رواية قتلني ورحل الفصل السابع عشر 17 - بقلم ميفو سلطان

فاقت كارما وهيا تشعر بانفاسها تذبحها لتجد قاسم بجوارها فقد رفض ان يدخل عليها احد. لتنظر إليه بوجع وتجهش بالبكاء. "شفت يا قاسم جدك واخوك عملوا فيا إيه. شفت الجاحدين! أنا حبيته سنين عشان آخرتها كده يشتري بالفلوس. ليه يا قاسم، هو أنا ما أنفعش أتحب؟ حبي ليه رخيص؟ ما يقبلوش إلا بالفلوس ويمثل عليا. جدك إزاي جاحد كده يعمل فيا كده." ليهتف قاسم بقهر: "جدك جاحد يعمل أي حاجة يا كارما."

لتهب وتقف: "لو فاكر إننا بنتاخد ونتجاب يبقى بيحلم. هو بيربي بدر حديدي ونفسه نبقى زيه. خلاص نبقى كلنا زيه من غير قلب. أنا بكرهه وبكره أيان وبكره نفسي. أروح فين منهم لله؟ قلبي مزعوزع تمزيع. كل ده عشان الفلوس. يدبحوك عشان الفلوس ويدبحوني عشان الفلوس. ليه الصعرة دي؟ لتهتف: "أنا ما أتحملش أقعدلهم. قاسم خدني معاك." ليبهت قاسم: "آخدك؟ كارما بتقولي إيه؟

لتصرخ: "بقول إن ما عادش ليا حد إلا انت. خدني معاك وإلا هموت نفسي. ما تبقاش زيهم وترميني وأنا محتاجالك." ليتنهد ويهتف: "حاضر يا كارما. اللي تعوزيه." لتهتف: "ومش هرجع تاني يا قاسم. ولو انطبقت السما ما عايزاش أشوفهم." ليهتف قاسم بغل: "أنا بقى هرجع يا كارما. هرجع آخد حقي اللي ما عرفتش أصونه. هرجع آخد وجعي منه تالت ومتلت. هرجع أعيد دنيا ما عشتهاش وحبيب راح بالجبر والغصب. قاسم هيرجع عشان يمزع قلبه حتتين ويحسره. مش عايزني؟

قاسم العالي ابن البهوات اللي بيدوس على الناس. هكبر وأبقى. عهد عليا قدام ربنا لاتحول زي ما هو عايز، بس أول حد هدوس عليه هيكون هو. أول واحد هخطى عليه وابتدي دنيتي هيكون هو. هحرق قلبه وأجيب حبيبي تاني. أنا عارف إني قتلتها، بس اللي متأكد منه إنها عمرها ما هتكون لغيري. أنا طبعت نفسي جواها وربيتها. لقاسم طفلة ما تعرفش حاجة. فتحت على دنيا قاسم وعارف إنها ما تعرفش تخرج. بدعيلها ربنا يملس على قلبها لحد ما أرجع لها وآخدها

أداويها. سيبتها عشان ما تتفضحش وأمها تنحبس. الجاحد مراقبني وحاطط عليا حراسة ومش مخليني أتنفس لحد ما أسافر. مخطط لي وراسم خط همشي عليه. وأنا فعلاً همشي عليه بس عشان أوصل. وأول ما أوصل قاسم هيعلم عليه خطوط الدنيا. سيبت حبيبي بحافظ عليه مالجاحد. كان هيلبسها قواضي ويعك شرفها. أهون عليا تعرف إنها رخيصة من إنها تتمسح والشرفها يروح وتنفضح. عارفة هرجع وراجعة لها كل حاجة. هرجع وأعملها أحلى فرح، أحلى دنيا. هرجع وأوطي على

رجليها تسامحني، بس أكبر وآخد من الدنيا حقي. قاسم هيكبر وهيعرف بدر الحديدي إن القوي فيه اللي هيقوي عليه وينهش قلبه."

**************** كانت ليال تجلس في حجرتها تحس بتمزيقة في قلبها. "إيه مش مصدقة إن ابن البهوات يعمل كده؟ لسه مصدومة؟ بجد إيه الغلب اللي انت فيه ده؟ الله يسامحك يا أمي ربيتي الضعف والخيبة. ربيتي العبط والهبل. أي حد ياخدها ويوديها. بس ليه، ليه يحصل كده؟ الحب ليه مالوش تمن؟ ليه ما يتحسش؟ ده أنا كنت تحت رجليه. ما تلبسيش يا ليال. حاضر يا قاسم. ما تعلميش. حاضر يا قاسم. ما تصاحبيش حد. حاضر يا قاسم. جواز عرفي واتجوزت؟

إيه الجبروت ده؟ ما صعبش عليك غلبي؟ ما صعبش عليك إن واحدة ضعيفة غلبانة؟ يا ترى كنت بتعمل كده وتدور تضحك على عبطي؟ يا ترى يا قاسم؟ لتحس بنغزة في صدرها. "قلبي بيموت واحدة واحدة بس بيسحب روحي. صعب عليا حالي منك وأنا اللي عشقتك وحبيتك. ليه؟ انت إزاي اتلونت كده؟ سنة ماشية وراك زي القطة اللي تربيها ولا تسيبكش. سنة وآخرتها تبعتلي فلوس؟ أنا يا قاسم نمت معايا بفلوس؟ هتتجوز غيري؟ هتعيش مع حد غيري؟ طب وأنا هعيش إزاي؟

انت كده سحبت قلبي. منك لله. ليه، ليه عملتلك إيه؟ ده أنا العشق كان قليل." لتحس بنار داخلها. لتفتح تليفونها بقهر لتسجل له آخر رسالة كليال التي تعلم أنها ستموت ما إن تنهي تلك الرسالة. لتهتف: "كل اللي عايزة أعرفه ليه. بس ليه؟ مش عتاب لأن العتاب ده للي عايز حبيب. لا أنا بس بستغرب. ليه؟ تقرب من واحدة غلبانة وطيبة وتضحك عليها ليه؟ دنيتك فاضية يابن البهوات؟ ما عندكش الوف تحت رجلك؟ ما لقيتش إلا الغلبانة تغرز غرزتك؟

أنا مش مصدقة ومش مستوعبة إن فيه بشر كده. ممكن عشان مقفول عليا ما أعرفش البشاعة اللي انتوا فيها. بس بجد شابو أستاذ والله علمت صح الصح. بس يا ترى بقى القصة عجبتك؟ انبسطت يا قاسم بيه؟

ليال كانت تنفع يعني. طمني بس عشان حتى نطلع من القصة حد انبسط بحاجة. أنا مش عارفة أنا مين ولا بتكلم كده إزاي. عارف يا قاسم انت غرزت نفسك في قلب ليال. آه والله أنا شايفه ده اللي بتكلمك مش ليال أساساً. أنا شايفه ليال بتموت. لتضحك. آه والله جنازتها هتطلع أهي. ليال ماتت وتخيل قاسم كمان مات. آه والله ليال وقلبها واللي جواها ماتوا. الدفنة واحدة يا عيني. البت حبت واحد ومات وماتت وراه. لتضحك. جنازة حارة والميت...

يلا الله يرحمهم كلهم. ماتوا وارتاحوا. كانت قصة حلوة برضه تصدق. ليال خدت حبها وماتت بيه. ما فضلش منها حاجة. جثة. آه جثة ما بتحسش. ببص من فوق عليها. شفتها نايمة لوحدها تتمناك من الدنيا. شفتها نايمة من غير حد بتبعت لحبيبها يرد عليها. شايفها بتتمزع أهي يا عيني غلبانة والله صعبت عليا. متخيل قضت ليلتها إزاي بتتمزع إزاي. بس اطمن ماهتقفش في طريقك تاني. ماهي حبت ولما حبيبها مات ماتت وراه. هتعيش لمين الغلبانة؟

مش من دنيتكم. حلمت بالأبيض. جه قاسم لبسها الكفن على مقاسها. حلمت بدنيا. جه قاسم دخلها القبر وقفل عليها. لتضحك. لا و باعتينلها فلوس. دانا كل اللي اتمنيته منك دبله. آخرتها طوق حديد في رقبتي خنقني. مش لاقية حاجة أقولها. امشي يابن الناس وامسح طريقي من سكتك وهيل عليه التراب. لا خدت حاجة منك ولا عايزة حاجة. بس اطمن ليال لما ماتت رجعتلك حاجتك. آه الورقة قامت ودعستها برجليها. البت برضه انقهرت يا عيني. يلا آخر أيامها كانت صعبة. انت فعلاً وعدت يا قاسم. مش قلتلي هلبسك الأبيض؟

لتضحك بقهر.

"ليال يا عيني لبست الأبيض. كفنوها يا قاسم. غلبانة فعلاً مالهاش في الدنيا دي. حبيت بس أعرفك إن اللي ضحكت عليها ماتت. أبقى افتكرها بالرحمة وعيش بقى حياتك وافرح. بس عارف ليال قبل ما تموت ما زعلتش إنها حبت وداقت الحب. ليال حبت واحد وعشقته وعاشت معاه أحلى جنة. ليال داقت الحب على إيدك وراحت وراحت قصتها. بس انت فعلاً أستاذ والله علمت صح. هفضل شايلالك حق تعليمي. مانا ما أعرفش أنا مين. هشيلك إنك كبرتني قبل الأوان. هشيلك إنك

عرفتني يعني إيه دنيا. ماتت ليالي وجت ليالي. ماتت ليالي اللي عاشت حلم بنوره وماتت وجت مكانها ليالي اللي عايشة في دنيتك الجديدة. لتضحك. دنيا مكشوفة عن حق. دنيا ما فيهاش لا حب ولا هموم. شفت أديني كسبت برضه. الخسارة راحت بهمها. راحت البت الهبلة اللي حبت وعشقت. راحت بروحه حبيب أو كانت فاكراه حبيب. وجه مكانها واحدة مش حاسة أساساً إن ليها قلب. قلب ميت يحسر. قلب سواده زايد وطافح. عيش يا قاسم وانسي ليال. عيش واطمن إنها راحت.

عيش وافتكرها واترحم عاللي كانت يوم حبيبه. لتضحك. حبيبة إيه بس. اترحم على واحدة اترمت في طريقك ودعستها برجلك واتسوت بالتراب وداب قلبها في التراب. وزي ما اتخلقتنا من طين وقلوبنا اتنفخ فيها الروح رجعت اتخلقت من طين بس ماخدتش الروح. مالروح راحت بنتشه حبيب. روح يابن البهوات هعيش عمري كله شايلالك علامك ليا إن الدنيا دي لا ينفعها الطيب ولا ينفعها قلب يحب. روح الله يسهلك. لا هدعي عليك ولا هفتكرك من أساسه. لأنك خدت حبك من

قلبي وسيبتني ميتة. هزعل ليه؟

هو اللي بيموت بيحس؟ هعيش مش هقدر أنسي اللي عملته. بس هنسي إني بني آدمة عايشة تحس وتحب. هيجي يوم وأنسى أكيد. ويمكن نتقابل في يوم. أعدي من جنبك وما أحسش بيك. أبص ليك سراب. فايتالك دنيتك كملها. الله يعينكم على نفسكم. بشر عايش. مسوخ ماشية. آه نتشت سلسلك من على قلبي وأنا بنتشها. خرجت قلبي ونفسي."

لتهتف: "مش قلتلك ادفنها جنبي يوم ما أسيبها. بس لقيتها خسارة. أصلها ما عادش ينفع خلاص. ماهي ما عدلهاش قلب يا عيني. غلبانة. غلب بعتهالك خسارة بفلوس برضه. وانت الفلوس عندكم ما بتترميش كده. خدها اديها لحد عنده قلب يحس بيها. بكلملك لاخر مرة قبل ما روحي تطلع وأقولك انت اتحبيت. حب السنين. اتحبيت من واحدة ما تعرفش الحب إلا على إيديك وما هطولوش تاني. ولا هتلاقي حد حبك كده. ليال حبت قاسم وعشقته وراح قاسم. ماتت ليال. ليال ماتت يا قاسم. مش عارفة ليه اتعمل فيا كده. ليه ليه يابن البهوات عملتلك إيه توجعني كده؟

لا توجعني إيه كلمة وجع قليلة والله. عارف إن ليال خلاص عمرها ما هتحب. هتحب إزاي وانت نتشت قلبها؟

عمرها ما هتبقى عروسة بعد ما فضحتها. أنا اتفضحت يا قاسم بحبك. هتعيشني عمري كله وأنا مكسورة ووشي في الأرض. بس صدقني مش متخيلة خلاص إني أنفع. يا ريتني مت وإلا إن أعيش كده. روح يابن الناس روح وافرح بدنيتك اللي مش مكتوبالي. روح وعيش. نفسي أتمنالك إنك تحب وتحب قوي عشان تحس اللي اتوجع في حبه شكله إيه. نفس خارج ونفس داخل من غير إحساس. بلاده أنا ببص للدنيا وأنا تايهة يا قاسم. بعتلك سلسلتك خدها. قلب قاسم خده. ما قلب ليال مات هيعمل بيه إيه. روح روح وسيب اللي عشقت غلط واتربت غلط وعاشت غلط. روح وسيب. ودع الضعف يا قاسم. اللي زيكو ماينفعش يحبو اللي زينا. روح. بدعي وأقول يا رب خدني. بس أرجع وأقول أمي. أمي هتعمل إيه؟

دلوقتي بدعي إني أتنفس. بس ده اللي عايزة أعمله لأني مابتنفسش يا قاسم. ادعي لليال تتنفس وتعرف تعيش بدل موتتها. فرحانة إنها ماتت عشان هيا مش للدنيا دي من أساسه. سيباك لدنيتك. عيشها زي ما تحب. لا هبقى فيها ولا ليا فيها. مش لاقية سبب إن ممكن حد يعمل في حد كده. بجد هعيش أحاول أفهم ليه. هعيش أحاول أعرف انتوا صنفكم إيه. وبشكرك لأنك علمتني. أكبر ليال. كبرت على إيديك وشاخت وماتت. شفت انت كويس إزاي. ما عادش فيه هبل خلاص. كتر خيرك. لو تعرف أنا شايفاك إزاي. فايتاك لدنيتك وفايتني لكفني يا قاسم. فوضت أمري لله."

لتقفل الخط وتجهش بالبكاء. كان قاسم يجلس وحيداً يشعر بقهر الدنيا. ليدخل عليه أخيه ليصرخ: "هتسيبني وتمشي؟ هتسيبوني وتمشوا؟ كارما كمان هتمشي؟ انتوا بتعملوا كده ليه فيا؟ ليهتف قاسم: "بنعمل إحنا بنعمل. بنعمل إيه يابن أبويا؟ قلي جدك قتلنا كلنا وأنت جيت وكملت معاه. زعلان أوي إن كارما ماشية؟ ماهي كانت قاعدة تتمنالك الرضا. البت كانت هتتجنن من الفرحة لما جدك قالها. انت إزاي جاحد كده؟

فلوس إيه وشركات إيه وزفت إيه اللي بتدور عليهم؟ يابن نعيم ما شبعتش؟ فلوس وشركات إيه عايز تبقى زيه؟ إيه القرف ده؟

ليصرخ أيان: "لا أنا مش زيه يا قاسم. أنا عشت أيام طين. أنت كنت صغير. أنا حشت عنك جحوده. فكنت طبيعي. قاسم أنا مش ببرر عملتي السودة. بس أنا اتربيت غلط. اتربيت ما بفهمش في المشاعر. يا قاسم انت أخويا. أنا غلطت. ماتبقاش أنت وهو والزمن عليا. ماتبقاش قاسي زيه. أنا أبويا مات وأمي واتحول بدر لجبروت. عايزني أبقى أبويا وأنا مش زي أبويا. روحه أبويه جننت جدي. أبويا كان زي جدي كان روحه. أنا عشت سنين بخاف أعيط قدام حد لأنحبس وأتضرب.

أيان كان بيقف يبصلكم وأنتم بتلعبوا. أخاف أقرب يجي ويشوفني. ربي جوايا المشاعر يتعاقب عليها. ربي جوايا إن اللي عنده مشاعر ما حدش عايزه. أنت فلتت منه عشان كان فاضيلي. يبخ جوايا سمه لما خلاني حاجة تعر. والنصيبة إنه عارفني وعارف إني حبيتها. ما يجي يقلي يقلي انت بتموت عليها وتغير عليها. لا إزاي لازم يكمل على أيان ويعيشه حسرة قلب. يا قاسم ووالنبي ما تمشوا. رجعوها لي. هموت. أنا بحبها والله بحبها. قولها يا قاسم رافضة تشوفني.

قولها هعملها اللي عايزاه بس تقعد."

ليهتف قاسم ساخراً: "بتحبها بعد إيه؟ بعد ما موتها؟ بعد ما حسستها بالرخص؟ هتعملها إيه قلي؟ هتديها فلوس؟ وإلا شركات؟ كارما ماتت وانت السبب. أنت اتربيت وشربت منه واتفرعنت. منقوع نجاسة عم عالكل وطافح زبالة. أسياد يجيبوا ويودوا ويتفقوا. اتفقت على بنت عمك اللي بتعشقك؟ اتفقت تتجوزها بفلوس وشركات؟ والله بطني قلبت أكتر ماهي مقلوبة. أنت مش حاسس بالقرف اللي انت فيه."

ليهتف أيان: "لا حاسس وقلبي بيمزعني يا قاسم. أنا اتربيت غلط. رجعها لي. هيا بتسمع كلامك." ليضحك: "أرجعها لك؟ أرجعلك مين؟ هيا فين أصلاً؟ روح الله يسهلكو روح. عموما روح جرب تكلمها، بس مانصحكش عشان هتشوف وش هيوجعك قوي إنك وصلتها لكده. روح. أو أقولك روح لبدر الحديدي، قله يرجعهالك. مش هو اللي وحلك الوحلة دي؟

روح، خليه يخططلك. جرب مثلا تحبسها، أو تهددها. جرب أي حاجة، خلي الحديدي يرجعها لك. ما طرقه النجسة كتير. مضيها عافية مثلا، أو احبسها. آه، ماهو بيعرف يحبس ويخرج، واتشرط. وبعدها لما تنفذ وتاخدها، قاعدها زي الكلبه تعيش معاك. انت آخرتك كلبه تعيش معاك من غير قلب. يا حسرة عالرجالة ليتركه. ليقف أيام محصوراً. ليصرخ: "يعني إيه البت راحت؟ قلبي بيوجعني. أعمل إيه؟ ماكنتش عارف إني بحبها كده. أروح فين؟

منك لله يا جدي، ادي تربيتك الزبالة." ليجهش بالبكاء. دخل قاسم المكتب مقهوراً. ليشعر بهم السنين، فكل هذا فوق طاقته. ليضع يده على قلبه وينهار بالبكاء. ليمد يده لجيبه ويخرج خصلتها. "حبيبي وحشني، هموت عليه. حبيبي موجوع وبعيد عني. يا ترى بتكرهيني قد إيه؟ وحشتيني يا قلب قاسم." ليصدح تليفونه برسالة. ليفتحها، ليبهت، فهي من حبيبته. ليفتحها ليهوي قلبه وتسيل دموع. وكلما سمع يشهق بالدموع، ويقف يمسك قلبه يئن وجعاً.

"ماتت حبيبته على إيدي. مات نبض قلبي." ليهمس: "حبيبي، أنت ليال؟ ليال ما بتتكلمش كده. مين دي؟ أنت قلبي. قلبي مات جواه. كل حاجة أعيش إيه وأفرح إيه؟ ده أنا دنيتي اسود. اتجوز؟ بتقوليلي اتجوز؟ وأنا ما أشوفش صنف ست من غيرك. متي يا قلبي؟ واتخلق مكانك واحدة ماشية جثة ما بتحسش. شايلالي إني علمتك. علمتك إيه؟ الهم والقهر. علمتك إن مافيش حب في الدنيا. علمتك إن الوساخة سارحة وطايحة. أقول إيه يا وجع قلبي؟

منك لله يا جدي. أروح فين بوجعي؟ أروح فين يا عالم؟ حبيبي مات وبيقولي ادعيلها بالرحمة. حبيبي اتاخد عزاه بقتلي. ليها مزقت قلبها يا ابن نعيم." ليهب ويصرخ: "مش أنا، مش أنا. ده الجاحد اللي ما هيورد على جنة." ليقوم ويكسر في المكان. ليدخل عليه المحامي وبدر بجبروته. "إيه القرف ده؟ أنت قاعد تنح زي النسوان؟ ماكنتش حتة بت خدت غرضك منها." لينظر إليه قاسم بغل رهيب. أراد أن يقتله ولكنه لم يستطع. ليهتف قاسم: "هو أنت ما بتحسش خالص؟

ما بتصعبش عليك؟ قلبك ده حجر صوان؟ ما يعديش عليه رحمة ربنا؟ طب مش حاسس بتمزيقتي ليه؟ فاكرنا إيه؟ حجارة زيك؟ ليهتف الجد بقوة: "انح يا ابن نعيم على حتة بت اتاخدت بالعُرفي. انح بس اعمل حسابك تنح وتخلص وتقفل القصة دي. أنت لسه صغير، ما دخلتش دنيتنا لسه. ابن نعيم الحديدي ما يبقاش ضعيف وينضحك عليه." ليصرخ قاسم: "أنا اتضحك؟ مش عليا. أنا حبيت يا قادر." ليهتف: "وماله؟

أهو هبل ولعب عيال. بكرة تكبر. ابن نعيم الحديدي لازم يبقى زي أبوه وجده. مالوش قلب. دنيتنا ما فيش فيها قلوب. دنيتنا دنيا السلطان والنفوذ. ما حدش بيرحم حد. هتعيش طيب هتتاكل. تتركب وتتفعص في الرجلين. دور على مصلحتك ومصلحة عيلتك. بدر الحديدي عامل إمبراطورية مالهاش مكان للضعف. ومش هسبب مكان للضعف. لو فاكر إني أهبل ولا ما أعرفش، أنت إيه؟

تبقي فعلاً أهبل. أنا عارفك ولازم أعلمك. وأول تعليمة إنك تموت قلبك. عشان مصلحتك. دنيتنا مش دنيا قلوب. أوعي لحالك يا ابن نعيم، لأنك منين ما تكون هكون قدامك لحد ما تكبر. وإياك، إياك تفكر ترجعها أو ترجع لها. هتلاقي نابي أزرق وانغرز فيها. ساعتها ماتلومش إلا نفسك. عنيا عليك ومراقباك. والنفس عارف النفس. هراقبه. تسافر وعليك حراسة وناس ومراقبة لحد ما ننسى القرف وتكبر. ساعتها هتعرف إني كنت صح. تفكر بهبل وترجع فادية وبنتها، هيتعفنوا في السجن. قاسم الحديدي، شكلي وشكل نعيم أخوك عرف القصة من الأول، وأنت لازم تعرفها."

ليصرخ جهة قاسم: "مبسوط بينا أنت صح؟ واحد كلب فلوس وحرق قلب حبيبته. وأنا عايزني أبقى كلب فلوس وخلتني أحرق قلب حبيبتي." ليهتف بدر: "أي حاجة تهون بس تكبر." لينظر إليه قاسم ويتجلد، وتتوحش عيونه.

"حاضر يا جدي، هكبر يا جدي. عهد عليا لأكبر وأكبر. خدها عهد وافتكر الليلة دي ليلة حرقة قلبي. خدها عهد وافتكر إن ابن نعيم هيكبر وهيعدي ويكبش من دنيتك. ابن نعيم هيبقى جاحد وحش ما حدش يهوب له. ابن نعيم هيبقى سيد عن حق. مش عايزني أخش دنيا الأسياد؟ حاضر يا جدي، بس ما ترجعش ساعتها تزعل وتقول ده واحد من غير قلب وما يتعاشرش. افرح بخلف خلفك يا جدي. افرح لأني ناوي أفرحك وعهد عليا لأتم فرحتي يوم من الأيام. خلصت كده يا جدي؟

قاسم خلاص. القديم قيامته قامت ومات. قاسم مات يوم ما نزع قلب حبيبه وموته. قاسم مات واتأخد عزاه زي ما حبيبه قله. قاسم راح من دنيا كان بيتمناها ودخل دنيا ما طلبهاش، بس ربنا كتب عليه يدخلها بالوجع. قاسم يا جدي جنازته اتأخدت بالغالي، بس يا خسارة، هو كان غالي ونفسه يكمل غالي، بس حبيبه عرف إنه رخيص وبقت جنازة حارة والميت كلب يا جدي. قاسم ما حصلش يبقى كلب حتى بسببك. الكلب عمره ما يخون ويسيب قلب حبيبه يتوجع. الكلب وفي واحنا ما حصلناش الكلاب. إحنا تعابين وهنعيش تعابين. ومن هنا ورايح اعرف وانبسط إني قابل أبقى تعبان يا جدي. هكبر وأكبر، بس ساعة ما أحب...

لدعتي والقبر." ليقترب من المحامي. "فين السلسلة اللي أدتهالك؟ ليخرجها المحامي ويعطيها له. ليهتف: "عيوني يا جدي. قاسم هيكبر لك، بس ساعتها ما تزعلش." ليتركه وجده يقف مبهوتاً من تحول قام الذي يتسم بالطيبه لذلك الجاحد الذي يتوعد أن يكون شيئاً مخيفاً. فبدر الحديدي طلب تلك الدنيا وسيعطي يوماً سيعض أنامل الندم على ما طلبه وسعى إليه.