رواية خيانة زوجية الفصل السابع 7 - بقلم عمرو راشد

سوري نسيت أعرفك بنفسي، أنا أبقى هند مرات يوسف التالتة. = إيه! وكمان جاية برجلك لحد هنا؟ ده أنتي مستغنية عن نفسك بقى. اهدّي بس الأول، أنا وأنتي مصلحتنا واحدة. = أنا هساعدك ترجعي فلوسك وكمان هتخلصي عليه. = وأنا إيه اللي يخليني أثق فيكي؟ عشان معنديش أي سبب يخليني أكدب عليكي. في الأول آه كنت معاه وبساعده، بس هو كان طماع وعايز ياخد كل حاجة بالرغم من كل اللي أنا عملته معاه. = أنتوا متجوزين من امتى؟ -ثمان سنين بالظبط.

= يعني البيه كان متجوز عليا اتنين وزعلان إني خونته وهو كان طول الوقت بيخوني. حبيبتي بقولك أنا مراته، يعني الموضوع مفيهوش خيانة. = ما أنتي أصلك مجربتيش يعني إيه جوزك يسيبك بالأيام ويسافر وكنتي بتستحملي على أساس إنه بيشتغل وبيتعب وفي الآخر يطلع متجوز عليكي اتنين. ومين قالك إني مجربتش؟ لا يا حبيبتي جربت، ماهو كان بيسيبني أنا كمان… حسن قاطعنا ودخل في الكلام.

= يا جماعة مش وقته الكلام ده، إحنا دلوقتي بقينا 3 وكل واحد فينا بسم الله ما شاء الله دماغه سم، يعني قادرين إننا نشيل يوسف من على وش الأرض. هند ردت عليه بسخرية. = بس متستهونش بيه أوي كدا، يوسف ده شيطان. لا لا، يوسف ده أخويا وأنا عارفه كويس، مبيعرفش ينفذ حاجة إلا لما يكون حد معاه، حد يفكرله ويخططله، ميعرفش ياخد خطوة لوحده. = بس حالياً يوسف مش لوحده. أوعي تقولي متجوز واحدة رابعة.

= لا يا حبيبي أنا الأخيرة، بس أقصد يعني إنه عنده رجّالته، يعني متفتكرش إنك هتعرف تعمل معاه حاجة. امال أنتي لازمتك إيه؟ أنتي أكيد حافظة يوسف. = أنتو ليكو 8 مليون عند يوسف. هاخد أنا منهم 4 مليون. أنتي عبيطة يا بت انتي ولا إيه، 4 مليون إيه اللي تاخديهم. = ماهو بص يا حبيبي يا إما هاخد نص الفلوس دي، يا إما وريني إنت هترجعها إزاي بقى. كان لازم أحُل أنا الموضوع. = خلاص يا حسن خليها تاخد اللي هي عايزاه، المهم الفلوس ترجع.

= فلوس إيه اللي ترجع؟ دي عايزة نصها، إحنا كأننا ولا عملنا حاجة. يا حسن إحنا هيكون معانا 4 مليون، حلوين يا حسن. = حلوين إيه ده… حسن أنا بقول إنهم حلوين، خلصنا بقى. = إحنا موافقين، الفلوس ترجع الأول وهيبقى ليكي نصهم. = حيث كدا يبقوا تسمعوا كلامي بالحرف الواحد.

أول حاجة لازم تبقوا عارفين إن يوسف عمره ما هيشيل فلوسه في بنك، يعني بنسبة كبيرة الفلوس هتكون معاه في البيت. أنا هرجع البيت تاني بحجة إني ندمانة وعايزة أرجع أعيش معاه تاني، هخليه يطمنلي من الآخر. وفي الليلة دي أنا هستنى ينام وأنزل أدور على الفلوس وأول ما ألاقيها هاخدها وأجيلكم علطول، بس طبعاً مننساش حقي. = المهم أو إوعي يشوفك يا هند. = خافي على نفسك يا حبيبتي، أنا ميتخافش عليا.

هند مشيت وأنا قعدت أفكر في اللي هيحصل. حاجات كتير ممكن تحصل لو هند فشلت تعمل اللي هي بتقول عليه ده. بفكر أكلمها ونلغي الخطة دي وأبعد عن يوسف وأكتفي بكده. = أنتي واثقة في البت دي؟ = معنديش حل غيرها. = أنا مش مطمنلها. = طب إيه، نلغي معاه؟ = لأ ونلغي إيه، خلينا نشوف هي هتوصل لإيه. = ولو يوسف عرف؟ = إحنا ملناش دعوة ومشوفنهاش. = هنسيبها يعني؟ = لا نروح نتمسك معاها يا أسماء، أنتي بتفكري إزاي؟ = بفكر يا أخي بفكر.

= متفكريش تاني، يا إما تتكلمي كلام يدخل العقل. كنت قاعد في الصالة، سمعت صوت الباب بيتفتح وبعد ثواني شوفتها، كانت شايلة شنطتها اللي مشيت بيها من هنا. = إيه اللي جابك تاني؟ = معنديش مكان أروحه. سكت ومردتش عليها، ورجعت دورت وشي وشغلت التليفزيون. = أنتي لسه زعلانة مني يا يوسف؟ أنا آسفة والله أنا مكنتش أقصد. = يوم ما تفكري إنك تلعبي معايا تاني يا هند هيبقى آخر يوم في عمرك.

= آسفة يا يوسف، متزعلش مني، أنا اكتشفت إني مليش غيرك، لفيت كتير أوي وفي الآخر كنت أنت الوحيد اللي معنديش غيره أروحله. = يعني لو كان في غيري كنتي هترجعلي برضه؟ = طبعاً كنت هرجعلك، هو أنا أقدر أعيش من غيرك، كنت هزعل كام يوم كدا وهرجع تاني. = طب يلا اطلعي غيري هدومك وارتاحي شوية. = عينيا، طب وانت مش هتطلع تنام؟ = جاي وراكي.

استنيت شوية لحد ما طلع ينام، طفيت النور وفضلت صاحية لحد ما تقريبا عدى ساعتين، حسيت إن ده الوقت المناسب. قمت بهدوء من جنبه وخدت معايا الموبايل ومفاتيح العربية تحسباً لأي حاجة ممكن تحصل. اتسحبت لحد ما خرجت من الأوضة ورايحة على أوضة المكتب لأن ده المكان الوحيد اللي بنسبة كبيرة الفلوس هتكون فيه. دخلت الأوضة، دورت يمين وشمال ملقتش أي حاجة. بدأت أتعصب، مفيش أي حاجة في الأوضة لحد ما لاحظت إن في لوحة على الحيطة معووجة شوية. ابتسمت وقربت عليها وشيلتها، وبالفعل لقيت الخزنة وراها بس يا ترى رقمها هيكون إيه؟

هو عامل باسورد الموبايل ب…، مش فاكرة، حاولت أكون هادية عشان أعرف أفكر. جربت أكتب عيد ميلاده بس منفعتش. خدت نفس عميق وفكرت، وكتبت وأنا حاطة إيدي على قلبي. 1/8/1966 = ده تاريخ ميلاد أمه.

وفعلاً كان صح، الخزنة اتفتحت. خرجت بسرعة من الأوضة وروحت جبت الشنطة اللي كنت مجهزاها قبل ما أنام عشان أحط فيها الفلوس. خدتها بسرعة وجريت على أوضة المكتب وبدأت آخد الفلوس كلها، قلبي بيدق بسرعة جدا، خايفة ييجي ويشوفني لحد ما خلصت. قفلت الشنطة وخرجت بسرعة، مكنش عندي وقت إني أطلع تاني أغير هدومي حتى. كملت طريقي ناحية الباب ولسه بفتحه سمعت حد بيتكلم. = رايحة فين يا هند بالشنطة دي؟

قلبي وقف، بس مكنش ينفع أنا أقف. كملت بسرعة لحد العربية، ركبتها ومشيت بسرعة. كنت سايقة بسرعة جدا، مسكت التليفون وكلمتها. = أيوا يا أسماء، يوسف بيجري ورايا، جهزي كل حاجتك بسرعة، أنا هعدي عليكي حالا، جهزي هدومك وأي فلوس معاكي، يوسف لو مسكنا هيموتنا كلنا، بسرعة يا أسماء بسرعة. = بس حسن برا دلوقتي. = مش مهم خليه ييجي ورانا، أنتي معاكي فلوس؟ = آه آه معايا، في فلوسي وفلوس حسن.

= هاتى كل حاجة وانزلي استنيني تحت البيت وأنا جايه أهو. سقت بسرعة جدا، قلبي هيقف من الخوف، مش عارفة الخطوة الجاية هتكون إيه، بفكر في كل حاجة، أنا مش عارفة هتصرف إزاي حتى. وصلت عند أسماء. = يلا بسرعة، حطي كل حاجة في شنطة العربية. = حاضر، افتحي انتي بس. فتحت الشنطة وكنت شايفاها من المراية وهي بتحط كل الشنط اللي معاها. = خلصتي ولا لسه؟ = خلاص أهو.

لحد ما شوفتها وهي بتقفل شنطة العربية ساعتها دوست على البنزين وجريت بسرعة جدا وسمعاها بتصرخ من ورايا. = هند، استني يا هند، يااا هند. جريت بسرعة من المكان، فضلت ماشية كتير أوي لحد ما بقيت بعيدة، وقفت في مكان مفيهوش بني آدم واحد، طريق فاضي مفيش فيه أي صوت. وقفت وخدت نفسي. باب العربية اتفتح ولقيته ركب جنبي. = فلاش باك. ضربتها بالقلم ومسكتها من شعرها. = بعد كدا لما تتكلمي مع جوزك تتكلمي بأدب يا حبيبتي، فاهمة ولا مش فاهمة؟

= أنتي اتجننت ولا إيه، شكلك نسيت أنا مين يا يوسف، نسيت أنا ممكن أعمل فيك إيه. = تصدقي نسيت، ما توريني هتعملي إيه وأنا هحمسك أكتر عشان توريني. محستش بنفسي غير وأنا بض*ربها بالبوكس بكل قوتي. باك. = كان لازم كل حاجة تبان حقيقية، بس عجبتيني دماغ عوالم بصحيح. = عيب يا حبيبي، ده أنا هند. = يعني إيه خدت الفلوس وهربت؟ = والله ما أعرف، هي كلمتني قالتلي إنها خدت الفلوس من يوسف وهربت منه وقالتلي أحضر كل حاجة عشان نهرب كلنا.

= يعني إيه، يعني هند كانت متفقة مع يوسف وجت تلعبها علينا؟ = يا ولاد الـ***، هقت*لك يا يوسف، هقت*لك!!