رواية كيندرا الفصل الرابع والعشرون 24 - بقلم حليمة عدادي

الدكتور: الحمدلله الورم طلع حميد. يوسف بفرحة: الحمدلله يارب. بس يادكتور يعني إزاي إنتوا بدأتوا العلاج قبل ماتعرفوا نتيجة العينة؟ الدكتور: عملنا عينة في الأول وطلع خبيث علشان كدا بدأنا العلاج. واستغربنا ليه شعرها وقع في بداية العلاج. فلما رجعت علشان أتأكد من العينة اكتشفت إن العينة دي لحد تاني. مش العينة بتاعت كيندرا. علشان كدا عملنا واحدة تانية وطلع الورم حميد. الجاد: طيب هتعمل العملية إمتى يادكتور؟

إنت قلت بعد أسبوع. الدكتور: الورم الحميد مش محتاج علاج كتير. لأن ممكن استئصاله. وسرعة نمو الأورام الحميدة بتكون بالعادة بطيئة أوي ومش بتنتقل لعضو تاني. جاد بفرحة: هتعمل العملية وهتبقى كويسة صح كدا؟ الدكتور: هتاخد كام جلسة علاج الأول وبعدها العملية بإذن الله. جاد: الجلسات صعبة أوي. هتستحملها إزاي؟ يوسف: إن شاءالله كل حاجة هتعدي. جاد: أنا هروحلها دلوقتي. أكيد هتكون فاقت.

يوسف: ماتسيبهاش لوحدها. هروح علشان أشوف ماما لأنها تعبانة. جاد: ماتقلقش. أنا هبات معاها الليلة دي كمان. روح إنت علشان ترتاح. *** خرج يوسف من المستشفى. أما جاد راح لأقرب مطعم جاب شوية أكل. فتح الباب واتصدم لما لاقاها حاضنة نفسها وبتبكي. حط الأكل وجري عليها. ضمها لحضنه. اتمسكت بيه بقوة. جاد: حبيبتي اهدي. في حاجة وجعاكي؟ أكلم الدكتور. كيندرا ببكاء: حلمت إني بعد العلاج شعري وقع كله وشكلي مابقاش حلو. وإنت روحت وسبتني.

وكملت ببكاء وشهقات عالية: جاد إنت هتسيبني لما شعري يقع؟ شوفوا هو لسه حلو. جاد: ششش اهدي ياحبيبتي. أنا مش هسيبك خالص. مافيش أي حاجة ممكن تبعدني عنك. إنتي روحي ياكيندرا. مافيش حد يقدر يسيب روحه. بصتله والدموع في عينيها. كيندرا: أنا بحبك ياجاد. متسبنيش مرة تانية. أنا هموت لو إنت بعدت عني. جاد مسح دموعها وباس خدودها بحب. جاد: يلا بقى خفي. أنا عايز اتجوز. أنا عجزت. عايز يبقى عندي ولاد.

كيندرا: ولو متعالجتش هتفضل مستنيني طول عمرك؟ طيب لو مقدرتش أخلفلك الولاد اللي إنت عايزهم. جاد: كيندرا إنتي بتقولي إيه؟ إنتي هتبقي بخير وتخلفيلي ولاد جميلة. ودلوقتي أنا عندي أجمل بنوتة في الدنيا كلها ودا مكفيني. كيندرا: هو إنت بقى عندك بنت؟ إنت متجوز ياخاين. جاد: ههههههه. هو في بنت غيرك في حياتي؟ إنتي بنوتي ومراتي وحبيبتي. حضنها بكل حب. لما شاف ابتسامتها كأنه ملك الدنيا باللي فيها.

كيندرا: رغم الألم اللي بحس بيه. لكن لما بشوفك بنسى كل ألمي. جاد: اااه الأكل برد. أنا نسيت الأكل. جاب الأكل وقعد قدامها وبدأ يأكلها بإيده بكل حب وهو شايف ابتسامتها. جاد: عارفه ابتسامتك دي بتخليني أنسى كل حاجة. كيندرا: إنت أجمل حاجة حصلت لي في حياتي. رغم تعبي. لكن لما بشوفك بحس إن بقالي سند. جاد: أنا هكون دايما سندك. ودلوقتي لازم تنامي. لأن بكرة عندك جلسة علاج. كيندرا بحزن: إمتى بقى الألم دا ينتهي؟ أنا تعبت.

جاد: كيندرا إنتي مؤمنة بقضاء الله. قولي الحمدلله. إن شاءالله كله هيعدي. كيندرا: إنت هتروح فين دلوقتي؟ وكملت بغيرة: ولا عايز تروح علشان تشوف سارة. جاد: هههههه. كيندرا: إنت بتضحك ليه؟ يعني كلامي صح؟ خلاص روحلها ومتجيش هنا تاني. جاد: إنتي متأكدة عايزاني أروحلها؟ كيندرا: روح. مش عايزة أشوفك. قعد جنبها وضمها لحضنه. جاد: عينيا مش شايفة غيرك ياكيندرا. أنا هنام هنا معاك. يلا نامي. هتنامي في حضني. بصتله بخجل وهي مبتسمة.

جاد: مالك. دا مجرد حضن. حضنها جاد وناموا. جاد فاق بالليل مفزوع لما سمع صوتها بتئن. بصلها شافها حاطة إيديها على بوقها ودموعها نازلة بغزارة. جاد بفزع: حبيبتي مالك؟ إيه اللي واجعك؟ لما ملاقاش منها رد ضمها لحضنه. جاد: ليه حاطة إيديك على بوقك؟ إنتي مش عايزاني أسمع عياطك. كيندرا بدموع: أنا بتألم أوي. ومكنتش عايزة أزعجك بصوت عياطي. جاد: كدا أنا هزعل منك ياكيندرا. لازم تفهمي إن ألمنا واحد. وحزننا واحد.

كيندرا: وإنت ذنبك إيه إنك تبقى من غير نوم بسببي. حط إيده على بوقها. جاد: ذنبي إني بحبك. ذنبي إنك روحي. في حد يقدر يعيش من غير روحه؟ تعالي لحضني. ضمها لحضنه ومسح دموعها. كيندرا: إنت اللي بتصبرني على الألم ياجاد. جاد: حبيبتي أنا معاكي لحد ماتبقي كويسة. بلاش تخبي ألمك عليا مرة تانية. كيندرا هزت رأسها بالموافقة. *** عدى أسبوع وكيندرا متابعة الجلسات. بقى جسمها هزيل وشعرها وقع. كيندرا بدموع: بصي يارنا شعري وقع إزاي؟

فين جمالي؟ بصي بقيت عاملة إزاي؟ جاد مش هيعجبه شكلي دلوقتي وهيكرهني. رنا: جاد بيحبك و مستحيل يسيبك أو يتخلى عنك ياكيندرا. إنتي كل حياته. كيندرا: إنتي بتتكلمي جد يارنا؟ جاد مش يكره شكلي. رنا: جاد حب جمال قلبك وروحك. الحب مش بجمال الوش. الحب الحقيقي بجمال الروح. كيندرا: أنا بحاول بكل قوتي. لكن القوة اللي بتخليني أستحمل كل دا هو وجود جاد. جني: دخل جاد وباقي العيلة وراه. جاد: حبيبة قلبي الجميلة. عاملة إيه دلوقتي؟

قعد جنبها وباس راسها. كيندرا بخجل من نظرات الجميع لها: بخير الحمد لله. خالد: إنتي حاسة بإيه دلوقتي ياقلبي. كيندرا: حاسة إني مبسوطة أوي لأني شايفه كل اللي بحبهم حواليا. يوسف بهزار: قصدك باللي بتحبيهم إحنا كلنا ولا حد معين. كيندرا: أنا قصدي الكل يايوسف. بصت لجاد بكل حب. وأكتر واحد استحملني في تعبي هو جاد. مش هنسى أبداً وقفته جنبي. جاد: كيندرا كل حاجة عملتها كان علشاننا إحنا الإثنين. إنتي مراتي وكل حاجة ليا.

يوسف: حبيبتي النهاردة هتعملي العملية. لازم تكوني مستعدة ونفسيتك كويسة. زينب بدموع: أنا بنتي قوية وهتطلع من العملية بسلام. كيندرا: بعد إذنكم. ممكن تسيبوني مع جاد شوية. يوسف: حبيبتي إنتي بخير. كيندرا: أيوه. أنا بخير يايوسف. ماتقلقوش. وكمان مستعدة للعملية. لكن عايزة أبقى مع جاد لحد معاد العملية. يوسف: تمام ياحبيبتي. يلا بينا نخرجك. قعد جاد جنبها. مسكت وشه بين إيديها.

كيندرا: جاد بصلي. لو حصلي حاجة ماتوقفش حياتك. اتجوز وعيش حياتك. جاد: كيندرا إزاي تطلبي مني الطلب دا؟ إنتي حياتي. فاهمه؟ إنتي هتخرجي من العملية بخير. يإما نعيش سوى. أو نموت سوى. أنا من غيرك عايش. كيندرا: جاد نسبة نجاح العملية 20%. يعني مش مضمون إني أطلع منها. جاد: كيندرا مافيش حاجة اسمها مش مضمونة. ربنا قادر على كل شيء. كيندرا: جاد أنا بحبك أوي. إنت أول وآخر حب في حياتي. حضنته بقوة وهي حاسة إن دا آخر حضن ليها.

جاد: كوني قوية. أنا مش هقدر أعيش من غيرك. حبيبتي اطمني. هتكوني بخير. كيندرا: جاد احضني. أنا محتاجة لحضنك أوي. جاد ضمها لحضنه بقوة. حست إن ضلوعها هتتكسر. وقلبه كان بيبكي دم. الباب خبط. ودخل الدكتور ومعاه سرير المرضى. جاد شالها بين إيديه وحطها على السرير. مسك ايدها وخرجوا بيها من الأوضة. يوسف: هتخدوها على فين يادكتور. الدكتور: لغرفة العمليات. كيندرا: خلوا بالكم من بعض. وابقوا دايماً مع بعض. وبلاش تزعلوا بعض.

الدكتور: هندخلها دلوقتي علشان نبدأ العملية. جاد: بلاش الحزن اللي في عينيك دا. إن شاءالله هتكوني بخير. دخلوها غرفة العمليات. قعد جاد على الأرض. كان بيحاول يكون قوي قدامها. ومحدش عارف إن قلبه بينزف من خوفه عليها. نزلت دمعة حارقة من عينيه. يوسف بدموع: جاد اهدى. إن شاءالله هتكون بخير. *** الساعات بتعدي كأنها شهور. خيم الحزن على الجميع. كل واحد فيهم دموعه هي اللي بتعبر عن اللي جواه.

قعد جاد في زاوية بعيدة. وسمح لدموعه بالنزول. الخوف أكل قلبه. هو عارف إن نسبة نجاح العملية قليل أوي وصعب إنها تنجح. لكن هو مش هيستحمل إن يحصلها حاجة. *** بعد ست ساعات خرج الدكتور من غرفة العمليات. الكل جري عليه. إلا جاد. كان حاسس إنه مابقاش عنده طاقة علشان يتحمل يسمع خبر وحش. خالد بلهفة: ها طمنا يادكتور. هي كويسة؟ العملية نجحت مش كدا؟ اتكلم يادكتور. الدكتور: قلبها وقف.