رواية لاجل الحب الفصل الأول 1 - بقلم منال كريم

كنت واقفة قدام جوزي وبقول بكل قوة الجملة اللي هزت كيانه، ومش بس كده، أنا قلتها قدام البلد كلها. كان عامل ليلة كبيرة بمناسبة أنه خلف بعد سنين، وجيت أنا قدام الكل وقولت كده. الناس بدأت تبص لبعض بذهول، ودول صعيدة إزاي أقول كده وأخرج وسط الرجالة، وكمان أطلع على المسرح وأقول كده. كان ماشي في طريقي ليا وقال بعصبية: بتقولي إيه، انتي مجنونة، انزلي من عندك بدل ما أجيبك من شعرك.

بصيت بابتسامة وقولت: أوعى تفكر تقرب خطوة كمان، شايف البودي جارد دول عندهم أوامر لو حد فكر يمس شعرة مني يخلصوا عليه. وقف مكانه وصرخ بجنون: طيب انزلي يا نغم، خلينا نكلم براحة. ابتسمت بسخرية وقولت: خلص الكلام، اللي عندي قولته، الولد مش ابنك، خد التقيلة، مش أنا اللي مش بخلف، انت اللي عقيم. عارف يعني إيه عقيم؟ بس تصدق أنا شايفة إن مخك عقيم. قال حمي العزيز: بت قليلة أدب بصحيح، مش هي دي اختيارك، جابت لنا العار.

قولت بابتسامة: كان نفسي أسمع كلامك الجميل، بس مش طايقة أسمع صوت حد فيكم. اسمع يا سولي، أنت اللي مش بتخلف، وأنا عشان بحبك وخفت على مشاعرك قولت إن أنا اللي مش بخلف. بس طلعت واطي وخسيس، وقلت أتجوز عشان أخلف، وروحت اتجوزت واحدة، استغفر الله العظيم، كل شوية مع واحد شكلك. ولما عرفت إنها حامل قولت اللعبة أحلوت أوي، مبروك عليك ابنك اللي مش ابنك. قال أخوه بدافع عن شرف العيلة: حتى لو كلامك صح، ممكن يكون اتعالج.

قولت بهدوء: طبعًا ممكن، عشان كده أنا عملت تحليل ليه أول ما عرفت إن السنيورة حامل، وطلعت إن عمرك ما تكون أب. وكمان زيادة تأكيد عملت تحليل DNA عشان أعرف ابنك ولا لأ. بصيت في عينه بقوة وشماتة وقولت: الولد مش ابنك، ابن حرام يا سولي. ومدت إيدي بتحاليل لواحد من البودي جارد وصولها لسليم. وجيت أنزل بس رجعت

ومسكت المايك تاني وقولت: شوفت كنت أنسى، بقولك يا سولي، قضية الخلع كانت النهاردة، وطبعًا أنت ما رحتش ولا بعت محامي، فأنا كسبت القضية وبقيت أنت مخلوع. وضحكت بصوت عالي. كان مذهول وهو حاسس إنه في دوامة، وعنده حق برضو، اللي عملته أنا مش شوية، بس أنا حاولت أكون طيبة معاه. سأل بعدم فهم: قضية.

قولت: أنا رفعت قضية خلع، بس طبعًا بعت المحضر على بيتك القديم اللي في القاهرة، ومجبتش سيرة إنك عايش في الصعيد حاليًا، وكسبت القضية يا سولي، مبروك عليك ابنك يا مخلوع. الكل كان بيبص لي بذهول ومحدش مصدق إني ممكن أعمل كده، بس محدش فيهم عارف أنا عشت إيه. فجأة طلع المسدس من جيبه وقال بجنون: أقتلك يا نغم، أقتلك على الفضيحة دي.