رواية قلبي لم يتقبل موتك الفصل الرابع 4 - بقلم جاسمين محمد

مالك: لازم أروح أقابله وأسأله ليه هعمل كل ده، وإنتو اياكم حد يعرف أمي بأي حاجة. وسابهم ومشي. حسام: مالك مينفعش يقابل أبوه وهو متعصب كده، ده ممكن يتهور ويعمل حاجة، لازم نلحقه. محمد: عندك حق، يلا بسرعة نروح وراه نلحقه. *** مالك وصل العنوان اللي محمد ادّاهوله، لقى بيت كبير وحواليه جنينة. بيبص لقى واحد قاعد في الجنينة عمال يهزر مع واحدة وست وبيضحكوا. "ههههههه كفاية بقى يا محمد، ده إنت مشكلة بجد والله."

"ههههههه إنتِ لسه شفتي حاجة." مالك من الصدمة لما شاف وشه رجع خطوتين لورا. حسام ومحمد جم في نفس الوقت، قربه منه وسندوه، صحبه أحسن يقع. مالك بعصبية ووجع: سيبوني أنا لازم أروح أسأله ليه عمل فينا كده، ليه بعد عنا كل السنين دي، ليه سايبنا بنتوجع عليه وهو عايش مبسوط. محمد بحزن على صحبه، عشان هو

عارف الوجع اللي هو حاسه: اهدي يا مالك، مينفعش تواجه دلوقتي عشان إنت حالتك مش هتستحمل تسمع حاجة. يلا نروح يا مالك وبعدين نشوف معاد ونبقى نواجه ونعرف الحقيقة. مالك: أروح إزاي؟ أروح أقول لأمي إيه اللي قاعدة مستنية تسمع معلومة عن أبويا؟ أقولها إيه؟ أقولها افرحي جوزك طلع عايش؟ لأ، وأفرحي أكتر ومتجوز كمان؟ لأ، وأفرحي أكتر وعايش في إسكندرية؟ أقولها إيه أنا؟ ردوا عليا. حسام ومحمد بحزن ربّتوا

على كتف صاحبه: اهدي يا مالك وتعالى نفكر براحة هنعمل إيه. مالك بحزن: هنعمل إيه؟ أنا أمي هتموت فيها لو عرفت الأخبار دي. حسام ومحمد: لا بعد الشر، طنط شمس أصلاً متستاهلش كل اللي بيحصل فيها ده. مالك: وقسم بالله ليندموا على كل دمعة نزلت من أمي على فراقه وهو قاعد هنا فرحان ومبسوط. حسام: اهدي بقى ويلا نشوف هتقول إيه لأمك الأول لما تسألك. مالك: أنا مش هروح أصلاً عشان مش هعرف أكدب عليها، ريحوا نفسكم.

محمد: فعلاً، طيب بص حسام، رن على طنط شمس وقولها إن مالك طالع معانا بمأمورية ومش هيجي البيت النهاردة. حسام: فكرة، حاضر. ومسك التليفون ورن على شمس. حسام: أزيك يا طنط شمس؟ شمس: الحمد لله بخير يا حبيبي، إنت عامل إيه؟ طمني عليك، مشوفتكش من كام يوم ليه كدا؟ حسام: شغل بقى، حقك عليا. شمس: اصرفها فين حقك عليا دي؟ مش هسامحك غير لما تيجي وأشوفك إنت والواد محمد.

حسام: حاضر، هنيجي لك من عينيا. بصي، صح، مالك مش هيجي البيت النهاردة. شمس بحزن: ليه يا ابني؟ مالك فيه حاجة؟ حسام: لا يا حبيبتي، بس عندنا مأمورية وهو طالع معانا، بس مش عارف يكلمك ويقولك عشان مشغول. شمس: وهتيجي إمتى يا ابني؟ حسام: يومين كده. شمس: ماشي يا حبيبي، ربنا معاكم ويحفظكم يا رب. حسام: يا رب يا حبيبتي، سلام. شمس: حسام ثانية. حسام: إيه؟ شمس: مالك كان رايح لمحمد عشان عرف أخبار عن أبوه، عرفوا إيه؟

حسام بتهرب: طيب معلش هقفل معاكي دلوقتي يا طنط عشان بينادوا عليا، سلام سلام. وقفل السكة. مالك: هربت منها النهاردة، ههرب منها بعد يومين كيف؟ محمد: يا أخي سيبها على الله، يمكن نتصرف وقتها. المهم يلا نروح شقتي نرتاح. حسام: فكرة برضه، يلا. *** مليكة طالعة على السلم، بتبص لقت اللي مسك إيدها ووقفها. إسلام: الحلو عامل إيه؟ مليكة بعصبية: سيب إيدي أحسن أقول لأخويا مالك. وبتحاول تشد إيدها بس مش عارفة.

إسلام: هههههه يا ماما خوفت أنا كده، صح؟ لأ يا حلوة، أنا مبخافش من حد، إنتي سامعة؟ مليكة بصوت عالي: طيب سيب إيدي أحسن، والله هعلمك أنا الأدب من أول وجديد. إسلام بعصبية: تعلمي مين يا روح أمك؟ ده أنا اللي هعلمك إنتي اللي زيك الأدب. مليكة: تصدق إنك متربتش فعلاً. وراحت ضاربة بالكف على وشه. إسلام بعصبية: يابنت الـ... ومسكها من الطرحة. مليكة بحركة لفت إيده وراحت ضربة عليها، كسرتها له.

إسلام بزعيق من وجع إيده: آآآآآآآآآه يابنت الـ... كسرتي إيدي. أبوه وأمه كانوا نايمين، طلعوا على صوت زعق ابنهم. مديحة جرت على ابنها وبلهفة: حبيبي، مالك، طمني عليك. إسلام بزعيق: كسرت لي دراعي بنت الـ... دي. مليكة: وإن ملمتش لسانك هقطعهولك المرة الجاية، إنت سامع؟ فؤاد بعصبية: لا دانتي بقيتي فاجرة وعايزة اللي يلمك.

مليكة: لم ابنك الأول يا عمي، ولا خسارة أصلاً أقولك يا عمي، لم ابنك يا راجل إنت، وبعدين تعال اتكلم. ومين دي اللي فاجرة؟ ليه صبحت زي بنتك، بتسهر لصبح وبر، وعالم بتسهر مع مين. مديحة سابت ابنها وقامت على حيلها تضرب مليكة: لا دانتي عايزة تتربي بقى. ولسه هترفع إيدها. مليكة مسكت إيدها ولفّتها لورا: لمي نفسك عشان إنتي واحدة كبيرة ومش عايزة أكسرك، وقعدتك جنب ابنك. وزاحتها وسابتهم وبتلف عشان تطلع.

شمس كانت واقفة على السلم، ومليكة أول ما شافتها ميلت راسها لتحت. فؤاد من تحت: البت دي عايزة تتربى. شمس: ربي عيالك الأول يا فؤاد، أنا عيالي متربيين أحسن تربية. وإنتي ارفعي راسك، متوطيهاش طول ما أنا عايشة. إنتي سامعة؟

إنتي يمكن غلطتي إنك علّيتي صوتك على عمك، بس ده متتسمش عم عشان مفيش عم يعمل كده في ولاد أخوه. وبقولهالك لتاني مرة، اللي يجي عليكي حتى لو مين، متستسلميش. عشان كل ما بتسكتي بيحس إنك ضعيفة، مش بيحس إنك محترمة. يا بنتي خليكي دايماً قوية، واقفي قدام أي حد مدام إنتي صح. مليكة جرت على أمها وحضنتها.

شمس وهي بتطبطب عليها: مش عايزكي ضعفي أبداً ولا تسيبي حد يجي عليكي، عشان الناس دلوقتي مش بترحم. اللي خلى العم ييجي على ولاد أخوه اللي من دمه، يخلي الغريب يعمل أكتر من كده. يا حبيبتي يلا نطلع شقتنا. مليكة هزت راسها وطلعت مع أمها. ومديحة وفؤاد خدوا ابنهم وجروا بيه على المستشفى. تاني يوم. شمس: مليكة حبيبتي، قومي بقى، كفاية نوم. مليكة: يا ماما، أنا معنديش حاجة النهاردة، سيبيني نايمة براحتي.

شمس: حاضر يا غيبوبة هانم، هسيبك. أنا مجهزة لك الفطار، لما تقومي ابقي افطري. وأنا، ممكن أتأخر النهاردة برضه. مليكة بنص عين: وده ليه بقى يا ست هانم؟ لأ، إحنا معندناش ستات تتأخر بره. شمس: لأ، وحياة أمك. مليكة: آه، أنا راجل البيت هنا بعد بابا ومالك أخويا. شمس: مليكة نامي أحسن، مخليه يصبح عليكي على الصبح. مليكة شدت البطانية على وشها: ليه، ما الطيب أحسن. ابقي اقفلي الباب وراكي والنبي، ومعاكي ربنا.

شمس: ضحكت على تصرفات بنتها وسابتها ومشيت. *** محمد (جوز شمس) : رايحة فين كده على الصبح؟ مريم (مراته) : رايحة أشوف بابا في الإدارة عشان عايزاها في موضوع. محمد: الموضوع ده مينفعش يتأجل لبليل؟ كده كده رايحين عندهم بليل. مريم: لأ والله يا حبيبي مينفعش يتأجل، ومش هتأخر. هو دلوقتي يعتبر عنده اجتماع كمان ساعتين، فيلا أروح الحقه قبل الاجتماع. محمد: طيب استنى أجي أوصلك. مريم: هههههه يلا يا عم، أهو توفر عليا قرف المواصلات.

محمد: ههههههه ياك يطمر، بس يلا. محمد قام لبس وطلع مع مريم متوجهين لوالدها في الإدارة. *** مني: ها يا شمس، رايحة الإدارة النهاردة؟ شمس: آه، لازم أروح عشان الاجتماع اللي الأستاذ سعد عامله. مني: اشطاااا، يعني هستناكي بعد الاجتماع تيجي نروح نشوف عروسة ابني. شمس: ماشي تمام، وأنا هعدي عليكي أول ما أخلص علطول، بس تكوني جاهزة عشان مناخرش، والبت لوحدها في البيت. مني: حاضر، مش هاخر. شمس: تمام، أسيبك بقى عشان أقوم أروح الإدارة.

مني: ماشي يا حبيبتي، ربنا معاكي يا رب. شمس قامت تروح الإدارة. *** مليكة قامت الضهر، صلت وفطرت، ومسكت المصحف وقعدت تقرأ فيه. تحت. مديحة بغل: عارفين طبعاً هتعملوا إيه، عايزاكم تدّوها حتة علقة.