رواية قصتي انا الفصل الثاني 2 - بقلم هي جنتة

طبعاً كتبنا الكتاب وطلعنا على المطار أنا وبابا وأخويا محمد وأخته وأخوه. وسلمت على بابا وأخويا وأنا بتقطع من جوايا. أول مرة أبعد عنهم وأول مرة أطلع من بلدنا أسافر فيها وأركب الطيارة وأروح لجوزي اللي عمري ما شفته ولا مرة واحدة. فقت من أحزاني وخوفي على صوت النداء الأخير للطائرة. آه يا رب خليك معايا. طلعت الطيارة وقلبي مليان خوف وقلق. افتكرت آية من كتاب الله:

(قل لن يصيبنا إلا ما كتبه الله لنا هو مولانا وعلى الله فليتوكل المؤمنون) قعدت في الكرسي اللي جنب الشباك. وبعد شوية جه شاب، والمضيفة بتستقبله بالترحاب وقعد في الكرسي اللي جنبي. لأول مرة أقعد جنب شاب. وشوية قالي: "لو سمحت ممكن أقعد جنب الشباك؟ وأنا في نفسي بقول: "إيه شباك؟ أنا أصلاً زهقانة ومضغوطة." حمدت ربنا إني قاعدة جنب الشباك، يمكن أنسى اللي أنا فيه. رديت عليه: "آسفة مش هقدر." استغرب وقال: "إنتي مش عارفة أنا مين؟

قلت له: "معرفش، ولو سمحت متتوجهليش أي كلام." استغرب وانصدم من ردي. وكل شوية تيجي مضيفة وتشوفه عايز حاجة. وناس كتير بتيجي تسلم عليه وتطلب توقيعه أو صورة أو يتصوروا معاه. بصراحة قلت: "يمكن هو حد مهم، ولا ابن وزير ولا حاجة." طلعت مصحفي الصغير وقعدت أقرأ. قبل ما توصل الطيارة، لقيت الشاب اللي جنبي بيقولي: "ممكن أسأل سؤال؟ قلت له: "اتفضل." قال: "هو ليه إنتي ما طلبتيش توقيعي ولا صورة ولا أي حاجة زي الناس والمضيفات ما بتطلب؟

رديت وقلت: "حضرتك وأنا أطلب منك ليه؟ أنا معرفكش ومش عايزة أعرفك، ولو سمحت متتوجهليش أي كلام تاني." ورجعت لمصحفي تاني وهو قاعد جنبي مزهول ومصدوم. ولما نزلنا من الطيارة وخلصت الإجراءات، وجه اللقاء المنتظر. ولقيت شاب في عمر 35 واقف ومعاه ورقة مكتوب فيها اسمي: "منار عبدالله". قلبي انقبض لما شفته وحسيت بإحساس مش طبيعي. روحت عليه وقلت له: "أنا منار." قال: "منار؟ منار مين؟ قلت له: "منار عبد الله." قال: "إزاي؟ إنتي منتقبة؟

قلت له: "أيوا منتقبة." قعد يزعق ويصرخ: "إيه دا؟ هو أنا هتجوز خيمة؟ هتجوز عفريتة؟ لأ أنا مش عاوزك، ارجعي تاني." ومرة واحدة لقيته بيقول: "إنتي طالق، طالق، طالق." قال كدا وطلع يصرخ وهو بيجري، كأني عفريتة. وأنا منطقتش ولا بحرف. قعدت في الأرض من الصدمة. "طالق؟ أنا طالق؟ إزاي؟ هو أنا لسه اتجوزت عشان أطلق؟ طب مش يستنى يشوفني ويحكم عليا؟ دا كله والمسافرين بيتفرجوا.

بس في حد كان متابعني من أول ما نزلت من الطيارة وعايز يعرف أنا مين ولا أنا إيه. ياترى إيه اللي هيحصل لمنار وإيه اللي هيعمله الشاب ده معاها؟