رواية كنت وحيدا لكنك اتيتي الفصل الخامس 5 - بقلم مريم محمود

يارين قاعده على الرصيف بعد ما سليم مشي. خافت منه شوية، بس حاولت تهدّي نفسها وقعدت تقول لنفسها إنه مستحيل يوصلها، واستحالة يعرف هي مين ومنين. قررت لو شافته تعتذر له عشان ما يعملهاش حاجة. في نفس الوقت، كانت خايفة من عمامها أكتر، اللي ممكن يقتلوها فعلاً. قطع تفكيرها صوت رنة موبايلها. يارين: الو. جدتها: الو يا يارين، خير؟ في حاجة؟ عمك عيد بعتلك لي؟ يارين: بعتلي إنه بيقولي عاوزين يقتلوني. جدتها شهقت من الصدمة.

يارين: متخافيش، مش هيعملوا حاجة. جدتها: لا يا يارين، لازم نشوف حل. يارين: هنعمل إيه؟ مش في إيدينا حاجة نعملها. وبعدين يقتلوني أحسن، أنا تعبت. جدتها: انتي بتهزري يا يارين؟ لا طبعًا، أنا عرفت الحل. يارين: إيه؟ جدتها: انتي هتهربي. هتختفي عن أنظارهم. خليكي عندك في القاهرة، وأنا هتصرفلك وهشوفلك شقة من ناس قرايبي هنا. يارين: بس يا تيتي، حياتي كلها في الشرقية، إزاي هسيب كل ده ودراستي؟ وهصرف إزاي على نفسي؟

جدتها: انتي معاكي معاش أبوكي وأمك، مش تقلقي. ودراستك هننقلها هناك في القاهرة. ولو محتاجة فلوس، أنا معايا، وأوعي تتكسفي تاخدي مني. يارين: لا يا تيتي، مش هعرف. بعدين أنا شفت شغل في الشرقية ومرتبه حلو، استحالة أسيبه. وبعدين معاش بابا وماما ماكنوش بيكفونا، يدوب بس يكمل يومين. جدتها: شوفي لك شغل هناك يا يارين، وأنا هكلم لك قريبتي تشوف لك شقة عندها إيجار وتشوفي حياتك هناك. وأنا هاجيلك بين فترة وفترة عشان ما يشكوش فيا.

يارين: يا تيتي، مش هعرف والله، صدقيني. وبعدين هتكلمي مين دلوقتي؟ إحنا الفجر. أنا شوية وهركب وأجي. جدتها بجمود: يارين، أنا قولت كلمة وهتحصل، ومش تتعبيني. يارين بحزن: ماشي يا تيتي. جدتها: يلا شاطرة. على الصبح كده هكلم قريبتي، وهي كده كده بتصحى بدري عشان شغلها. واستحملي شوية انتي بس. يارين: حاضر. تصبحي على خير. جدتها: لا متقفليش، خليكي معايا. يارين: لا نامي انتي، مش تقلقي عليا.

جدتها: متزعليش مني يا يارين، أنا والله بس خايفة عليكي. يارين: عارفة يا تيتي، بس هنعمل إيه يعني؟ أدفن نفسي عشان يرتاحوا مثلاً؟ جدتها: بعد الشر عليكي يا حبيبة تيتي. بس معلش، حسبي الله فيهم، ربنا ينتقم منهم. وإن شاء الله ربنا هيخد لك حقك منهم في أقرب وقت. انتي بس فوضي أمرك لله، وهو هيختار لك الخير، وثقي في خطة ربنا. يارين: ونعم بالله يا تيتي. جدتها: ربنا يسهلك يا رب.

يارين: يارب يا تيتي، كله خير. بس نامي انتي، متقلقيش عليا. جدتها: كلها ساعتين وهكلم قريبتي، فلو نمت مش هصحى. يارين: هتصل عليكي أنا. قوليلي أتصل عليكي إمتى وهصحيكي. جدتها: هي ساعة كام دلوقتي؟ يارين: بتاع 4 كده. جدتها: خلاص يا حبيبة تيتي، صحيني 7. يارين: حاضر يا تيتي. تصبحي على خير. جدتها: وانتي من أهل الخير كله يا حبيبة قلب تيتي.

قفلت يارين مع جدتها وفضلت قاعدة في الشارع على الرصيف، بتحاول ما تنامش، بس النوم غلبها ونامت وهي قاعدة. *** عند سليم، اللي صحي على رنة ياسين. سليم بنعاس: إيه؟ في إيه؟ ياسين: انت لسه نايم؟ ده ساعة 7. سليم بخضة: إيه؟ إزاي؟ ياسين: إيه اللي نيمك يا بطل كده؟ ده أول مرة تحصل. سليم: منا امبارح نمت متأخر بسببك. هقوم ألبس، فاضل ساعة على الشغل. ياسين: طب البس بسرعة وعدي عليا، عايز أوريك حاجة كده. سليم: مش هلحق. عدي عليا انت.

ياسين: خف بس كده وهتلحق. يلا هستناك تحت. سليم: طب الاقيك تحت عشان ما أتأخرش على الشغل. ياسين: يعم ده أول مرة. مانت طول عمرك بتروح قبل الشغل بساعتين. مش هيحصل حاجة لو رحت في معاده يعني. سليم: ماشي يعم ياسين، اقفل يلا عشان ألبس. ياسين: اوكي يا سوسو، باي. سليم: يا ابن الـ... قفل ياسين المكالمة، وسليم بدأ يلبس. ولما لبس وخلص، قابل دعاء. دعاء: استنى، رايح فين؟ الفطار؟

سليم باستعجال: لا لا، مش هلحق. اتأخرت أوي ولسه هشوف ياسين. يلا باي. دعاء: ماشي يا حبيبي. باي، مع السلامة، في حفظ الله. مشي سليم وركب عربيته ووصل عند ياسين، لقاه واقف. سليم: إيه؟ بسرعة؟ فاضلي ربع ساعة. ياسين: اهدي يعم، في إيه؟ بص كده وراك. بص سليم، لقي يارين نايمة. ابتسم بشر وقرر يروح لها. ياسين: استنى بس، رايح فين؟ سليم: اهدي بس. راح سليم ناحيتها. سليم: يا بت انتي، اصحي. يارين مكنتش بتصحى. سليم بزعيق: يا زفتة انتي!

يارين وهي نايمة: لا مش تقتلوني، لا سبوني، حرام عليكم. ياسين وسليم بصوا لبعض باستغراب من كلامها. ياسين: آنسة، اصحي. يارين قامت بخضة بتصرخ: مش تقتلوني بقولكم، لا! ياسين: اهدي يا آنسة، محدش هيقتلك. بصت يارين لسليم. يارين بغضب: عاوز إيه تاني؟ سليم: عاوز حقي. يارين: طب أنا آسفة إني كلمتك كده امبارح، بس الله أعلم أنا تعبانة إزاي. بتأسف لك مرة تانية، وأتمنى تقبل اعتذاري. سليم بغرور: أسفك مش مقبول. يارين: أفندم؟

سليم: بقولك أسفك مش مقبول، مش سامعة ولا إيه، طرشة حضرتك؟ يارين بهدوء: أيوا حضرتك، عاوز إيه دلوقتي؟ سليم: بقولك عاوز حقي. يارين: وده نجيبهولك إزاي بقى؟ سليم بشر: أنا محدش بيجيبلي حاجة، حقي وأعرف أجيبه بنفسي يا آنسة يارين، ولا إيه برضه؟ يارين بصدمة: انت عرفت إزاي إن اسمي يارين؟ سليم: سهلة. يارين السيد علي موسى، 17 سنة، من الشرقية. أهلك اتوفوا في حادثة من أقل من شهر، صح كده ولا إيه برضه؟

يارين بتوتر: لا لا، مش أنا. مين دي أصلاً؟ سليم برفع حاجب: طب اتصدمتي ليه من أول ما قولت اسمك؟ يارين: استغربت بس من الاسم ده. مين يارين ولا تارين؟ إيه الاسم الغريب ده؟ حد يبقى اسمه كده؟ سليم بص في عينيها. سليم: بس عينك بتقول غير كده، فبطلي كدب ولف. يارين بغضب: يعني انت عاوز إيه دلوقتي؟ آه اسمي يارين ومش هخاف منك. واللي تقدر عليه اعمله. أعملك إيه يعني؟

منا اتأسفت خلاص. أو أقولك اعتبرني مش اتأسفت واخبط راسك في أقرب حيطة؟ وقتك خلص، اتفضل. سليم بهدوء: شاطرة. اشتمي كويس وزودي في العقاب. يارين بضحكة سخرية: عقاب ليه؟ هو إحنا في مدرسة ولا إيه؟ سليم: آه، وهوريكي والله. يارين: بقولك إيه؟ على الصبح أنا مش فايقة. قولت اللي تعمله اعمله. أنا معنديش حاجة أخسرها. فاعمل اللي تعمله يعني. سليم ببرود: يعني معندكيش حاجة تخسريها؟ متأكدة؟ يارين: آه، معنديش. خلصنا.

سليم: اممم. يعني مبتخافيش على جدتك اللي انتي عايشة معاها؟ يارين بخوف: سيب تيتي في حالها. الموضوع بيني وبينك، فمتدخلهاش في الموضوع. سليم بهدوء: طب فكنا من جدتك، ست كبيرة وهحترمها. طب يعني مش خايفة على عمامك؟ يارين بلهفة وكذب: لا بالله أرجوك. عمامي لا، دول بحبهم جدا. لا لا، إزاي هعيش من غيرهم؟ يالهوي! بحبهم جدا. بلاش، هما بلاش تقرب لهم. سليم: يا شيخة؟ يارين: تحب أقولك عنوان بيتهم؟ سليم: نبطل خفة عشان مش ناقصه.

يارين بتنهيدة: والله أنا هموم الدنيا فوق راسي، فمش قادرة لأي حاجة والله. فأتفضل دلوقتي. ياسين: الحق يا سليم، الوقت. يلا روح. سليم بص ليارين وقال: لينا معاد تاني، ومش هسيبك المرة الجاية. يارين: ماشي، ماشي. يلا. مشي سليم، وكان واقف معاه ياسين. ياسين: معلش، متحطيش في دماغك، مش هيعمل حاجة، متقلقيش. يارين: مش خايفة، عادي يعني. مشي ياسين وساب يارين لوحدها. بعدها اتصلت على جدتها. يارين: صباح الخير يا تيتي، عاملة إيه؟

جدتها: صباح النور يا قلب تيتي، عاملة إيه انتي؟ يارين: الحمد لله. وانتي؟ جدتها: يدوم يا حبيبتي. أنا أهو الحمد لله. وهقفل معاكي وأتصل على قريبتي. يارين: طب اتصلي على قريبتك دلوقتي عشان هموت وأنام. جدتها: ماشي يا حبيبتي، هتصل عليها. يارين: ماشي يا تيتي. باي. *** عند جدة يارين. جدة يارين: عاملة إيه يا حبيبتي؟ أخبارك؟ وحشاني أوي والله. دعاء: عاملة إيه يا عمتو؟ انتي اللي وحشاني أكتر. وبشري وعيالها عاملين إيه؟

البنت دي وحشتني أوي. يعني أنا صديقة طفولتها ومش تعبرني كده. ده أنا بتصل عليها كل يوم، وأول أسبوع اتشغل عنها ومتصلش، تقوم متتصلش. هي كده. جدة يارين بتوتر: بشري... بشري... دعاء بقلق: مالها بشري يا عمتو؟ في إيه؟ جدة يارين: بشري في ذمة الله، هي وعيالها وجوزها. ومبقاش إلا يارين. دعاء بخضة: إيه؟ انتي بتقولي إيه يا عمتو؟ أكيد لأ. بالله عليكي لو بتهزري، بلاش، بلاش في المواضيع دي.

جدة يارين بحزن شديد: والله يا بنتي ما بضحك. ويا ريتني كنت بضحك. دعاء: هما ماتوا على طريق ***؟ جدة يارين: آه، إيه عرفك؟ دعاء ببكاء: يالهوي، يالهوي. شوفت يارين على تلفزيون ومعرفتهاش ليه؟ بشري تسبني؟ ده مليش حد غيرها. لي؟ جدة يارين: طب يا دعاء، لو بتحبي بشري، اعملي معروف ليها ولبنتها. الله يخليكي يا دعاء. أنا متصلة عليكي مخصوص. دعاء ببكاء: أنا أخدم بشري يعيني. هو أنا ناسيه لها حاجة؟

جدة يارين: طب اهدي يا دعاء، أنا عارفة إنك بتحبيها، بس اهدي عشان أفهمك. دعاء ببكاء: ياريتني كنت بحبها، بس دي كانت أختي وصاحبتي. دي أفضالها عليا متتعدش. ياريت أعرف أرد لها إيه حاجة. قولي يا عمتو، سامعاكي. جدة يارين بدأت تحكيلها كل حاجة عن عمام يارين وكل حاجة. دعاء: طب هي فين؟ طب ليه متصلتيش عليا من بدري؟ كنت روحت لها والله. جدة يارين: اهو اللي حصل. بس شوفي لها أي مكان بالإيجار، حتى لو أوضة.

دعاء: طب بصي، أنا قاعدة في شقة. يعني يدوب وأنا راجعة من الشغل بقعد فيها. وهي حلوة وجميلة. لو تعيش معايا، هاتيها. جدة يارين: مش هتبقى ضيقة عليكم؟ دعاء: ضيقة إيه بس يا عمتو؟ ده سليم بيه هو اللي جايبها لي مخصوص. وكمان مش بندفع إيجار. جدة يارين: ياه، لدرجة دي. دعاء: مش لدرجة دي أوي يعني. هو كان باني عمارات وماجرها، فشاف لي عمارة قريبة من الفيلا وساكنة في شقة فيها. وهي كبيرة وحلوة. ده مش بيسكن فيها إلا الأغنياء يا عمتو.

جدة يارين: ماشي يا حبيبتي. هتعدي على يارين تاخديها امتى؟ دعاء: والله يا عمتو، ممنوع أطلع خالص إلا ما سليم بيه يجي. أول ما يجي، هروح لها. جدة يارين: طب هو بيرجع امتى؟ دعاء: بيرجع متأخر، بس متقلقيش. هكلمه أستأذن منه. هو مبيرفضليش طلب. جدة يارين: تمام يا حبيبتي. ماشى. دعاء: انتي محتاجة أي حاجة؟ جدة يارين: محتاجة سلامتك يا حبيبتي.