رواية خطايا الماضي الفصل العاشر 10 - بقلم اية عامر

عزيز: عجبتك المفاجأة؟ ريم بصدمة: الله يخربيتك.. ي نهار أسود.. قوم.. امشي من هنا.. قوم قبل ما حد يجي.. عزيز اتعدل وقعد على السرير.. وهو بيخبط بإيديه جنبه.. عزيز: تعالي في مكان.. ريم بصتله بصدمة على وقاحته وهي مش مستوعبة اللي بيحصل.. قفلت الباب وبعدين بصتله بغضب.. ريم: انت دخلت هنا ازاي!! عزيز: دخلت من الشباك ده.. ريم: طب قوم امشي.. قوم اطلع برااا.. عزيز: بتخبيني ليه.. ما انتي ممكن تصوتي وأخوكي هيجي في ثانية..

ريم بغضب: الوضع هنا مش مستحمل مشاكلي.. وبعدين مش عايزة يعرف إني كنت معاك طول اليوم.. مين اللي هيصدق إني كنت معاك غصب عني.. قوم امشي من هنا.. انت طلعت لي من انهي داهية.. عزيز: الموضوع إني معرفش عنك أي حاجة وبصراحة مفكرتش إني أسأل عنك أو كده.. بس اكتشفت إنك اخت رحيم السيوفي وكمان نص كلامك مش فاهمه!!! ف قولت أجي أسألك.. ريم بغضب: امشي اطلع برا.. مش عايزة أشوف وشك تاني!!

عزيز: ماشي همشي.. بس خلي بالك بكرة وأخوكي داخل شركته هيبقى فيه قاتل مأجور عشان يقتله بالرصاص... حبيت أعرفك.. ريم: ااانت بتقول إيه!! عزيز: انتي نسيتي ولا إيه!!! ريم: انت عامل كل ده عشان اتجوزك بس؟ عزيز ضحك جامد عليها وهو بيقوم من على السرير.. ريم: اللي يخربيتك وطي صوتك هتوديني في داهية.. عزيز: أنا مش هستنى إني أعمل عليكي حوار عشان أتجوزك.. أنا عايزك تحبيني زي ما أنا حبيتك.. وإلا أقسم بالله كان زمانك على ذمتي دلوقتي...

ريم بغضب: طب اسمع بقي عشان أنا اتخنقت منك.. أنا لا بحبك ولا هحبك ولا هتجوزك أصلاً.. ف ريح نفسك مني وابعد عني.. واوعى عقلك ده يصور لك إني كيوت عشان أنا عشت في أماكن انت تخاف تعدي من جنبها أصلاً.. عزيز: أحبك وإنتي شرسة كده ي خراشي.. احكي لي بقي أماكن إيه؟ وإيه حكاية إنك ما صدقتي لقيته دي!! وندي دي اختك إزاي وهي مرات رحيم!! أنا سهل أعرف كل الكلام ده بس عايز أسمع منك..

ريم: ملكش دعوة بيا هقولها لك كام مرة.. هو انت فيه إيه مش حاسس إني مش عايزك ولا طايقاك أصلاً.. انتي مالك بيا أو بحياتي أصلاً.. ابعد عني وسيبني في حالي أنا مبحبكش أظن إني واضحة في كلامي.. لو سمحت متتوقعش مني أي حاجة تانية.. لو سمحت ابعد عني وعن حياتي... لأن لو انت بتحبني عمرك ما تهددني بقتل أخويا.. من نفسك هتحميه لمجرد إني متوجعش.. ده لو انت عارف يعني إيه حب أصلاً...

عزيز بغضب: ي ريم متختبريش صبري معااااكي.. لو حد غيرك كان قالي الكلام ده أنا كنت دفنته مكااانه انتييييي ملكييييي أنا فاااهمه.. بالزوق منفعش يبقى العافية تنفع.. انتي فااااهمه.. ريم: وطي صوتك بقي.. وامشي من هنا.. امشي بقي الله يخليك.. رحيم خبط على الباب.. ريم بصت لعزيز بصدمة.. ريم بهمس: ادخل تحت السرير.. عزيز: نعم يا أختي.. ريم: بقولك انزل انت لسه هتتصدم.. عزيز نزل تحت السرير ...

عزيز في نفسه: إيه قلة القيمة دي.. أقسم بالله ليطلع عليكي ي ريم.. ريم فتحت الباب لرحيم وحاولت تبان طبيعية.. رحيم: إيه الصوت ده!! ريم: ده التليفزيون أنا كنت في الحمام وصوته علي بس جيت قفلته خلاص.. رحيم بشك: تمام.. نامي عشان الوقت اتأخر.. ريم: حاضر.. رحيم قرب منها وباسها من جبينها وعينيه بتدور في الأوضة.. رحيم: تصبحي على خير.. ريم: وانت من أهل الخير.. خرج رحيم وقفلت الباب وراه وهي بتتنفس بارتياح وشعور بالذنب...

عزيز خرج من تحت السرير بغضب وهو بيشدها ليه.. هي بعدت عنه بقوة وسحبت إيدها وضربته بالقلم على وشه.. ريم: اطلع برا بيتي.. عزيز بص لها بغضب كبير وسابها ومشي.... بعد أسبوع.... تسنيم خبطت على أوضة عزيز.. تسنيم: عزيز أنا ماشية.. ممكن تبقي تيجي بدري النهاردة... عزيز: لي! تسنيم: عشان مخنوقة ومش عايزة أقعد لوحدي.. عزيز بص لها باستغراب وراح ناحيتها مسكها من إيديها وقعدها جنبه... عزيز: مالك! تسنيم: هو أنا زعلتك في حاجة..

عزيز: لا ابداً.. تسنيم: اومال مالك بقالك أسبوع كده مبقتش تيجي تقعد معايا.. هو لي كل الناس بتبعد عني.. عزيز: إيه اللي حصل بس لكل ده! تسنيم: انت عارف إني لما دخلت الكلية متعرفتش على حد غير ريم ومعاملتي مع الباقي سطحية.. عزيز: ريم قالت لك حاجة ضايقتك! تسنيم بنفي: لا.. بس بتتجنبني وعرفت إن فتحتها اتفتحت ومقالتليش حتى.. هو أنا وحشة ي عزيز...

عزيز بحزن وهو يحتضنها: لا يا حبيبتي انتي أحلى بنت في الدنيا كلها.. أنا آسف أنا مقصر معاكي.. تسنيم: عزيز ممكن أطلب منك حاجة بس متزعقش عشان خاطري... عزيز: اطلبي ومش هزعق.. تسنيم: ممكن تبعد عن شغلك ده! عزيز خرجها من حضنه وبص في الأرض بحزن.. عزيز: بقيتي تستعري من أخوكي يا دكتورة!

تسنيم: لا أوعى تفكر كده.. أنا بتشرف بيك في كل وقت وبأي شكل.. أنا مليش غيرك بتخرج وأنا مش عارفة انت هترجع ولا لا.. مش انت عارف إن حياتنا دي غلط.. أنا عايزة أبطل خوف... عزيز: حاضر.. هعمل اللي هقدر عليه عشان ابعدك عن الحياة دي!! تسنيم: مش لوحدي.. أنا ي هفضل معاك ي هنبعد سوا... عزيز: ي هبلة انتي كبرتي وخلاص بقي يتقدملك عرسان.. وأنا الحقيقة عايزك تتجوزي وتبعدي...

تسنيم: لا طبعاً.. أنا مش هتجوز إلا لما انت تبعد عن الشغل ده وتستقر وابقى مطمنة عليك.. عزيز بسخرية: أنا اتجوز.. لا خلاص بقي.. تسنيم: يعني 28 سنة.. مفيش واحدة لفتت نظرك كده ولا أي حاجة... عزيز بحزن: وإن كان تفتكري هترضي بيا.. تسنيم بحزن: عشان كده بقولك ابعد ي عزيز عشان خاطري.. عزيز: ربنا يسهل ي تسنيم.. ربنا يسهل.. تسنيم: طيب أنا همشي بقي.. سلام.. عزيز: سلام...

تسنيم خرجت وسابت عزيز لوحده.. اللي سيطر عليه الحزن بدل الغضب.. ولأول مرة يحس إنه ضعيف ومش قادر يعمل حاجة.. إحساس إنه فارض نفسه عليها جاي على كرامته.. وفي نفس الوقت مش قادر يستحمل إنه يسيبها لغيره... عزيز في نفسه: ياريتني ما شفتك ولا حبيتك.. غمض عينيه وهو بيفتكر أول مرة شافها بعد ما كانت مع بدر... فلاش باك.. كان داخل الحرم الجامعي بيدور على تسنيم.. لحد ما لقاها قاعدة مع ريم...

بص لها من بعيد بغضب وقرب منهم بس اتراجع لما سمع كلامهم.. كان واقف وراهم وهما قاعدين جنب بعض... ريم: مالك شكلك زعلان! تسنيم: مش زعلانة.. أنا متضايقة أوي من نفسي ي ريم.. ريم: لي!! تسنيم: شوفي لبسك وشوفي لبسي.. ريم: انتي عايزة تلبسي حجاب.. تسنيم: نفسي أوي.. ريم: طب ومستنية إيه! تسنيم: هل أنا قد الحجاب ي ريم.. ولا أنا هعرف ألبس لبس يكون مناسب معاه.. طب أنا ممكن أرجع عنه تاني ولا لا..

ريم: بصي ي تسنيم.. انتي عايزة الجنة وفي نفس الوقت الدنيا سحراكي.. كلنا بنحب الدنيا.. بس الجنة تستاهل.. الحجاب هيكون بداية الخطوة إنك تكوني ملتزمة.. ومين قالك إن اللي محجبة أو منتقبة مبجيش أوقات وتكون ضعيفة كده.. ونفسها تسيطر عليها..

البنت عندها طبيعة وفطرة إنها تحب إن شكلها حلو.. وبتحب إنها تاخد اهتمام اللي حواليها.. بس الستر إحساس حلو أوي ولما تلبسي حجاب هتحسي بالإحساس ده.. إن شاء الله هتاخدي الخطوة وأنا معاكي في أي وقت وهدعمك... تسنيم: ادعي لي ي ريم عشان خاطري... ريم: هدعيلك وانتي كمان فضلي ادعي لنفسك.. باااك.. عزيز: أنا مش هسيبك لغيري.. مش هسيبك... اخد مفاتيحه وخرج من بيته...

وقفت ملك في المطبخ وهي بتجهز الفطار.. لحد ما دخل خالد وهو بيقلب في تليفونه.. ملك: أنا خلاص خلاص خلصت أهو.. خالد: ي أختي على مهلك أنا ورايا إيه يعني! ملك بضحكة: معلشي معلشي.. خالد: انتي وراكي حاجة النهاردة!! ملك: لا... لي؟ خالد: أخواتك جايين النهاردة.. ملك بفرحة: بتهزر صح!! خالد: أبوكي بقوله هاخدهم يقضوا يومين مع ملك.. قالي العيل ب ألف جنيه.. أبوكي ده ولا كسبناه في كيس شيبسي.. ملك بضيق: حظنا المنيل هنعمل إيه!!

خالد تليفونه رن فرد وهو متوتر وخرج من المطبخ وبعد شوية دخل وهو بيبص لها بفرحة... خالد بسعادة: أنا اتقبلت في الوظيفة.. ملك بفرحة: ألف ألف مبروك ي خالد.. ربنا يوفقك ي رب.. خالد قرب منها وحضنها وشالها لف بيها.. وهي ماسكة فيه بخجل وتوتر.. نزلها وهي باصة في الأرض وشها أحمر... خالد: احم.. أنا هنزل أجيب حاجات حلوة وشيبسي لأخواتك.. خالد خرج وهي اتراجعت كام خطوة لورا وقلبها بيدق بسرعة...

ملك: لا لا.. اهدي كده عشان متلبسيش في الحيط!! ده مجرد جواز مؤقت.. ف انشفي كده... بعد شوية الجرس رن.. ملك راحت تشوف مين.. انفتح الباب ولقت بنت جميلة واقفة مبتسمة... ندي: خالد موجود! ملك بضيق: مين حضرتك؟ ندي: ازيك أنا ندي.. انتي ملك مراته صح! خرج خالد من الاسانسير وبص لندي بسعادة وحضنها وملك بصت له بغضب كبير... ملك: ده بجد!! خالد: هو إيه!! اتفضلي ي ندي... ندي: انت وحشتني أوي ف جيت أسلم عليك وأقعد معاك شوية..

خالد: وانتي والله وحشتيني أوي وكمان إحنا ملحقناش خالص نقعد سوا وأنا في حاجات كتير أوي عايز أتكلم معاكي فيها... ملك بدموع: بعد إذنكم.. ندي: هي عرفاني صح! خالد: لا أنا حاكيلها عنك بس هي متعرفكيش!! ندي: انت غبي صح.. ادخل ي ابني قولها إني أختك! خالد: هي اتضايقت!!! ندي بهمس: وأنا اللي هعرف هي اتضايقت ولا لا هي مش مراتك ي ابني ولقيت جوزها واقف بيحضن في واحدة.. خالد: ي ندي ما أنا قايلك حقيقة جوازنا..

ندي: بس برضو دي مراتك.. وأصلاً باين عليها بتحبك... خالد: بتحبني أنا!!! ندي بغضب: أنا هدخلها.. طب بقولك إيه تعالا ورايا! خالد: إيه! ندي بتخطيط: تعالا بس.. دخلت ندي لملك كانت واقفة في المطبخ وبتعملهم مشروب دافي وهي عينها بتدمع... ندي: مطبخك حلو أوي.. ملك بضيق: شكراً.. حضرتك ممكن تقعدي في الصالون برا وأنا هجيب لك قهوتك لحد عندك.. انتي ضيفة خالد برضه...

ندي: لا لا.. أنا مش ضيفة ولا حاجة.. الصراحة أنا خدت بالك إن خالد مقال لكش بس إحنا خلاص هنتجوز وهاجي أعيش هنا معاكم... ملك بصت لها بغضب ثواني ومسكت سكينة في إيدها وهي بتقرب لندي بغضب... ملك: تقعدي مع مين ي بت... لا ي حبيبتي فوقي لنفسك ده بيتي أنا وخالد جوزي أنا ومش هسمح لك أبداً تخطفيه مني ي خطافة الرجالة... دخل خالد عشان يحمي ندي ووقف قدامها وهو بيحاول يهديها.. خالد: أهدي ي ملك وسيبي اللي في إيدك دي..

ملك: خرج البت دي من هنا بدل ما أقسم بالله أعبيها لك في أكياس وأضحي بيها في العيد... خالد: أهدي بس والله.. دي ندي أختي.. ملك: أختك من أنهي داهية دي.. خالد بغضب: ملك!! أهدي وافهمي.. دي ندي أختي اللي كانت تايهة واللي حكيت لك عنها... ملك بصت لها بضيق وسألتها.. ملك: انتي أخته! ندي بضحك: أه والله أخته.. ملك: اومال إيه اللي قولتيه ده! ندي بمرح: أنا لقيتك مش عرفاني ف قولت أرخم شوية.. ملك بابتسامة: يعني انتي أخته بجد!

ندي بضحك: أه والله... ملك: طب تعالي في حضني بقي.. ندي حضنتها وهما الاتنين بيضحكوا أما خالد كان ساند على الباب وهو مربع إيده وبص لملك نظرة فيها معاني كتير وهي اتحرجت من رد فعلها اللي تقريباً فضح حقيقة شعورها... ندي: طب أحضر القهوة بقي... ملك: لا قهوة إيه! عندي عصير مانجا فريش يرطب على قلبنا كده... ندي: أوكيه هستناكي برا ولا أساعدك... ملك شدتها وهمست ليها...

ملك بهمس: لا بقولك إيه خليكي معايا عشان أنا في لحظة حرجة دلوقتي.. ندي بضحك: خلاص مش هخرج.. بقولك إيه ي خالد م تسيبنا لوحدنا نرغي شوية... خالد: ماشي هسيبكم... خرج خالد وبصت ندي لملك.. ندي: بتحبيه! ..................... عزيز وقف قدام الكلية وهو ساند على عربيته ولابس نضارته السودا.. لمحها وهي جاية من بعيد وبتقطع الطريق.. افتكر أول مرة شافها فيها.... ولكن... عربية جاية بأقصى سرعتها وهي مش ملاحظاها حتى...

عزيز بخوف: ريم.. حاسبي!!!! ولكن.. اصطدمت بيها العربية وارتمت ريم على بعد من العربية... عزيز بخوف جري عليها وشالها حطها في عربيته... بعد شوية وصل للمستشفى وهو شايلها وهدومه متغرقة بدمها... الدكاترة أخدوها بسرعة للعمليات وهو وقف برا بخوف وقلق كبير رايح جاي وهو بيفرك في إيده... عزيز: ي رب.. أنا عارف إني مستاهلش بس هي تستاهل إنك تنجيها... الدكتور خرج ووقف قدام عزيز..

الدكتور: متقلقش هي حالتها مستقرة.. هي أخذت خبطة جامدة في دماغها والحقيقة احتمال كبير إن يحصل معاها فقدان في الذاكرة... ولكن هنعرف كل حاجة لما تفوق... فضل في المستشفى لساعات طويلة وهو متوتر وانقضى النهار وجه الليل... الممرضة: المريضة فاقت تقدر تدخلها... عزيز وقف بسرعة ودخل أوضتها بلهفة وخوف عليها... قرب ومسك إيدها.. عزيز: انتي كويسة.. ريم بصت له باستغراب وهي مش مستوعبة اللي بيحصل حواليها.. ريم: أنا فين!!

عزيز: انتي عملتي حادثة وانتي دلوقتي في المستشفى... ريم: وانت.. انت مين!! دخل الدكتور وعزيز بصله وهو فهم وقرب منها... الدكتور: حضرتك اسمك إيه!! ريم: اسمي!! أنا.. اسمي إيه مش فاكرة... الدكتور: طب فاكرة الأستاذ؟ ريم بصت لعزيز باستغراب.. ريم: لا.. الدكتور بص لعزيز وسأله.. الدكتور: هو حضرتك تقربلها إيه!! عزيز بص للدكتور ورجع بص تاني ل ريم... وغمض عينيه بألم... عزيز: أنا جوزها..