رواية لعالم تاني الفصل الأول 1 - بقلم سلسبيل أحمد

كنت ماشي بليل وفجأه لقيت حاجة 150 سنتي ماسكة في آخر الجاكيت بتاعي. بصيت لتحت عشان أشوفها. –في إيه! انتي مين؟ = انت مروح؟ –الساعة 12 بليل، أكيد مروح. انتي بتعملي إيه هنا في وقت زي ده!!!؟ = أنا جميلة و.. أنا تايهة. –تايهة إيه دلوقتي! = هو بيبقى في معاد للتوهان؟ بصتلها بتعجب: طيب أقدر أساعدك؟ = خدني معاك عشان خايفة مش عارفة أروح فين.. رديت بدهشة واستغراب: آخدك معايا! آخدك فين؟ = خدني بيتك، مش انت مروح بيتك؟

–انتي شكلك ابن ناس؟ انتي كويسة ولا في إيه؟ = يعني إيه؟ مانا مينفعش أقعد في الشارع صح؟ الشارع مش حلو، لازم أروح بيت. –انتي شكلك كأنك أول مرة تنزلي الشارع في حياتك. تفاجئت: انت عرفت منين إني أول مرة أنزل الشارع! انت ساحر ولا.. انت تبع الأشرار؟ = أشرار مين؟ انتي بتقولي إيه؟ = أنا خلاص هشوف حد تاني ياخدني، روح انت. وقفت قدامها بسرعة ومسكت طرف الجاكيت بتاعها عشان تقف: اهدي اهدي واستنى، هو انتي هتروحي مع أي حد وخلاص!

رفعت كتفها ببراءة: أيوه، أنا خايفة وهخاف وأنا هنا لوحدي، لازم حد يساعدني. –طب تعالي معايا لما أشوف هقدر أرجعك مكانك إزاي أو أساعدك بإيه. مسكت في آخر الجاكيت بتاعي تاني ورفعت راسها وبصتلي: عشان متوهش مني. ابتسمت باستغراب: مش هروح في حتة، متخافيش. هاتي إيدك. مدت إيديها ليا، لاحظت إنها صغيرة أوي مقارنة بإيدي ومسكتها زي الطفلة ومشينا. ************************************** –ادخلي تعالي، متخافيش.

= هو انت لوحدك في البيت ده، دا كبير أوي! ضحك: مش لوحدي، لا معايا شغالين. وقاطعته واحدة وهي بتبص لجميلة: زين مين دي؟