رواية لهيب عشقه الفصل السادس 6 - بقلم سلمى تامر

قوليلي إيه شعورك وإنتي عايشة في حضن اللي قتل أخوكي؟ سمعتها بيسان من شهد بصدمة وعدم استيعاب للي بتقوله، وهزت دماغها بنفي. مستحيل... الكلام اللي بتقوليه ده أكيد ما حصلش. زياد مات في حادثة، يونس ملوش علاقة بموته. إنتِ إزاي جواكي كمية الغل والشر دي؟ ليه بتكرهي أخوكي بالطريقة دي وعايزة تدمريله حياته؟ شهد مسحت دموعها وكملت كلامها بغل. أنا بكرهه أكتر ما إنتِ تتخيلي بكتير. عارفة ليه يا بيسان؟

عشان جوزك ده أكتر بني آدم مؤذي في الحياة ومصيرك تعرفي في يوم من الأيام. وهو السبب في موت زياد واتفق مع حد من رجّالته يلعبوا في فرامل العربية عشان تتقلب بيه. واتجوزك عشان حس بتأنيب الضمير لما بقيتي وحيدة من بعده. لكن أنا مش هعدي ده بالساهل وهيُعاقب على اللي عمله بطريقتي. مش مصدقاني صح؟ طلعت تليفونها وفتحت تسجيل لصوت يونس وهو بيقول: مش هتتجوزي البني آدم ده يا شهد، ريحي نفسك. إنتِ متعرفيش هو مقرف إزاي.

دي حياتي وأنا حرة فيها، واتجوز اللي أنا عايزاه. لا، إنتِ مش حرة فيها! ولو الواد ده مابعدش عنك أنا هبعده بطريقتي. قفلت شهد التسجيل وبصت في عيون بيسان بقوة. سمعتي؟ ونفذ تهديده فعلاً وعمل كده لمجرد إن زياد مش عاجبه. بيسان سابتها وطلعت من أوضتها وجريت على تحت، وراحت ليونس ووقفت قدامه بجمود. بصلها باستغراب واتكلم بتساؤل: إيه اللي نزلك من أوضتك؟ مش قولت...

قاطعته بدموع وقررت إنها تواجهه ومتغلطش غلطة المرة اللي فاتت وإنها هربت من غير ما تسمع حاجة منه. يونس، شهد بتقول إن ليك علاقة بموت أخويا وسمعتني تسجيل بصوتك. لمحته اتحولت للاستغراب، وسحبها من إيديها ووقفوا في حتة هادية. شهد قالتلك كده؟ آه، ومش بس كده. شهد أختك هي اللي قالتلي قبل كده إنك عايز تسقطني. اتصدم هو كمان من كلامها، ونهى الحفلة وطلع لأوضة شهد ووقف قدامها بغضب وحزن.

عمري ما كنت أتخيل إنك تطلعي بالبشاعة دي يا شهد، وتتهمني بحاجة زي كده وتكوني عايزة تخربي بيتي. وكل ده عشان زياد صح؟ طب أنا هقولك بقا حقيقته كاملة واسمعيها. زياد كان بيخونك مع بنات كتير وكان عايز يتجوزك عشان فلوسك. ولو مش مصدقاني أنا معايا صور ليه بفضايحه كلها، بس مكنتش حابب أجرح مشاعرك. زياد مستحيل يعمل كده. قالتها بيسان بحدة. بصلها وابتسم بسخرية، وراح أوضته جاب كل الدلايل على كلامه وحطهم قدامهم الاتنين.

اتفضلوا. رغم إني مكنتش عايز أعمل كده، بس لازم تعرفوا الحقيقة كاملة. أنا شايف يا شهد إنك تسافري تعيشي مع أمك اللي كانت بتزرع فيكي من وإنتي صغيرة كره ليا، وطول عمرك بتظني فيا الشر بسببها وبسبب كلامها. وأعتقد إن كفاية لحد هنا، لأنك كنتي هتدمريلي حياتي. وطول عمرك بتكرهيني لمجرد إننا أخوات من الأب بس ومش من نفس الأم. سابهم ومشى من قدامهم. وبيسا بصت لشهد بلوم وضيق، ومشيت بسرعة ورا يونس عشان تلحقه.

وبدأت شهد تلم حاجتها وقربت إنها تسافر وتنسحب من حياته. يونس... استنى يايونس عشان خاطري متسبنيش كده. وقف وبصلها بجمود. أنا قرفت من كل الاتهامات اللي بتتوجهلي دي من غير ما أعمل حاجة يا بيسان. بيسان قربت منه بدموع. بس أنا مش ذنبي حاجة، اختك هي السبب. عارف... بس مكنتش متوقع إن تكون ثقتك فيا منعدمة للدرجادي، وده اللي صدمني. وشايف إننا خلاص مبقاش ينفع نكمل. بعدت عنه بصدمة ودموع. يعني إيه! هتطلقني؟

للدرجادي أنا مش فارقة معاك وهتنهي علاقتنا بالسهولة دي؟ بعد عن عينيها من عليها ومشى خطوتين بعيد عنها، لكن رجع تاني بسرعة لما سمع صوت صراخها من بطنها. مالك يا بيسان؟ فيه إيه؟ إنتِ كويسة؟ وقفت بابتسامة خبيثة. مالك؟ خوفت عليا أوي كده ليه ووشك اتخطف؟ نفخ بضيق وتوتر. مش قولتلك ميت ألف مرة بلاش الهزار في الحاجات دي. هو أنا مهمة عندك يايونس وبتقلق عليا؟ سكت شوية وبعد كده اتنهد ومسكها من كتافها.

عارف إني مش بقول كلام حب كتير كل شوية، وإنك فهمتي من كده إني مش بحبك. بس أقسم بالله يا بيسان إنتِ الوحيدة اللي قلبي دق عشانها. وأهم عندي من أي حاجة في الدنيا. أنا مبعرفش أقول كلام كتير، بس بحاول أثبتلك ده بأفعالي. كانت بتسمع اعترافه ليها بسعادة وفرحة، ورمت نفسها في حضنه براحة إنه بيبادلها نفس شعورها. ابتسم على رد فعلها واتكلم بجدية. اوعديني يا بيسان إننا مش هندخل حد بينا تاني، وأي حاجة هتحصل لحد فينا هنقولها لبعض.

بعدت عنه واتكلمت بوعد. أوعدك يايونس، أنا عارفة إن اللي حصل ده كان يعتبر بسبب تسرعي، بس ده مش هيتكرر تاني وهيكون درس لينا يفيدنا في حياتنا الجاية. ابتسم بحب ليها واخدها تاني في حضنه. وحاول يصلح علاقته بشهد اللي كانت ندمانة جداً، وبعدها سافرت وبعدت عن حياتهم. وبقيت علاقتهم أقوى من الأول بكتير.