ياسر عشان انت بتقول كلام كويس في البداية وبعدين بتقلب عيل في ابتدائي. = ههههه.. طيب أهدي هاتِ دفتر المذكرات ده.

= أهو.. خير هتعمل فيه إيه؟ = هنكتب كل الافتراضات وندور سوا على الفرض الصح فيهم. = فكرة حلوة، طيب يلا ابدأ. = ١/ ممكن يكون ده فعلا ليه علاقة بالجـ ن والسحـر. = ٢/ إن تكون عندك موهبة زي بتاعت طه حسين لما قال إنه سمع كان دقيق جدا بس الفارق إنك مفقدتيش بصرك الحمد لله. = ٣/ ممكن تكون دي توقعات واستنتاجات نتيجة إنك حد حساس بزيادة بيتهيأله حاجات غريبة. = ٤/ إنك تكوني صاحبة كرامة ربانية.

= كلهم فاهمام، ما عدا صاحبة كرامة ربانية دي يعني إيه. = يعني انتِ حد بيصلي، ومتعبدة، وعلاقتك بالله قوية وحافظة كتابه وفاهمة وعاملة بيه، ليه ميكونش ده من جيفت.. هدية من الله سبحانه وتعالى مكافأة ليكي كل ما بتتعمقي في الدين أكتر كل ما بتبعدي عن أي شر وإثم ودا محتاج كرامة من الله وبعدين إحنا تاريخنا مليـــــان وحافل بالكرامات الإلاهية. فــ ليه لأ. = شكرا. = على إيه؟

= إنك قاعد بتحلل معايا مشكلة عندي وسايب حياتك وأصحابك ومصدقني. = بس هبل، انتِ توأمي.. انتِ روحي. المهم هنبدأ نعمل اختبارات وتدريبات. = اختبارات عشان نعمل اكس على الفرضيات اللي مفترضها لحد ما نوصل للحقيقة، لكن تدريبات دي بتاعت إيه؟ = برافو عليكي، التدريبات دي نتأكد من صلاحية الموهبة أو الكرامة.. او الحاجة اللي بتحصلك واحنا مش عارفين سببها. = مش فاهمة.. لاء انت بقيت مثقف من امتى كدا.

= مش هضحك، عشان انتِ غلسة.. بصي يا ستي التدريبات دي ممكن نعنصرها في أربع حاجات، = ١/ انتِ بتقدري تسمعي لــــ كام متر بالظبط. = ٢/ انتِ بتسمعي بجودة عالية في أي أوقات وأي أماكن؟ = ٣/ مين الناس اللي فعلا مش بتقدرى تسمعيهم؟ = ٤/ إيه اللي نعمله عشان الأماكن اللي فيها تجمعات متتعبيش منها بسبب سماعك لكل الأصوات اللي حواليكي. = لا انت يتعملك كوباية شاي على العظمة والدماغ دي. = أصل أنا مبحبش أتكلم على نفسي كتير.

= ماشي.. ماشي أنا هعديلك النرجسية دي عشان بجد تفكيرك كان في غاية الذكاء والفن. = أي خدمة، يلا هبدأ. = هنعمل إيه؟ = بصِ يا ست البنات، قاعد ربع ساعة وبابا يشيل مننا الموبايلات صح؟ صح يبقى نلحق نستغل الوقت. = طيب يا باشا هنعمل إيه؟ = من أوضتك لحد باب الفيلا ٢٠ متر. ومن أوضتك لحد بعد فيلا خالتك ٥٠ متر. ومن أوضتك لــ حد فيلا حبيبة صاحبتنا اللي معانا دي فاكراها ٧٠ متر. = آه فاكراها إشمعنى حبيبة يعني.

= بلفت نظرك للمكان عشان تبقي فاهمة كـ علامة يعني. = كـ علامة أه.. لا لو عشان علامة ومالو. = طيب بصِ يا ستي أنا هرن عليكي أول ما أوصل لحد باب الفيلا، انتِ هتفهمي إن كده ابتدت خطتنا.. وخطتنا كالآتي: هقف عند باب الفيلا وارن دي الإشارة بينا وبعدها هقفل وأنا هتكلم مع أشخاص مع بني آدمين.. مع أي حد وهسجل بالموبايل اللي حصل بالظبط وعلى الصعيد الآخر انتِ كمان هتسجلي كل اللي سمعتيه فويس نوت في الشات بينا.

بعدها هتحرك على فيلا خالتي وهكرر نفس اللي حصل وانتِ على الصعيد الآخر هتنفذي اللي بيحصل برضه. وهكرر ده لحد الــــــ ٧٠متر وهنشوف النتيجة سوا. = اتفقنا. *** بعد مرور ربع ساعة. = جاهزة يا حاجة. = جاهزة يا ابني.

توالت أصوات ضحكاتنا، بعد تجمعنا لنرى نتيجة هذه التجارب ولكن قلبي كان يخفق بشده هل هنجح، أم فعلاً توقعات وتهيأت، أم أنا حقاً صاحبة الكرامة الربانية، أم لدي القدرة والموهبة، ليكون ذلك نتيجة الجـ ن حقاً، كلها أسئلة وصراعات تنهش عقلي دون حل دون الوصول إلى إجابة واحدة ومسمى واحد. = يلا نسمع المكالمات بتاعتي الأول.

= انت اتكلمت مع حازم، يحيى، دول في الفون ملاك بعتله فويس نوت.. في الواتساب.. متكلمتش مع أي حد في في الشارع كله بالفون. = الله بقا!!! دي شكلها بجد ولا إيه. = ومالك اتخضيت ليه كأنك أول مرة تعرف.. ما انت اللي مقترح نعمل كده.. خوفت ليه. = هااا.. لا. احم احم أنا.. أنا مخوفتش نبتدي. قمنا بتشغيل المكالمة المسجلة، والمسجل الصوتي على الجانب الآخر الذي قمت أنا بتسجيله.

= يُسر المكالمة مع حازم هي هي بالظبط.. هي إيه دا كأنك كنتِ معانا. يعني كده هنعمل علامة صح قدام الـــــ ٣٠ متر. وهكذا قمنا بتشغيل المكالمة الثانية، وما يقابلها من مسجل صوتي. = وكده برضه علامة صح قدام الــــ ٥٠. = كده أنا في الــ ٧٠ متر كان السمع مشوش جدا ومش سامعة كويس خالص كلام بسيط جدا. = زي إيه. = "عامل إيه" "بكره" "إمتحان" دول اللي قدرت أميزهم. = يعني قدرتك لحد الــ ٧٠ متر. = بس أنا اكتشفت اكتشاف مذهل. = إيه.

= مش هتصدق.