رواية قصيرة القامة طويلة اللسان الفصل السابع عشر 17 - بقلم شيماء صبحي

أنا أسف يا باشا على الخبر اللي هقولهولك، بس الآنسة اللي بلغتنا نحميها كانت بتصرخ ولما طلعنا نشوف إيه اللي بيحصل لقيناها واكلة أكل كتير جداً وبطنها كانت وجعاها جداً، وإحنا حالياً واخدينها وفي طريقنا للمستشفى. هادي وقف مصدوم وقال بقلق: "إنتوا رايحين مستشفى إيه؟ محمود: "في مستشفى حكومي قريبة من هنا، هنروح هناك." هادي قال برفض:

"طيب يا محمود، متروحوش هناك، غيروا طريقكم بسرعة للمستشفى الخاص ***** وأنا هحصلكم على هناك بسرعة." محمود هز راسه بالموافقة وقال: "تمام يا هادي بيه." هادي قال بقلق: "طيب يلا بسرعة اتحركوا." هادي قال كلامه وقفل المكالمة وهو بيبص لعبدالله بقلق وقال: "هي قمر دي مجنونة للدرجادي؟ عبدالله بص له بصدمة وقال: "إيه اللي حصلها؟ هادي بتنهيدة: "واكلة أكل كتير وبطنها وجعتها، ودلوقتي الرجالة بتاعتي واخدينها على المستشفى."

عبدالله قال بقلق: "طيب يلا يا هادي خلينا نروح لها بسرعة." هادي هز راسه وشغل العربية وساق وهو بيقول: "ربنا يستر وميكنش حصلها حاجة." *** وفي العربية اللي فيها قمر: قمر بوجع: "آه بطني، منكم لله إنتوا السبب." محمود بص لها بصدمة وقال: "إحنا السبب في إيه؟ هو إحنا عملنا إيه بس يا آنسة؟ قمر بصت له بغيظ وقالت: "أنا عرضت عليكم تاكلوا معايا ومرضتوش، يبقى إنتوا السبب." حسن صاحبه بصلها وقال:

"إحنا رفضنا أكل علشان ده ممنوع يا آنسة، ولاكن إنتي طبعاً أكلك حلو وميترفضش." قمر بصت له وقالت بغيظ: "وإنت عرفت منين إن أكلي حلو؟ حسن ابتسم وقال: "من ريحته طبعاً اللي كانت طالعة، وإحنا طبعاً شميناها، تسلم إيديك." قمر ابتسمت ولاكن قالت بعياط: "هو إنتوا بقالكم كتير ساقيين ليه؟ دي المستشفى قريبة من هنا." محمود بصلها وقال بخوف من تحولها من ابتسامة لعياط:

"إحنا رايحين مستشفى خاص يا آنسة، وهادي بيه هو اللي قالنا نوديكي هناك." قمر أول ما سمعت اسم هادي قالت بغيظ: "وإنتوا بتسمعوا كلامه ليه؟ أنا مش عايزة أشوفه، رجعوني البيت تاني." حسن ومحمود بصوا لبعض ولاكن تجاهلوها وفضلوا مكملين في طريقهم لحد ما وصلوا عند المستشفى. نزل محمود وهو بيقول بصوت عالي: "ترولي هنا بسرعة."

الممرضين جريوا على صوته وجابوا الترولي بسرعة وشالوا قمر من العربية وحطوها عليه، وهي كانت عمالة تتوجع بألم، وبعدها أخدوها لغرفة الطوارئ. حسن قال لمحمود: "أنا هدخل معاها، وإنت كلم هادي بيه عرفه إننا وصلنا." محمود هز راسه وحسن دخل، وفضل محمود واقف ومسك موبايله واتصل على هادي. في غرفة الطوارئ: الدكتور واقف بيبص لقمر وبيقول: "إنتي أكلتي إيه يا آنسة؟ قمر بوجع: "أكلت أكل كتير." الدكتور باستغراب:

"بس أكل كتير إيه اللي يخليكي بالمنظر ده؟ قمر بصت له بدموع وقالت: "أنا أكلت أكل يكفي خمس أفراد لوحدي." الدكتور بص للممرضين بصدمة وبعدها قال: "طيب، الحل الوحيد معاكي هو إننا نعملك غسيل معدة." قمر بخوف: "لا، غسيل معدة إيه؟ لا مش عايزة، أنا هغسلها لنفسي." الدكتور بص لها بصدمة وقال: "هو إنتي بتغسلي معدتك بنفسك؟ قمر هزت راسها وقالت: "أومال فاكرني مش نظيفة؟ مهو أكيد بغسلها." الممرضة اللي كانت واقفة

جمبها بصت لها وقالت بصدمة: "إنتي فاهمة الأول يعني إيه غسيل معدة يا آنسة؟ قمر بصت لها بسخرية وقالت: "أومال يعني مش فاهمة؟ وبعدين خلصوني، إنتوا هتفضلوا تسألوني أسئلة كتير؟ بقولكم أنا مش قادرة." الدكتور خبط كف على كف بصدمة ورجع بص لها وقال: "هنعملك غسيل معدة، وكل اللي محتاجينه لحضرتك إنك تنامي علشان نعرف نشتغل." قمر هزت راسها بخوف، وبعدها الدكتور قال: "دخلوها الأول غرفة العمليات."

الممرضة هزت راسها وندهت على المساعدين، واللي جم أخدوا قمر لغرفة العمليات، وبعدها الدكتور دخل بعد ما جهزوا قمر للعملية وبدأ يدخل الأنبوب من فم قمر وبدأ يسحب كميات السوائل اللي في المعدة. وفي الخارج وصل هادي وعبدالله، وعلى وشهم الخوف. حسن ومحمود كانوا واقفين عند غرفة العمليات وهما قلقانين، وأول ما شافوا هادي جاي عليهم قربوا منه وقالوا: "هيا حالياً في غرفة العمليات بيعملولها غسيل معدة." هادي بص لهم وقال:

"إزاي كل ده حصل؟ وأكلت كل الأكل ده إمتى؟ محمود شرح له كل اللي حصل وإنها جت تعزم عليهم ياكلوا وهما رفضوا، وهيا كانت متضايقة وقالت: "إنتوا الخسرانين"، وبعدها أكلت كل الأكل لوحدها وحستش بنفسها غير وهي واقعة على الأرض وبتصرخ. هادي بص لهم وقال: "وإنتوا رفضتوا تاكلوا ليه؟ عاجبكم اللي حصل لها ده؟ دي كانت ممكن تروح فيها." محسن ومحمود بصوا في الأرض وقالوا:

"إحنا آسفين يا فندم، بس إحنا رفضنا علشان كان أول مرة حد يعزم علينا أكل في الشغل." عبدالله بص لهادي وقال: "قمر عملت كدا علشان حاسة بالوحدة يا هادي، وأكيد كانت عاملة الأكل ده كله علشان كانت متعودة إننا بناكل معاها، فلازم نعذرها. هيا أكيد لسه متقبلتش إننا مشينا وسبناها لوحدها." هادي بص له وقال: "مهيا عنيدة برضه يا عبدالله، وبعدين اللي عملته ده اسمه تهور، وبعدين دي عرضت حياتها للخطر، أصل مفيش إنسان عاقل يعمل كدا."

عبدالله بص له وقال بحزن: "اللي عملناه هو اللي غلط يا هادي، وأنا بالذات ماكنش ينفع أسيبها لوحدها، والآن شي." هادي أخد عبدالله وبعده عن محمود وحسن علشان يتكلموا براحتهم وقال: "متجبش الغلط عليك ولا على أي حد فينا. أنا عرضت عليها تيجي معانا وهي اللي رفضت، والمفروض يعني إننا نفضل معاها ونسيب حياتنا واقفة عشانها." عبدالله اتنهد وهز راسه وقال:

"هي في الأول وفي الآخر بنت ومش زينا يا هادي، وبعدين متنساش إنه غلط إنها تيجي معانا، وبالذات انت. هو صحيح كنتوا عايشين معاها في نفس البيت، بس كان في حدود، إنما دلوقتي معتقدش إنها لو كانت جت معاك كان هيبقى في حدود بينكوا." هادي بص له برفع حاجب وقال: "تقصد إيه يا عبدالله؟ عبدالله ابتسم وقال: "أقصد إنك تتجوزها يا هادي، هو إنت مش بتحبها برضه؟ هادي بص له بتفكير وقال: "أتجوزها؟

إنت عارف إني حالياً مشغول ولسه بأسس الشركة من جديد." عبدالله ابتسم وقال: "إنت لما تكتب عليها وتخليها في القصر على الأقل هتبقى مع عيلتك وفي أمان، أحسن ما هي عايشة لوحدها، وفي الأول وفي الآخر هتكون جوزها يعني هتبقى في حمايتك." هادي بص لعبدالله بتفكير، مكنش عارف يعمل إيه، هل يوافق على كلام عبدالله ويتحوزها فعلاً ولا يسيبها زي ما هي عايزة ويفضل حسن ومحمود معاها؟

بص كان قلقان جداً عليها برضه. بعد ما فكر في الموضوع، بص لعبدالله تاني وهز راسه بالموافقة وقال: "إنت عندك حق، هي مينفعش تفضل عايشة هناك لوحدها تاني، وبعدين أنا جبت لها حراس يحموها ومفيش فايدة معاها، بس إنت عارف لو هي رفضت إنها تيجي معايا هعمل فيها إيه! عبدالله ضحك وقال: "متنساش بس تكتب الكتاب الأول، وأنا أوعدك إني اللي هطلعها من هناك بنفسي وأجيبها لحد عندك."

هادي هز راسه، وبعدها سمع صوت باب غرفة العمليات بيتفتح وخرج منه الدكتور والممرضين كانوا ساحبين قمر بالترولي، وأول ما شافها هادي قرب عليها بخوف لأن وشها كان باين عليه التعب. مسك الترولي ووقفه وهو بيبص عليها وبيقول بقلق: "قمر؟ الدكتور وقف قدام هادي وقال: "سيبهم يودوها أوضتها ترتاح." هادي بص للدكتور بقلق وقال: "هي عاملة إيه دلوقتي يا دكتور؟ الدكتور اتنهد وقال: "هي دلوقتي كويسة الحمد لله،

بس أنا عايز أقول لجوزها: ربنا يكون في عونك." هادي بص للدكتور باستغراب من كلامه وقال: "تقصد إيه يا دكتور بكلامك ده؟ الدكتور بص له وقال: "أقصد إنها مينفعش تفضل لوحدها تاني، دي بتقولي إنها بتغسل معدتها بنفسها علشان لازم تكون نظيفة." هادي بص لعبدالله والرجالة بتوعه بصدمة ورجع قال للدكتور: "يعني إيه الكلام ده يا دكتور؟ الدكتور حرك راسه بعدم علم وقال: "أنا مش عارف، بس إنت تقدر تفهم منها وتعرف الطريقة، وأرجوك تقولي عليها."

هادي بص للدكتور وقال: "أنا متشكر جداً يا دكتور على تعبك معانا." الدكتور ابتسم وقال: "الشكر لله، بعد إذنكم." هادي بص لعبدالله وقال: "هي فعلاً بتغسل معدتها يا عبدالله؟ عبدالله هز راسه بعدم فهم وقال: "الله أعلم، بس يمكن بتغسلها فعلاً." هادي بص له بصدمة وسابه وراح لأوضتها، وعبدالله جري وراه علشان يفهم إيه اللي بيحصل. وصل هادي لغرفة قمر ولاقاها نايمة على السرير وباين على وشها التعب. هادي قرب منها وهو بيقول:

"قمر، إنتي سامعاني؟ قمر مردتش عليه، وهوا حط إيديه على وشها بلطف وقال: "إنتي كويسة؟ فضلت مغمضة عينيها وساكتة لحد ما هو قعد قدامها وعمالي يحرك إيديه على وشها بحنية وبيهمس كلام لطيف، لحد ما قرب من خدها وطبع قبلة رقيقة وهو بيقول: "إن شاء الله تكوني بخير." قمر فتحت عين واحدة وقالت بغضب: "هو إنت إيه اللي جابك هنا؟ هادي رفع حاجبه بصدمة وقال: "يعني إنتي صاحية أهو وسمعاني! قمر هزت راسها وقالت:

"أيوه صاحية، وبعدين إيه اللي بتعمله ده؟ عمالي تحط إيدك على وشي، لا وكمان بتبوسني من خدي، ممكن أعرف اللي بتعمله ده بصفتك إيه؟ هادي ابتسم على طريقتها في الكلام وقال: "عادي يا قمر، أنا بعمل كدا علشان إنتي هتكوني مراتي." فتحت عينيها بصدمة وقالت: "مرات مين؟ هو إحنا هنهزر! هادي ضحك على كلامها وقال: "إنتي صحيح يا قمر، كنتي بتغسلي معدتك بنفسك؟ قمر بصت له وقالت: "ملكش دعوة، أغسل معدتي ولا مغسلهاش، هي معدتي وأنا حرة فيها."

هادي قرب من خدها وقال: "تصدقي إنك طفلة والله! قمر بصت له بتوتر وقالت: "هادي ابعد كدا، مينفعش تقرب مني." هادي قرب أكتر من خدها وقال: "الدكتور قال إنك كويسة، يعني أعتقد تقدري تروحي دلوقتي معايا، وكل الحكاية إنك هتجهزي نفسك علشان هتجوزك النهارده." قمر بصت له بصدمة ولاكنها حطت إيديها على صدرها وقالت: "وأنا بقى مش موافقة اتجوزك!