رواية كيان الفصل الثالث 3 - بقلم اسماعيل موسى

فجأة كوكى توقفت عن الكلام وبصت ناحية الباب. ظلت ناظرة على ثقب الباب كأنها تراني. بعد كده كوكى طلعت على السرير وشدت الغطاء عليها إلى منتصفها. أغمضت عينيها والنور انطفأ. جسمي اتنفض. رعشة قوية سرحت على عمودي الفقري. إزاي النور انطفى في غرفة كوكى؟ فتحت الباب بسرعة وولعت النور. "كوكى، كوكى، إنتي نايمة؟ كوكى ما ردتش عليا. "أنا عارف إنك صاحية يا كوكى! كوكى بصوت ضعيف: "أنا زعلانة منك." طلعت على السرير ونمت جنب كوكى.

كنت خايف الصراحة. خدتها في حضني. "زعلانة ليه يا كوكى؟ كوكى بصوت نعسان: "عشان أنت عايز تتخلص من صديقتي." "صديقتك مين يا كوكى؟ "يوه تاني؟ صديقتي اللي على قطعة المعدن." "هنتخلص منها إزاي بقى يا ست كوكى؟ قالت كوكى بصوت واهن: "زعلان، مش أنت عايز تبيعها؟ جسمي وقف من الصدمة والخوف. "مين قالك كده يا كوكى؟ "صاحبتي قالتلي وكانت زعلانة، إنت ليه عايز تتخلص منها؟ "على فكرة هي حذرتني وقالت إن بعدها عني فيه خطر عليا."

كان لازم آخدها على قد عقلها. سألتها: "خطر إزاي؟ خطر عليا أنا يعني؟ كوكى قالت: "لأ، أنت مش فاهم حاجة، خطر عليا أنا. صديقتي قالت لو أخوكي باع العملة مش هيشوفك تاني، ولو كان بيحبك متخليهوش يبيعني عشان مصلحتك." كوكى متعرفش إني هبيع العملة. أنا ما اتكلمتش قدامها ولا قدام أي شخص. حضنتها أوي. "متخفيش يا روحي، محدش يقدر يعملك حاجة." كوكى بصت عليا. "اسكت يا سمسم، إنت مش عارف حاجة."

"لو كنت بتحبني متتخلاش عن العملة، خليها معانا هنا في البيت، أنا مش عايزة أموت يا سمسم." اتلخبطت. الكلام اللي بتقوله كوكى أكبر من سنها. كلام حزين خلى قلبي ينقبض. لساني ما كانش عارف يقول إيه. من أول النور ما قطع لحد الكلام المرعب اللي بتقوله كوكى خلاني مش على بعضي. "إنت عارف إني بحبك يا كوكى وعمري ما هسمح لأي حاجة تزعلك أو تعملك حاجة." كوكى أدتني ضهرها.

"لو بتحبني وخايف عليا ارجوك اديني العملة، تخلى عن أفكارك بالتخلص منها وسيبها معايا." "والله هي مش مؤذية، الطفلة دي اتعذبت كتير أوي ومش عايزاني أتعذب زيها."