رواية قمر الزين الفصل السادس عشر 16 - بقلم ساسو محمد

وصلت الشغل ودخلت مكتبها. قمر بصدمة: إيه الورد ده وإيه اللي جابه هنا؟ كان بوكيه ورد كبير على مكتبها. ريم: طب مش تقولي صباح الخير الأول؟ قمر: صباح الخير الأول. ريم: صباح النور. قمر: قوليلي بقى إيه الورد ده؟ ريم: ده ليكي. قمر باستغراب: ليا؟ ريم: آه ليكي. قمر مسكت الورد وقعدت تدور فيه. ريم: بتدوري على إيه؟ قمر: على كارت أو حاجة تعرفني مين اللي باعته. ريم: ولقيتي؟ قمر: لا، ما لقيتش. ريم: بس شكله حلو.

قمر: أوي، وبالذات إنه أبيض وأحمر زي ما أنا بحب. ريم: آه، شكل اللي باعته ده هيمان بيكي أوي. قمر: هيمان مرة واحدة؟ ريم: آه طبعًا، هو في حد بيعمل كده غير لما يكون هيمان ولهان باللي بيحبها. قمر: يا ختي اتنيلي. ريم: يخربيتك يا شيخة، عديمة الرومانسية. قمر قعدت تبص للورد برومانسية وقالت: تعرفي؟ ريم: لا، محدش قالي. قمر: يخربيت برودك، مش قايلة. ريم بضحك: لا خلاص، قولي. قمر: كان نفسي زين هو اللي يبقى باعت الورد ده.

ريم: مش عايزة تنسي برضه يا قمر؟ قمر: مش عارفة أنسى، كل ما أحاول أنسى أفكر فيه أكتر. ريم: لو ليكي نصيب معاه، أكيد ربنا هيجمعكوا مع بعض. قمر: إنتي متخلفة يا بت ولا الحمل أثر عليكي؟ ريم: ليه؟ قمر: يعني قولتلك إنه اتجوز وشوفناه مع بعض هو ومراته، يبقى هيبقي من نصيبي إزاي؟ ريم: إنتي متعرفيش ترتيب ربنا ليكي إيه. قمر: حتى لو مش عايزاه بعد ما اتجوز. ريم: يبقى حاولي تبطلي تفكري فيه. قمر: حاضر، هحاول.

وقمر فضلت تفكر في زين شوية، واللي باع الورد شوية، ويا ترى هو مين ويعرفها منين، وعرف منين إنها بتحب الورد الأبيض والأحمر، لحد ما قاطع تفكيرها. ريم: سرحتي في إيه؟ قمر: في اللي باع الورد. ريم: ماله؟ قمر: بفكر يعرفني منين. ريم: فكك، هو لو عايز يعرفك بنفسه كان بعت كارت مع الورد. قمر: عندك حق. قاطع كلامهم رنة موبايل قمر. قمر: الو، إزيك يا يارا؟ يارا: الحمد لله، وإنتي عاملة إيه؟ قمر: الحمد لله، وحشتيني.

يارا: وإنتي كمان وحشتيني أوي. قمر: طب ما تحاولي تيجي. يارا: لا، إنتي اللي هتجي. قمر: ليه؟ يارا: عشان خطوبتي بعد 3 أسابيع. قمر: بجد؟ مبروووك يا روحي. يارا: الله يبارك فيكي يا حبيبتي، عقبالك. قمر: إن شاء الله. وقفلت مع يارا. ريم بفضول: خير، فرحيني معاكي. قمر: خطوبة يارا بنت خالتي بعد 3 أسابيع. ريم: مبروك. قمر: الله يبارك فيكي، عارفة؟ ريم: عارفة إيه؟

قمر: على قد ما أنا فرحانة إن يارا هتتخطب، على ما أنا زعلانة إني هبقى أنا وزين في مكان واحد بس مش مع بعض. ريم باستغراب: إنتي وزين في مكان واحد ليه؟ قمر: ما خطيب يارا ابن خالة زين. ريم: امممممم. قمر: أنا بفكر محضرش. ريم: إنتي هبلة؟ قمر: ليه؟ ريم: إزاي يعني متحضريش خطوبة بنت خالتك؟ قمر: ما أنا مش عايزة أشوفه. ريم: عبيطة، ده إنتي تروحي وتعرفيه إنه مش فارق معاكي. قمر: هحاول.

وعدى أسبوعين ونص من غير أحداث، بس الورد كل يوم بيتبعت لقمر، بس بقى معاه كروت، مرة شكلك حلو النهاردة، ومرة وحشتيني، ومرة نفسي تكوني ملكي، وآخر كارت كان مكتوب عليه هفتقدك اليومين اللي مش هتكوني موجودة فيهم، وطبعًا قمر في حيرة مين الشخص ده. وجه ميعاد الخطوبة، ويارا لبست فستان بينك، وقمر لبست فستان أسود، وكانت قمر فعلاً. وصلوا القاعة، وقمر وزين شافوا بعض، وفضلوا باصين لبعض لحد ما زين قرب من قمر. زين: تسمحيلي بالرقصة دي؟